Ўзбекистон Республикаси Олий Кенгаши қарор қилади:

1. Ўзбекистон Республикасининг «Давлат санитария назорати тўғрисида»ги Қонуни матбуотда эълон қилинган пайтдан бошлаб амалга киритилсин.

2. Ўзбекистон Республикаси Президенти ҳузуридаги Вазирлар Маҳкамаси:

уч ой мудддат ичида «Санитария нормалари, қоидалари ва гигиена нормативларига риоя қилмаслик ва санитарияга доир, эпидемияга қарши чора-тадбирларини ўтказмаганлик оқибатида одамлар саломатлигига ва атроф-муҳитга етказилган зарарнинг мулкчилик шаклидан қатъи назар, корхоналар, муассасалар, ташкилотлар, бирлашмалар, айрим шахслар томонидан тўланиши тартиби тўғрисида», «Санитария қонунлари бузилган ҳолларда диагностика чораларига, даволаш ва эпидемияга қарши кураш чора-тадбирларига қилинган ҳаражатларни тўлаш тартиби тўғрисида», «Санитария соҳасидаги ҳуқуқбузарликлар учун жарималар ундириш тартиби тўғрисида»ги низомларни тасдиқласин;

1992 йилнинг 1 декабрига қадар:

Ўзбекистон Республикасининг қонун ҳужжатларини «Давлат санитария назорати тўғрисида»ги Ўзбекистон Республикаси Қонунига мувофиқ ҳолга келтириш ҳақидаги таклифни Ўзбекистон Республикаси Олий Кенгашига тақдим этсин;

Ўзбекистон Республикаси Ҳукуматининг қарорларини мазкур Қонунга мувофиқлаштирсин.