Oʻzbekiston Respublikasining Fuqarolik kodeksiga muvofiq va tadbirkorlik subyektlari faoliyati uchun qulay shart-sharoitlarni yanada shakllantirish maqsadida Vazirlar Mahkamasi qaror qiladi:

1. Kompleks tadbirkorlik litsenziyasi (franshizing) shartnomalarini davlat roʻyxatidan oʻtkazish tartibi toʻgʻrisidagi nizom ilovaga muvofiq tasdiqlansin.

2. Oʻzbekiston Respublikasi Adliya vazirligi, Savdo-sanoat palatasi, Davlat patent idorasi manfaatdor vazirliklar va idoralar, Qoraqalpogʻiston Respublikasi Vazirlar Kengashi, viloyatlar va Toshkent shahar hokimliklari bilan birgalikda bir oy muddatda Tashkiliy tadbirlar rejasini tasdiqlasinlar. Rejada quyidagilar:

Kompleks tadbirkorlik litsenziyasi (franshizing) shartnomalarini davlat roʻyxatidan oʻtkazish tartibi toʻgʻrisidagi nizomning asosiy maqsadlari va mohiyatini hamda kompleks tadbirkorlik litsenziyasi (franshizing) shartnomalarini davlat roʻyxatidan oʻtkazish ishlarini tashkil etish mexanizmini tushuntirish;

respublika hududlarida franshizingni rivojlantirishning afzalliklari toʻgʻrisida tadbirkorlik subyektlari oʻrtasida davra suhbatlari tashkil etish;

ixtisoslashtirilgan seminarlar va treninglar oʻtkazish yoʻli bilan kompleks tadbirkorlik litsenziyasi (franshizing) shartnomalarini davlat roʻyxatidan oʻtkazishni taʼminlash uchun masʼul boʻlgan mutaxassislar malakasini tizimli oshirishni tashkil etish chora-tadbirlari nazarda tutilsin.

3. Oʻzbekiston Respublikasi Tashqi iqtisodiy aloqalar, investitsiyalar va savdo vazirligi, Tashqi ishlar vazirligi xoʻjalik boshqaruvi organlari bilan birgalikda tizimli asosda franshizingni yoʻlga qoʻyish, shuningdek milliy brendlarning chet elga chiqishida tadbirkorlik subyektlariga koʻmaklashish uchun xalqaro eʼtirof etilgan tashkilotlarni, eng avvalo, ishlab chiqarish tashkilotlarini va ularning brendlarini Oʻzbekiston Respublikasiga jalb etish ishlarini olib borsinlar.

4. Oʻzbekiston Respublikasi Savdo-sanoat palatasi va xoʻjalik boshqaruvi organlariga:

manfaatdor tashkilotlar va xalqaro donor institutlar bilan birgalikda yirik korxonalar bilan kichik biznes, xususiy tadbirkorlik subyektlari oʻrtasidagi kooperatsiyani kengaytirish maqsadida franshizingni tizimli oʻrganish va uning mexanizmini Savdo-sanoat palatasi aʼzolari va sheriklari orasida joriy etish;

Qoraqalpogʻiston Respublikasi Vazirlar Kengashi, viloyatlar, tumanlar va shaharlar hokimliklari bilan birgalikda franshizing mexanizmidan foydalangan holda muvaffaqiyatli korxonalarning tajribasini aniqlash va yoyish chora-tadbirlarini koʻrish;

Oʻzbekiston Respublikasi Savdo-sanoat palatasining saytida franshizing mexanizmini qoʻllash boʻyicha oʻquv-metodik va koʻrgazmali qoʻllanmalarni, sharhlarni joylashtirish tavsiya qilinsin.

5. Vazirliklar va idoralar bir oy muddatda oʻz idoraviy normativ-huquqiy hujjatlarini ushbu qarorga muvofiqlashtirsinlar.

6. Mazkur qarorning bajarilishini nazorat qilish Oʻzbekiston Respublikasi Bosh vazirining birinchi oʻrinbosari R.S. Azimov zimmasiga yuklansin.

