Fuqaro aviatsiyasi to‘g‘risidagi va osmon bo‘shlig‘idan foydalanish haqidagi Davlatlararo Bitimni O‘zbekiston Respublikasi hududida amalga oshirish, havo transportining xavfsizligini ta’minlash, aviatsiyasi texnikasining pishiq-puxtaligini va uning xalqaro bozordagi raqobatchilik qobiliyatini yanada oshirish maqsadida qaror qilaman:

1. Belgilab qo‘yilsinki, aviatsiya xodimlarini, xalqaro va toifalashtirilgan aerodromlarni, ularning uskunalarini sertifikatlash masalalari yuzasidan O‘zbekiston Respublikasining tegishli qonun akti qabul qilingungacha aviatsiya texnikasini ishlatuvchilar, ishlab chiquvchilar va tayyorlovchilar, shuningdek fuqaro aviatsiyasi to‘g‘risidagi va osmon bo‘shlig‘idan foydalanish haqidagi Bitimda qatnashuvchi davlatlarning Kengashi amalda joriy etadigan qoidalarga amal qiladilar.

2. Ikki va undan ko‘proq davlatlarning manfaatlariga daxl qiladigan aviatsiya hodisalarini nazorat tariqasida taftish etish, havo kemalarini, aviatsiyasi texnikasini ishlab chiquvchilar va tayyorlovchilarni, xalqaro yo‘llarda tashiydigan ishlatuvchilarni, shuningdek xalqaro va toifalashtirilgan aerodromlar hamda ularning uskunalarini sertifikatlash tegishli hujjatlar berilib O‘zbekiston Respublikasining hududida Xalqaro fuqaro aviatsiyasi tashkiloti (IKAO) tavsiyanomalarini hisobga olib va O‘zbekiston Respublikasining qonunlariga rioya etgan holda Davlatlaro aviatsiya Komiteti tomonidan o‘tkaziladi.

3. Fuqaro aviatsiyasi to‘g‘risida va osmon bo‘shlig‘idan foydalanish haqida 1991-yil dekabr oyida Minsk shahrida qabul qilingan Bitimda qatnashuvchi davlatlarning Kengashida quyidagilar O‘zbekiston Respublikasining muxtor vakillari etib tasdiqlansin:

— “O‘zbekiston havo yo‘llari” aviakompaniyasining Bosh direktori;

— V.P. Chkalov nomli Toshkent aviatsiya ishlab chiqarish birlashmasining Bosh direktori;

— O‘zbekiston Respublikasi harbiy havo kuchlarining qo‘mondoni.

4. O‘zbekiston Respublikasining hukumati, Qoraqalpog‘iston Respublikasi Vazirlar Kengashi, viloyatlar, shaharlar va rayonlarning hokimliklari, korxonalar va tashkilotlar aviatsiya hodisalarini taftish qilish va ularning oqibatlarni tugatish chog‘ida Davlatlararo aviatsiya komitetiga zarur yordam va ko‘mak bersinlar.