Республикада пиллачилик соҳасини бошқаришни такомиллаштириш, бозор муносабатларини чуқурлаштириш ҳамда соҳа корхоналарининг экспорт салоҳиятини ошириш мақсадида:

1. Ўзбекистон Республикаси Давлат мулкини бошқариш ва тадбиркорликни қўллаб-қувватлаш давлат қўмитаси, Ўзбекистон Республикаси Қишлоқ ва сув хўжалиги вазирлиги, «Ўзбекенгилсаноат» давлат уюшмаси, Ўзбекистон қишлоқ хўжалиги илмий ишлаб чиқариш маркази, Қорақалпоғистон Республикаси Вазирлар Кенгаши ва вилоятлар ҳокимликлари, шунингдек, ипакчилик соҳасида хўжалик юритувчи субъектларнинг:

Ўзбекистон Республикаси Қишлоқ ва сув хўжалиги вазирлиги ҳузуридаги «Пилла» уюшмасини, «Ўзбекенгилсаноат» давлат уюшмасининг «Андижон ипаги», «Хон атлас» ва «Кумуш тола» акциядорлик компанияларини тугатиш;

«Шойи» акциядорлик компанияси ҳамда «Пилла-холдинг» холдинг компаниясини ўз ичига оладиган «Ўзбекипаги» мустақил уюшмасини ташкил этиш;

ипакли ва аралаш газламалар ишлаб чиқарадиган шойи тўқиш корхоналари, шунингдек табиий шойи ишлаб чиқариш ва қайта ишлаш бўйича марказий илмий-тадқиқот институтини ўз ичига оладиган «Шойи» акциядорлик компаниясини тузиш;

таркибига пилла хом ашёси ва ипакли калава ишлаб чиқарадиган шойи тўқиш саноати, ипак қурти уруғи тайёрлайдиган заводлар, хом пиллани қабул қилиш ва дастлабки ишлов бериш корхоналари, тутчилик хўжаликлари, ипак қурти наслчилик станциялари ва автотранспорт корхоналари, шунингдек, бевосита компанияга бўйсундириладиган Ўзбекистон Ипакчилик илмий-тадқиқот институти кирадиган «Пилла-холдинг» холдинг компанияси ва унинг ҳудудий акциядорлик бирлашмаларини ташкил этиш ҳақидаги таклифлари қабул қилинсин.

2. «Ўзбек ипаги» уюшмасининг асосий вазифалари ва фаолият йўналишлари қуйидагича белгилансин:

«Пилла-холдинг» холдинг компанияси ва «Шойи» акциядорлик компаниясининг сифатли қуруқ пилла, пилла хом ашёси ва ипак калава, жаҳон бозорида рақобатбардош бўлган табиий ва аралаш шойи газламалари ишлаб чиқаришнинг ягона технологик жараёнини таъминлаш борасидаги фаолиятини мувофиқлаштириш;

уюшма таркибига кирадиган компанияларнинг корхона ва ташкилотлари ўртасидаги хўжалик ва технологик алоқаларни шартнома муносабатлари тизимини такомиллаштириш йўли билан мустаҳкамлаш;

пиллачилик соҳасида хусусийлаштириш жараёнини чуқурлаштириш ҳамда агросаноат интеграцияси ва кооперациясининг янги ташкилий шаклларини ривожлантириш;

сифатли уруғ ва пилла тайёрлаш, пиллакашлик, ипак йигириш, шойи тўқиш соҳалари бўйича ишлаб чиқаришга илғор технологияларни жорий этиш борасида ягона техникавий ва инвестицион сиёсат юритиш;

пиллачилик соҳасига, жумладан, хорижий сармоялар иштирокидаги корхоналар барпо этиш йўли билан, хорижий сармоялар жалб этиш;

ипакчилик маҳсулотларини экспорт қилиш ҳажмини кўпайтириш учун ички ва ташқи бозорнинг маркетинг тадқиқотларини амалга ошириш, республика ипакчилик саноати корхоналари маҳсулотларининг жаҳон бозорида рақобатбардошлигини таъминлаш.

3. Янги тутзорлар барпо этилган майдонлар 3 йил муҳлатга ер солиғидан озод қилинсин.

4. Ўзбекистон Республикаси Вазирлар Маҳкамаси бир ҳафта муддат ичида мазкур Фармоннинг бажарилиши бўйича қарор қабул қилсин.