1. Ushbu Nizom kompleks tadbirkorlik litsenziyasi shartnomalarini (keyingi oʻrinlarda “franshizing toʻgʻrisidagi shartnoma” deb yuritiladi) davlat roʻyxatidan oʻtkazishda, franshizing toʻgʻrisidagi shartnomalarga oʻzgartirish, qoʻshimchalar kiritish yoki ularni bekor qilishda qonun hujjatlariga muvofiq tadbirkorlik subyektlarini davlat roʻyxatidan oʻtkazish vakolatiga ega boʻlgan davlat organlari bilan franshizing toʻgʻrisidagi shartnoma boʻyicha litsenziat yoki litsenziar sifatida ish koʻradigan yuridik shaxslar (tijorat tashkilotlari), yakka tadbirkorlar oʻrtasida yuzaga keladigan munosabatlarni tartibga soladi.

Tadbirkorlik faoliyatining ayrim turlarini amalga oshirish uchun tegishli ruxsatnomalar (letsenziyalar) olish zarur boʻlgan taqdirda, lizenziat tegishli ruxsatnoma (litsenziya) olishi va bunday faoliyatni faoliyatning ushbu turini tartibga soladigan normativ-huquqiy hujjatlar talabiga muvofiq amalga oshirishi shart.

2. Ushbu Nizom maqsadlari uchun quyidagi tushunchalardan foydalaniladi:

franshizing toʻgʻrisidagi shartnoma — u boʻyicha bir taraf (litsenziar) ikkinchi tarafga (litsenziatga) haq evaziga litsenziarning firma nomidan hamda qoʻriqlanadigan tijorat axborotidan, shuningdek shartnomada nazarda tutilgan mutlaq huquqlarga kiruvchi boshqa obyektlardan (tovar belgisi, xizmat koʻrsatish belgisi va ixtirolar hamda boshqalardan) litsenziatning tadbirkorlik faoliyatida foydalanish huquqini oʻz ichiga oladigan mutlaq huquqlar kompleksi (litsenziya kompleksi)ni berish majburiyatini oladigan shartnoma;

kompleks tadbirkorlik boʻyicha qoʻshimcha litsenziya shartnomasi (keyingi oʻrinlarda “qoʻshimcha litsenziya shartnomasi” deb yuritiladi) — bu litsenziat tomonidan unga berilgan litsenziya kompleksidan yoki uning qismidan litsenziar bilan kelishilgan yoxud franshizing toʻgʻrisidagi shartnomada belgilangan shartlarda foydalanish huquqini boshqa shaxslarga berish toʻgʻrisidagi shartnoma;

litsenziar — franshizing toʻgʻrisidagi shartnoma boʻyicha taraf, litsenziatga kompleks mutlaq huquqlarni haq evaziga foydalanish uchun beruvchi kompleks mutlaq huquqlar (litsenziya kompleksi)ning huquqiy egasi;

litsenziat — franshizing toʻgʻrisidagi shartnoma boʻyicha taraf, litsenziarning kompleks mutlaq huquqlaridan tadbirkorlik faoliyati uchun huquqiy foydalanuvchi;

franshizing toʻgʻrisidagi shartnomani davlat roʻyxatidan oʻtkazish — tegishli roʻyxatdan oʻtkazuvchi organlarda Franshizing toʻgʻrisidagi shartnomalarni (ularni tuzishni, ularga muhim oʻzgartirishlar, qoʻshimchalar kiritish yoki ularni bekor qilishni) davlat roʻyxatidan oʻtkazishni hisobga olish jurnaliga (keyingi oʻrinlarda “Jurnal” deb ataladi) yozish tartib-qoidasi;

franshizing toʻgʻrisidagi shartnomaga muhim oʻzgartirish va qoʻshimchalar — shartnoma predmeti, yetkazib beriladigan tovar (ishlar, xizmatlar)ning miqdori, sifati, turi, narxi, bajarish muddatlari, hisob-kitob tartibi, taraflarning rekvizitlari, shartnoma tuzilgan sana va joy, shuningdek franshizing toʻgʻrisidagi shartnomalar uchun qonun hujjatlarida belgilangan yoki ularga nisbatan taraflardan biri tomonidan berilgan ariza boʻyicha bitimga erishilishi kerak boʻlgan boshqa muhim shartlar boʻyicha oʻzgartirish va qoʻshimchalar.

