|
Hujjat kuchini yo‘qotgan " " 26.11.2025
|
Oʻzbekiston Respublikasi Prezidentining
Farmoni
TAMAKI MAHSULOTLARI VA ALKOGOLLI ICHIMLIKLARGA AKSIZ MARKALARI QOʻLLANISHNI TAKOMILLASHTIRISH TOʻGʻRISIDA
LexUZ sharhiMazkur Farmon Oʻzbekiston Respublikasi Prezidentining 2025-yil 25-noyabrdagi PF-231-sonli “Qonunchilikdagi huquqiy boʻshliqlarni bartaraf etish va tartibga solish yukini kamaytirish toʻgʻrisida”gi Farmoniga asosan oʻz kuchini yoʻqotgan.
Alkogolli mahsulotlar va tamaki mahsulotlari olib kelish hamda sotishni tartibga solish, isteʼmolchilarning huquqlarini himoya qilish maqsadida:
1. 1997-yilning 1-iyulidan boshlab aksiz markalari boʻlmagan tamaki mahsulotlari va alkogolli ichimliklarni:
Oʻzbekiston Respublikasining bojxona hududiga (xalqaro tranzitdan tashqari);
“vaqtincha olib kirish” rejimida Oʻzbekiston Respublikasi hududiga;
jismoniy shaxslar tomonidan (qaytadan joʻnatish ham shu jumlaga kiradi) Oʻzbekiston Respublikasi hududiga olib kirish taqiqlansin. Oʻzbekiston Respublikasining qonunchiligida belgilangan normalar doirasida aksizsiz olib kirish bundan mustasno.
Belgilab qoʻyilsinki, 1997-yilning 1-iyulidan boshlab importyorlar tomonidan aksiz markalarini respublikadan tashqariga olib chiqib ketish yuk boʻyicha oʻrnatilgan tartibda toʻldirilgan bojxona deklaratsiyasi mavjud boʻlgan taqdirdagina amalga oshiriladi.
LexUZ sharhiQarang: Oʻzbekiston Respublikasi Bojxona kodeksining 25-moddasi birinchi qismi.
Oldingi tahrirga qarang.
2. Oʻzbekiston Respublikasi Davlat Bojxona qoʻmitasiga, aksiz markalari boʻlmagan tamaki mahsulotlari va alkogolli ichimliklarni Oʻzbekiston Respublikasi hududiga olib kirish, tashish (xalqaro tranzitdan tashqari), saqlash chogʻida, shuningdek Davlat soliq qoʻmitasiga — ularni saqlash, sotish hamda yashirincha ishlab chiqarish chogʻida shunday mahsulotlar va ichimliklarni musodara etish toʻgʻrisida qarorlar qabul qilish huquqi berilsin.
(2-bandning birinchi xatboshisi Oʻzbekiston Respublikasi Prezidentining 1998-yil 16-apreldagi PF-1988-sonli Farmoni tahririda)
Koʻrsatib oʻtilgan huquqbuzarliklarga yoʻl qoʻygan shaxslar Oʻzbekiston Respublikasining amaldagi qonunchiligiga muvofiq maʼmuriy yoki jinoiy javobgarlikka tortilishlari belgilab qoʻyilsin.
LexUZ sharhiQarang: Oʻzbekiston Respublikasi Maʼmuriy javobgarlik toʻgʻrisidagi kodeksining 1861-moddasi, Oʻzbekiston Respublikasi Jinoyat kodeksining 1861-moddasi.
Oldingi tahrirga qarang.
Davlat daromadiga oʻtkaziladigan tamaki mahsulotlari va alkogolli ichimliklarni hisobga olish, baholash va sotish qonunchilikda belgilangan tartibda amalga oshiriladi.
(2-bandning uchinchi xatboshisi Oʻzbekiston Respublikasi Prezidentining 2003-yil 15-oktabrdagi PF-3335-sonli Farmoni tahririda — OʻR QHT, 2003-y., 19-son, 177-modda)
LexUZ sharhiQarang: Vazirlar Mahkamasining 2009-yil 15-iyuldagi 200-sonli “Davlat daromadiga oʻtkaziladigan mol-mulkni olib qoʻyish, sotish yoki yoʻq qilib tashlash tartibini takomillashtirish toʻgʻrisida”gi qarori.
Oldingi tahrirga qarang.
(3-band Oʻzbekiston Respublikasi Prezidentining 2008-yil 5-fevraldagi PF-3963-sonli Farmoni bilan oʻz kuchini yoʻqotgan — OʻR QHT, 2008-y., 6-7-son, 25-modda)
4. Davlat soliq qoʻmitasi yigirma kun muddatda:
Adliya vazirligi bilan kelishgan holda aksiz markalari boʻlmagan tamaki mahsulotlari va alkogolli ichimliklarni musodara qilish hamda sotish tartibini ishlab chiqib, tasdiqlasin;
Oʻzbekiston Respublikasi Moliya vazirligi, Markaziy banki, Tashqi iqtisodiy aloqalar vazirligi va Adliya vazirligi bilan birga xalqaro tranzit tartibida Oʻzbekiston Respublikasining bojxona hududi orqali tashib oʻtiladigan aksiz soligʻiga tortiladigan tovarlardan olinadigan boj haqi va aksiz soligʻini bojxona organlarining depozit hisobvaragʻiga oʻtkazib, ushbu summani tovar respublika hududidan olib chiqib ketilgandan keyin qaytarib berish toʻgʻrisidagi takliflarni Vazirlar Mahkamasiga kiritilsin.
5. Oʻzbekiston Respublikasi Adliya vazirligi ikki hafta muddatda amaldagi qonunchilikka mazkur Farmondan kelib chiqadigan oʻzgartish va qoʻshimchalar toʻgʻrisidagi takliflar kiritilsin.
6. Ushbu Farmonning bajarilishini nazorat qilish Oʻzbekiston Respublikasi Vazirlar Mahkamasi zimmasiga yuklansin.
Oʻzbekiston Respublikasining Prezidenti I. KARIMOV
Toshkent sh.,
1997-yil 12-iyun,
PF-1789-son
(Oʻzbekiston Respublikasi Oliy Majlisining Axborotnomasi, 1997-y., 7-son, 177-modda; Oʻzbekiston Respublikasi qonun hujjatlari toʻplami, 2003-y., 19-son, 177-modda; 2008-y., 6-7-son, 25-modda)
