Темир йўл транспортида Ўзбекистон Республикаси божхона чегараларидан ўтувчи йўловчиларнинг қўл юкини, багажини, валютасини ва валюта бойликларини божхона назоратидан ўтказишни тартибга солиш, шунингдек Ўзбекистон Республикаси божхона чегараларидан ўтиш пунктларида уларни божхона расмийлаштируви учун зарур шарт-шароитлар яратиш мақсадида Вазирлар Маҳкамаси қарор қилади:

1. Қуйидагилар:

Ўзбекистон Республикаси божхона чегарасини кесиб ўтиш чоғида йўловчиларнинг қўл юкини, багажини, валютасини ва валюта бойликларини божхона назоратидан ўтказиш мақсадида йўловчи ташувчи темир йўл транспорти воситаларини тўхтатиш учун мўлжалланган чегара темир йўл станциялари рўйхати 1-иловага мувофиқ;

ҳудудида «Ўзбекистон темир йўллари» компанияси божхона органларига хизмат хоналари берадиган темир йўл станциялари рўйхати 2-иловага мувофиқ тасдиқлансин.

2. «Ўзбекистон темир йўллари» компанияси 1999 йилда Бухоро вилоятидаги Хўжадавлат станциясида, келгусида алоқа воситалари билан таъминланган маҳаллий тармоқлар ташкил қилинишини ҳисобга олган ҳолда, иншоотлар ва муҳандислик коммуникацияларига эга бўлган божхона пости қурсин.

Ўзбекистон Республикаси Давлат божхона қўмитаси қурилиш тугаллангандан кейин постни зарур инвентарь, асбоб-ускуналар ва алоқа воситалари билан жиҳозласин.

3. Ўзбекистон Республикаси Алоқа, ахборотлаштириш ва телекоммуникация технологиялари давлат қўмитаси мазкур пунктларни Давлат божхона қўмитаси буюртманомасига биноан алоқа хизматлари ва воситалари билан белгиланган тартибда таъминласин ҳамда келгусида уларнинг узлуксиз ишлашини таъминласин.

4. Ўзбекистон Республикаси Давлат божхона қўмитаси Молия вазирлиги, Марказий банк ва «Ўзбекистон темир йўллари» давлат-акциядорлик компанияси билан биргаликда Темир йўл транспорти йўловчиларининг қўл юкини, багажини, валютасини ва валюта бойликларини божхона назоратидан ўтказиш ва расмийлаштириш тартибини ишлаб чиқсин ҳамда икки ой муддатда тасдиқласин.

5. Мазкур қарорнинг бажарилишини назорат қилиш Ўзбекистон Республикаси Бош вазирининг ўринбосари Л. А. Ахметов зиммасига юклансин.