Oʻzbekiston Respublikasi Vazirlar Mahkamasi tomonidan taqdim etilgan Oʻzbekiston Respublikasining 2010-yilgi Davlat budjetini koʻrib chiqib, Oʻzbekiston Respublikasi Oliy Majlisining Senati qaror qiladi:

1. Oʻzbekiston Respublikasining 2010-yilgi makroiqtisodiy koʻrsatkichlari, soliq va budjet siyosatining asosiy yoʻnalishlari hamda Davlat budjeti parametrlari qabul qilinsin, shuningdek Davlat budjeti taqchilligining eng yuqori darajasi yalpi ichki mahsulot hajmiga nisbatan 1,0 foiz miqdorida belgilansin.

2. Oʻzbekiston Respublikasi Hukumati:

makroiqtisodiy va moliyaviy barqarorlikni taʼminlashga, aholining daromadlar darajasi va turmush farovonligini oshirishga hamda inflatsiya darajasini maqsadli prognoz koʻrsatkichlar doirasida saqlashga qaratilgan iqtisodiy islohotlarni amalga oshirishni davom ettirsin;

mamlakatda qabul qilingan, iqtisodiy oʻsishning uzoq muddatli barqaror surʼatlariga hamda iqtisodiyotning muvozanatli rivojlanishiga erishishni nazarda tutadigan, jahon moliyaviy-iqtisodiy inqirozi taʼsirining oldini olish va oqibatlarini bartaraf etish boʻyicha Inqirozga qarshi choralarning 2009 — 2012-yillarga moʻljallangan dasturi amalga oshirilishini taʼminlasin;

mamlakatda ishlab chiqarilayotgan tovarlar va koʻrsatilayotgan xizmatlarning ichki va tashqi bozorlarda raqobatbardoshligini taʼminlash maqsadida investitsiya va innovatsiya jarayonlarini ragʻbatlantirish orqali iqtisodiyotda uning yetakchi tarmoqlari ishlab chiqarishini modernizatsiya qilish, texnik va texnologik jihatdan yangilashni jadallashtirishga yoʻnaltirilgan tarkibiy oʻzgartirishlar va iqtisodiyotni diversifikatsiya qilish dasturlarini bajarishni davom ettirsin;

aholi turmush farovonligini oshirishga ijobiy taʼsir koʻrsatadigan davlat xarajatlarining, shu jumladan taʼlimni rivojlantirishga, tibbiy xizmatlar sifatini yaxshilashga, ijtimoiy infratuzilmani rivojlantirishga qilinadigan xarajatlarning ustuvorligini oʻrnatsin;

ishlab chiqarish va bozor infratuzilmasini yanada rivojlantirish, shuningdek mamlakatni modernizatsiya qilish, bandlikni taʼminlash va aholi turmush sifatini oshirishning eng muhim omili sifatida xizmat koʻrsatish sohasini va kichik biznesni jadal rivojlantirish choralarini amalga oshirishni davom ettirsin;

investitsiya muhitini yaxshilashga, iqtisodiyotning raqobatbardoshligini oshirishga hamda yangi ish oʻrinlari yaratishni ragʻbatlantirishga koʻmaklashuvchi iqtisodiyot zimmasiga tushayotgan soliq yukini kamaytirish va soliq maʼmuriyatchiligi tizimini yanada soddalashtirish, soliq toʻgʻrisidagi qonun hujjatlarining barqarorligini taʼminlash chora-tadbirlarini koʻrsin;

Sugʻoriladigan yerlarning meliorativ holatini yaxshilashning 2008 — 2012-yillarga moʻljallangan davlat dasturini amalga oshirishni davom ettirsin;

mahalliy budjetlarning dotatsiyaga bogʻliqligini kamaytirish, budjetlararo munosabatlarni yanada takomillashtirish chora-tadbirlarini koʻrsin;

budjet mablagʻlari va budjetdan tashqari mablagʻlar maqsadli va manzilli ishlatilishi ustidan qattiq nazorat qilib borilishini taʼminlash, budjetdan ajratilgan mablagʻlardan foydalanish samaradorligini oshirish imkonini beruvchi moliyalashtirishning normativ usullarini joriy etishni kengaytirish hisobiga xarajatlarni maqbullashtirish maqsadida Davlat budjetining gʻazna ijrosi tizimini takomillashtirish ishlarini davom ettirsin;

Davlat budjeti taqchilligini 2010-yil 1-yanvar holatiga koʻra respublika budjetining zaruriy aylanma kassa naqd mablagʻlari hajmidan ortiqcha erkin qoldiqlari va boshqa noinflatsiyaviy manbalar hisobidan moliyalashtirsin.

3. Mahalliy davlat hokimiyati organlari Davlat budjeti daromadlari va xarajatlarining tasdiqlangan koʻrsatkichlari bajarilishini taʼminlasin, mintaqalarning soliq bazasini kengaytirish va iqtisodiy salohiyatini oshirish yuzasidan zarur choralar koʻrsin, budjet mablagʻlaridan maqsadli hamda samarali foydalanilishi ustidan qattiq va taʼsirchan nazorat oʻrnatsin.

4. Ushbu qaror qabul qilingan kundan eʼtiboran kuchga kiradi.