Umumtaʼlim maktablari uchun darsliklar va oʻquv-metodik qoʻllanmalarni moliyaviy mablagʻlarni birlashtirish yoʻli bilan budjet va budjetdan tashqari mablagʻlar hisobidan chop etish va yetkazib berish barqaror hamda uzluksiz moliyalashtirilishini taʼminlash, shuningdek ulardan maqsadli foydalanishni samarali boshqarish va amalda nazorat qilish maqsadida:

1. Oʻzbekiston Respublikasi Xalq taʼlimi vazirligi, Moliya vazirligi, “Kamolot” Oʻzbekiston yoshlar ijtimoiy harakati, Respublika “Mahalla” hayriya jamgʻarmasi, Umumtaʼlim maktablarining pedagoglar jamoatchiligi va oʻquvchilarning ota-onalari qoʻmitalarining yuridik shaxs maqomi bilan Oʻzbekiston Respublikasi Moliya vazirligi huzurida budjetdan tashqari Respublika maqsadli kitob jamgʻarmasi (keyingi oʻrinlarda Jamgʻarma deb yuritiladi) tashkil etish toʻgʻrisidagi taklifi qabul qilinsin.

2. Quyidagilar Jamgʻarmaning asosiy vazifalari etib belgilansin:

umumtaʼlim maktablari oʻquvchilari va oʻqituvchilarini darsliklar hamda oʻquv-metodik qoʻllanmalar, oʻrta maxsus, kasb-hunar taʼlimi muassasalari oʻquvchilari va oʻqituvchilarini chet tillari boʻyicha darsliklar va oʻquv-metodik qoʻllanmalar bilan taʼminlash uchun moʻljallangan budjet va homiylik mablagʻlari, xalqaro moliya institutlarining kredit va grant mablagʻlari, darsliklarning ijara toʻlovlarini jamlash, ushbu mablagʻlardan samarali foydalanishni tashkil etish;

umumtaʼlim maktablari kutubxona fondlari, shu jumladan, ijara tizimi asosida darsliklar bilan oʻquvchilarni taʼminlash uchun darsliklar va oʻquv-metodik qoʻllanmalarni sotib olish va yetkazib berishni moliyalashtirish;

umumiy oʻrta va oʻrta maxsus, kasb-hunar taʼlimi muassasalarining oʻquvchilari va oʻqituvchilarini taʼminlash uchun chet tillari boʻyicha darsliklar va oʻquv-metodik qoʻllanmalarni sotib olish va yetkazib berishni bepul asosda moliyalashtirish;

nashriyotlar, bosmaxonalar va kitob savdosi bilan shugʻullanuvchi korxonalarga qisqa muddatli maqsadli ssuda ajratish yoʻli bilan koʻmaklashish;

Jamgʻarma mablagʻlari tushumi, ulardan maqsadli va samarali foydalanish ustidan monitoringni amalga oshirish.

3. Respublika maqsadli kitob jamgʻarmasi Vasiylik kengashining tarkibi unga quyidagi asosiy vazifa va funksiyalarni yuklagan holda 1-ilovaga* muvofiq maʼqullansin:

Oʻzbekiston Respublikasi Xalq taʼlimi vazirligi hamda Oliy va oʻrta maxsus taʼlim vazirligining Oʻrta maxsus, kasb-hunar taʼlimi markazi tomonidan keyingi oʻquv yili uchun taqdim etilgan darsliklar va oʻquv-metodik qoʻllanmalarni nashrdan chiqarish va sotish kvotalarini tasdiqlash;

Jamgʻarmaning foydalanish manba va yoʻnalishlari boʻyicha daromad va xarajatlarning prognoz parametrlari, shuningdek Jamgʻarma ijroiya direksiyasi tomonidan kiritiladigan Jamgʻarma tushumlari va mablagʻlaridan foydalanish toʻgʻrisidagi hisobotlarni tasdiqlash;

Jamgʻarma oldiga qoʻyilgan masalalarni hal etishga manfaatdor vazirliklar, idoralar, jamoatchilik va boshqa nodavlat tashkilotlarni jalb etish;

Jamgʻarma ijroiya direksiyasi faoliyatini Jamgʻarma mablagʻlaridan maqsadli va samarali foydalanish qismida nazorat qilish.

