Oʻrta maxsus, kasb-hunar taʼlimi muassasalari xodimlari mehnatiga haq toʻlash tizimini yanada takomillashtirish, kasb-hunar kollejlari va akademik litseylar rahbar hamda pedagog kadrlarining mehnatini moddiy ragʻbatlantirish va unga haq toʻlashning yuksak kasb mahoratini namoyon etgan va taʼlim-tarbiya jarayoniga shaxsan katta hissa qoʻshayotgan iqtidorli pedagoglarni ragʻbatlantirishni koʻzda tutuvchi sifat jihatdan yangi mexanizmini joriy etish, shuningdek, mamlakat iqtisodiyoti tarmoqlari va sohalarida ehtiyoj sezilayotgan malakali mutaxassislar tayyorlashda ularning masʼuliyatini oshirish maqsadida:

1. Oʻzbekiston Respublikasi Oliy va oʻrta maxsus taʼlim vazirligining Oʻrta maxsus, kasb-hunar taʼlimi markazi hamda Moliya vazirligi, Mehnat va aholini ijtimoiy muhofaza qilish vazirligining:

2008-yil 1-sentabrdan boshlab pedagog va rahbar xodimlarning lavozimlari va malaka toifalari boʻyicha bazaviy tarif stavkalarini belgilashga, mehnatga haq toʻlashning obyektiv, ochiq-ravshan mexanizmini tatbiq etishga asoslangan oʻrta maxsus, kasb-hunar taʼlimi muassasalarining pedagog va rahbar xodimlari mehnatiga haq toʻlashning takomillashtirilgan tizimini joriy etish;

oʻrta maxsus, kasb-hunar taʼlimi muassasasida yuqori kasb mahoratiga ega boʻlgan va taʼlim-tarbiya jarayoniga shaxsan aniq hissa qoʻshayotgan oʻqituvchilar va ishlab chiqarish taʼlimi ustalarining bazaviy tarif stavkalariga har oylik ustamalar belgilash, shuningdek, koʻrsatib oʻtilgan muassasalar xodimlariga bir martalik mukofotlar toʻlash va moddiy yordam koʻrsatish yoʻli bilan ularni ragʻbatlantirish uchun Direktor jamgʻarmasini tashkil etish toʻgʻrisidagi taklifi qabul qilinsin.

2. Quyidagilar belgilansin:

oʻrta maxsus, kasb-hunar taʼlimi muassasasining Direktor jamgʻarmasi barcha oʻrta maxsus, kasb-hunar taʼlimi muassasalari — kasb-hunar kollejlari va akademik litseylarda tashkil etiladi;

Direktor jamgʻarmasi mablagʻlari har bir oʻrta maxsus, kasb-hunar taʼlimi muassasasi huzurida tegishli muassasa rahbari boshchiligida hamda Vasiylik kengashi, pedagoglar va ota-onalar jamoatchiligi vakillari ishtirokida tashkil etiladigan, oʻrnak koʻrsatgan xodimlarni ragʻbatlantirish boʻyicha maxsus komissiyalar tomonidan tasarruf etiladi.

3. 2008-yil 1-sentabrdan boshlab oʻrta maxsus, kasb-hunar taʼlimi muassasalari direktorlarining, oʻquv ishlari, kasbiy taʼlim va maʼnaviy-maʼrifiy ishlar boʻyicha direktor oʻrinbosarlarining ish haqi miqdorlari Yagona tarif tizimi boʻyicha amaldagi stavkalarga nisbatan oʻrta hisobda 1,4 baravar oshirilsin.

4. 2008-yil 1-sentabrdan boshlab oʻrta maxsus, kasb-hunar taʼlimi muassasalarining oʻqituvchilariga qoʻshimcha haq:

guruh rahbarligi uchun — mehnatga haq toʻlashning eng kam miqdorining 17,6 foizidan 35,2 foizigacha;

yozma ishlarni tekshirish uchun — mehnatga haq toʻlashning eng kam miqdorining 10,6 foizidan 17,6 foizigacha;

oʻquv va laboratoriya kabinetlariga mudirlik uchun — mehnatga haq toʻlashning eng kam miqdorining 8,8 foizidan 17,6 foizigacha oshirilsin.

5. Shunday tartib oʻrnatilsinki, unga muvofiq oʻrta maxsus, kasb-hunar taʼlimi muassasalarining oʻqituvchilari va ishlab chiqarish taʼlimi ustalari mehnatini ragʻbatlantirish hamda moddiy jihatdan qoʻllab-quvvatlash maqsadida yuqori kasb mahoratiga ega boʻlganligi va oʻquv-tarbiya jarayoniga shaxsan hissa qoʻshganligi, taʼlim berishdagi yuqori samaradorligi hamda sifati, oʻquvchilarning kasb-hunar koʻnikmalari va bilimlarini rivojlantirganligi, tarbiyaviy va darsdan tashqari ishlar olib borganligi uchun Direktor jamgʻarmasidan ularga bazaviy tarif stavkalarining 40 foizigacha miqdorida oylik ustama haq toʻlanadi.

6. Oʻzbekiston Respublikasi Vazirlar Mahkamasi ikki hafta muddatda:

oʻrta maxsus, kasb-hunar taʼlimi muassasalarining pedagog va rahbar xodimlari mehnatiga haq toʻlashning bazaviy tarif stavkalarini;

Oʻrta maxsus, kasb-hunar taʼlimi muassasalari xodimlari mehnatiga haq toʻlash toʻgʻrisidagi Nizomni;

Oʻrta maxsus, kasb-hunar taʼlimi muassasasining Direktor jamgʻarmasi toʻgʻrisidagi Nizomni tasdiqlasin.

7. Oʻzbekiston Respublikasi Moliya vazirligi Oʻzbekiston Respublikasi Oliy va oʻrta maxsus taʼlim vazirligining Oʻrta maxsus, kasb-hunar taʼlimi markazi, Qoraqalpogʻiston Respublikasi Vazirlar Kengashi, viloyatlar va Toshkent shahar hokimliklari bilan birgalikda mazkur qarorda belgilangan tadbirlarni amalga oshirish bilan bogʻliq xarajatlarning oʻz vaqtida va toʻliq moliyalashtirilishini taʼminlasin.

8. Oʻzbekiston Respublikasi Oliy va oʻrta maxsus taʼlim vazirligining Oʻrta maxsus, kasb-hunar taʼlimi markazi, Adliya vazirligi manfaatdor vazirliklar va idoralar bilan birgalikda bir oy muddatda:

qonun hujjatlariga ushbu qarordan kelib chiqadigan oʻzgartish va qoʻshimchalar toʻgʻrisida Vazirlar Mahkamasiga takliflar kiritsin;

vazirliklar va idoralarning normativ hujjatlari ushbu qarorga muvofiqlashtirilishini taʼminlasin.

9. Mazkur qarorning ijrosini nazorat qilish Oʻzbekiston Respublikasining Bosh vaziri Sh.M. Mirziyoyev zimmasiga yuklansin.