Oʻzbekiston Respublikasi Mehnat kodeksining 170-moddasiga va Soliq kodeksining 171-moddasiga muvofiq dala sharoitlaridagi ishlarda band boʻlgan xodimlarning mehnatini yanada ragʻbatlantirish va qoʻshimcha xarajatlarining oʻrnini qoplash maqsadida Vazirlar Mahkamasi qaror qiladi:

1. Dala sharoitlaridagi ishlarda band boʻlgan xodimlarga dala ustamasi toʻlash tartibi toʻgʻrisidagi Nizom ilovaga muvofiq tasdiqlansin.

2. Dala sharoitlaridagi ishlarda band boʻlgan xodimlarga mehnat haqi tumanlar boʻyicha tartibga solinadigan, shu jumladan noqulay tabiiy iqlim-sharoitlaridagi joylarda ishlaganlik uchun tuman koeffitsiyentlari boʻyicha toʻlovlar qonun hujjatlariga muvofiq amalga oshiriladi.

3. Vazirliklar va idoralar bir oy muddatda oʻz normativ-huquqiy hujjatlarini ushbu qarorga muvofiqlashtirsinlar.

4. Mazkur qarorning bajarilishini nazorat qilish Oʻzbekiston Respublikasi Bosh vazirining birinchi oʻrinbosari R.S.Azimov zimmasiga yuklansin.

1. Ushbu Nizom dala sharoitlarida geologiya-qidiruv, topografiya-geodeziya, loyiha-izlanish, ilmiy-tadqiqot ishlarini hamda boshqa ishlarni bajaradigan tashkilotlar (korxonalar) xodimlariga dala ustamasi toʻlashning umumiy tartibini va miqdorlarini belgilaydi.

2. Xodimlarga dala ustamasi ishlovchilarning vaqtincha noqulay mehnat va maishiy sharoitlar sababli dala sharoitlaridagi ishlarni bajarish, shuningdek ishlab chiqarish obyektlarining aholi punktlaridan tashqarida joylashganligi bilan bogʻliq ortiqcha xarajatlarning oʻrnini qoplash maqsadida toʻlanadi.

3. Quyidagi xodimlar dala ustamasi olish huquqiga ega:

a) dala sharoitlarida ishlovchilar va dala ishlari amalga oshirilayotgan joylarda yashovchilar;

b) ushbu Nizomning 1-bandida koʻrsatilgan geologiya-qidiruv, topografiya-geodeziya, loyiha-izlanish va boshqa tashkilotlar (korxonalar)ga bevosita ularning bazaviy dala shaharchalarida xizmat koʻrsatish uchun maxsus tashkil etilgan maktablar, tibbiyot, madaniy-maʼrifiy, maktabgacha taʼlim muassasalari va boshqa yordamchi boʻlinmalar xodimlari.

4. Dala ustamasi xodimlarga, egallab turgan lavozimi va oylik maoshidan qatʼi nazar, dala ustamasi hisoblab yoziladigan sanada Oʻzbekiston Respublikasida belgilangan mehnatga haq toʻlashning eng kam miqdoriga nisbatan miqdorlarda (koeffitsiyentlarda), biroq har oyda mehnatga haq toʻlashning eng kam miqdorining 1,06 baravaridan ortiq boʻlmagan holda quyidagi miqdorlarda toʻlanadi:

a) kuniga 0,053 – dala sharoitlarida bevosita dala ishlari amalga oshiriladigan obyektlarda ishlaganda;

b) kuniga 0,011 – mazkur Nizomning 1-bandida koʻrsatilgan tashkilotlar (korxonalar)ning bazaviy dala shaharchalarida ishlaganda.

4¹. Arxeologik tadqiqotlar oʻtkazuvchi Oʻzbekiston Respublikasi Davlat budjeti mablagʻlari hisobiga moliyalashtiriladigan ilmiy tashkilotlarda dala ustamasi arxeologik ilmiy-tadqiqot ishlarini bajaradigan ilmiy xodimlarga, egallab turgan lavozimi va oylik maoshidan qatʼi nazar, dala ustamasi hisoblab yoziladigan sanada Oʻzbekiston Respublikasida belgilangan bazaviy hisoblash miqdoriga nisbatan (koeffitsiyentlarda), biroq har oyda bazaviy hisoblash miqdorining 2,3 baravaridan ortiq boʻlmagan quyidagi miqdorlarda haq toʻlanadi:

a) kuniga 0,08 — dala sharoitlarida bevosita dala ishlari amalga oshiriladigan obyektlarda ishlaganda;

b) kuniga 0,03 — bazaviy dala shaharchalarida ishlaganda.