4. Quyidagilar tasdiqlansin:

Respublika maqsadli kitob jamgʻarmasi ijroiya direksiyasining tashkiliy tuzilmasi boshqaruv xodimlari cheklangan soni 11 nafar, va uning hududiy boʻlinmalarida, Qoraqalpogʻiston Respublikasi Moliya vazirligi, viloyatlar moliya boshqarmalarida va Toshkent shahrida xodimlarning chegaralangan soniga 2-ilovaga* muvofiq yana qoʻshimcha 1 kishi;

Oʻzbekiston Respublikasi Moliya vazirligi huzuridagi budjetdan tashqari Respublika maqsadli kitob jamgʻarmasining mablagʻlarini shakllantirish va foydalanish tartib-qoidalari toʻgʻrisidagi nizom 3-ilovaga muvofiq.

Belgilab qoʻyilsinki, Jamgʻarmaning ijrochi direktori Oʻzbekiston Respublikasi Vazirlar Mahkamasi tomonidan Jamgʻarmaning Vasiylik kengashi tavsiyasi bilan lavozimiga tayinlanadi va undan ozod etiladi.

zarur hollarda, Jamgʻarmaning Vasiylik kengashiga Oʻzbekiston Respublikasi moliya vaziri bilan kelishib, Jamgʻarma ijroiya direksiyasining tashkiliy tuzilmasiga, tasdiqlangan umumiy xodimlar soni doirasida oʻzgartirish kiritish huquqi berilsin.

5. Quyidagilar Jamgʻarma mablagʻlarini shakllantirish manbalari etib belgilansin:

budjet mablagʻlari;

darsliklarni ijaraga berishdan tushadigan toʻlovlar;

xalqaro tashkilotlar va moliyaviy institutlar hamda Oʻzbekiston Respublikasi rezidentlari va norezidentlari boʻlgan yuridik va jismoniy shaxslarning grantlari, kreditlari va homiylik yordamlari;

Jamgʻarmaning vaqtincha boʻsh mablagʻlarini joylashtirishdan olingan mablagʻlar;

Qonun hujjatlarida taqiqlanmagan boshqa tushumlar.

Oʻzbekiston Respublikasi Xalq taʼlimi vazirligi ijara tizimini tadbiq etish boʻyicha tajriba doirasida Oʻzbekiston Respublikasi Xalq taʼlimi vazirligi tomonidan ochilgan maktablarning maxsus depozit subhisob raqamlarida toʻplangan mablagʻlarni belgilangan tartibda Jamgʻarmaga oʻtkazsin.

6. Oʻzbekiston Respublikasi Moliya vazirligi 2006-yildan boshlab Davlat budjeti parametrlarini shakllantirishda birinchi sinf oʻquvchilarini, “Mehribonlik” uylari, ixtisoslashtirilgan maktablar va maktab internatlarining tarbiyalanuvchilarini, kam taʼminlangan oilalarning bolalarini mazkur xarajatlarni Jamgʻarma hisobidan moliyalashtirish orqali darsliklar bilan bepul taʼminlash, shuningdek ijara asosida darsliklar bilan birlamchi taʼminlash tizimiga mablagʻlar ajratishni nazarda tutsin.

7. Jamgʻarma yagona ijtimoiy toʻlov hamda bojxona toʻlovlarini hisobga olmagan holda budjetga tushadigan barcha turdagi soliqlar va yigʻimlar, shuningdek davlat maqsadli fondlariga majburiy toʻlovlardan ozod etilsin.

8. Mazkur qarorning ijrosini nazorat qilish Oʻzbekiston Respublikasi Bosh vazirining birinchi oʻrinbosari R.S. Azimov va Oʻzbekiston Respublikasi Bosh vazirining oʻrinbosari A.I. Ikromov zimmasiga yuklansin.

1. Mazkur Nizom Oʻzbekiston Respublikasi moliya vazirligi qoshidagi budjetdan tashqari Respublika maqsadli kitob jamgʻarmasi (keyingi oʻrinlarda jamgʻarma) faoliyatining maqsadi va asosiy vazifalari, Jamgʻarmani boshqarish tartibi, uning mablagʻlarini shakllantirish manbalari va foydalanish yoʻnalishlarini belgilaydi.