3. Franshizing toʻgʻrisidagi shartnomalar, ularga muhim oʻzgartirish va qoʻshimchalar kiritish, shuningdek ularning amal qilishini bekor qilish davlat roʻyxatidan oʻtkazilishi kerak.

4. Franshizing toʻgʻrisidagi shartnoma (muhim oʻzgartirish va qoʻshimchalar hamda bekor qilish) shartnoma boʻyicha litsenziar sifatida ish koʻradigan yuridik shaxs yoki yakka tadbirkorni davlat roʻyxatidan oʻtkazadigan organ (keyingi oʻrinlarda “roʻyxatdan oʻtkazuvchi organ” deb ataladi) tomonidan davlat roʻyxatidan oʻtkazilishi kerak. Ushbu qoidaga rioya qilmaslik shartnomaning haqiqiy hisoblanmasligiga olib keladi.

Agar litsenziat xorijiy davlatda yuridik shaxs yoki yakka tadbirkor sifatida roʻyxatdan oʻtkazilgan boʻlsa, franshizing toʻgʻrisidagi shartnomani (muhim oʻzgartirishlar, qoʻshimchalar hamda bekor qilish)ni davlat roʻyxatidan oʻtkazish shartnoma boʻyicha litsenziat sifatida ish koʻradigan yuridik shaxs yoki yakka tadbirkorni davlat roʻyxatidan oʻtkazgan Oʻzbekiston Respublikasining roʻyxatidan oʻtkazuvchi organi tomonidan amalga oshiriladi.

Agar franshizing toʻgʻrisidagi shartnomada tashqi savdo operatsiyalari (tovarlar, ishlar va xizmatlar eksporti-importi) nazarda tutiladigan boʻlsa, u holda bunday operatsiyalarga nisbatan qonun hujjatlarida belgilangan talablarga ham rioya qilinishi kerak.

Oʻzbekiston Respublikasi qonun hujjatlarida nazarda tutilgan hollarda intellektual mulk obyektlariga nisbatan mutlaq huquqlarni oʻz ichiga oladigan franshizing toʻgʻrisidagi shartnoma (litsenziya shartnomasi)ning tegishli qismi Oʻzbekiston Respublikasi Intellektual mulk agentligida ham roʻyxatdan oʻtkazilishi kerak. Bunda litsenziya shartnomasi franshizing toʻgʻrisidagi shartnomaning ajralmas qismi hisoblanadi. Ushbu talabga rioya qilinmagan taqdirda, agar shartnomaning boshqa shartlari bevosita oʻz kuchini saqlab qolishi mumkin boʻlsa, shartnomaning (litsenziya shartnomasining) tegishli qismi yoxud franshizing toʻgʻrisidagi shartnoma umuman tuzilmagan va haqiqiy emas deb hisoblanadi. Agar intellektual mulk obyekti Oʻzbekiston Respublikasi hududida roʻyxatdan oʻtkazilmagan boʻlsa, intellektual mulk huquqini roʻyxatdan oʻtkazish va uni franshizing toʻgʻrisidagi shartnoma boʻyicha berish shartnoma taraflarining xohishiga koʻra amalga oshiriladi.

5. Davlat roʻyxatidan oʻtkazish ushbu Nizomning 9—11-bandlarida nazarda tutilgan hujjatlar roʻyxatdan oʻtkazuvchi organga taqdim etilgan kundan boshlab 3 (uch) ish kunidan ortiq boʻlmagan muddatda amalga oshiriladi.

6. Franshizing toʻgʻrisidagi shartnoma (muhim oʻzgartirishlar, qoʻshimchalar yoki bekor qilish)ni davlat roʻyxatidan oʻtkazish toʻgʻrisidagi ariza:

a) yakka tadbirkor;

b) yuridik shaxs — huquq egasi (shartnomaga oʻzgartirish, qoʻshimchalar kiritish yoki uni bekor qilish toʻgʻrisida sud organining qarori asosida, yoki, agar huquq egasi xorijiy shaxs boʻlsa, huquqdan foydalanuvchi)ning doimiy ishlaydigan ijro etuvchi organi rahbari yoki yuridik shaxs nomidan ishonchnomasiz ish koʻrish huquqiga ega boʻlgan boshqa shaxs;

v) huquq egasi boʻlgan yuridik shaxs yoki yakka tadbirkor nomidan ishonchnoma asosida ish koʻradigan boshqa shaxs tomonidan berilishi mumkin.

