Oʻzbekiston Respublikasi Prezidentining “Ishlab chiqarishni modernizatsiyalash, texnik va texnologik qayta jihozlashni ragʻbatlantirishga oid qoʻshimcha chora-tadbirlar toʻgʻrisida” 2007-yil 14-martdagi PF-3860-sonli Farmoniga muvofiq:

1. Belgilansinki, Oʻzbekiston Respublikasi Prezidentining 2007-yil 14-martdagi PF-3860-sonli Farmoni 5-bandidagi qoidalar Oʻzbekiston Respublikasi Prezidentining “Neft va gaz konlarini razvedka qilish hamda ularni qazib chiqarishga bevosita xorijiy sarmoyalarni jalb etish chora-tadbirlari toʻgʻrisida” 2000-yil 28-apreldagi PF-2598-sonli Farmoni, shuningdek Oʻzbekiston Respublikasi Prezidenti va Hukumatining vaqtinchalik xarakterdagi alohida qarorlariga muvofiq bojxona toʻlovlari toʻlashdan ozod etish boʻyicha ilgari berilgan imtiyozlar muddati oʻtgandan soʻng tatbiq etilmaydi.

2. Oʻzbekiston Respublikasi Prezidentining baʼzi hujjatlariga ilovaga muvofiq oʻzgartish va qoʻshimchalar kiritilsin.

3. Mazkur Farmonning ijrosini nazorat qilish Oʻzbekiston Respublikasi Prezidentining Mamlakatni isloh qilish va yangilashning huquqiy bazasini takomillashtirish masalalari boʻyicha Davlat maslahatchisi xizmati (I.B. Abdullayev) zimmasiga yuklansin.

1. Oʻzbekiston Respublikasi Prezidentining “Kichik va oʻrta tadbirkorlikni rivojlantirishni ragʻbatlantirishga oid qoʻshimcha chora-tadbirlar toʻgʻrisida” 1997-yil 31-yanvardagi PF-1702-sonli Farmonining 5-bandi quyidagi tahrirda bayon etilsin:

“5. 1997-yilning 1-fevralidan boshlab kichik ishlab chiqarish korxonalari va lizing kompaniyalari jalb etiladigan xorijiy kreditlar hisobiga belgilangan tartibda tasdiqlanadigan roʻyxatga muvofiq olib kelinadigan texnologik uskunalar, shuningdek texnologik uskunalar yetkazib berish kontrakti shartlarida butlovchi buyumlar va ehtiyot qismlar yetkazib berish nazarda tutilgan taqdirda, ular uchun bojxona boji toʻlovlaridan ozod qilinsin”.

2. Oʻzbekiston Respublikasi Prezidentining “Investitsiya loyihalarini amalga oshirishni ragʻbatlantirish borasidagi qoʻshimcha chora-tadbirlar toʻgʻrisida” 1998-yil 19-yanvardagi PF-1919-sonli Farmonida:

a) 1-bandining birinchi xatboshi quyidagi tahrirda bayon etilsin:

“Oʻzbekiston Respublikasi hududiga belgilangan tartibda tasdiqlanadigan roʻyxatga muvofiq olib kelinadigan texnologik uskunalar, shuningdek texnologik uskunalar yetkazib berish kontrakti shartlarida butlovchi buyumlar va ehtiyot qismlar yetkazib berish nazarda tutilgan taqdirda, ular qoʻshilgan qiymat soligʻidan ozod etilsin”;

b) 2-bandining ikkinchi xatboshi quyidagi tahrirda bayon etilsin:

“Yangi korxonalarni tashkil etish, shuningdek ishlab turganlarini modernizatsiya qilish va texnik qayta jihozlash uchun belgilangan tartibda tasdiqlanadigan roʻyxatga muvofiq respublika hududiga olib kelinadigan texnologik uskunalar, shuningdek texnologik uskunalar yetkazib berish kontrakti shartlarida butlovchi buyumlar va ehtiyot qismlar yetkazib berish nazarda tutilgan taqdirda, ular qoʻshilgan qiymat soligʻidan ozod etilsin”.

3. Oʻzbekiston Respublikasi Prezidentining “Xususiy tadbirkorlik, kichik biznesni rivojlantirish chora-tadbirlari toʻgʻrisida” 1998-yil 9-apreldagi PF-1987-sonli Farmonining 3-bandi quyidagi tahrirda bayon etilsin:

“Kichik biznes korxonalari oʻzlari tashkil etayotgan ishlab chiqarish uchun belgilangan tartibda tasdiqlanadigan roʻyxatga muvofiq olib kelinadigan texnologik uskunalar, shuningdek texnologik uskunalar yetkazib berish kontrakti shartlarida butlovchi buyumlar va ehtiyot qismlar yetkazib berish nazarda tutilgan taqdirda, ular bojxona boji toʻlashdan ozod etilsin”.

4. Oʻzbekiston Respublikasi Prezidentining “Lizing faoliyatini rivojlantirishni yanada ragʻbatlantirish chora-tadbirlari toʻgʻrisida” 2002-yil 28-avgustdagi PF-3122-sonli Farmoni 1-bandining uchinchi xatboshi quyidagi tahrirda bayon etilsin:

“lizingga berish uchun Oʻzbekiston Respublikasi hududiga belgilangan tartibda tasdiqlanadigan roʻyxatga muvofiq olib kelinadigan texnologik uskunalar, shuningdek texnologik uskunalar yetkazib berish kontrakti shartlarida butlovchi buyumlar va ehtiyot qismlar yetkazib berish nazarda tutilgan taqdirda, bojxona toʻlovi va qoʻshilgan qiymat soligʻidan ozod qilinsin”.

5. Oʻzbekiston Respublikasi Prezidentining “2006 — 2008-yillarda Toʻqimachilik sanoati korxonalarini modernizatsiya qilish va texnikaviy qayta jihozlash dasturi toʻgʻrisida” 2006-yil 13-noyabrdagi PQ-510-sonli qarorining 5-bandi “kiritilgan korxonalar” soʻzidan soʻng “mazkur qarorda nazarda tutilgan loyihalar boʻyicha” soʻzlari bilan toʻldirilsin.