1-modda. O‘zbekiston Respublikasining 1997-yil 30-avgustda qabul qilingan 478-I-sonli Qonuni bilan tasdiqlangan O‘zbekiston Respublikasining Xo‘jalik protsessual kodeksiga (O‘zbekiston Respublikasi Oliy Majlisining ­Axborotnomasi, 1997-yil, № 9, 234-modda; 1998-yil, № 5-6, 102-modda; 2001-yil, № 1-2, 11-modda; 2002-yil, № 9, 165-modda; 2003-yil, № 9-10, 149-modda; O‘zbekiston Respublikasi Oliy Majlisi palatalarining Axborotnomasi, 2006-yil, № 7, 373-modda; 2007-yil, № 8, 367-modda) quyidagi o‘zgartish va qo‘shimcha kiritilsin:

1) quyidagi mazmundagi 192¹-modda bilan to‘ldirilsin:

Ishda ishtirok etuvchi shaxslar nazorat tartibida protest keltirish to‘g‘risidagi arizani ushbu Kodeksning 193-moddasida ko‘rsatilgan mansabdor shaxslarga berishga haqli.

Nazorat tartibida protest keltirish to‘g‘risidagi ariza mazmunan ushbu Kodeks 177-moddasining birinchi qismi talablariga muvofiq bo‘lishi lozim. Arizaga sudning hal qiluv qarori nusxasi, agar ish apellatsiya, kassatsiya tartibida ham ko‘rib chiqilgan bo‘lsa, apellatsiya, kassatsiya instansiyasi sudlarining qarorlari nusxalari ham ilova qilinadi.

Ushbu moddaning ikkinchi qismi talablariga rioya qilinmagan taqdirda nazorat tartibida protest keltirish to‘g‘risidagi ariza qaytariladi.

Sudning hal qiluv qarori qonuniy kuchga kirgan kundan e’tiboran uch yil o‘tgandan keyin berilgan nazorat tartibida protest keltirish to‘g‘risidagi ariza ko‘rib chiqilmaydi.

Nazorat tartibida protest keltirish to‘g‘risidagi ariza bir oylik muddatda, ish talab qilib olinadigan va tekshiriladigan hollarda esa ikki oygacha bo‘lgan muddatda ko‘rib chiqilishi kerak.

Protest keltirish uchun asoslar bo‘lmaganda ariza bergan shaxsga arizani qanoatlantirmasdan qoldirish sabablari ko‘rsatilib, yozma javob berilishi lozim”;

2) 197-modda quyidagi tahrirda bayon etilsin:

Protest keltirish uchun asoslar mavjud bo‘lganda ushbu Kodeksning 193-moddasida ko‘rsatilgan mansabdor shaxs protest keltiradi va uni ish bilan birga O‘zbekiston Respublikasi Oliy xo‘jalik sudining Rayosatiga yuboradi.

Protestning mazmuni ushbu Kodeks 177-moddasining birinchi qismi talablariga muvofiq bo‘lishi lozim.

Protestning nusxalari ishda ishtirok etuvchi shaxslarga yuboriladi.

Protest keltirgan mansabdor shaxs uni protest ko‘riladigan sud majlisi boshlanguniga qadar o‘zgartirish, to‘ldirish yoki chaqirib olishga haqli. Ishda ishtirok etuvchi shaxslar protest to‘ldirilganligi, o‘zgartirilganligi yoki chaqirib olinganligi to‘g‘risida xabardor qilinadi”.

2-modda. Ushbu Qonun rasmiy e’lon qilingan kundan e’tiboran kuchga kiradi.