2. Jamgʻarma respublika umumtaʼlim maktablari, shuningdek oʻrta maxsus, kasb-hunar taʼlimi muassasalarining kutubxona fondlari uchun chet tillari boʻyicha darsliklar va oʻquv-metodik qoʻllanmalar kutubxona jamgʻarmalarini darsliklar va oʻquv-metodik qoʻllanmalar bilan taʼminlashga yoʻnaltirilgan maqsadli moliya resurslarini jamlaydi.

3. Jamgʻarmaning ijroiya direksiyasi jamgʻarma mablagʻlarini tasarruf etuvchi hisoblanadi.

4. Jamgʻarma yuridik shaxs hisoblanadi, mustaqil balansga, Oʻzbekiston Respublikasi Moliya vazirligi Gʻaznachiligida shaxsiy gʻazna hisobvaraqlariga, Oʻzbekiston Respublikasining tijorat banklarida xorijiy valyutada talab qilib olinadigan depozit hisobvaragʻiga, shuningdek oʻz nomi yozilgan Oʻzbekiston Respublikasi Davlat gerbining tasviri tushirilgan muhrga ega.

5. Jamgʻarma faoliyatining maqsadi budjet va budjetdan tashqari manbalar hisobiga moliyaviy mablagʻlarni birlashtirish yoʻli orqali umumtaʼlim maktablarining kutubxona fondlari uchun darsliklar hamda oʻquv-metodik qoʻllanmalarni va oʻrta maxsus, kasb-hunar taʼlimi muassasalarining kutubxona fondlari uchun chet tillari boʻyicha darsliklar hamda oʻquv-metodik qoʻllanmalarni sotib olish va yetkazib berishni barqaror va muttasil moliyalashtirishni taʼminlash hisoblanadi.

6. Jamgʻarmaning asosiy vazifalari:

Umumtaʼlim maktablari va oʻrta maxsus, kasb-hunar taʼlimi muassasalari uchun chet tillari boʻyicha darsliklar va oʻquv-metodik qoʻllanmalar oʻquvchilarini darsliklar va oʻquv-metodik qoʻllanmalar bilan taʼminlashga qaratilgan budjet va homiylik mablagʻlari, xalqaro moliya institutlari kreditlari va grantlari, darsliklar uchun belgilangan ijara toʻlovlarini jamlaydi, ushbu mablagʻlarni samarali boshqarishni tashkil etish;

umumtaʼlim maktablari kutubxona jamgʻarmalari uchun darsliklar va oʻquv-metodik qoʻllanmalarni xarid qilish va yetkazib berish, shu jumladan oʻquvchilarni ijara tizimi asosida darsliklar bilan taʼminlashni moliyalashtirish;

umumiy oʻrta va oʻrta maxsus, kasb-hunar taʼlimi muassasalarining oʻquvchilari va oʻqituvchilarini taʼminlash uchun chet tillari boʻyicha darsliklar va oʻquv-metodik qoʻllanmalarni sotib olish va yetkazib berishni bepul asosda moliyalashtirish;

nashriyotlar, bosmaxonalar va kitob savdosi tashkilotlariga darsliklarni ochiq savdosini rivojlantirishida qisqa muddatli maqsadli ssudalar ajratish orqali yordam koʻrsatish;

Jamgʻarma moliyalari kirimlari, ularni maqsadli va samarali foydalanilishi ustidan monitoring va nazoratni amalga oshirish hisoblanadi.

7. Jamgʻarmani boshqarishning yuqori organi Jamgʻarma Vasiylik kengashi hisoblanadi.

Vasiylik kengashining shaxsiy tarkibi Oʻzbekiston Respublikasi Prezidentining qarori bilan tasdiqlanadi.

Jamgʻarma Vasiylik kengashining yigʻilishlari zaruriyat tugʻilganda, ammo yiliga kamida ikki marotaba oʻtkaziladi. Jamgʻarmada kredit va grantlari jamlangan Osiyo taraqqiyot banki hamda boshqa xalqaro moliya institutlari vakili Vasiylik kengashi yigʻilishlarida kuzatuvchi sifatida ishtirok etish huquqiga ega.

