Respublikada fermer xoʻjaliklarini jadal rivojlantirish uchun zarur shart-sharoitlar yaratish maqsadida, shuningdek zarar koʻrib ishlayotgan, past rentabelli va istiqbolsiz qishloq xoʻjaligi kooperativlari (shirkatlari)ni fermer xoʻjaliklariga aylantirish Dasturiga muvofiq:

1. Qishloq xoʻjaligida iqtisodiy islohotlarni chuqurlashtirish boʻyicha Respublika komissiyasining Oʻzbekiston Respublikasi Qishloq va suv xoʻjaligi vazirligi, Iqtisodiyot vazirligi, Qoraqalpogʻiston Respublikasi Vazirlar Kengashi va viloyatlar hokimliklari bilan birgalikda tayyorlangan quyidagi:

1-ilovaga* muvofiq, zarar koʻrib ishlayotgan, past rentabelli va istiqbolsiz qishloq xoʻjaligi kooperativlari (shirkatlari)ni 2006-yilda fermer xoʻjaliklariga aylantirish;

2-ilovaga* muvofiq, 2006-yilda qayta tashkil etiladigan qishloq xoʻjaligi kooperativlari (shirkatlari) hududida ishlab chiqarish va bozor infratuzilmasi obyektlarini barpo etish toʻgʻrisidagi takliflari qabul qilinsin.

Qishloq xoʻjaligida iqtisodiy islohotlarni chuqurlashtirish boʻyicha Respublika komissiyasiga Qoraqalpogʻiston Respublikasi Vazirlar Kengashi va viloyatlar hokimliklari bilan kelishilgan holda qayta tashkil etiladigan qishloq xoʻjaligi kooperativlari (shirkatlari) roʻyxatini kengaytirish boʻyicha tegishli oʻzgartishlar kiritish huquqi berilsin.

2. Qoraqalpogʻiston Respublikasi Vazirlar Kengashi raisi, viloyatlar va tumanlar hokimlari, Oʻzbekiston Respublikasi Qishloq va suv xoʻjaligi vazirligi, Fermer xoʻjaliklari uyushmasi rahbarlari zimmasiga:

1-ilovaga muvofiq ikki oy muddatda qishloq xoʻjaligi kooperativlari (shirkatlari)ni fermer xoʻjaliklariga aylantirishni Oʻzbekiston Respublikasining “Fermer xoʻjaligi toʻgʻrisida”gi Qonuni talablariga toʻla muvofiq tarzda amalga oshirilishi;

fermer xoʻjaliklarini tashkil etishga daʼvogarlar oʻrtasida ochiq va oshkora tanlovlar oʻtkazilishi, Gʻoliblarni aniqlashda xolislik va haqqoniylik tamoyillari qatʼiy taʼminlanishi;

shirkat xoʻjaliklarini tugatish ishlari qonun hujjatlarida belgilangan tartibda oʻz vaqtida va toʻliq yakunlanishi uchun shaxsiy javobgarlik yuklansin.

3. Vazirlar Mahkamasi (Sh.M. Mirziyoyev) Qoraqalpogʻiston Respublikasi Vazirlar Kengashi va viloyatlar hokimliklari bilan birgalikda:

2006-yilda qayta tashkil etiladigan qishloq xoʻjaligi kooperativlari (shirkatlari) hududida barpo etiladigan ishlab chiqarish va bozor infratuzilmasi obyektlari 2-ilovaga qatʼiy muvofiq ravishda joylashtirilishini bir oy muddatda aniqlasin va ularni tashkil qilish ustidan nazoratni taʼminlasin;

“Oʻzdonmahsulot” AK boʻlinmalari bilan qayta tashkil etiladigan qishloq xoʻjaligi kooperativlari (shirkatlari) oʻrtasida avval tuzilgan shartnomalarga teng hajmda davlat ehtiyojlari uchun 2006-yil hosilidan boshoqli don xarid qilish uchun yangi tashkil etilgan fermer xoʻjaliklari bilan shartnomalar imzolanishini taʼminlasin;

1-ilovaga muvofiq qishloq xoʻjaligi korxonalarini qayta tashkil etish natijasida boʻshaydigan xodimlar ish bilan taʼminlanishini tashkil etsin.

7. Oʻzbekiston Teleradiokompaniyasi, Oʻzbekiston Matbuot va axborot agentligi, Oʻzbekiston Respublikasi Qishloq va suv xoʻjaligi vazirligi, Fermer xoʻjaliklari uyushmasi televideniye va ommaviy axborot vositalarida fermer xoʻjaliklarini rivojlantirish va ularning faoliyati, qishloqda ishlab chiqarish va bozor infratuzilmasini tashkil etish hamda rivojlantirish masalalarini yoritish boʻyicha maxsus koʻrsatuv va ruknlar tashkil etsin.

8. Mazkur qarorning ijrosini nazorat qilish Oʻzbekiston Respublikasi Bosh vaziri Sh.M. Mirziyoyev zimmasiga yuklansin.