“Oʻzbekiston Respublikasida nogironlarni ijtimoiy himoya qilish toʻgʻrisida”gi Oʻzbekiston Respublikasi Qonuniga muvofiq shaxslarning ayrim toifalarini ijtimoiy himoya qilishni taʼminlash maqsadida hamda Vazirlar Mahkamasining “Avtomobil benziniga chakana narxlarning oʻzgarishi toʻgʻrisida” 2006-yil 30-iyundagi 127-son qarorini bajarish yuzasidan Vazirlar Mahkamasi qaror qiladi:

1. 2006-yil 1-noyabrdan boshlab avtomobil benzini sotib olish boʻyicha ilgari berilgan imtiyozlar oʻrniga shaxslarning ayrim toifalariga oylik pul kompensatsiyalari toʻlovlari joriy etilsin.

2. Avtomobil benzini sotib olish xarajatlarining bir qismi uchun shaxslarning ayrim toifalariga oylik pul kompensatsiyasi toʻlash tartibi toʻgʻrisidagi nizom 1-ilovaga muvofiq tasdiqlansin.

4. Oʻzbekiston Respublikasi Hukumatining 2-ilovaga muvofiq ayrim qarorlariga oʻzgartirishlar kiritilsin va baʼzilari oʻz kuchini yoʻqotgan deb hisoblansin.

5. Mazkur qarorning bajarilishini nazorat qilish Oʻzbekiston Respublikasi Bosh vazirining oʻrinbosari R.S. Azimov zimmasiga yuklansin.

1. Mazkur Nizom avtomobil benzini sotib olishga xarajatlarning bir qismi uchun oylik pul kompensatsiyasi olish (keyingi oʻrinlarda “oylik pul kompensatsiyasi” deb yuritiladi) huquqiga ega boʻlgan shaxslar toifasini belgilaydi va ularga bunday kompensatsiya toʻlash tartibini tartibga soladi.

2. Oylik pul kompensatsiyalari toʻlash avtomobil benzini sotib olish boʻyicha ilgari berilgan imtiyozlar oʻrniga 2006-yil 1-noyabrdan boshlab joriy etiladi.

3. Quyidagilar oylik pul kompensatsiyasi olish huquqiga egadir:

urush qatnashchilari va ularga tenglashtirilgan shaxslar mazkur Nizomga 1-ilovaga muvofiq;

urush faxriylari va ularga tenglashtirilgan shaxslar mazkur Nizomga 2-ilovaga muvofiq;

mehnatda mayib boʻlish va kasb kasalligi tufayli I va II guruh nogironlar;

I va II guruh bolalikdan nogironlar.

4. Oylik pul kompensatsiyasi toʻlovi uni olish huquqiga ega boʻlgan, Oʻzbekiston Respublikasi hududida doimiy yashaydigan, yengil avtomobil, motoaravacha yoki mototsiklga ega boʻlgan (keyingi oʻrinlarda “avtomototransport vositasi” deb yuritiladi) va ulardan foydalanadigan shaxslarga tayinlanadi.

5. Avtomototransport vositalaridan foydalanish huquqi ishonchnoma boʻyicha boshqa shaxsga berilganda oylik pul kompensatsiyasi olish huquqi yoʻqoladi.

6. Mazkur Nizomning 5-bandining amal qilishi, basharti sogʻligʻining holati boʻyicha avtomototransport haydash toʻgʻri kelmaydigan Ikkinchi jahon urushi nogironlari bilan doimiy ravishda birga yashaydigan, u bilan birga bir turar joy maydonida roʻyxatdan oʻtgan oila aʼzolari avtomototransportni ishonchnoma boʻyicha haydagan taqdirda ularga nisbatan tatbiq etilmaydi. Bunda oylik pul kompensatsiyasi toʻlash faqat ishonchnomaning amal qilish muddatiga tayinlanadi.

