Oʻzbekiston Respublikasi Vazirlar Mahkamasining taklifini koʻrib chiqib, Oʻzbekiston Respublikasi Oliy Majlisi qaror qiladi:

Birlashgan Millatlar Tashkilotining Transmilliy uyushgan jinoyatchilikka qarshi konvensiyasi quyidagi axborot, bildirish va bayonotlar eʼtiborga olingan holda ratifikatsiya qilinsin:

Oʻzbekiston Respublikasining 1994-yil 22-sentabrda qabul qilingan Qonuni bilan tasdiqlangan Oʻzbekiston Respublikasining Jinoyat kodeksi 29-moddasining toʻrtinchi qismiga muvofiq ikki yoki undan ortiq shaxsning birgalikda jinoiy faoliyat olib borish uchun oldindan bir guruhga birlashishi uyushgan guruh deb topiladi.

Oʻzbekiston Respublikasining Jinoyat kodeksi 15-moddasiga muvofiq jinoyatlar oʻz xususiyati va ijtimoiy xavflilik darajasiga koʻra: ijtimoiy xavfi katta boʻlmagan; uncha ogʻir boʻlmagan; ogʻir; oʻta ogʻir jinoyatlarga boʻlinadi.

Ijtimoiy xavfi katta boʻlmagan jinoyatlarga qasddan sodir etilib, qonunda uch yildan koʻp boʻlmagan muddatga ozodlikdan mahrum qilish tarzidagi jazo nazarda tutilgan jinoyatlar, shuningdek ehtiyotsizlik oqibatida sodir etilib, qonunda besh yildan koʻp boʻlmagan muddatga ozodlikdan mahrum qilish tarzidagi jazo nazarda tutilgan jinoyatlar kiradi.

Uncha ogʻir boʻlmagan jinoyatlarga qasddan sodir etilib, qonunda uch yildan ortiq, lekin besh yildan koʻp boʻlmagan muddatga ozodlikdan mahrum qilish tarzidagi jazo nazarda tutilgan jinoyatlar, shuningdek ehtiyotsizlik oqibatida sodir etilib, qonunda besh yildan ortiq muddatga ozodlikdan mahrum qilish tarzidagi jazo nazarda tutilgan jinoyatlar kiradi.

Ogʻir jinoyatlarga qasddan sodir etilib, qonunda besh yildan ortiq, lekin oʻn yildan koʻp boʻlmagan muddatga ozodlikdan mahrum qilish jazosi nazarda tutilgan jinoyatlar kiradi.

Oʻta ogʻir jinoyatlarga qasddan sodir etilib, qonunda oʻn yildan ortiq muddatga ozodlikdan mahrum qilish yoki oʻlim jazosi nazarda tutilgan jinoyatlar kiradi.

Jazo turi sifatida mol-mulkni musodara qilish Oʻzbekiston Respublikasining 2001-yil 29-avgustda qabul qilingan Qonuniga muvofiq Jinoyat kodeksidan chiqarib tashlangan.

Oʻzbekiston Respublikasining Jinoyat-protsessual kodeksi 284-moddasiga koʻra jinoyat narsasi boʻlgan mol-mulk, basharti avvalgi egasiga qaytarib berilishi lozim boʻlmasa, sud hukmi bilan davlat egaligiga oʻtkaziladi.

Oʻzbekiston Respublikasi ushbu bilan maʼlum qiladiki, Oʻzbekiston Respublikasining Jinoyat kodeksiga muvofiq tavsiflash belgilari va ayrim turdagi jinoyatlar boʻyicha javobgarlik darajasiga koʻra uyushgan guruh tomonidan yoki uning manfaatlarini koʻzlab sodir etilgan jinoyatlar ogʻir yoki oʻta ogʻir jinoyat toifalariga kiritiladi.

Oʻzbekiston Respublikasining 1996-yil 25-aprelda qabul qilingan “Banklar va bank faoliyati toʻgʻrisida”gi Qonunining 38-moddasiga muvofiq jismoniy va yuridik shaxslarning operatsiyalari hamda hisobvaraqlariga doir maʼlumotnomalar mijozlarga, tashkilotlarning oʻziga, prokuror, sudlarga, surishtiruv va tergov organlariga quyidagi hollarda beriladi:

a) yuridik shaxslar va boshqa tashkilotlarning operatsiyalari hamda hisobvaraqlariga doir maʼlumotnomalar ana shu tashkilotlarning oʻziga, prokuror, sudlarga, jinoiy ish qoʻzgʻatilgan boʻlsa, surishtiruv va tergov organlariga beriladi;

b) jismoniy shaxslarning hisobvaraqlari va jamgʻarmalariga doir maʼlumotnomalar mijozlarning oʻziga va ularning qonuniy vakillariga; mijozlarning hisobvaraqlari va omonatlarida turgan pul mablagʻlari hamda boshqa qimmatbaho narsalar xatlanishi, ularga undiruv qaratilishi yoki mol-mulk musodara etilishi mumkin boʻlgan hollarda yuritilayotgan ishlar boʻyicha sudlarga, surishtiruv va tergov organlariga beriladi.

Oʻzbekiston Respublikasining qonun hujjatlarida yuridik shaxslarning jinoiy yoki maʼmuriy javobgarligi nazarda tutilmagan.

Oʻzbekiston Respublikasi tutib topshirish masalalarida mazkur Konvensiya qatnashchilari boʻlgan boshqa davlatlar bilan hamkorlik qilishda ushbu Konvensiyani huquqiy asos deb hisoblaydi. Biroq bu qoida Oʻzbekiston Respublikasining ushbu Konvensiya qatnashchisi boʻlgan alohida davlatlar bilan tutib topshirish toʻgʻrisida ikki tomonlama shartnomalar tuzish imkoniyatini istisno etmasligi lozim.

Oʻzbekiston Respublikasi tomonidan oʻzaro huquqiy yordam koʻrsatish toʻgʻrisidagi iltimoslarni qabul qilish va yo ularni bajarish, yoki bajarilishi uchun ularni vakolatli organlarga yuborishga masʼul markaziy organ sifatida Oʻzbekiston Respublikasining Bosh prokuraturasi belgilangan.

Oʻzbekiston Respublikasi maqbul til sifatida rus tilini belgilaydi.

Oʻzbekiston Respublikasi oʻzini ushbu Konvensiya 35-moddasining 2-bandi qoidalari bilan bogʻliq deb hisoblamaydi.