“O‘zbekiston Respublikasi fuqaroligi to‘g‘risida”gi O‘zbekiston Respublikasi Qonuniga muvofiq, shuningdek O‘zbekiston Respublikasi fuqarolarining pasportlari va 16 yoshga to‘lmagan O‘zbekiston Respublikasi fuqarolarining guvohnomalari blankalari tayyorlashni moddiy-texnik ta’minlash va tashkil etish tartibini takomillashtirish maqsadida Vazirlar Mahkamasi qaror qiladi:

1. Belgilansinki, O‘zbekiston Respublikasi fuqarolari pasportlari va 16 yoshga to‘lmagan O‘zbekiston Respublikasi fuqarolari guvohnomalarining har yili tayyorlanadigan blankalari umumiy soni qonun hujjatlarida belgilangan yoshga to‘lgan shaxslarning joriy statistik hisobi ma’lumotlari bo‘yicha prognozlardan hamda O‘zbekiston Respublikasi fuqarolari pasportlari va guvohnomalarini olish va almashtirish uchun boshqa asoslardan kelib chiqib hisoblab chiqiladi.

2. O‘zbekiston Respublikasi fuqarolari pasportlari va 16 yoshga to‘lmagan O‘zbekiston Respublikasi fuqarolari guvohnomalarini tayyorlashni tashkil etish tartibi belgilansin, bunda:

O‘zbekiston Respublikasi Davlat statistika qo‘mitasi har yili 1-aprelgacha O‘zbekiston Respublikasi Ichki ishlar vazirligiga O‘zbekiston Respublikasi fuqarosi pasportini olish yoki almashtirish uchun asos hisoblanadigan 16, 25 va 45 yoshga to‘lgan shaxslar soni to‘g‘risidagi ma’lumotlarni taqdim etadi;

O‘zbekiston Respublikasi Adliya vazirligi har yili 1-aprelgacha Ichki ishlar vazirligiga oldingi ikki yil uchun O‘zbekiston Respublikasining barcha fuqarolik holati dalolatnomalarini yozish barcha organlari bo‘yicha ro‘yxatdan o‘tkazilgan nikohlar, ajralishlar soni va familiyaning o‘zgarishi hamda ismi va otasining ismi to‘g‘risidagi ma’lumotlarni taqdim etadi;

O‘zbekiston Respublikasi Ichki ishlar vazirligi oldingi davrdagi faoliyat tahliliga hamda O‘zbekiston Respublikasi Davlat statistika qo‘mitasi va Adliya vazirligidan olingan ma’lumotlarga muvofiq har yili belgilangan muddatlarda O‘zbekiston Respublikasi Moliya vazirligiga pasportlar va guvohnomalar blankalari tayyorlashga bo‘lgan ehtiyoj prognozini taqdim etadi;

O‘zbekiston Respublikasi Moliya vazirligi Ichki ishlar vazirligining asoslangan hisob-kitoblari bo‘yicha har yili pasportlar va guvohnomalar blankalari tayyorlashni moddiy-texnik ta’minlash va tashkil etish uchun respublika budjetidan mablag‘ ajratilishini nazarda tutadi;

“Davlat belgisi” davlat-ishlab chiqarish birlashmasi O‘zbekiston Respublikasi Ichki ishlar vazirligining buyurtmanomalari bo‘yicha pasportlar va guvohnomalar blankalari o‘z vaqtida va sifatli tayyorlanishini ta’minlaydi.

3. O‘zbekiston Respublikasi Ichki ishlar vazirligi har yili ajratiladigan budjet mablag‘lari va budjetdan tashqari mablag‘lar doirasida:

pasportlar va guvohnomalarni rasmiylashtirish va chop etish uchun maxsus asbob-uskunalar;

192 ming AQSh dollariga va 51,1 ming yevroga pasportlar va guvohnomalarni rasmiylashtirishda foydalaniladigan ehtiyot qismlar va maxsus materiallar sotib olsin.

4. O‘zbekiston Respublikasi Vazirlar Mahkamasining “Milliy pasportlar tayyorlashning moddiy-texnik va moliyaviy masalalari hamda O‘zbekiston Respublikasi fuqarolarini ular bilan ta’minlash to‘g‘risida” 1996-yil 21-avgustdagi 293-son qarori o‘z kuchini yo‘qotgan deb hisoblansin.

5. Mazkur qarorning bajarilishini nazorat qilish O‘zbekiston Respublikasi Bosh vazirining o‘rinbosari R.S. Azimov zimmasiga yuklansin.