Савдо соҳасидаги иқтисодий ислоҳотларни чуқурлаштириш, улгуржи савдо тизимини янада такомиллаштириш, улгуржи, чакана савдо билан истеъмол товарлари ишлаб чиқарувчи корхоналар ўртасида барқарор шартномавий муносабатлар учун шарт-шароитлар яратиш, шунингдек, аҳолига савдо хизмати кўрсатиш сифати даражасини ошириш мақсадида:

1. Ўзбекистон Республикаси Давлат мулки қўмитаси, Қорақалпоғистон Республикаси Вазирлар Кенгаши, вилоятлар ва Тошкент шаҳар ҳокимликлари, «Ўзбексавдо» ва «Ўзбекбирлашув» акциядорлик компаниялари муассисларининг «Ўзбексавдо» ва «Ўзбекбирлашув» акциядорлик компанияларини, шунингдек, ҳудудий савдо-ишлаб чиқариш «Савдо» акциядорлик компанияларини тугатиш тўғрисидаги таклифи қабул қилинсин.

Ўзбекистон Республикаси Молия вазирлиги, Иқтисодиёт вазирлиги тугатилаётган ва қисқартирилаётган тузилмалар фаолияти билан боғлиқ харажатларнинг тасдиқланган кўрсаткичларига зарур тузатишлар киритсин.

2. Ўзбекистон Республикаси Президентининг 2005 йил 31 октябрдаги Р-2360-сонли фармойиши билан тузилган ишчи гуруҳнинг, иловага мувофиқ, истеъмол товарларининг асосий гуруҳлари бўйича ҳудудий (вилоятлараро, туманлараро ва вилоят) базалари тармоқларига эга бўлган ихтисослаштирилган республика улгуржи база-контораларини шакллантириш тўғрисидаги таклифи маъқуллансин.

Мазкур республика улгуржи база-контораларининг фаолиятини мувофиқлаштириш учун қонунчиликда белгиланган тартибда Улгуржи савдо корхоналари уюшмасини ташкил қилиш зарур деб ҳисоблансин.

3. Қуйидагилар республика ихтисослаштирилган улгуржи база-контораларининг асосий вазифалари этиб белгилансин:

чакана савдо корхоналарини, айниқса қишлоқ, бориш қийин ва тоғли ҳудудларда жойлашган корхоналарни тузилган шартномаларда назарда тутилган ҳажм ва турдаги истеъмол товарлари билан барқарор таъминлаш;

ички истеъмол бозорида маркетинг тадқиқотлари олиб бориш, мамлакатимиз корхоналари билан барқарор савдо алоқалари ўрнатиш ва саноат ҳамда озиқ-овқат истеъмол товарлари ишлаб чиқариш учун буюртмаларни жойлаштириш;

чакана савдо ташкилотлари томонидан бериладиган буюртмалар асосида бозорни истеъмол товарлари билан таъминлаш, жумладан республикада ишлаб чиқариш чекланган ёки чиқарилмайдиган товарларни импорт бўйича харид қилиш ҳисобига амалга ошириш;

замонавий улгуржи-савдо технологияларини жорий этиш, техника билан жиҳозлаш масалаларида, шунингдек айланма маблағларни шакллантиришда ҳудудий базаларга ёрдам кўрсатиш.

Белгилансинки, юридик шахс ҳисобланувчи республика ихтисослаштирилган улгуржи базалари очиқ акциядорлик жамияти шаклида ташкил этилади, фаолият кўрсатаётган ва янгидан ташкил этилаётган республика ҳамда вилоят улгуржи базалари, шу жумладан, тугатилаётган «Ўзбексавдо» ва «Ўзбекбирлашув» акциядорлик компаниялари тизимига кирувчи улгуржи базалар, шунингдек бошқа юридик ва жисмоний шахслар унинг муассислари бўладилар.

4. Улгуржи савдо корхоналари уюшмаси бир ой муддатда белгиланган тартибда ихтисослаштирилган ҳудудий базалар рўйхатини, Республика улгуржи база-конторалари тўғрисидаги намунавий низомни, шунингдек, улгуржи савдони амалга ошириш ҳуқуқини берадиган лицензияларни олиш тартибини белгилаб берадиган ҳужжатлар пакетини Ўзбекистон Республикаси Адлия вазирлигига киритсин.

5. Қуйидагилар белгилаб қўйилсин:

ихтисослаштирилган улгуржи база конторалар, уларнинг ҳудудий базалари, вилоят «Матлуботсавдо» акциядорлик компаниялари, истеъмол товарлари ишлаб чиқарувчи ва чакана савдо корхоналари ўртасидаги ўзаро савдо муносабатлари узоқ муддатли ва ўрта муддатли шартнома асосида қурилади;

ихтисослаштирилган ургуржи база-конторалар ва уларнинг ҳудудий базалари, шунингдек, вилоят «Матлуботсавдо» акциядорлик компаниялари чакана савдо корхоналари республиканинг қайси ҳудудида жойлашганидан қатъи назар улар билан олди-сотди шартномаларини тузиш ҳуқуқига эгадирлар.

6. Қуйидагилар:

республика ихтисослаштирилган улгуржи база-конторалари ва уларнинг ҳудудий базалари;

бориш қийин ва тоғли ҳудудларда фаолият кўрсатаётган чакана савдо корхоналари беш йил муддатга мулк солиғи тўлашдан озод қилинсин.

2006 йилнинг 1 апрелидан бошлаб бориш қийин ва тоғли ҳудудларда янги ташкил этилаётган савдо корхоналари учун рўйхатга олиш йиғими суммаси битта энг кам иш ҳақи миқдорида белгилансин.

7. Молия вазирлиги Улгуржи савдо корхоналари уюшмаси билан биргаликда бир ой муддатда республика ихтисослаштирилган улгуржи база-конторалар ва уларнинг ҳудудий базалари томонидан солиқлар ҳамда бошқа мажбурий тўловларни тўлаш тартиби тўғрисида таклифлар киритсин.

8. Ўзбекистон Республикаси Вазирлар Маҳкамаси:

ўн кун муддатда ушбу Фармонни ижро этишга оид ҳужжатлар, жумладан Улгуржи савдо корхоналари уюшмаси, ихтисослаштирилган улгуржи база-конторалар фаолиятини ташкил этиш чора-тадбирлари, савдо фаолиятини амалга ошириш талабларини тасдиқлаш, шунингдек, «Ўзбекбирлашув» ва «Ўзбексавдо» акциядорлик компанияларини тугатиш бўйича комиссияни тузиш борасидаги ҳужжатларнинг лойиҳаларини киритсин;

икки ой муддатда «Матлуботсавдо» ҳудудий компанияларининг фаолиятини ўрганиб чиқсин ва унинг натижаларига кўра улар фаолияти самарадорлигини ошириш ҳамда қишлоқ, бориш қийин ва тоғли ҳудудлар аҳолисининг зарур товарларга бўлган талаб-эҳтиёжини қондириш бўйича таклифлар киритсин.

9. Ўзбекистон Республикаси Адлия вазирлиги манфаатдор вазирликлар ва идоралар билан биргаликда бир ой муддатда қонун ҳужжатларига ушбу Фармондан келиб чиқадиган ўзгартиш ва қўшимчалар тўғрисида таклифлар киритсин.

10. Мазкур Фармоннинг ижросини назорат қилиш Ўзбекистон Республикаси Бош вазири Ш.М. Мирзиёев зиммасига юклансин.