Oʻzbekiston Respublikasi va Rossiya Federatsiyasi bundan keyin “Tomonlar” deb ataluvchilar,

Oʻzbekiston bilan Rossiya va ikki davlat xalqlari oʻrtasidagi doʻstlik va totuv qoʻshnichilikning tarixiy anʼanalariga tayanib,

Oʻzbekiston—Rossiya munosabatlarida Oʻzbekiston Respublikasi bilan Rossiya Federatsiyasi oʻrtasida harbiy va harbiy-texnikaviy sohalarda har tomonlama hamkorlikni yanada chuqurlashtirish toʻgʻrisida 1999-yil 11-dekabrdagi Shartnoma va Oʻzbekiston Respublikasi bilan Rossiya Federatsiyasi oʻrtasida strategik sherikchilik toʻgʻrisidagi 2004-yil 16-iyuldagi Shartnoma muhim rol oʻynayotganini eʼtirof etib,

Oʻzbekiston bilan Rossiya oʻrtasidagi munosabatlarni ularning xalqlarining tub manfaatlariga toʻla javob beradigan, milliy, mintaqaviy va xalqaro xavfsizlik va barqarorlikni taʼminlashishiga xizmat qiluvchi, sifat jihatidan yangi, ittifoqdoshlik darajasiga koʻtarishga intilib,

turli sohalardagi hamkorlikni yanada rivojlantirishga boʻlgan niyatga amal qilib,

Birlashgan Millatlar Tashkiloti Ustavining, Yevropada xavfsizlik va hamkorlik tashkiloti asosiy hujjatlarining maqsadlari va prinsiplariga sodiqligini tasdiqlab,

Mustaqil Davlatlar Hamdoʻstligi doirasida qabul qilingan hujjatlarni hisobga olib,

Ushbu Shartnomaga muvofiq Tomonlar ittifoqdoshlik munosabatlarini uzoq muddatga moʻljallangan asosda bogʻlaydilar va rivojlantiradilar.

Biror davlat yoki bir guruh davlatlar tomonidan Tomonlardan biriga qarshi tajovuzkorlik harakati sodir etilsa, bunga ikkala Tomonga qarshi sodir etilgan tajovuzkorlik harakati deb qaraladi.

Tomonlardan biriga qarshi tajovuzkorlik harakati sodir etilsa, boshqa Tomon Birlashgan Millatlar Tashkiloti Ustavining 51-moddasiga muvofiq kollektiv tarzda oʻzini oʻzi mudofaa qilish huquqidan foydalanish sifatida unga zarur yordam beradi, shu jumladan harbiy yordam, va shuningdek oʻz ixtiyorida bor boshqa vositalar bilan qoʻllab-quvvatlaydi.

Ushbu modda asosida koʻrilgan choralar toʻgʻrisida Tomonlar zudlik bilan Birlashgan Millatlar Tashkilotining Xavfsizlik Kengashini xabardor qiladilar. Ushbu choralarni koʻrayotganda Tomonlar Birlashgan Millatlar Tashkiloti Ustavining qoidalariga rioya qiladilar.

Tomonlardan birining fikriga koʻra tinchlikka xavf solishi, tinchlikni buzishi yoki uning xavfsizlik manfaatlariga daxl qilishi mumkin boʻlgan, va shuningdek Tomonlardan biriga qarshi tajovuzkorlik harakati sodir etilishi xavfi tugʻiladigan vaziyat yuzaga kelsa, Tomonlar bunday vaziyatni tartibga solish boʻyicha pozitsiyalarni muvofiqlashtirish va amaliy choralarni kelishib olish uchun tegishli maslahatlashuvlar mexanizmini zudlik bilan harakatga keltiradilar.

Xavfsizlikni taʼminlash, tinchlik va barqarorlikni qoʻllab-quvvatlash maqsadida Tomonlar zarur hollarda alohida shartnomalar asosida bir-biriga hududlarida joylashgan harbiy obyektlardan foydalanish huquqini beradilar.