4². Arxeologik tadqiqotlar oʻtkazuvchi Oʻzbekiston Respublikasi Davlat budjeti mablagʻlari hisobiga moliyalashtiriladigan ilmiy tashkilotlarda dala sharoitlarida mavsumiy yollanadigan “yer qazuvchi” ishchilarning ish haqi miqdori Oʻzbekiston Respublikasida belgilangan bazaviy hisoblash miqdoriga nisbatan (koeffitsiyentlarda), biroq har oyda bazaviy hisoblash miqdorining 2,6 baravaridan ortiq boʻlmagan quyidagi miqdorlarda haq toʻlanadi:

a) kuniga 0,12 — haftada 5 kun ishlaganda;

b) kuniga 0,1 — haftada 6 kun ishlaganda”.

5. Oʻz xodimlariga dala ustamasi toʻlash huquqiga ega boʻlgan tashkilotlar roʻyxati mansubligi boʻyicha vazirliklar va idoralar tomonidan, vazirliklar va idoralar tarkibiga kirmaydigan tashkilotlar (korxonalar) tomonidan esa – mustaqil ravishda (Mehnat va aholini ijtimoiy muhofaza qilish vazirligi bilan kelishgan holda) tasdiqlanadi.

6. Dala ishlariga yuborilayotgan xodimlarga dala ustamasi toʻlash tashkilot (korxona) boʻyicha tegishli buyruq bilan belgilanadi.

7. Dala ustamasi dala ishlari amalga oshirilayotgan joyda haqiqatda boʻlingan kalendar kunlar uchun toʻlanadi.

8. Ushbu Nizomning 4-bandida nazarda tutilgan miqdorlardagi dala ustamasi oʻrtacha oylik ish haqini hisoblashda hisobga olinmaydi va Soliq kodeksiga muvofiq xodimning daromadi sifatida hisoblanmaydi.

9. Dala ustamasi toʻlash xodim dala ishlari olib borilayotgan joyda yoki bazaviy dala shaharchasida boʻlgan quyidagi holatlarda saqlanib qoladi:

a) vaqtinchalik ishga layoqatsiz boʻlgan davrda;

b) davlat yoki jamoat vazifalarini bajarish vaqtida.

10. Dala ustamasi:

a) har kuni doimiy yashash joyiga qaytib kelish imkoniyatiga ega boʻlgan barcha toifadagi xodimlarga;

b) har yilgi mehnat taʼtilida boʻlingan vaqt uchun toʻlanmaydi.

11. Xodim xizmat safariga yuborilganda dala ustamasi toʻlash toʻxtatiladi. Bunday holatlarda xarajatlar oʻrnini qoplash xizmat safarlari toʻgʻrisidagi qonun hujjatlariga muvofiq amalga oshiriladi.

12. Tashkilotlar (korxonalar)ning jamoa shartnomalarida, jamoa kelishuvlarida va mehnat shartnomalarida dala ustamasi ushbu Nizomning 4-bandida belgilangan miqdorlardan ortiq miqdorda nazarda tutilishi mumkin, uni toʻlash budjetdan tashqari manbalar hisobiga amalga oshiriladi. Tashkilot (korxona)lar dala ustamasini oʻz mablagʻlari hisobidan toʻlaydilar.

13. Budjet tashkilotlari va budjet mablagʻlari oluvchilar tomonidan dala ustamasi toʻlash bilan bogʻliq xarajatlar tegishli xarajatlar smetalarida nazarda tutilgan mablagʻlar doirasida amalga oshiriladi.

14. Ushbu Nizomning 4-bandida nazarda tutilgan normalardan ortiq miqdorda toʻlanadigan dala ustamasi Oʻzbekiston Respublikasining Soliq kodeksiga muvofiq jismoniy shaxslarning daromadlari deb hisoblanadi va ulardan soliq olinadi.

15. Mazkur Nizom talablarining buzilishida aybdor boʻlgan shaxslar qonun hujjatlarida belgilangan tartibda javob beradilar.