Kadrlar tayyorlash milliy dasturida belgilangan vazifalarni amalga oshirish, zamon talablariga javob beradigan yuqori malakali mutaxassislarni tayyorlashni tashkil etish, umumtaʼlim maktablari, akademik litsey va kasb-hunar kollejlarini oliy maʼlumotli pedagog kadrlar bilan taʼminlash, abituriyentlarga test sinovlaridan oʻtishda qulayliklar yaratish hamda oliy taʼlim muassasalariga iqtidorli va qobiliyatli yoshlarni tanlab olish maqsadida Vazirlar Mahkamasi qaror qiladi:

1. 2001/2002 oʻquv yilida:

bakalavrlar tayyorlash boʻyicha umumiy qabul soni 49500, shu jumladan 19800 davlat grantlari va 29700 toʻlov-kontrakt asosida belgilanib, ular oliy taʼlim muassasalari va taʼlim yoʻnalishlari boʻyicha 1-ilovaga* muvofiq;

magistrlar tayyorlash boʻyicha umumiy qabul soni 4200, shu jumladan 1400 davlat grantlari va 2800 toʻlov-kontrakt asosida belgilanib, ular oliy taʼlim muassasalari va mutaxassisliklar boʻyicha 2-ilovaga* muvofiq taqsimlansin.

2. 2001/2002 oʻquv yilida tibbiyot oliy taʼlim muassasalari huzurida tashkil etilgan 3 yillik oliy malakali hamshiralar tayyorlash boʻlimlariga umumiy qabul kvotalari 200, shu jumladan davlat grantlari boʻyicha 100 va toʻlov-kontrakt asosida 100 kvota belgilanib, ular respublika tibbiyot oliy taʼlim muassasalari boʻyicha 3-ilovaga* muvofiq taqsimlansin.

3. 2001/2002 oʻquv yilida Oʻzbekiston Respublikasi taʼlim muassasalariga qabul qilish boʻyicha Davlat komissiyasining tarkibi 4-ilovaga* muvofiq tasdiqlansin.

4. Oliy taʼlim muassasalariga ega boʻlgan vazirliklar va idoralar Davlat test markazi bilan birgalikda oʻzlariga qarashli taʼlim muassasalarida davlat grantlari va toʻlov-kontrakt asosidagi bakalavriat va magistratura boʻyicha oʻrinlar kvotasini taʼlim shakllari va tillari boʻyicha taqsimlash toʻgʻrisidagi takliflarni bir hafta muddatda Davlat komissiyasiga tasdiqlash uchun kiritsinlar.

5. Respublika umumtaʼlim maktablari, akademik litseylar va kasb-hunar kollejlarini oliy maʼlumotli oʻqituvchilar va pedagog-muhandislar bilan taʼminlash maqsadida 2001/2002 oʻquv yilidan boshlab Toshkent davlat pedagogika universiteti, Buxoro oziq-ovqat va yengil sanoat texnologiyasi instituti, Namangan muhandislik-pedagogika instituti, shuningdek Urganch, Qoraqalpoq, Andijon, Samarqand va Fargʻona davlat universitetlari tarkibida oʻrta maxsus maʼlumotga va tegishli taʼlim turi boʻyicha kamida uch yil amaliy pedagogik stajga ega boʻlgan pedagog kadrlarni davlat grantlari asosida test sinovlari orqali qabul qilish va bakalavriatda oʻqitish uchun maxsus sirtqi boʻlimlar ochilsin.

Belgilansinki, ushbu toifadagi pedagog kadrlarga oliy maʼlumot berish uchun bakalavr darajasiga moʻljallangan uch yillik oʻquv dasturlari ishlab chiqiladi va taʼlimning blokli tizimi joriy etiladi.

Oʻzbekiston Respublikasi Oliy va oʻrta maxsus taʼlim vazirligi 10 kun muddatda qayd etilgan oliy taʼlim muassasalarining maxsus sirtqi boʻlimlariga qabul kvotalari yuzasidan, ularning moddiy-texnika va oʻquv-metodik bazasi imkoniyatlarini hisobga olgan holda, hukumatning tegishli qarori loyihasini tayyorlasin va belgilangan tartibda tasdiqlash uchun Vazirlar Mahkamasiga kiritsin.