7. Oylik pul kompensatsiyasi toʻlovini tayinlash uchun bunga huquqi boʻlgan shaxs pensiyalar va nafaqalarni tayinlaydigan organlarga (Oʻzbekiston Respublikasi Moliya vazirligi huzuridagi budjetdan tashqari Pensiya jamgʻarmasi, Mudofaa vazirligi, Ichki ishlar vazirligi, Favqulodda vaziyatlar vazirligi, Davlat xavfsizlik xizmati, Davlat bojxona qoʻmitasi organlari) quyidagi hujjatlarni taqdim etishi zarur:

ariza;

ariza beruvchining pasporti nusxasi;

imtiyozga boʻlgan huquqlar toʻgʻrisidagi guvohnomalar nusxalari (urush qatnashchilari va nogironlari hamda ularga tenglashtirilgan shaxslar uchun);

Tibbiy-mehnat ekspert komissiyalarining maʼlumotnomalari nusxalari (mehnatda mayib boʻlish, kasb kasalligi tufayli nogironlar va bolalikdan nogironlar uchun);

ariza beruvchiga tegishli boʻlgan avtomototransport vositasi texnik pasportining Oʻzbekiston Respublikasi Ichki ishlar vazirligining Yoʻl harakati xavfsizligi davlat xizmati organlarida davriy texnik koʻrikdan oʻtganligi toʻgʻrisida belgi qoʻyilgan texnik pasporti nusxasi;

avtomototransport vositasi egasining haydovchilik guvohnomasi nusxasi yoki Ikkinchi jahon urushi nogironi bilan doimiy birga yashaydigan va u bilan bir turar joy maydonida roʻyxatdan oʻtgan oila aʼzosining haydovchilik guvohnomasi, pasporti nusxalari va u tomonidan avtomototransport vositasidan foydalanish huquqiga ishonchnoma.

8. Oylik pul kompensatsiyasini toʻlash barcha zarur hujjatlar mavjud boʻlgan taqdirda murojaat qilingan kundan boshlab tayinlanadi.

9. Barcha zarur hujjatlar bilan birgalikda ariza berilgandan keyin oylik pul kompensatsiyasi toʻlovini tayinlash toʻgʻrisidagi masala 5 ish kuni mobaynida koʻrib chiqiladi.

Bunda oylik pul kompensatsiyasi toʻgʻrisidagi ijobiy qaror oylik pul kompensatsiyasini tayinlaydigan organning (Oʻzbekiston Respublikasi Moliya vazirligi huzuridagi budjetdan tashqari Pensiya jamgʻarmasi, Milliy gvardiya, Mudofaa vazirligi, Ichki ishlar vazirligi, Favqulodda vaziyatlar vazirligi, Davlat xavfsizlik xizmati, Davlat bojxona qoʻmitasi organlari) farmoyishi bilan qabul qilinadi.

10. Oylik pul kompensatsiyasi toʻlovini tayinlash rad etilgan taqdirda oylik pul kompensatsiyasini tayinlaydigan organlar tegishli qaror qabul qilingandan keyin 3 ish kunida tegishli qarorni ariza beruvchining qoʻliga beradi yoki unga rad etish toʻgʻrisida pochta bildirishnomasini joʻnatadi (rad etish sabablari koʻrsatilgan holda) va ayni bir vaqtda barcha hujjatlarni qaytaradi.

11. Oylik pul kompensatsiyasini tayinlaydigan organlar tomonidan oylik pul kompensatsiyasi toʻlovni tayinlash rad etilishi toʻgʻrisidagi qaror:

ariza beruvchining maqomi oylik pul kompensatsiyasini olish huquqiga ega boʻlgan shaxslar toifasi maqomiga muvofiq boʻlmaganda;

foydalanilayotgan avtomototransport vositasi tipi yengil avtomobil, motoaravacha va mototsiklga muvofiq boʻlmaganda;

avtomototransport davriy davlat texnik koʻrigidan oʻtkazilmaganda;

mazkur Nizomning 7-bandida nazarda tutilgan hujjatlar toʻliq taqdim etilmaganda qabul qilinishi mumkin.

12. Oylik pul kompensatsiyasi toʻlovini tayinlash rad etilishi uchun asos boʻlib xizmat qilgan sabablar ariza beruvchi tomonidan bartaraf etilgan taqdirda ariza beruvchi takroran murojaat qilish huquqiga egadir.

Hujjatlarni takroran koʻrib chiqishda oylik pul kompensatsiyasini tayinlaydigan organ tomonidan ariza beruvchiga yozma shaklda ilgari bayon qilingan eʼtirozlar taqdim etilishiga yoʻl qoʻyilmaydi, ularning bartaraf etilishini tasdiqlaydigan hujjatlar bilan bogʻliq eʼtirozlarni taqdim etish bundan mustasno.