8. Jamgʻarma Vasiylik kengashining asosiy vazifalari quyidagilardan iborat:

Oʻzbekiston Respublikasi Xalq taʼlimi vazirligi hamda Oliy va oʻrta maxsus taʼlim vazirligining Oʻrta maxsus, kasb-hunar taʼlimi markazi tomonidan keyingi oʻquv yili uchun taqdim etilgan darsliklar va oʻquv-metodik qoʻllanmalarni nashrdan chiqarish va sotish kvotalarini tasdiqlash. Bunda, Oʻzbekiston Respublikasi Oliy va oʻrta maxsus taʼlim vazirligining Oʻrta maxsus, kasb-hunar taʼlimi markazi tomonidan chet tillari boʻyicha darsliklar va oʻquv-metodik qoʻllanmalarni nashrdan chiqarish va sotish kvotalari taqdim etiladi.

Jamgʻarma oldiga qoʻyilgan vazifalarni hal qilish uchun manfaatdor vazirliklar, muassasalar, jamoatchilik va boshqa nodavlat tashkilotlarni jalb qilish;

Jamgʻarma kirim va chiqimlarining manbalar va foydalanish yoʻnalishlari boʻyicha taxminiy parametrlarini, shuningdek Jamgʻarma ijroiya direksiyasi kiritgan Jamgʻarmaga mablagʻning tushishi va sarflanishi yuzasidan hisobotini tasdiqlash;

Jamgʻarma ijroiya direksiyasi faoliyatini, jumladan, Jamgʻarma mablagʻlaridan maqsadli va samarali foydalanilishini nazorat qilish;

darsliklar uchun ijara toʻlovlarini hisoblash va toʻlash tartibini belgilash;

darsliklar uchun yillik ijara toʻlovi hajmini belgilash;

Jamgʻarmaga xorijiy kredit va grantlarni jalb qilishda koʻmaklashish;

Jamgʻarma mablagʻlarini shakllantirish va undan foydalanish bilan bogʻliq boshqa vakolatlarni amalga oshirish.

9. Jamgʻarma ijroiya direksiyasi Jamgʻarmaning ijrochi organi boʻlib, joriy rahbarlikni amalga oshiradi hamda Jamgʻarma faoliyati uchun javobgarlikni oʻz zimmasiga oladi.

Jamgʻarma ijroiya direksiyasi xarajatlari budjet tashkilotlari uchun oʻrnatilgan tartibda Vasiylik kengashi tasdiqlagan smeta xarajatlariga asosan, Jamgʻarma mablagʻlari hisobidan amalga oshiriladi.

10. Jamgʻarma ijroiya direksiyasining asosiy vazifalari quyidagilardan iborat:

Oʻzbekiston Respublikasi Xalq taʼlimi vazirligi bilan birgalikda umumtaʼlim maktablari kutubxona jamgʻarmasining Darslik va oʻquv-metodik qoʻllanmalari yillik balansini tuzish;

Jamgʻarma kirim va chiqimlarining taxminiy parametrlarini, shuningdek, Jamgʻarma Vasiylik kengashiga belgilangan muddatda taqdim etish uchun ularning bajarilishi yuzasidan hisobot tayyorlash;

umumtaʼlim maktablarining ayrim toifadagi oʻquvchilarini bepul taʼminlash uchun darsliklar sotib olish va yetkazib berish, shuningdek ijaraga berishga moʻljallangan darsliklarni yangilash xarajatlarini budjet va ijara mablagʻlari hisobidan moliyalashtirish;

umumiy oʻrta va oʻrta maxsus, kasb-hunar taʼlimi muassasalarining oʻquvchilari va oʻqituvchilarini bepul taʼminlash uchun chet tillari boʻyicha darsliklar va oʻquv-metodik qoʻllanmalarni sotib olish va yetkazib berish xarajatlarini Jamgʻarmaning aylanma mablagʻlari hisobidan moliyalashtirish;

umumtaʼlim maktablari hisobiga darslik ijarasi uchun ota-onalardan kelib tushgan mablagʻlarni yuqori qimmatli va ishonchli aktivlarga aylantirish yoʻli bilan umumlashtirib boshqarish;