6. Oʻzbekiston Respublikasi Oliy va oʻrta maxsus taʼlim vazirligi Xalq taʼlimi vazirligi va Davlat test markazi bilan birgalikda:

ikki hafta muddatda pedagogika va kasbiy-pedagogik tayyorgarlik yoʻnalishlari boʻyicha uch yillik dasturlar asosida sirtqi boʻlimlarda bakalavrlar tayyorlash boʻyicha qabul qilish tartibi va qoidalari toʻgʻrisidagi nizomni ishlab chiqsin va belgilangan tartibda Davlat komissiyasiga tasdiqlash uchun kiritsin;

bir oy muddatda Davlat taʼlim standartlari talablari asosida uch yillik oʻquv rejalari va dasturlarini ishlab chiqsin va tasdiqlasin.

7. “Oʻzbekiston temir yoʻllari” davlat-aksiyadorlik kompaniyasi Qoraqalpogʻiston Respublikasi va Xorazm viloyatida yashayotgan va Toshkent shahri hamda viloyat markazlarida joylashgan oliy taʼlim muassasalariga oʻqishga kirish istagini bildirgan abituriyentlarni 10-iyuldan 10-avgustgacha boʻlgan muddatda, oliy taʼlim muassasalari qabul komissiyasiga taqdim etiladigan tasdiqlovchi hujjatlar asosida, tegishli manzilga bir marotaba borib kelishi uchun bepul temir yoʻl chiptalari bilan taʼminlasin.

Qoraqalpogʻiston Respublikasi Vazirlar Kengashi va Xorazm viloyati hokimligi “Oʻzbekiston temir yoʻllari” davlat-aksiyadorlik kompaniyasini abituriyentlarning soni va yoʻnalishlar haqidagi tasdiqlovchi maʼlumotlar bilan oʻz vaqtida taʼminlasinlar.

8. Davlat komissiyasiga, Vazirlar Mahkamasi bilan kelishilgan holda, oliy taʼlim muassasalari bakalavriati va magistraturasiga qabul qilish tartibi va qoidalari toʻgʻrisidagi nizomlar ilovalariga hamda test sinovlari natijalaridan kelib chiqib, toʻlov-kontrakt asosida belgilangan umumiy qabul kvotalari doirasida, qabul koʻrsatkichlariga zarur boʻlgan oʻzgartirishlar kiritishga ruxsat berilsin.

9. Oliy taʼlim muassasalarining toʻlov-kontrakt asosida kadrlar tayyorlashdan tushgan mablagʻlari, ulardan moddiy-texnika bazani mustahkamlash, oʻquv jarayonini oʻqitishning yangi vositalari bilan taʼminlash, oliy taʼlim muassasalari xodimlarini moddiy ragʻbatlantirish uchun maqsadli foydalanilgan taqdirda, istisno tariqasida, soliqlardan va Oʻzbekiston Respublikasi Moliya vazirligi huzuridagi budjetdan tashqari Pensiya jamgʻarmasi, Respublika yoʻl jamgʻarmasi, budjetdan tashqari Maktab taʼlimi jamgʻarmasiga majburiy ajratmalardan 2015-yil 1-yanvargacha ozod qilinsin.

10. Oʻzbekiston Respublikasi Moliya vazirligi 2001/2002 oʻquv yilida davlat grantlari asosida bakalavriat va magistraturaga hamda oliy malakali hamshiralar tayyorlash uchun belgilangan qabulni hisobga olgan holda budjetdan zarur mablagʻlar ajratilishini taʼminlasin.

11. Oʻzbekiston Respublikasi Vazirlar Mahkamasining “2000/2001 oʻquv yilida Oʻzbekiston Respublikasining oliy taʼlim muassasalariga qabul toʻgʻrisida” 2000-yil 8-iyundagi 222-son qarori oʻz kuchini yoʻqotgan deb hisoblansin.

12. Mazkur qarorning bajarilishini nazorat qilish Oʻzbekiston Respublikasi Bosh vazirining oʻrinbosari H.S.Karomatov zimmasiga yuklansin.