Oʻzbekiston Respublikasi Prezidentining “Xalq taʼlimi muassasalarini moliyalashtirish mexanizmini takomillashtirish toʻgʻrisida” 2007-yil 26-fevraldagi PF-3857-sonli Farmoni hamda Oʻzbekiston Respublikasi Prezidentining “Davlat budjetining gʻazna ijrosi tizimini yanada rivojlantirish chora-tadbirlari toʻgʻrisida” 2007-yil 28-fevraldagi PQ-594-sonli qaroriga muvofiq, shuningdek budjet mablagʻlaridan foydalanishda taʼlim muassasalarining mustaqilligini kengaytirish va masʼuliyatini oshirish boʻyicha chora-tadbirlarni amalga oshirishni taʼminlash maqsadida:

1. Oʻzbekiston Respublikasi Moliya vazirligi hamda Xalq taʼlimi vazirligining barcha umumtaʼlim maktablari (maktab-internatlari)ga belgilangan tartibda yuridik shaxs maqomini berish toʻgʻrisidagi taklifi qabul qilinsin.

2. Oʻzbekiston Respublikasi Moliya vazirligi hamda Xalq taʼlimi vazirligi umumtaʼlim maktablari (maktab-internatlari)ning amaldagi namunaviy shtatiga, oʻquvchilarning soniga qarab, ilovaga muvofiq, normativlar boʻyicha buxgalter lavozimini kiritsin va 2007-yilda ularni malakali mutaxassislar bilan toʻldirishni taʼminlasin.

3. Umumtaʼlim maktablari (maktab-internatlari) rahbarlari va buxgalterlari zimmasiga tegishli moliya tashkilotlarining xalq taʼlimi muassasalarini moliyalash boʻlimlari bilan birgalikda quyidagi vazifalarni amalga oshirish yuklatilsin:

pedagog xodimlar tarifikatsiyasini hisobga olgan holda umumtaʼlim maktablari (maktab-internatlari) shtat jadvali va xarajatlar smetasini tuzish va ularni moliya organlarida roʻyxatga olish;

belgilangan tartibda roʻyxatga olingan xarajatlar smetasini tovarlar va xizmatlar yetkazib berish boʻyicha shartnomalarni faqat Oʻzbekiston Respublikasi Moliya vazirligi gʻaznachiligining hududiy organlari orqali tuzishni hisobga olgan holda bajarish;

belgilangan standartlarga muvofiq umumtaʼlim maktabi (maktab-internati) buxgalterlik hisob-kitobi va hisobotini olib borish;

toʻlovlar, oylik maoshni belgilash va toʻlash, nafaqa hamda unga tenglashtirilgan boshqa toʻlovlarni oʻz vaqtida amalga oshirish, shuningdek xalq taʼlimi muassasalarida moddiy boyliklarning hisob-kitobini olib borish;

amaldagi qonun hujjatlariga muvofiq tasdiqlangan shtatlar, smeta va moliya intizomiga qatʼiy rioya qilishni taʼminlash.

4. Belgilab qoʻyilsinki:

yuridik shaxs maqomiga ega xalq taʼlimi muassasasi, shu jumladan umumtaʼlim maktablari Direktorlar fondining budjet mablagʻlarining bosh boshqaruvchisi mazkur muassasa rahbari hisoblanadi;

buxgalter shtat lavozimini toʻldirgunga qadar yuridik shaxs maqomiga ega umumtaʼlim maktablari (maktab-internatlari) rahbarlari begʻaraz shartnoma asosida buxgalterlik hisob-kitob vazifalarini yuritishni mutasaddi hududiy moliya organlariga topshirish huquqiga ega boʻladilar.

5. Oʻzbekiston Respublikasi Moliya vazirligi, Oʻzbekiston Respublikasi Xalq taʼlimi vazirligi, moliya organlari va xalq taʼlimi hududiy boʻlinmalari:

ikki oy muddatda umumtaʼlim maktablari (maktab-internatlari) shtat jadvali va xarajatlar smetasini mazkur qaror qoidalariga muvofiqlashtirilishini taʼminlasin;

2007-yilning 15-iyunidan kechiktirmay yuridik shaxs maqomiga ega barcha umumtaʼlim maktablari (maktab-internatlari) tomonidan Oʻzbekiston Respublikasi Moliya vazirligi Gʻaznachiligining mutasaddi hududiy boʻlinmalarida shaxsiy hisobraqamlarning ochilishini yakunlasin.

6. Quyidagi tartib belgilansin, unga muvofiq Oʻzbekiston Respublikasi Moliya vazirligi Gʻaznachiligining tuman (shahar) moliya organlari va boʻlinmalari yuridik shaxs maqomiga ega umumtaʼlim maktablari (maktab-internatlari)ni moliyalashtirish yilida moliyalashtirishga yoʻnaltirilgan davlat va budjetdan tashqari mablagʻlardan maqsadli foydalanish ustidan har chorakda nazoratni amalga oshirishlari shart.

7. Belgilansinki, umumtaʼlim maktablari (maktab-internatlar)ga buxgalterlar lavozimlarini kiritish va moddiy-masʼul shaxslar (kassirlar) uchun belgilangan ustama haqlar bilan bogʻliq xarajatlar 2007-yilgi Davlat budjetining “Taʼlim” boʻlimi boʻyicha tasdiqlangan xarajatlar doirasida budjet mablagʻlari hisobidan amalga oshiriladi.

8. Mazkur qarorning ijrosini nazorat qilish Oʻzbekiston Respublikasi Bosh vazirining oʻrinbosarlari R.S. Azimov va R.S. Qosimov zimmalariga yuklansin.