Oʻzbekiston Respublikasi Prezidentining “Oʻzbekiston Milliy teleradiokompaniyasi faoliyatini tashkil etish boʻyicha tadbirlar haqida” 2005-yil 27-dekabrdagi PQ-245-son qaroriga muvofiq hamda ishlab chiqarishning oʻziga xos xususiyatlarini va professional talablarni hisobga olgan holda Oʻzbekiston Milliy teleradiokompaniyasi ijodiy-ishlab chiqarish va muhandis-texnik xodimlari mehnatiga haq toʻlashni takomillashtirish, shuningdek, ularning kasb darajasini va malakasini oshirishi uchun ragʻbatlar yaratish maqsadida Vazirlar Mahkamasi qaror qiladi:

1. Mehnatga haq toʻlash boʻyicha yagona tarif setkasiga binoan hisoblab chiqilgan lavozim maoshlariga (koʻpaytiruvchi koeffitsiyentni inobatga olgan holda):

“Oʻzbekiston 24” ijodiy birlashmasi”, “Maʼrifat” ijodiy birlashmasi”, “Sport” ijodiy birlashmasi”, “Oʻzbektelefilm” davlat muassasalari, shuningdek, “Yoshlar” ijodiy birlashmasi” aksiyadorlik jamiyati hamda Oʻzbekiston Milliy teleradiokompaniyasi markaziy apparati xodimlari uchun — 1,15 miqdorida;

ishlab chiqarishning oʻziga xos xususiyatlariga va professional talablarga muvofiq Oʻzbekiston Milliy teleradiokompaniyasi hududiy boʻlinmalari xodimlari uchun — 1,1 miqdorida tarmoq koeffitsiyentlari joriy etilsin.

2. Belgilab qoʻyilsinki, Yagona tarif setkasi boʻyicha lavozim maoshlariga tarmoq koeffitsiyentlarini joriy etish Oʻzbekiston Milliy teleradiokompaniyasiga, uning tasarrufidagi korxonalar va tashkilotlarga, shuningdek, hududiy boʻlinmalariga ajratiladigan budjet mablagʻlari doirasida, shtatdagi xodimlar sonini maqbullashtirish va budjetdan tashqari mablagʻlar hisobiga amalga oshiriladi.

3. Oʻzbekiston Milliy teleradiokompaniyasi Oʻzbekiston Respublikasi Mehnat va aholini ijtimoiy muhofaza qilish vazirligi hamda Moliya vazirligi bilan kelishgan holda bir oy muddatda ishlab chiqarishning oʻziga xos xususiyatlarini va professional talablarni hisobga olib xodimlarni ragʻbatlantirishni nazarda tutuvchi Oʻzbekiston Milliy teleradiokompaniyasi tizimi xodimlari mehnatiga haq toʻlash tartibi va shartlari toʻgʻrisidagi nizomni ishlab chiqsin va tasdiqlasin.

4. Mazkur qarorning bajarilishini nazorat qilish Oʻzbekiston Respublikasi Bosh vazirining oʻrinbosarlari R.S. Azimov va A.N. Aripov zimmasiga yuklansin.