13. Oylik pul kompensatsiyasi toʻlovi summasining miqdori jismoniy shaxslardan yonilgʻi isteʼmoli uchun olinadigan soliq hisobga olinmagan holda chakana savdodagi avtomobil benzini (chakana savdoda eng koʻp tarqalgan) muayyan markasining qirq litri qiymatining ellik foizidan kelib chiqib Oʻzbekiston Respublikasi Vazirlar Mahkamasining qarorlari bilan belgilanadi.

14. Oylik pul kompensatsiyasi toʻlovi koʻrsatib oʻtilgan shaxslarning yashash joyi boʻyicha pensiyalar va nafaqalarni tayinlaydigan organlar tomonidan pensiyalar va nafaqalarni toʻlash uchun belgilangan muddatlarda, alohida qaydnomalar boʻyicha aloqa boʻlimi yoki banklarning boʻlimlari orqali amalga oshiriladi.

15. Avtomototransportning davriy davlat texnik koʻrikdan oʻtganligi toʻgʻrisida texnik pasportda tegishli belgi mavjud boʻlmagan taqdirda oylik pul kompensatsiyasi toʻlash oylik pul kompensatsiya toʻlovini tayinlaydigan organlar tomonidan toʻxtatib qoʻyiladi.

Oylik pul kompensatsiyasi toʻlash avtomototransport egasi tomonidan ariza berilgan va davriy davlat texnik koʻrikdan oʻtganlik toʻgʻrisida texnik pasportda belgi qoʻyilgan paytdan boshlab tiklanadi.

Oylik pul kompensatsiyasi toʻlovi tayinlangan avtomototransport vositasi egalari oylik pul kompensatsiyasi toʻlovini tayinlaydigan organlarni davriy davlat texnik koʻrigidan oʻtilgandan keyin 10 kun mobaynida xabardor qilishi shart.

Agar davriy texnik koʻrikdan oʻtganlik toʻgʻrisidagi hujjat ikki haftadan ortiq kechikib taqdim etilgan taqdirda tegishli davr uchun oylik pul kompensatsiyasi toʻlanmaydi.

16. Avtomototransport vositasi egasi oylik pul kompensatsiya toʻlovini tayinlaydigan organga:

yashash joyi oʻzgarganligi;

avtomototransport vositasi sotilganligi;

yoʻl harakati xavfsizligi qoidalari buzilganligi uchun haydovchilik guvohnomasidan mahrum etilganligi holatlari toʻgʻrisida xabar berishi shart.

Oylik pul kompensatsiyasi olish huquqiga ega boʻlgan avtomototransport vositasi egasi vafot etgan taqdirda tegishli bildirishnoma uning qarindoshlari tomonidan taqdim etilishi kerak.

Yuqorida sanab oʻtilgan holatlarda kompensatsiya toʻlash toʻxtatiladi.

Koʻrsatib oʻtilgan axborotni yashirgan va oylik pul kompensatsiyasini noqonuniy olgan avtomototransport vositasi egasidan tegishli summa qonun hujjatlarida belgilangan tartibda undirib olinadi.

17. Agar oylik pul kompensatsiyasini asoslanmagan toʻlash oylik pul kompensatsiyasini tayinlaydigan yoki toʻlaydigan organning xodimi aybi bilan yuz bergan taqdirda ushbu pul mablagʻlari aybdor shaxsning hisobiga qoplanadi.

18. Oylik pul kompensatsiyasini toʻlaydigan vazirliklar va idoralarning hududiy boʻlinmalari, har oyda, 3-kundan kechikmay “Oʻzneftmahsulot” aksiyadorlik kompaniyasining unitar korxonalariga (neft bazalariga) neft bazalari tomonidan xizmat koʻrsatiladigan hududlar boʻyicha, oylik pul kompensatsiyasini olish huquqiga ega boʻlgan shaxslar sonini koʻrsatgan holda keyingi oyga oylik pul kompensatsiyalari summasini toʻlash uchun moliyaviy mablagʻlar hajmida (kompensatsiyalar yetkazib berilishi uchun aloqa boʻlimlari yoki banklarning boʻlimlari xarajatlari hisobga olingan holda) hisob-kitoblar bilan asoslangan ehtiyojga boʻlgan buyurtmanomani taqdim etadilar.

