Demokratiyaning, konstitutsiyaviy taraqqiyotni taʼminlashning, qonunchilikka rioya etishning, inson huquqlari va qadr-qimmatini himoya qilishning gʻoyat muhim muassasasi sifatida teleradioeshittirishni yanada rivojlantirish, shuningdek uning respublikadagi tub iqtisodiy, siyosiy va ijtimoiy islohotlarni amalga oshirishga taʼsirini kuchaytirish maqsadida:

1. Oʻzbekiston Davlat teleradioeshittirish kompaniyasi joylarda hududiy boʻlinmalariga ega boʻlgan Oʻzbekiston Teleradiokompaniyasi (Oʻzteleradio)ga oʻzgartirilsin.

2. Belgilab qoʻyilsinki, Oʻzbekiston Teleradiokompaniyasi:

Davlat teleradioeshittirish kompaniyasining huquqiy vorisi, Oʻzbekistonda teleradioeshittirish sohasidagi muvofiqlashtiruvchi organ hisoblanadi va oʻz faoliyati toʻgʻrisida Vazirlar Mahkamasiga hisobot berib boradi;

jamoatchilikning ommaviy axborotga boʻlgan ehtiyojlarini qondirish maqsadida mahsulot ishlab chiqarish, ishlarni bajarish va xizmatlar koʻrsatish uchun tashkil etilgan yuridik shaxs huquqlariga ega boʻlgan xoʻjalik yurituvchi mustaqil subyekt hisoblanadi;

ommaviy axborot vositalarining muassisi, tahririyati, tarqatuvchisi va noshiri huquqlariga ega;

respublika budjetidan, shuningdek tijorat va xoʻjalik faoliyatidan olinadigan mablagʻlar hisobidan mablagʻ bilan taʼminlanadi.

3. Belgilab qoʻyilsinki, Oʻzbekiston Teleradiokompaniyasining hududiy (mintaqaviy) boʻlinmalari:

Oʻzbekiston Teleradiokompaniyasi va tegishli ravishda Qoraqalpogʻiston Respublikasi Vazirlar Kengashi, viloyatlar va Toshkent shahar hokimliklari tomonidan taʼsis etiladilar;

yuridik shaxs huquqlari bilan Oʻzbekiston Teleradiokompaniyasi tarkibiga kiradilar va oʻz faoliyatini hududiy teleradiokompaniya toʻgʻrisidagi nizomga muvofiq amalga oshiradilar;

mahalliy va respublika budjetlaridan, shuningdek tijorat faoliyatidan tushadigan mablagʻlar hisobidan mablagʻ bilan taʼminlanadilar.

4. Quyidagilar Teleradiokompaniyaning asosiy vazifalari va faoliyatining yoʻnalishlari etib belgilansin:

axborotlarning mafkuradan mutlaqo holi boʻlishini nazarda tutgan holda, aholi hamda jamiyatning xolisona, haqqoniy va xilma-xil axborotlarga boʻlgan ehtiyojlarini oʻrganish va qoniqtirish;

mamlakat aholisini, shuningdek chet el jamoatchiligini Oʻzbekistonning siyosiy, iqtisodiy va ijtimoiy-madaniy hayotida sodir boʻlayotgan oʻzgarishlar toʻgʻrisida keng xabardor qilish;

mustaqil davlatni rivojlantirish va mustahkamlashga jamoatchilik taʼsirining ortib borishini taʼminlash, turli ijtimoiy tabaqalar, siyosiy partiyalar va harakatlarni zamonaviy madaniyatli jamiyat barpo etishning dolzarb muammolarini oshkora va amaliy muhokama qilishga faol jalb etish;

mamlakatda konstitutsiyaviy normalar va qonunchilikni chuqur tushuntirish, ularni roʻyobga chiqarishga va huquqiy jamiyatni barpo etishga har tomonlama koʻmaklashish;

jamoatchilik fikrining xilma-xilligini aks ettirish, insonning Oʻzbekiston Respublikasi Konstitutsiyasida mustahkamlangan eʼtiqodlar va inson qadr-qimmati, uning huquq va erkinliklari hurmat qilinishini taʼminlash;

respublika ichkarisida va uning tashqarisida teleradioeshittirishlarni yuksak darajadagi odob, aniqlik va haqqoniyat mezonlari asosida tashkil qilish hamda axborotlarni tarqatish. Shafqatsizlikni targʻib qiladigan, inson qadr-qimmatini tahqirlaydigan yoki odamlarni ularning dini, milliy va madaniy belgilariga qarab haqoratlash sifatida talqin etilishi mumkin boʻlgan materiallardan foydalanishga yoʻl qoʻymaslik;

