Qoraqalpogʻiston Respublikasi Vazirlar Kengashi, viloyatlar va tumanlar hokimlari qishloq xoʻjaligi ekinlarining payhon qilinishi va nobud boʻlishining oldini olish muammolariga yetarli eʼtibor bermayotganliklari, oʻzini oʻzi boshqarish organlari hamda qishloq xoʻjaligi korxonalari ushbu dolzarb masalaga toʻla jalb qilinmayotganligi va ularga nisbatan talabchanlikning pastligi oqibatida, shuningdek, huquqni muhofaza qilish idoralari tomonidan ekinlarning payhon qilinishiga yoʻl qoʻymaslik yuzasidan yetarli chora-tadbirlar koʻrilmayotganligi natijasida ayrim xoʻjaliklarga jiddiy zarar yetkazilmoqda.

Qishloq xoʻjaligi ekinlarining payhon qilinishiga Qoraqalpogʻiston Respublikasi, Toshkent, Jizzax, Navoiy va Buxoro viloyatlarida sezilarli ravishda yoʻl qoʻyilayotganligi tashvishli holdir.

Qishloq xoʻjaligi ekinlari avvalo risqu-roʻzimiz boʻlmish gʻalla maydonlarini payhon qilinishining oldini olish va nobud boʻlishi holatlariga yoʻl qoʻymaslik yuzasidan amalga oshirilayotgan tadbirlar samaradorligini oshirish hamda ushbu masalada tegishli idoralar rahbarlarining masʼuliyatini yanada kuchaytirish maqsadida Vazirlar Mahkamasi qaror qiladi:

1. Qoraqalpogʻiston Respublikasi Vazirlar Kengashi raisi, viloyatlar va tumanlar hokimlari:

ekinlarning payhon qilinishi va nobud boʻlishiga qarshi tegishli chora-tadbirlar koʻrmayotganliklari hamda bu borada zarur nazoratni taʼminlamayotganliklari uchun qattiq ogohlantirilsin;

qishloq xoʻjaligi korxonalari rahbarlarining ekinlarni payhon qilinishi va nobud boʻlishi holatlari uchun masʼuliyatini oshirish hamda mavjud kamchiliklarni bartaraf etish boʻyicha shoshilinch tadbirlar belgilasin;

ekinzorlarda chorva mollarini boqish, ularni qarovsiz qoldirish va ekinzorlar orqali hamma turdagi harakatlanuvchi texnika vositalari oʻtishi, shuningdek, ekinlarning payhon qilinishi va nobud boʻlishiga olib keluvchi boshqa salbiy holatlarga qarshi kurash choralarini yanada kuchaytirsin;

ichki ishlar organlari, qishloq xoʻjaligi korxonalari, fuqarolarning oʻzini oʻzi boshqarish organlari va boshqa jamoat tashkilotlari vakillari, mahalla posbonlari bilan hamkorlikda ekinlarni payhon qilinishining oldini olish boʻyicha muntazam ravishda reydlar oʻtkazilishini taʼminlasin;

qishloq xoʻjaligi ekinlari payhon qilinishi mumkin boʻlgan joylarda tashkil etilgan kuzatuv postlari xodimlari va dala qorovullarining faoliyati samaradorligini oshirsin.

2. Oʻzbekiston Respublikasi Oqsoqollar kengashi va “Mahalla” jamgʻarmasi qishloq xoʻjaligi ekinlari payhon qilinishining oldini olish boʻyicha mahalla faollari va keng jamoatchilikni jalb etgan holda joylarda tarbiyaviy-tushuntirish ishlarini kuchaytirsin.

3. Eʼtiborga olinsinki, amaldagi qonunchilikda ekinzorlarni payhon qilganlik uchun belgilangan javobgarlik asosida:

chorva mollarning ekinzorlarni payhon qilishi, fuqarolarga bazaviy hisoblash miqdorining uchdan bir qismidan bir baravarigacha, mansabdor shaxslarga esa — ikkidan bir qismidan ikki baravarigacha miqdorda jarima solishga;

ekinzorlarni texnika vositalarida bosib oʻtish — bazaviy hisoblash miqdorining ikkidan bir qismidan ikki baravarigacha jarima solishga sabab boʻladi.

Ushbu huquqbuzarlik uchun belgilangan jarima bilan bir qatorda ekinzorlarni payhon qilish oqibatida keltirilgan zarar aybdor shaxs hisobidan qoplanadi.

4. Oʻzbekiston Respublikasi Ichki ishlar vazirligi (Z.Almatov) qishloq xoʻjalik ekinlarining payhon qilinishi va nobud boʻlishining oldini olish yuzasidan tashkiliy profilaktik tadbirlarni muntazam ravishda oʻtkazish haqida qoʻshimcha tadbirlar belgilasin.

5. Oʻzbekiston Respublikasi Bosh prokuraturasi (R.Qodirov) qishloq xoʻjaligi ekinlarining payhon qilinishi va nobud boʻlishining oldini olishga qaratilgan qonun hujjatlari ijrosi ustidan nazoratni kuchaytirsin.

6. “Oʻzteleradio” kompaniyasi (A.Koʻchimov), Oʻzbekiston Milliy axborot agentligi (M.Xazratqulov), Oʻzbekiston Respublikasi Ichki ishlar vazirligi (Z.Almatov), ommaviy axborot vositalari qishloq xoʻjaligi ekinlari payhon qilinishi va nobud boʻlishining oldini olishga qaratilgan amaldagi qonunchilikning targʻib qilinishini va bu yoʻnalishda olib borilayotgan ishlarning muntazam ravishda yoritilishini taʼminlasin.

7. Mazkur qarorning bajarilishini nazorat qilish Oʻzbekiston Respublikasi Prezidentining Davlat maslahatchilari I. Joʻrabekov va T. Xudaybergenov zimmasiga yuklansin.