Tomonlar tinchlikni mustahkamlash, barqarorlik va xavfsizlikning global, va shuningdek mintaqa miqyosida kuchaytirish maqsadida birgalikda harakat qiladilar. Ular nizolarning oldini olish va yoʻlga qoʻyish hamda xavfsizlik va barqarorlikning mintaqaviy va global muammolarini hal qilish ishida Birlashgan Millatlar Tashkiloti va uning Xavfsizlik Kengashining markaziy rolini yanada mustahkamlashga, Yevropada xavfsizlik va hamkorlik tashkiloti hujjatlarida qayd qilingan maqsad va prinsiplarni amalga oshirishga alohida ahamiyat beradilar.

Tomonlar xalqaro terrorizm, zoʻravonlik ekstremizm ommaviy qirgʻin qurolini tarqatish, narkotik vositalar, psixotrop moddalar va ularning prekursorlarining, qurolning noqonuniy aylanishi, transmilliy uyushgan jinoyatchilik, xavfsizlikning boshqa yangi tahdidlari va shakllariga qarshi harakat qilish va ularni neytrallashtirish mexanizmlari samaradorligini oshirishga qaratilgan oʻzlarining saʼy-harakatlarini oʻzaro muvofiqlashtiradilar va birlashtiradilar.

Tomonlar yashirin migratsiyaga qarshi kurashda, shu jumladan jismoniy shaxslarning oʻz hududlaridan va u orqali noqonuniy yurishiga qarshi qurashda hamkorlik qiladilar.

Tomonlar inson huquqlari va asosiy erkinliklari ishida oʻzlarining xalqaro majburiyatlari va har birining qonun hujjatlariga muvofiq amalga oshirishga koʻmaklashishda hamkorlik qiladilar.

Tomonlar oʻzlarining xalqaro majburiyatlari va milliy qonun hujjatlariga muvofiq bir Tomon fuqarolari va yuridik shaxslarining qonuniy huquqlari va manfaatlarini boshqa Tomon hududida kafolatlaydigan samarali choralar koʻradilar.

Tomonlar ikki tomonlama savdo-iqtisodiy munosabatlarni rivojlantirish va takomillashtirish uchun xalqaro amaliyotni hisobga olgan holda tegishli choralar koʻradilar.

Tomonlarning bu sohadagi hamkorligining asosiy yoʻnalishlari — tovarlar, xizmatlar, kapital bozorini rivojlantirish va ishlatish, soliq, pul-kredit, valyuta, moliya, savdo va bojxona sohalarida kelishilgan siyosat oʻtkazish, investitsiyalarni ragʻbatlantirish va himoya qilish.

Tomonlar, oʻzlarining qonun hujjatlari va xalqaro majburiyatlarini hisobga olib, ikki davlat xoʻjalik subyektlariga tadbirkorlik faoliyati, ishlab chiqarishlarni birgalikda rivojlantirish, va shuningdek oʻzaro manfaatli iqtisodiy dasturlarni amalga oshirish uchun oʻzarolik asosida qulay iqtisodiy, moliyaviy va huquqiy sharoitlar yaratib beradilar.

Tomonlar ikki tomonlama savdo-iqtisodiy munosabatlarda oʻzlarining tovarlar va xizmatlar ishlab chiqaruvchilarining iqtisodiy manfaatlarini himoya qilishda xalqaro huquq normalariga muvofiq diskriminatsiyaga asoslanmagan choralarni bir-biriga nisbatan qoʻllashlari mumkin.

Tomonlar, amaldagi shartnomalar asosida erishilgan yuqori darajadagi harbiy va harbiy-texnikaviy hamkorlikni hisobga olgan holda, qurolli kuchlarni zamonaviylashtirish va isloh qilish, ularni zamonaviy qurollar va harbiy texnika bilan taʼminlash, va shuningdek bu sohada bir-birini qiziqtiradigan boshqa yoʻnalishlar boʻyicha faol hamkorlik qiladilar. Tomonlar tegishli tashqi savdo kontraktlari tuzish uchun harbiy-texnikaviy hamkorlikning vakolatli subyektlariga zarur sharoitlar yaratib berishga har qanaqasiga yordamlashadilar.