7. Franshizing toʻgʻrisidagi shartnomani davlat roʻyxatidan oʻtkazish toʻgʻrisidagi ariza erkin shaklda tuziladi.

Bunda litsenziar (litsenziat) arizada quyidagi maʼlumotlarni koʻrsatadi:

a) litsenziar (litsenziat)ning nomi, tashkiliy-huquqiy shakli va manzili, litsenziar oʻz faoliyatini amalga oshirayotgan va kelgusida litsenziat oʻz faoliyatini amalga oshiradigan nom (savdo markasi, savdo belgisi va hokazolar);

b) shartnoma predmeti boʻlgan franshizingning qisqacha tavsifi;

v) lizensiarning intellektual mulki haqidagi litsenziatga beriladigan:

roʻyxatdan oʻtkazish yoki roʻyxatdan oʻtkazish uchun berish;

intellektual mulk egasi;

intellektual mulkka ruxsat beruvchi hujjatning amal qilish muddati haqidagi maʼlumotlar;

g) franshizing toʻgʻrisidagi shartnomani amalga oshirish uchun zarur boʻlgan boshqa maʼlumotlar.

Franshizing toʻgʻrisidagi shartnomaga muhim oʻzgartirishlar, qoʻshimchalar yoki bekor qilishni davlat roʻyxatidan oʻtkazish toʻgʻrisidagi arizada litsenziar (litsenziat)ning nomi, tashkiliy-huquqiy shakli va manzili hamda arizaning nima haqda berilayotganligi koʻrsatiladi.

Ariza beruvchi arizani vakolatli shaxs (rahbar yoki ishonchnoma asosida ish koʻruvchi boshqa shaxs)ning imzosi va oʻz muhri bilan tasdiqlaydi. Ariza yuridik shaxsning rahbari tomonidan imzolanganda uning lavozimi koʻrsatiladi.

8. Hujjatlar vakolatli shaxsning (ariza beruvchining) oʻzi tomonidan roʻyxatdan oʻtkazuvchi organga taqdim etiladi yoki topshirilganlik toʻgʻrisidagi bildirish qogʻozi bilan pochta joʻnatmasi orqali yuboriladi.

Franshizing toʻgʻrisidagi shartnoma (muhim oʻzgartirishlar, qoʻshimchalar yoki bekor qilish)ni davlat roʻyxatidan oʻtkazish uchun hujjatlar bevosita taqdim etilganda koʻrsatib oʻtilgan hujjatlarni taqdim etgan shaxsga roʻyxatdan oʻtkazuvchi organ tomonidan hujjatlarning roʻyxati va ular olingan sana koʻrsatilgan holda hujjatlar olinganligi toʻgʻrisida tilxat beriladi. Tilxat hujjatlar roʻyxatdan oʻtkazuvchi organ tomonidan olingan kunda berilishi kerak.

Pochta orqali yuborilgan hujjatlar roʻyxatdan oʻtkazuvchi organga tushganda tilxat hujjatlar roʻyxatdan oʻtkazuvchi organ tomonidan olingan kundan keyingi bir ish kunidan kechikmay topshirilganligi toʻgʻrisidagi bildirish qogʻozi bilan vakolatli shaxsga pochta joʻnatmasi orqali joʻnatiladi.

Roʻyxatdan oʻtkazuvchi organ tomonidan roʻyxatdan oʻtkazilgan shartnomalar yoki davlat roʻyxatidan oʻtkazishni rad etish sabablari koʻrsatilgan qaror pochta orqali yuborilgan taqdirda ular vakolatli shaxsga pochta orqali joʻnatish uchun topshirilgan hujjatlar roʻyxati ilova qilingan holda topshirganlik haqidagi bildirishnoma bilan yuboriladi.

