O‘zbekiston Respublikasi fuqarosining biometrik pasportini almashtirish va olishda, shuningdek chet eldan nobiometrik pasportlar bo‘yicha qaytishda fuqarolar uchun qulay shart-sharoitlar yaratish maqsadida Vazirlar Mahkamasi qaror qiladi:

1. O‘zbekiston Respublikasi Ichki ishlar vazirligi, Tashqi ishlar vazirligi, Davlat xavfsizlik xizmati va O‘zbekiston Respublikasi Vazirlar Mahkamasi huzuridagi Davlat personallashtirish markazining O‘zbekiston Respublikasi fuqarosining biometrik bo‘lmagan namunadagi pasportining amal qilish muddatini uzaytirish to‘g‘risidagi taklifiga rozilik berilsin:

respublika hududida — 2019-yil 31-dekabrgacha;

chet davlat hududida — uning amal qilish muddati tugaguniga qadar.

2. Belgilab qo‘yilsinki, O‘zbekiston Respublikasi fuqarosining biometrik bo‘lmagan namunadagi pasporti xorijiy davlat hududida turgan fuqarolar uchun uning amal qilish muddati tugaguniga qadar respublika hududiga kirish uchun haqiqiy hisoblanadi.

3. Qoraqalpog‘iston Respublikasi Vazirlar Kengashi, viloyatlar va Toshkent shahar hokimliklari:

respublika aholisini O‘zbekiston Respublikasi fuqarosining nobiometrik namunadagi pasportini biometrik pasportga almashtirishga tizimli ravishda jalb etish;

biometrik pasportga ega bo‘lmagan aholining kam ta’minlangan qatlamlarini pasportlashtirish uchun tegishli tashkiliy choralarni ko‘rish ta’minlasin.

4. O‘zbekiston Milliy teleradiokompaniyasi va O‘zbekiston Milliy axborot agentligiga mazkur qaror qoidalarini ommaviy axborot vositalarida keng yoritish tavsiya etilsin.

5. O‘zbekiston Respublikasi Tashqi ishlar vazirligi O‘zbekiston Respublikasi fuqarosining nobiometrik namunadagi pasportining amal qilish muddati uzaytirilganligi to‘g‘risida xorijiy mamlakatlarning vakolatli organlarini belgilangan tartibda xabardor qilsin.

6. O‘zbekiston Respublikasi Ichki ishlar vazirligi, Tashqi ishlar vazirligi, Vazirlar Mahkamasi huzuridagi Davlat personallashtirish markazi belgilangan tartibda taqdim etish:

biometrik pasportlarni rejali qabul qilish, personallashtirish va o‘z vaqtida berishni tashkil etish;

o‘zlari qabul qilgan normativ-huquqiy hujjatlarni ushbu qarorga muvofiqlashtirsinlar.

7. O‘zbekiston Respublikasi Vazirlar Mahkamasining “O‘zbekiston Respublikasi fuqarosining biometrik pasportini va fuqaroligi bo‘lmagan shaxsning 16 yoshga to‘lmagan shaxslarga harakatlanish hujjatini berish tartibi to‘g‘risidagi nizomni tasdiqlash haqida” 2011-yil 7-iyuldagi 200-son qarorining (O‘zbekiston Respublikasi QT, 2011-y., 7-son, 63-modda) 2-bandidagi “2018-yil 30-iyunda” so‘zlari “2019-yil 31-dekabrda” so‘zlari bilan almashtirilsin.

8. O‘zbekiston Respublikasi Vazirlar Mahkamasining “O‘zbekiston Respublikasi aholisini biometrik pasportlar bilan ta’minlashga doir qo‘shimcha chora-tadbirlar to‘g‘risida” 2015-yil 14-dekabrdagi 361-son qarori o‘z kuchini yo‘qotgan deb hisoblansin.

9. Mazkur qarorning bajarilishini nazorat qilish O‘zbekiston Respublikasi Vazirlar Mahkamasi huzuridagi Davlat personallashtirish markazi direktori N.S. To‘raxo‘jayev zimmasiga yuklansin.