umumtaʼlim maktablari kutubxona jamgʻarmalarini Jamgʻarma mablagʻlari hisobidan darsliklar va oʻquv-metodik qoʻllanmalar bilan taʼminlash boʻyicha moliya va xalq taʼlimi organlari faoliyatini muvofiqlashtirish;

nashriyot, bosmaxona va kitob savdo korxonalarining moliyaviy ahvolini oʻrganish asosida ularning aylanma mablagʻlarini vaqtinchalik toʻldirish uchun qisqa muddatli maqsadli ssudalar ajratish;

darsliklar va oʻquv metodik qoʻllanmalarni xarid etilishi va yetkazib berilishi moliyalashtirilgan Jamgʻarma mablagʻlaridan maqsadli foydalanish ustidan nazorat oʻrnatish;

nashriyot, bosmaxona va kitob savdo korxonalariga ajratilgan ssudalardan samarali foydalanish va qaytarilishini taʼminlash boʻyicha monitoring olib borish.

11. Jamgʻarmaning ijrochi direktori Jamgʻarmaning Vasiylik kengashi tavsiyasiga koʻra Oʻzbekiston Respublikasi Vazirlar Mahkamasi tomonidan lavozimga tayinlanadi va ozod etiladi.

12. Jamgʻarma mablagʻlarining shakllanish manbaalari quyidagilar:

budjet mablagʻlari;

darsliklarning ijara toʻlovlari;

grantlar, kreditlar hamda Oʻzbekiston Respublikasi rezidentlari va norezidentlari — yuridik va jismoniy shaxslar, xalqaro tashkilotlar va moliyaviy institutlarning homiylik yordamlari;

Jamgʻarmaning erkin mablagʻlarini vaqtinchalik joylashtirilishidan olinadigan daromadlar;

Keyinchalik foydalanishga yaroqsiz boʻlgan darsliklarni utilizatsiya qilishdan tushgan tushumlar, yaʼni ularni makulatura qabul qilish punktlariga topshirishdan olinadigan daromadlar.

va boshqa qonunda taʼqiqlanmagan tushumlar.

13. Jamgʻarma mablagʻlari Oʻzbekiston Respublikasi Markaziy bankining Toshkent shahri boʻyicha Bosh boshqarmasi hisob-kassa markazidagi yagona gʻazna hisobvaragʻida mablagʻlarni Jamgʻarmaning shaxsiy gʻazna hisobvaragʻi hisobiga qoʻshish orqali toʻplanadi.

14. Istiqbol tushumlar loyihasini tayyorlash, koʻrib chiqish va tasdiqlash hamda Jamgʻarma mablagʻlaridan foydalanish keyingi yilga davlat budjeti parametrlarini ishlab chiqish va tasdiqlash bilan bogʻliq holda amalga oshiriladi.

15. Oʻzbekiston Respublikasi Oliy va oʻrta maxsus taʼlim vazirligining Oʻrta maxsus, kasb-hunar taʼlimi markazi (chet tillari boʻyicha darsliklar va oʻquv-metodik qoʻllanmalarga tegishli qismida) hamda Xalq taʼlimi vazirligi zarur darsliklar va oʻquv-metodik qoʻllanmalar bilan taʼminlanganligi boʻyicha umumiy oʻrta va oʻrta maxsus, kasb-hunar taʼlimi muassasalari kutubxona fondlarini har yili inventarizatsiya qilish hamda umumiy oʻrta va oʻrta maxsus, kasb-hunar taʼlimi muassasalari oʻquvchilari va oʻqituvchilarining darsliklar bilan taʼminlanganligini oʻrganish asosida keyingi kalendar yili uchun darsliklar va oʻquv-metodik qoʻllanmalarga boʻlgan ehtiyojning prognoz koʻrsatkichlarini chakana savdo tarmogʻi orqali, kutubxona fondi hisobidan bepul taʼminlanish va ijara asosida taʼminlanish kesimida har yili 1-iyunga qadar Jamgʻarmaning ijroiya direksiyasiga taqdim etish. Bunda keyingi kalendar yili uchun oʻquvchilarning istiqbol kontingenti Oʻzbekiston Respublikasi Iqtisodiyot vazirligi bilan kelishilgan holda aniqlanadi.