9. Davlat roʻyxatidan oʻtkazish uchun franshizing toʻgʻrisidagi shartnomalar roʻyxatdan oʻtkazuvchi organga taqdim etilganda davlat roʻyxatidan oʻtkazish toʻgʻrisidagi arizaga quyidagilar ilova qilinadi:

a) franshizing toʻgʻrisidagi shartnoma har bir tarafining yuridik shaxs yoki yakka tadbirkor sifatidagi maqomini tasdiqlaydigan hujjatning notarial tasdiqlangan nusxasi (guvohnoma, patent, xorijiy litsenziar uchun — xorijiy davlatning tegishli davlat reyestridan koʻchirma yoki tegishli oʻrnini bosuvchi hujjatlar);

b) faoliyatning tegishli turini amalga oshirish huquqini beruvchi zarur ruxsatnomalar (litsenziyalar) nusxasi, basharti Oʻzbekiston Respublikasi qonunlariga muvofiq bunday ruxsatnoma talab qilinsa. Agar franshizing toʻgʻrisidagi shartnomani davlat roʻyxatidan oʻtkazish paytida bunday ruxsatnoma (litsenziya) olinmagan boʻlsa, bunday ruxsatnoma (litsenziya)ning nusxasi u olingandan keyin bir hafta muddatda roʻyxatdan oʻtkazuvchi organga taqdim etiladi;

v) taraflar tomonidan imzolangan franshizing toʻgʻrisidagi shartnomaning uch nusxasi tikilgan, varaqlari raqamlangan boʻlishi kerak, ularda oʻchirib tuzatishlar, qoʻshimcha yozuvlar, usti chizilgan soʻzlar yoki boshqa qayd etilmagan tuzatishlar boʻlmasligi kerak;

g) roʻyxatdan oʻtkazish yigʻimi toʻlanganligi toʻgʻrisidagi hujjat.

Agar vakolatli shaxs ishonchnoma asosida ish koʻradigan shaxs boʻlsa, koʻrsatib oʻtilgan shaxsning vakolatini tasdiqlaydigan, belgilangan tartibda tasdiqlangan hujjatning nusxasi ham taqdim etiladi.

Taraflar tomonidan imzolangan franshizing toʻgʻrisidagi shartnomaning taqdim etilgan nusxalariga tegishli roʻyxatdan oʻtkazuvchi organ tomonidan yozuv qayd etiladi (shtamp bosiladi).

Franshizing toʻgʻrisidagi shartnomaning ikki nusxasi franshizing toʻgʻrisidagi shartnoma davlat roʻyxatidan oʻtkazilgan kundan keyingi bir ish kunidan kechikmay vakolatli shaxsga beriladi (yuboriladi), uchinchi nusxasi roʻyxatdan oʻtkazuvchi organda saqlanadi.

10. Franshizing toʻgʻrisidagi shartnomaga muhim oʻzgartirish va qoʻshimchalarni davlat roʻyxatidan oʻtkazish uchun roʻyxatdan oʻtkazuvchi organga tegishli hujjatlarni topshirishda davlat roʻyxatidan oʻtkazish toʻgʻrisidagi arizaga quyidagi hujjatlar ilova qilinadi:

a) taraflar tomonidan imzolangan franshizing toʻgʻrisidagi shartnomaga kiritilayotgan muhim oʻzgartirish va qoʻshimchalarning uch nusxasi;

b) sud organining qarori asosida franshizing toʻgʻrisidagi shartnomaga oʻzgartirish va qoʻshimchalar kiritishda — ushbu hujjatning nusxasi;

v) roʻyxatdan oʻtkazish yigʻimi toʻlanganligi toʻgʻrisidagi hujjat.

Agar vakolatli shaxs ishonchnoma asosida ish koʻradigan shaxs boʻlsa, koʻrsatib oʻtilgan shaxsning vakolatini tasdiqlaydigan, belgilangan tartibda tasdiqlangan hujjatning nusxasi ham taqdim etiladi.

Taraflar tomonidan imzolangan franshizing toʻgʻrisidagi shartnomaga muhim oʻzgartirish va qoʻshimchalarning taqdim etilgan nusxalariga tegishli roʻyxatdan oʻtkazuvchi organ tomonidan yozuv qayd etiladi (shtamp bosiladi).

