“Qizilqumnodirmetalloltin” konserni hamda respublika kon-metallurgiya tarmogʻi korxonalarini yuqori malakali mutaxassislar bilan mustahkamlash, taʼlim dasturlarida vatanimiz hamda xorijiy konchilik va metallurgiya korxonalari tomonidan toʻplangan ilgʻor tajribadan keng koʻlamda foydalangan holda zamonaviy oʻqitish uslublarini joriy etish, taʼlim jarayonining ishlab chiqarish bilan aloqasini kuchaytirish asosida kadrlar tayyorlashni tashkil etish tizimini takomillashtirish maqsadida:

1. Navoiy davlat konchilik instituti oʻzining yuridik shaxs maqomi hamda budjetdan moliyalash manbalarini saqlab qolgan holda “Qizilqumnodirmetalloltin” konserni tarkibiga oʻtkazilsin.

2. Belgilab qoʻyilsinki, Navoiy davlat konchilik instituti “Qizilqumnodirmetalloltin” konserni korxonalari hamda respublika kon-metallurgiya tarmogʻi uchun yuqori malakali mutaxassislar, shuningdek konchilik va metallurgiya ixtisosidagi kasb kollejlari uchun muhandis-pedagog kadrlar tayyorlash boʻyicha bazaviy oliy taʼlim muassasasi hisoblanadi.

3. “Qizilqumnodirmetalloltin” konsernining pensiya yoshidagi yuqori malakali mutaxassislarini Navoiy davlat konchilik institutida oʻqituvchilik faoliyatiga jalb etishni ragʻbatlantirish uchun ularga toʻlanadigan pensiya miqdori toʻla hajmda saqlab qolinsin.

4. “Qizilqumnodirmetalloltin” konserniga oʻqishni tugatgach asosiy ishlab chiqarishlarda mutaxassisligi boʻyicha ishga keluvchi yosh mutaxassislarga korxonalar ixtiyorida qoladigan foyda hisobidan quyidagilarni berishga ruxsat etilsin:

beriladigan summani keyinchalik soliqqa tortiladigan daromadga qoʻshmagan holda bazaviy hisoblash miqdorining 20 baravar miqdorigacha yoʻl puli;

uy-joy sotib olish uchun 10 yil muddatga bazaviy hisoblash miqdorining 400 baravari miqdorida foizsiz ssuda. Yosh mutaxassis korxonada 5 yil ishlagandan keyin qolgan summa (koʻpi bilan 50 foizi korxona tomonidan toʻlanib, ssudaning shu qismi keyinchalik soliqqa tortiladigan daromadga qoʻshilmaydi.

Oʻzbekiston Respublikasi Moliya vazirligi, “Qizilqumnodirmetalloltin” konserni tegishli vazirliklar va idoralar bilan birgalikda uch oy muddatda oʻquv yurtlarini tamomlagandan keyin konsern korxonalariga ixtisosi boʻyicha ishga keluvchi yosh mutaxassislarga yoʻl puli v uy-joy sotib olish uchun foizsiz ssudalar berish tartibini ishlab chiqib, tasdiqlasinlar.

5. Oʻzbekiston Respublikasi Mudofaa vazirligi “Qizilqumnodirmetalloltin” konsernining asosli buyurtmanomalari boʻyicha yuqori malakali ishchilarni, mutaxassislarni hamda taʼlim muassasalarini bitiruvchilarni “Qizilqumnodirmetalloltin” konserni korxonalaridagi asosiy ishlab chiqarishda ishlab turgan davrda muddatli harbiy xizmatga chaqirish muddatini kechiktirsin, zarur hollarda esa muqobil xizmatni oʻtashga ruxsat bersin.

6. Vazirlar Mahkamasi bir hafta muddatda Navoiy davlat konchilik instituti faoliyatini tashkil qilish masalalari hamda “Qizilqumnodirmetalloltin” konserni korxonalarini yuqori malakali mutaxassislar bilan taʼminlash chora-tadbirlari yuzasidan qaror qabul qilsin.