O‘zbekiston Respublikasi Oliy Kengashi qaror qiladi:

1. “Vijdon erkinligi va diniy tashkilotlar to‘g‘risida”gi O‘zbekiston Respublikasi Qonuni matbuotda e’lon qilingan paytdan boshlab kuchga kiritilsin.

2. Belgilab qo‘yilsinki, respublikada ro‘yxatdan o‘tgan va ishlab turgan diniy tashkilotlarning ustavlari (nizomlari) ular huquqiy shaxs huquqini olishlari uchun 1992-yil 1-yanvarga qadar qonunda belgilangan tartibda ro‘yxatga olinishi kerak. Ilgari ro‘yxatdan o‘tmagan, yangi tuzilayotgan, o‘zlarining dinga mansubliklarini o‘zgartirayotgan diniy tashkilotlar o‘z ustavlari (nizomlari)ni qonunda belgilangan tartibda ro‘yxatga olish hamda huquqiy shaxs maqomiga ega bo‘lish uchun 1992-yil 1-yanvardan e’tiboran taqdim etadilar.

3. O‘zbekiston Respublikasi Prezidenti huzuridagi Vazirlar Mahkamasi shu yil oxirigacha:

O‘zbekiston Respublikasi Oliy Kengashiga O‘zbekiston Respublikasi qonunlarini “Vijdon erkinligi va diniy tashkilotlar to‘g‘risida”gi O‘zbekiston Respublikasi Qonuniga muvofiqlashtirish haqida, shuningdek uni buzganlik uchun javobgarlik belgilash to‘g‘risida takliflar kiritsin;

O‘zbekiston Respublikasi Hukumatining qarorlarini “Vijdon erkinligi va diniy tashkilotlar to‘g‘risida”gi O‘zbekiston Respublikasi Qonuniga muvofiqlashtirsin.

4. O‘zbekiston Respublikasi xalq deputatlari mahalliy Sovetlari “Vijdon erkinligi va diniy tashkilotlar to‘g‘risida”gi O‘zbekiston Respublikasi Qonuni talablarini bajarishni ta’minlash uchun zarur choralar ko‘rsin.