19. “Oʻzneftmahsulot” aksiyadorlik jamiyatining “Neftbaza” MChJlari har oyda 10-kundan kechikmay oylik pul kompensatsiyasi toʻlaydigan vazirliklar va idoralarning hududiy boʻlinmalarining bank hisob raqamlariga oylik pul kompensatsiyasi toʻlash uchun moliyaviy mablagʻlarning zarur miqdorini oʻtkazadilar.

20. Oylik pul kompensatsiyasi olish huquqiga ega boʻlgan shaxslar reyestri oylik pul kompensatsiyasi toʻlaydigan vazirliklar va idoralarning hududiy boʻlinmalari tomonidan amalga oshiriladi va ikki hafta mobaynida har bir kalendar yil choragining 1-kuni holati boʻyicha “Oʻzneftmahsulot” aksiyadorlik kompaniyasining unitar korxonalariga (neft bazalariga) taqdim etiladi.

21. Oylik pul kompensatsiyasi toʻlaydigan vazirliklar va idoralarning hududiy boʻlinmalari oylik pul kompensatsiyasi olish huquqiga ega boʻlgan shaxslar reyestrlarini topshirish bilan bir vaqtda “Oʻzneftmahsulot” aksiyadorlik kompaniyasining unitar korxonalariga (neft bazalariga) oldingi yil choragi uchun amalda toʻlangan toʻlovlar toʻgʻrisida hisobotlar taqdim etadi.

22. Mazkur Nizom talablari buzilishida aybdor boʻlgan shaxslar qonun hujjatlarida belgilangan tartibda javob beradi.

Ikkinchi jahon urushi, boshqa urushlar davrida, shuningdek Oʻzbekiston Respublikasini himoya qilishda harakatdagi armiya tarkibiga kirgan harbiy qismlar, shtablar va muassasalarda xizmatni oʻtagan harbiy xizmatchilar oylik pul kompensatsiyasi olish huquqiga ega boʻlgan urush qatnashchilari hisoblanadi.

Quyidagi shaxslar urush qatnashchilariga tenglashtiriladi:

a) 1941-yil 22-iyundan 1954-yil 31-dekabrgacha boʻlgan davrda qiruvchi batalonlar, vzvodlar va xalqni himoya qilish otryadlari tarkibida sobiq SSSR hududida janglarda qatnashgan shaxslar;

b) Ikkinchi jahon urushi yillarida partizan otryadlarida va qoʻshilmalarida boʻlgan yoxud yashirin ishlar bilan shugʻullangan shaxslar;

v) Ikkinchi jahon urushi yillarida harakatdagi armiya tarkibida yoki harbiy harakatlar mintaqalarida xizmatni oʻtagan sobiq SSSRning Ichki ishlar vazirligi organlari va Davlat xavfsizligi qoʻmitasi organlarining boshliqlar va oddiy askarlar tarkibiga kiruvchi shaxslar;

g) Ikkinchi jahon urushi davrida balogʻat yoshiga yetgunga qadar polk oʻgʻli yoki kichik matros sifatida harakatdagi armiya va flotning qismlari va tuzilmalari tarkibida boʻlgan shaxslar;

d) Ikkinchi jahon urushi yillarida harbiy harakatlar mintaqalarida temir yoʻllarning front yaqinida joylashgan uchastkalarida, mudofaa chizigʻi inshootlarida, harbiy-dengiz bazalarida, aerodromlarda va boshqa harbiy obyektlardagi ishlarda qatnashgan ishchilar;

e) Ikkinchi jahon urushi yillarida harakatdagi armiya tarkibida ishlagan erkin yollanganlar tarkibidan boʻlgan shaxslar;

j) 1956-yil 24-oktabrdan 1956-yil 10-noyabrgacha boʻlgan davrda Vengriyadagi jangovar harakatlar davrida ushbu mamlakat hududida boʻlgan harbiy qismlar, shtablar va muassasalarda xizmatni oʻtagan harbiy xizmatchilar.

Ikkinchi jahon urushi, boshqa urushlar davrida, shuningdek Oʻzbekiston Respublikasini himoya qilishda harakatdagi armiya tarkibiga kirgan harbiy qismlar, shtablar va muassasalarda xizmatni oʻtashda yarador, mayib boʻlish, kontuziyaga uchrash yoki kasal boʻlish oqibatida nogiron boʻlib qolgan harbiy xizmatchilar oylik pul kompensatsiyasini olish huquqiga ega boʻlgan urush nogironlari hisoblanadi.