Yakuniy ehtiyoj Oʻzbekiston Respublikasi Xalq taʼlimi vazirligi hamda Oliy va oʻrta maxsus taʼlim vazirligining Oʻrta maxsus, kasb-hunar taʼlimi markazi tomonidan aniqlanadi va keyingi oʻquv yili uchun predmetlar boʻyicha taʼlim tili, nomi, sinflar va kurslar kesimida darsliklar hamda oʻquv-metodik qoʻllanmalarni ishlab chiqarish va sotishga prognoz kvotalar shakllantirilgandan soʻng Jamgʻarmaga taqdim etiladi.

16. Ijroiya direksiya Oʻzbekiston Respublikasi Xalq taʼlimi vazirligi hamda Oliy va oʻrta maxsus taʼlim vazirligining Oʻrta maxsus, kasb-hunar taʼlimi markazi bilan hamkorlikda har yili 1-iyulga qadar keyingi kalendar yil uchun Jamgʻarmaning daromadlari va xarajatlari istiqbol parametrlarini ishlab chiqadilar va Jamgʻarmaning Vasiylik kengashiga koʻrib chiqishi uchun taqdim etadi.

17. Jamgʻarma daromadi va xarajatlarining prognoz parametrlari keyingi yil uchun davlat budjeti parametrlari tasdiqlangandan soʻng 5 kun ichida Jamgʻarmaning vasiylik kengashi tomonidan tasdiqlanadi.

18. Jamgʻarma mablagʻlari faqat quyidagi maqsadlarda foydalaniladi:

oʻrnatilgan tartibda shakllantirilgan va tasdiqlangan kvotalarga asosan budjet mablagʻlari hisobidan chop etilishi va qayta chop etilishi moʻljallangan darsliklar va oʻquv metodik qoʻllanmalarni xarid etish va yetkazish boʻyicha xarajatlarni moliyalashtirishga;

har bir umumtaʼlim maktabi boʻyicha shakllantirilgan kvota asosida va ijara toʻlovlaridan tushgan mablagʻlar doirasida ijara tizimi uchun darsliklarni xarid qilish va yetkazib berish shartnomalariga toʻlovlarni amalga oshirishga;

Jamgʻarmaning aylanma mablagʻlari hisobidan umumiy oʻrta va oʻrta maxsus, kasb-hunar taʼlimi muassasalari oʻquvchilari hamda oʻqituvchilarini bepul taʼminlash uchun chet tillari boʻyicha darsliklar va oʻquv-metodik qoʻllanmalarni sotib olish hamda yetkazib berish xarajatlarini moliyalashga;

nashriyotlar, bosmaxonalar va kitob savdo korxonalari uchun ularning aylanma mablagʻlarini toʻldirishga maqsadli ssudalar ajratishga;

jamgʻarmaning vasiylik kengashi tomonidan tasdiqlangan smeta xarajatlariga koʻra amalga oshirilgan boshqa operatsion xarajatlarni qoplashga.

19. Jamgʻarma:

a) Oʻzbekiston Respublikasi Xalq taʼlimi vazirligiga quyidagi yoʻnalishlar boʻyicha maktab kutubxonalarini darslik va oʻquv-metodik qoʻllanmalar bilan taʼminlash xarajatlarini qoplashga mablagʻlar ajratadi:

birinchi sinf oʻquvchilari uchun;

“Mehribonlik” uylari, maxsus maktab va maktab-internatlarning tarbiyalanuvchilari boʻlgan oʻquvchilar uchun;

ijtimoiy yordamga muhtoj boʻlgan oilalardagi oʻquvchilar uchun;

ijara tizimi uchun;

b) Oʻzbekiston Respublikasi Xalq taʼlimi vazirligi hamda Oliy va oʻrta maxsus taʼlim vazirligining Oʻrta maxsus, kasb-hunar taʼlimi markaziga chet tillari boʻyicha darsliklar va oʻquv-metodik qoʻllanmalarni sotib olish va yetkazib berish xarajatlarini toʻlash uchun.

