05.01.1994 yildagi 22-son
Hujjat kuchini yo‘qotgan 19.05.2018
 LexUZ sharhi
1. Kartoshka va meva-sabzavot mahsulotini (keyingi matnlarda — mahsulot) yetkazib berish va temir yo‘l orqali tashish chog‘idagi kamomadi va buzilib qolishi bilan bog‘liq nizolarni hal qilishda xo‘jalik sudlari O‘zbekiston Respublikasi Fuqarolik kodeksi, “Xo‘jalik yurituvchi subyektlar faoliyatining shartnomaviy-huquqiy bazasi to‘g‘risida”gi, “Temir yo‘l transporti to‘g‘risida”gi O‘zbekiston Respublikasi qonunlari, O‘zbekiston Respublikasi temir yo‘l Ustavi, Yuklarni tashish qoidalarining standartlar va texnik shartlarga mos keladigan, O‘zbekiston Respublikasi qonun hujjatlariga zid kelmaydigan qismi normalariga amal qilishlari kerak bo‘ladi.
2. O‘zbekiston Respublikasi temir yo‘l Ustavi va Yuklarni tashish qoidalariga muvofiq temir yo‘l tez buziladigan yuklarni, shu jumladan kartoshka va meva-sabzavot mahsulotini belgilangan muddatlarda, tegishli hollarda esa izotermik vagonlarni muz bilan ta’minlashning belgilangan tartibiga yoxud mashinalashgan tarzda sovutiladigan yoki elektrda isitiladigan vagonlarni ishlatish tartibotiga (harorat rejimiga) rioya etgan holda yetkazib berishi shart.
Yukni buzilmagan holda tashish va tekshirmasdan berishda temir yo‘l yuk xatida O‘zbekiston Respublikasi temir yo‘l Ustavining 65-moddasiga muvofiq belgi qo‘yilishi shart. Temir yo‘l yuk xatida bunday belgining yo‘qligi kamomad tufayli ko‘rilgan zararni undirish to‘g‘risidagi da’voni rad etishga asos bo‘lib xizmat qilishi mumkin.