Franshizing toʻgʻrisidagi shartnomaga kiritilayotgan muhim oʻzgartirish va qoʻshimchalarning ikki nusxasi franshizing toʻgʻrisidagi shartnomaga oʻzgartirish va qoʻshimchalar davlat roʻyxatidan oʻtkazilgan kundan keyingi bir ish kunidan kechikmay vakolatli shaxsga beriladi (yuboriladi), franshizing toʻgʻrisidagi shartnomaga oʻzgartirish va qoʻshimchalarning uchinchi nusxasi esa roʻyxatdan oʻtkazuvchi organda saqlanadi.

11. Franshizing toʻgʻrisidagi shartnomaning bekor qilinishi davlat roʻyxatidan oʻtkazilayotganda roʻyxatdan oʻtkazuvchi organga beriladigan davlat roʻyxatidan oʻtkazish toʻgʻrisidagi arizaga quyidagi hujjatlar ilova qilinadi:

a) taraflar tomonidan imzolangan franshizing toʻgʻrisidagi shartnomani bekor qilish toʻgʻrisidagi bitimning uch nusxasi;

b) franshizing toʻgʻrisidagi shartnoma sudning hujjati asosida bekor qilinganda franshizing toʻgʻrisidagi shartnomani bekor qilish toʻgʻrisidagi bitim oʻrniga ushbu hujjatning nusxasi taqdim etiladi.

Franshizing toʻgʻrisidagi shartnomaning amal qilish muddati tugaganligi munosabati bilan franshizing toʻgʻrisidagi shartnoma bekor qilingan taqdirda ariza beruvchi roʻyxatdan oʻtkazuvchi organga faqat ariza taqdim etadi.

Agar vakolatli shaxs ishonchnoma asosida ish koʻradigan shaxs boʻlsa, koʻrsatib oʻtilgan shaxsning vakolatini tasdiqlaydigan, belgilangan tartibda tasdiqlangan hujjatning nusxasi ham taqdim etiladi.

Taraflar tomonidan imzolangan franshizing toʻgʻrisidagi shartnomani bekor qilish toʻgʻrisidagi bitimning tasdiqlangan nusxalariga tegishli roʻyxatdan oʻtkazuvchi organ tomonidan yozuv qayd etiladi (shtamp bosiladi).

Franshizing toʻgʻrisidagi shartnomani bekor qilish toʻgʻrisidagi bitimning ikki nusxasi franshizing toʻgʻrisidagi shartnomani bekor qilish davlat roʻyxatidan oʻtkazilgan kundan keyingi bir ish kunidan kechikmay vakolatli shaxsga beriladi (yuboriladi), franshizing toʻgʻrisidagi shartnomani bekor qilish toʻgʻrisidagi bitimning uchinchi nusxasi roʻyxatdan oʻtkazuvchi organda saqlanadi.

12. Koʻrsatilgan roʻyxatdan ortiqcha qoʻshimcha hujjatlar va maʼlumotlar soʻrash taqiqlanadi.

13. Davlat roʻyxatidan oʻtkazish Jurnalga franshizing toʻgʻrisidagi shartnoma (muhim oʻzgartirishlar, qoʻshimchalar yoki bekor qilish) boʻyicha yozuvni kiritish va franshizing toʻgʻrisidagi shartnomalar (muhim oʻzgartirishlar, qoʻshimchalar yoki bekor qilish) (yoki uning oʻrnini bosuvchi hujjatlar)ning taqdim etilgan nusxalariga ushbu Nizomga 1-ilovada keltirilgan namunaga muvofiq tegishli shtamp va roʻyxatdan oʻtkazuvchi organning muhri qoʻyilishi orqali amalga oshiriladi.

Jurnal ushbu Nizomga 2-ilovaga muvofiq shaklda qogʻozda yuritiladi.

Jurnaldagi har bir yozuvga roʻyxatdan oʻtkazish tartib raqami beriladi. Raqamlash har bir yozuvga birdan boshlab navbatdagi tartib raqami berish yoʻli bilan amalga oshiriladi. Tartib raqami navbatdagi yilga oʻzgarishsiz oʻtadigan tarzda qoʻyiladi. Har bir yozuv uchun uning Jurnalga kiritilgan sanasi (davlat roʻyxatidan oʻtkazish sanasi) koʻrsatiladi.