19¹. Oʻzbekiston Respublikasi Xalq taʼlimi vazirligi hamda Oliy va oʻrta maxsus taʼlim vazirligining Oʻrta maxsus, kasb-hunar taʼlimi markazi tomonidan xarajatlar smetasida nazarda tutilmagan mablagʻlarni (shu jumladan, nashriyotlar, bosmaxonalar va kitob savdosi korxonalari, shuningdek darsliklar va oʻquv-metodik qoʻllanmalarni yetkazib berishni amalga oshiruvchi tashkilotlar tomonidan shartnoma majburiyatlari bajarilmagani uchun jarimalar va/yoki penyalarni qoʻllashdan olingan mablagʻlar)ni sarflash taqiqlanadi va mazkur mablagʻlar Jamgʻarmaga qaytarilishi lozim.

20. Xaridlar boʻyicha tasdiqlangan kvotalariga muvofiq:

Oʻzbekiston Respublikasi Xalq taʼlimi vazirligi darsliklar va oʻquv-metodik qoʻllanmalarni xarid qilish uchun buyurtmalarni tanlov asosida joylashtiradi. Bunda darslik va oʻquv-metodik qoʻllanmalarni umumtaʼlim maktablariga yetkazib berish “Oʻquv taʼlim-taʼminot” davlat unitar korxonasi tomonidan amalga oshiriladi;

Oʻzbekiston Respublikasi Oliy va oʻrta maxsus taʼlim vazirligining Oʻrta maxsus, kasb-hunar taʼlimi markazi chet tillari boʻyicha darsliklar va oʻquv-metodik qoʻllanmalarni xarid qilish va yetkazib berish uchun buyurtmalarni tanlov asosida joylashtirishni amalga oshiradi.

Umumtaʼlim maktablari uchun darsliklar va oʻquv-metodik qoʻllanmalarni, shuningdek oʻrta maxsus, kasb-hunar taʼlimi muassasalari uchun chet tillari boʻyicha darsliklar va oʻquv-metodik qoʻllanmalarni xarid qilish va yetkazib berish borasida Oʻzbekiston Respublikasi Xalq taʼlimi vazirligi hamda Oliy va oʻrta maxsus taʼlim vazirligining Oʻrta maxsus, kasb-hunar taʼlimi markazi bilan tuzilgan shartnomalar boʻyicha xarajatlarni Jamgʻarma hisobidan moliyalashtirish Oʻzbekiston Respublikasi Moliya vazirligi tomonidan belgilanadigan tartibga muvofiq amalga oshiriladi.

21. Chakana savdo tarmogʻi orqali sotiladigan darsliklarni ishlab chiqarish uchun taqsimlangan ham kvotalariga ega boʻlgan nashriyotlar, bosmaxonalar va kitobsavdo korxonalariga aylanma jamgʻarmalari yetmay qolgan taqdirda Oʻzbekiston Matbuot va axborot agentligining taklifiga koʻra Oʻzbekiston Respublikasi Moliya vazirligi belgilab beradigan tartib asosida jamgʻarma mablagʻlari hisobidan ssudalar ajratilishi mumkin.

22.Darsliklar va oʻquv-metodik qoʻllanmalar boʻyicha buxgalterlik hisobi va hisoboti umumiy oʻrta va oʻrta maxsus, kasb-hunar taʼlimi muassasalari tomonidan olib boriladi.

Umumtaʼlim maktablari tomonidan darsliklarning ijara haqi toʻlovlari va boshqa tushumlar boʻyicha ham hisob va hisobot olib boriladi.

23. Ijroiya direksiyaning hududiy vakillari talabnomalari boʻyicha gʻaznachilik boʻlinmalari umumtaʼlim maktablari yoki xalq taʼlimi muassasalari faoliyatini metodik taʼminlash va tashkil etish tuman va shahar boʻlimlarining mos hisob raqamlaridan koʻchirmalar taqdim etadi.