aholini fuqarolik jamiyati qurilishiga faol jalb etish, odamlarni umuminsoniy demokratik qadriyatlar va milliy merosni hurmat qilish, millatlararo totuvlik va doʻstlik ruhida tarbiyalash, yosh avlodda yuksak maʼnaviy fazilatlarni, Vatanga mehr-muhabbat va sadoqatni shakllantirish;

erkin bunyodkorlik mehnati va tadbirkorlik tajribasini faol targʻib etish, ijtimoiy sohaga yoʻnaltirilgan bozor iqtisodiyoti vazifalarini roʻyobga chiqarish borasidagi eng maqbul va muqobil yoʻllarni izlab topishni ragʻbatlantirish;

teleradioeshittirish sohasida kadrlarni tayyorlash, qayta tayyorlash va ularning malakasini oshirish, zamonaviy texnika bilan jihozlash hamda koʻrsatuv va eshittirishlarning ilgʻor texnologiyalariga oʻtish yoʻli bilan dasturlarning kasb mahorati darajasi va sifatini oshirish, ularning janr jihatdan xilma-xilligini taʼminlash;

hududiy teleradioeshittirish boʻlinmalariga amaliy yordam berish va ularning faoliyatini muvofiqlashtirib borish;

yetakchi xorijiy teleradiokompaniyalar bilan ijodiy hamkorlik qilish, Oʻzbekistonda ularning filiallari hamda vakolatxonalari ochilishiga faol koʻmaklashish.

5. Oʻzbekiston Teleradiokompaniyasi:

Oʻzbekiston Respublikasi Moliya vazirligi bilan birgalikda, budjetdan mablagʻ bilan taʼminlash miqdorlari asta-sekin kamaytirib borilishini hisobga olgan holda, kompaniyaning 2000-yildan boshlab oʻzini oʻzi pul bilan taʼminlashga bosqichma-bosqich oʻtishiga oid takliflarni bir oy muddatda ishlab chiqsin va taqdim etsin;

Moliya vazirligi va Mehnat vazirligi bilan birgalikda teleradiokompaniya xodimlari mehnatini meʼyorlash va unga haq toʻlashning ilgʻor shakllariga, yaʼni xodimlar mehnatiga toʻlanadigan haq miqdori telekoʻrsatuv hamda radioeshittirishlarning amaldagi hajmiga, sifatiga, janrlariga va reytingiga bogʻliq qilib qoʻyilishini koʻzda tutuvchi shakllariga oʻtish toʻgʻrisidagi nizomni ikki oy muddatda ishlab chiqsin va tasdiqlasin.

6. Oʻzbekiston Teleradiokompaniyasi, uning korxonalari va tashkilotlari xoʻjalik, reklama hamda boshqa faoliyatdan tushgan foydadan olinadigan soliqdan 2000-yilgacha ozod qilinsin va boʻshaydigan mablagʻlar kompaniyaning moddiy-texnika bazasini mustahkamlashga yoʻnaltirilsin.

7. Oʻzbekiston Respublikasi Aloqa vazirligi Oʻzbekiston teleradiokompaniyasi, “Oʻzistiqbolstat” davlat qoʻmitasi va Moliya vazirligi bilan birgalikda, yetakchi xorijiy tele-, radio hamda boshqa kompaniyalar orqali jalb etiladigan zamonaviy aloqa vositalaridan foydalangan holda, televizion koʻrsatuvlar va radioeshittirishlarni mamlakatning barcha mintaqalariga tarqatish boʻyicha umumdavlat dasturini ikki oy muddatda ishlab chiqsin va Vazirlar Mahkamasiga tasdiqlash uchun kiritsin.

8. Oʻzbekiston Respublikasi Prezidentining “Oʻzbekiston Respublikasi televideniye va radioeshittirish Davlat qoʻmitasini Oʻzbekiston Davlat teleradioeshittirish kompaniyasiga aylantirish toʻgʻrisida” 1992-yil 7-yanvardagi Farmoni oʻz kuchini yoʻqotgan deb hisoblansin.

9. Oʻzbekiston Respublikasi Vazirlar Mahkamasi 10 kun muddatda ushbu Farmonni amalga oshirish yuzasidan qaror qabul qilsin.