14. Shartnoma boʻyicha litsenziar sifatida ish koʻradigan yuridik shaxs yoki yakka tadbirkorning roʻyxatdan oʻtkazuvchi organi oʻzgargan taqdirda, franshizing toʻgʻrisidagi shartnomaga bundan keyin muhim oʻzgartirish va qoʻshimchalarni kiritish yoki uni bekor qilish litsenziar yangi roʻyxatdan oʻtkazilgan joydagi roʻyxatdan oʻtkazuvchi organda (xorijiy litsenziar bilan bogʻliq holatda — litsenziat roʻyxatdan oʻtkazilgan yangi joy boʻyicha) amalga oshiriladi.

Ushbu Nizomda nazarda tutilgan hujjatlar bilan birga roʻyxatdan oʻtkazuvchi organga boshqa roʻyxatdan oʻtkazuvchi organning Jurnalidan koʻchirma ham taqdim etiladi.

Koʻchirma Jurnalida franshizing toʻgʻrisidagi shartnoma roʻyxatdan oʻtkazilgan roʻyxatdan oʻtkazuvchi organ tomonidan litsenziar (litsenziat)ning murojaati olingandan boshlab bir kun mobaynida beriladi, unda franshizing toʻgʻrisidagi shartnomaning oldingi roʻyxatdan oʻtkazish sanasi va organi toʻgʻrisidagi maʼlumotlar koʻrsatiladi.

Tegishli roʻyxatdan oʻtkazuvchi organ ikki kun mobaynida Jurnalida franshizing toʻgʻrisidagi shartnoma roʻyxatdan oʻtkazilgan roʻyxatdan oʻtkazuvchi organga roʻyxatdan oʻtkazish hujjatlari turkumi berilishi toʻgʻrisida soʻrov yuboradi. Tegishli soʻrov olingandan keyin Jurnalida franshizing toʻgʻrisidagi shartnoma roʻyxatdan oʻtkazilgan roʻyxatdan oʻtkazuvchi organ franshizing toʻgʻrisidagi tegishli shartnoma boʻyicha roʻyxatdan oʻtkazish hujjatlarini yangidan roʻyxatdan oʻtkazgan organga yuboradi va bu haqda Jurnalga tegishli yozuvni kiritadi.

15. Litsenziat yoki litsenziar tugatilgan taqdirda franshizing toʻgʻrisidagi shartnoma ham bekor qilinishi va ushbu Nizomda nazarda tutilgan tartibda ular tugatilgunga qadar roʻyxatdan oʻtkazilishi kerak.

16. Franshizing toʻgʻrisidagi shartnoma (muhim oʻzgartirishlar, qoʻshimchalar) davlat roʻyxatidan oʻtkazilganligi uchun roʻyxatdan oʻtkazuvchi organning bankdagi hisob raqamiga eng kam oylik ish haqining uchdan biri miqdorida roʻyxatdan oʻtkazish yigʻimi toʻlanadi.

Roʻyxatdan oʻtkazish yigʻimi:

sud organining hujjati asosida franshizing toʻgʻrisidagi shartnomaga oʻzgartirish va qoʻshimchalarni davlat roʻyxatidan oʻtkazishda;

franshizing toʻgʻrisidagi shartnoma bekor qilinganda;

franshizing toʻgʻrisidagi shartnoma (muhim oʻzgartirishlar, qoʻshimchalar)ni davlat roʻyxatidan oʻtkazish boʻyicha hujjatlar takroran koʻrib chiqilganda toʻlanmaydi.

17. Qoʻshimcha litsenziya toʻgʻrisidagi shartnomani davlat roʻyxatidan oʻtkazish franshizing toʻgʻrisidagi shartnomani davlat roʻyxatidan oʻtkazish uchun belgilangan tartibda amalga oshiriladi.