24. Ijroiya direksiyaning hududiy vakillari:

hududdagi tuman va shahar maktablari boʻyicha ijara tizimining yuritilishi ustidan ishlarni muvofiqlashtiradi va nazorat qiladi;

ijara toʻlovlari tushumlarining monitoringini olib boradi, hisobotlarni roʻyxatga oladi va yigʻadi hamda xalq taʼlimi hududiy organlari bilan hamkorlikda umumtaʼlim maktablari uchun darsliklar va oʻquv-metodik qoʻllanmalarga buyurtmalarni umumlashtiradi;

oʻrta maxsus, kasb-hunar taʼlimi boshqarmalari bilan birgalikda oʻrta maxsus, kasb-hunar taʼlimi muassasalari uchun chet tili boʻyicha darsliklar va oʻquv-metodik qoʻllanmalarga buyurtmalarni umumlashtiradi;

ijara tizimini ishlatilishi masalalari boʻyicha gʻaznachilik boʻlinmalari bilan oʻzaro hamkorlik qiladi, ulardan hududlar va maktablar kesimida ijara toʻlovlari tushumlari boʻyicha aniq hisobotlarni muntazam olib turadi;

oʻz faoliyati yuzasidan Jamgʻarma ijroiya direksiyasiga doimiy ravishda hisobot berib boradi.

25. Qoraqalpogʻiston Respublikasi Xalq taʼlimi vazirligi, hududiy xalq taʼlimi boshqarmalari va oʻrta maxsus, kasb-hunar taʼlimi boshqarmalari, Jamgʻarma ijroiya direksiyasining hududiy vakillari har yarim yilda bir marotaba tegishli hududlar boʻyicha darsliklar harakati va saqlanishi toʻgʻrisida umumlashtirilgan hisobotlarni, hisobotdan keyin keluvchi oyning 15-sanasidan kechiktirmasdan Oʻzbekiston Respublikasi Xalq taʼlimi vazirligi hamda Oliy va oʻrta maxsus taʼlim vazirligining Oʻrta maxsus, kasb-hunar taʼlimi markazi hamda Jamgʻarmaning ijroiya direksiyasiga taqdim etishadi.

26. Jamgʻarma ijroiya direksiyasi buxgalterlik hisobini yuritadi va Jamgʻarma hisob raqamlari boʻyicha pul mablagʻlari harakatlari haqida hisobotlar tuzadi.

27. Jamgʻarma har yili Jamgʻarmaning hisob raqamlarini mustaqil auditorlik tekshiruvidan oʻtkazadi va hisobotlarni ommaviy axborot vositalarida chop etadi.

28. Darsliklar va oʻquv-metodik qoʻllanmalarni xarid qilish uchun Jamgʻarma tomonidan moliyalashtirilgan mablagʻlardan maqsadli va samarali foydalanish uchun javobgarlik Oʻzbekiston Respublikasi Xalq taʼlimi vazirligi hamda Oliy va oʻrta maxsus taʼlim vazirligining Oʻrta maxsus, kasb-hunar taʼlimi markazi zimmasiga yuklatiladi.

29. Ijara haqlarini toʻliq hisoblanishi va toʻlovlarining yigʻilishi, oʻz vaqtida naqd pul tushumlarini Oʻzbekiston Respublikasi Markaziy banki oʻrnatgan tartiblar asosida bank muassasalariga topshirish boʻyicha javobgarlik umumtaʼlim maktablari hamda xalq taʼlimining joylardagi boshqaruv idoralari rahbarlari zimmasiga yuklatiladi.

30. Xalq taʼlimining hududiy boshqaruv idoralari hamda oʻrta maxsus, kasb-hunar taʼlimi boshqarmalari darsliklar va oʻquv-metodik qoʻllanmalarning oʻz vaqtida va talab darajasida yetkazilishi boʻyicha nazorat olib boradilar.

31. Ijara haqi toʻlovlari tushumlarini, darsliklarning oʻrnatilgan tartibda saqlanishi va foydalanilishini taʼminlash, shuningdek maktablar tomonidan darsliklar va ijara haqlari boʻyicha dastlabki hisob-kitob hujjatlarining yuritilishini nazorat qilish tegishli hududiy xalq taʼlimi va moliya organlari hamda Jamgʻarmaning ijroiya direksiyasi hududiy vakillari tomonidan amalga oshiriladi;

chet tillari boʻyicha darsliklarning oʻrnatilgan tartibda saqlanishi va foydalanilishini taʼminlash, shuningdek oʻrta maxsus, kasb-hunar taʼlimi muassasalari tomonidan ularning hisobini yuritishga oid dastlabki hujjatlarni nazorat qilish oʻrta maxsus, kasb-hunar taʼlimining tegishli hududiy boshqarmalari va moliya organlari tomonidan amalga oshiriladi.