Tomonlar milliy va xalqaro transport infratuzilmalarini birgalikda rivojlantirish va foydalanish, oʻz hududida yoʻlovchi va yuklarni tranzit tashish uchun qulay sharoitlar yaratib berishda, va shuningdek bu maqsadlarda uchinchi mamlakatlar va xalqaro moliyaviy tashkilotlarning investitsiyalarini jalb qilish mumkinligida oʻzaro manfaatli hamkorlikni chuqurlashtiradilar.

Tomonlar ilmiy-texnika, energetika, moliya, investitsiya, bank, aviasozlik, kommunikatsiya sohalarida, yadro energetikasida, axborot texnologiyalari sohasida, bir-birini qiziqtiradigan boshqa sohalarda teng huquqli va oʻzaro manfaatli hamkorlikni taʼminlaydilar va milliy qonun hujjatlariga muvofiq buning uchun zarur qulay sharoitlar yaratib beradilar.

Tomonlar bunday hamkorlikning aniq yoʻnalishlari boʻyicha shartnomalar tuzadilar.

Tomonlar kishilar oʻrtasida bevosita muloqotlar qilish va avj oldirish uchun qulay sharoitlar yaratadilar, insonparvarlik sohasidagi hamkorlikning shartnoma-huquqiy negizini takomillashtirishda koʻmaklashadilar.

Tomonlar muntazam ravishda ikki tomonlama masalalar boʻyicha, va shuningdek bir-birini qiziqtiradigan koʻp tomonlama muammolar boʻyicha maslahatlashuvlar oʻtkazadilar. Zarur hollarda ular kelishilgan harakatlarni amalga oshirish uchun oʻz pozitsiyalarini muvofiqlashtiradilar.

Ikki tomonlama maslahatlashuvlar turli darajalarda, shu jumladan ikki davlatning davlatlar, parlamentlar, hukumatlar, xavfsizlik kengashlari, tashqi siyosat, mudofaa, huquqni muhofaza qilish va boshqa vazirlik va idoralar rahbarlari darajasida oʻtkaziladi.

Tomonlar zaruriyatga qarab oʻzlari aʼzo boʻlgan xalqaro tashkilotlardagi faoliyatini va pozitsiyalarini oʻzaro muvofiqlashtiradilar. Ular Mustaqil Davlatlar Hamdoʻstligiga aʼzo boʻlgan boshqa davlatlar bilan ikki tomonlama hamkorlikni rivojlantirishga alohida eʼtibor beradilar.

Ushbu Shartnoma Rossiya Federatsiyasining Kollektiv xavfsizlik shartnoma tashkiloti doirasida olgan majburiyatlariga zid boʻlmaydi.

Ushbu Shartnoma ratifikatsiya qilinishi lozim va uning ratifikatsiya qilinganligi toʻgʻrisidagi yorliqlar almashishi kuni kuchga kiradi.

Ushbu Shartnoma Tomonlardan biri boshqa Tomonga yozma ravishda uning amal qilishini toʻxtatish niyati borligi toʻgʻrisida xabar bergan kundan 12 oy oʻtganga qadar kuchida qolaveradi.

Ushbu Shartnoma kuchga kirgan sanadan boshlab Oʻzbekiston Respublikasi bilan Rossiya Federatsiyasi oʻrtasida harbiy va harbiy-texnikaviy sohalarda har tomonlama hamkorlikni yanada chuqurlashtirish toʻgʻrisida Toshkentda 1999-yil 11-dekabrda imzolangan Shartnomaning 1 va 2-moddalari amal qilishini toʻxtatadi.

Moskva shahrida 2005-yil 14-noyabrda ikki nusxada, har biri oʻzbek va rus tillarida tuzildi, ikkala matn ham bir xil kuchga ega.