18. Roʻyxatdan oʻtkazuvchi organ quyidagi asoslar boʻyicha:

a) tegishli boʻlmagan roʻyxatdan oʻtkazuvchi organga murojaat qilinganda;

b) kompleks mutlaq huquqlarning muvofiq boʻlmagan huquq egalari (huquqdan foydalanuvchilar) tomonidan murojaat qilinganda;

v) ariza beruvchining tashkiliy-huquqiy shakli ushbu Nizom shartlariga nomuvofiq boʻlganda;

g) ushbu Nizomning 9—11-bandlarida nazarda tutilgan hujjatlar toʻliq boʻlmagan hajmda taqdim etilganda yoki qasddan soxta hujjatlar yoki maʼlumotlar taqdim etilganda;

d) taqdim etilgan hujjatlarning Oʻzbekiston Respublikasi qonun hujjatlari talablariga nomuvofiqligi, shu jumladan franshizing toʻgʻrisidagi shartnomani bekor qilishda oldindan maʼlum qilish muddatlariga rioya qilinmaganda franshizing toʻgʻrisidagi shartnomani (muhim oʻzgartirishlar, qoʻshimchalar yoki bekor qilishni) davlat roʻyxatidan oʻtkazishni rad etishi mumkin.

19. Taqdim etilgan hujjatlar faqat ushbu Nizomning 18-bandida koʻrsatilgan rad etish uchun asoslar mavjud emasligi yuzasidan oʻrganiladi. Boshqa sabablarga koʻra, shu jumladan maqsadga muvofiq emasligi mulohazasi bilan davlat roʻyxatidan oʻtkazish rad etilishiga yoʻl qoʻyilmaydi.

Davlat roʻyxatidan oʻtkazishning asosli rad etilishi toʻgʻrisidagi qaror roʻyxatdan oʻtkazuvchi organ tomonidan qabul qilinadi va hujjatlar taqdim etilgan paytdan boshlab 3 (uch) ish kuni mobaynida ariza beruvchiga yozma shaklda beriladi.

20. Mulohazalar va takliflar tuzatilgandan keyin ariza beruvchi hujjatlarni roʻyxatdan oʻtkazuvchi organga roʻyxatdan oʻtkazuvchi organning yozma rad etishi olingan paytdan boshlab 3 (uch) oy mobaynida ushbu Nizomda belgilangan tartibda takroran topshirish huquqiga ega. Ushbu muddat tamom boʻlgandan keyin berilgan ariza yangidan berilgan ariza hisoblanadi. Hujjatlarni takroran koʻrib chiqishda roʻyxatdan oʻtkazuvchi organ tomonidan oldin ariza beruvchiga yozma shaklda bayon qilinmagan yangi yoki aniqlashtiruvchi mulohazalar bildirilishiga yoʻl qoʻyilmaydi.

21. Davlat roʻyxatidan oʻtkazish muddatlari roʻyxatdan oʻtkazuvchi organning aybi bilan buzilgan taqdirda franshizing toʻgʻrisidagi shartnoma (muhim oʻzgartirishlar, qoʻshimchalar yoki bekor qilish) belgilangan muddatlarda roʻyxatdan oʻtkazilgan hisoblanadi, bu haqda ariza beruvchining talabiga koʻra roʻyxatdan oʻtkazuvchi organ tomonidan biror-bir qoʻshimcha talablarsiz franshizing toʻgʻrisidagi shartnoma (muhim oʻzgartirishlar, qoʻshimchalar yoki bekor qilish) (yoki uning oʻrnini bosuvchi hujjatlar)ga tegishli yozuv yoziladi (shtamp bosiladi) va roʻyxatdan oʻtkazuvchi organning muhri bosiladi.

22. Ariza beruvchi roʻyxatdan oʻtkazuvchi organning qaroridan, uning mansabdor shaxslarining noqonuniy xatti-harakatlari (harakatsizligi)dan yoki davlat roʻyxatidan oʻtkazish muddatlari buzilishidan norozi boʻlgan taqdirda belgilangan tartibda yuqori davlat organiga va (yoki) sudga murojaat qilishga haqlidir.

23. Ushbu Nizom buzilishida aybdor boʻlgan shaxslar Oʻzbekiston Respublikasi qonun hujjatlariga muvofiq javob beradilar.