Quyidagi shaxslar urush nogironlariga tenglashtiriladi:

a) sobiq SSSR va Oʻzbekiston Respublikasi chegaralarini himoya qilishda yarador, mayib boʻlish, kontuziyaga uchrash yoki kasal boʻlish oqibatida nogiron boʻlib qolgan harbiy xizmatchilar;

b) 1941-yil 22-iyundan 1954-yil 31-dekabrgacha boʻlgan davrda sobiq SSSR hududida harakat qilgan qiruvchi batalonlar, vzvodlar va xalqni himoya qilish otryadlarida boʻlgan davrda yarador, mayib boʻlish, kontuziyaga uchrash yoki kasal boʻlish sababli nogiron boʻlib qolgan shaxslar;

v) front yaqinida joylashgan temir yoʻl uchastkalari, mudofaa chizigʻi inshootlari, harbiy-dengiz bazalari, aerodromlar va boshqa harbiy obyektlardagi ishlarda qatnashgan hamda Ikkinchi jahon urushi yillarida harbiy harakatlar mintaqalarida yarador, mayib boʻlish, kontuziyaga uchrash yoki kasal boʻlish sababli nogiron boʻlib qolgan xodimlar;

g) Ikkinchi jahon urushi yillarida partizan otryadlari va qoʻshilmalarida yoxud yashirin ishlarda boʻlish davrida yarador, mayib boʻlish, kontuziyaga uchrash yoki kasal boʻlish oqibatida nogiron boʻlib qolgan shaxslar;

d) Ikkinchi jahon urushi yillarida harakatdagi armiya tarkibida ishlagan davrda yarador, mayib boʻlish, kontuziyaga uchrash yoki kasal boʻlish oqibatida nogiron boʻlib qolgan erkin yollanganlar tarkibiga kirgan shaxslar;

e) ichki ishlar organlari va davlat xavfsizlik xizmatining boshliqlar va oddiy askarlar tarkibiga kiradigan, jangovar harakatlar olib borilgan mamlakatlarda tinchlik oʻrnatish kuchlarida qatnashish hamda baynalmilal burchni bajarish bilan bogʻliq yarador, mayib boʻlish, kontuziyaga uchrash yoki kasal boʻlish oqibatida nogiron boʻlib qolgan harbiy xizmatchilari;

j) ichki ishlar organlari va davlat xavfsizlik xizmatining boshliqlar va oddiy askarlar tarkibiga kiradigan, harbiy xizmat majburiyatini bajarish (xizmat vazifasini oʻtash) bilan bogʻliq yarador, mayib boʻlish, kontuziyaga uchrash yoki kasal boʻlish oqibatida nogiron boʻlib qolgan harbiy xizmatchilari;

z) oʻquv yoki sinov yigʻinlariga chaqirilgan hamda ushbu yigʻinlarni oʻtash davrida xizmat majburiyatlarini bajarish bilan bogʻliq yarador, mayib boʻlish, kontuziyaga uchrash yoki kasal boʻlish oqibatida nogiron boʻlib qolgan harbiy xizmatga majburlar.

1. Vazirlar Mahkamasining 2003-yil 1-iyuldagi 296-son qarori (Oʻzbekiston Respublikasi QT, 2003-y., 7-son, 54-modda) bilan tasdiqlangan Neft mahsulotlari sotuvchi korxonalarning cheklangan ustamalarini shakllantirish toʻgʻrisidagi nizomning 9-bandi birinchi xatboshining ikkinchi jumlasi quyidagi tahrirda bayon qilinsin:

“Bunda Narxlarni boshqarish jamgʻarmasiga oʻtkazilishi kerak boʻlgan summa avtomobil benzini sotib olish xarajatlarining bir qismi uchun fuqarolarning ayrim toifalariga pul kompensatsiyasi toʻlaydigan organlar hisobiga oʻtkazilgan pul mablagʻlari summasiga kamaytiriladi”.

2. Vazirlar Mahkamasining “Energiya resurslari narxlarini davlat tomonidan boshqarish toʻgʻrisida” 1992-yil 16-oktabrdagi 474-son qarorining 4-bandi oʻz kuchini yoʻqotgan deb hisoblansin.

3. Vazirlar Mahkamasining “Yoqilgʻi va energiya uchun cheklangan ulgurji va chakana narxlarning oʻzgarishi toʻgʻrisida” 1993-yil 27-maydagi 258-son qarorining 3-bandi oʻz kuchini yoʻqotgan deb hisoblansin.