Transafgʻon temir yoʻl yoʻlagini rivojlantirish, Toshguzar — Boysun — Qumqoʻrgʻon temir yoʻlida tranzit tashishlarni koʻpaytirish, respublika korxonalarining eksport salohiyatini kengaytirish maqsadida Vazirlar Mahkamasi qaror qiladi:

1. Quyidagilar:

Osiyo Taraqqiyot Banki Direktorlar kengashi tomonidan 2009-yil 30-sentabrda “Xayraton va Mozori Sharif oʻrtasidagi temir yoʻl liniyasini loyihalashtirish, qurish, oʻrnatish va foydalanishga topshirish” loyihasini moliyalashtirish uchun Afgʻoniston Islom Respublikasiga grant berish toʻgʻrisida qaror qabul qilinganligi, shuningdek loyihani amalga oshirish boʻyicha bosh pudratchi etib “Oʻzbekiston temir yoʻllari” davlat-aksiyadorlik kompaniyasi tanlanganligi;

“Oʻzbekiston temir yoʻllari” davlat-aksiyadorlik kompaniyasi bilan Afgʻoniston Islom Respublikasining Jamoat ishlari vazirligi oʻrtasida temir yoʻl qurish uchun 129,0 mln AQSh dollari summasida kontrakt tuzish kelishilganligi maʼlumot uchun qabul qilinsin.

2. Belgilansinki, koʻrsatib oʻtilgan loyihani amalga oshirishda:

“Oʻzbekiston temir yoʻllari” davlat-aksiyadorlik kompaniyasi — bosh pudratchi;

“Boshtransloyiha” ochiq aksiyadorlik jamiyati — bosh loyihalashtiruvchi;

yuridik shaxslar — subpudratchilar, tuzilgan shartnomalarga muvofiq bosh pudratchiga tovarlar (ishlar, xizmatlar)ni realizatsiya qiluvchi yetkazib beruvchilar sifatida qatnashadilar.

3. “Oʻzbekiston temir yoʻllari” davlat-aksiyadorlik kompaniyasi:

“Oʻzbekiston temir yoʻllari” davlat-aksiyadorlik kompaniyasining loyihada band boʻlgan barcha xodimlari Afgʻoniston Islom Respublikasi hududida boʻlishi davrida ularning hayoti va sogʻligʻini sugʻurta qilish boʻyicha “Oʻzbekinvest” eksport-import sugʻurta milliy kompaniyasi bilan shartnoma tuzilishini;

Oʻzbekiston Respublikasi Ichki ishlar vazirligi, Milliy xavfsizlik xizmati, Tashqi ishlar vazirligi bilan kelishgan holda, belgilangan tartibda, Afgʻoniston Islom Respublikasining vakolatli organlari va Afgʻoniston hududida joylashtirilgan kollektiv xavfsizlik kuchlari bilan Afgʻoniston Islom Respublikasi hududida loyihani amalga oshirishga jalb qilingan xodimlarning, qurilish texnikasi va infratuzilmaning xavfsizligi kafolatini taʼminlash boʻyicha oʻzaro tushunish memorandumini tuzish chora-tadbirlari koʻrilishini taʼminlasin.

4. Belgilab qoʻyilsinki:

“Oʻzbekiston temir yoʻllari” davlat-aksiyadorlik kompaniyasining loyihani amalga oshirish uchun Afgʻoniston Islom Respublikasiga yuborilayotgan xodimlariga belgilangan normalardan ortiqcha toʻlanadigan xizmat safari xarajatlariga qoʻshimchalar summasi, shuningdek xizmat safari davrida koʻrsatib oʻtilgan xodimlarni uch marta bepul ovqatlantirishni taʼminlash xarajatlari summasi yuridik shaxslar foydasiga solinadigan soliq boʻyicha va jismoniy shaxslarning daromad soligʻi boʻyicha soliq solinadigan bazaga kiritilmaydi;

koʻrsatib oʻtilgan loyihani amalga oshirish doirasida “Oʻzbekiston temir yoʻllari” davlat-aksiyadorlik kompaniyasi tarkibiy boʻlinmalari ichida bepul olinadigan (beriladigan) mol-mulk uchun qabul qiluvchi va beruvchi tomonning foydasiga soliq solinmaydi.

5. Koʻrsatib oʻtilgan loyihani amalga oshirish doirasida Oʻzbekiston Respublikasi Vazirlar Mahkamasi tasdiqlaydigan roʻyxatlar boʻyicha Oʻzbekistonga olib kiriladigan va olib chiqiladigan asbob-uskunalar va materiallar uchun “Oʻzbekiston temir yoʻllari” davlat-aksiyadorlik kompaniyasi bojxona toʻlovlari toʻlashdan ozod qilinsin (bojxona rasmiylashtiruvi yigʻimlari bundan mustasno).

7. Koʻrsatib oʻtilgan loyihani amalga oshirishga doir ishlarni bajarish uchun “Oʻzbekiston temir yoʻllari” davlat-aksiyadorlik kompaniyasining asoslangan buyurtmanomalari asosida Oʻzbekiston Respublikasi Iqtisodiyot vazirligi:

“Oʻzbekneftgaz” milliy xolding kompaniyasi bilan birgalikda qonun hujjatlarida nazarda tutilgan tartibda shartnomani rasmiylashtirgan holda yoqilgʻi-moylash materiallari bilan uzluksiz taʼminlashni;

“Oʻzmetkombinat” aksiyadorlik-ishlab chiqarish birlashmasi va “Oʻzqurilishmateriallari” aksiyadorlik kompaniyasi bilan birgalikda birja kotirovkalarining oʻrtacha narxlari boʻyicha toʻgʻridan toʻgʻri shartnomalar asosida metall prokati va sementning zarur hajmi sotilishini taʼminlasin.

8. Oʻzbekiston Respublikasi Ichki ishlar vazirligi, Tashqi ishlar vazirligi “Oʻzbekiston temir yoʻllari” davlat-aksiyadorlik kompaniyasining buyurtmanomalari boʻyicha koʻrsatib oʻtilgan loyihani amalga oshirishda qatnashayotgan mutaxassislarga chiqish hujjatlari rasmiylashtirilishini taʼminlasin.

9. Mazkur qarorning bajarilishini nazorat qilish Oʻzbekiston Respublikasining Bosh vaziri Sh.M. Mirziyoyev zimmasiga yuklansin.