|
Ҳужжат 03.06.2026 санаси ҳолатига
Амалдаги версияга ўтиш |
Ўзбекистон Республикаси Вазирлар Маҳкамасининг
қарори
Ўзбекистон ҳарбий санъати тарихи давлат музейини ташкил этиш тўғрисида
Ўзбекистон халқининг уч минг йилдан зиёд давлатчилик тарихининг ажралмас қисми бўлган ҳарбий тарих, буюк саркардаларнинг юксак ҳарбий маҳорати, миллий Қуролли Кучларимизнинг барпо этилиши ва ривожланиш босқичлари, шунингдек, Янги Ўзбекистонда ҳарбий соҳада амалга оширилаётган тарихий ўзгаришларни халқимиз, айниқса, ўсиб келаётган авлод ва дунё жамоатчилигига танитиш ва тарғиб этиш мақсадида Вазирлар Маҳкамаси қарор қилади:
1. Ўзбекистон Республикаси Мудофаа вазирлиги, Маданият вазирлиги, Маданий мерос агентлиги ва Фанлар академияси Тарих институтининг Ўзбекистон Республикаси Қуролли Кучлари давлат музейини Ўзбекистон ҳарбий санъати тарихи давлат музейи (кейинги ўринларда — музей) этиб қайта ташкил этиш тўғрисидаги таклифига розилик берилсин.
2. Ўзбекистон ҳарбий санъати тарихи давлат музейини ташкил этиш концепти ва тематик-экспозицион режасини ишлаб чиқиш бўйича ишчи гуруҳ таркиби 1-иловага мувофиқ тасдиқлансин.
3. Ўзбекистон Республикаси Мудофаа вазирлиги:
а) Ўзбекистон Республикаси Маданият вазирлиги, Маданий мерос агентлиги, Фанлар академияси Тарих институти ва Ўзбекистон Бадиий академияси билан биргаликда:
музей экспозицияларини юксак ғоявий-бадиий савияда яратиш учун энг истеъдодли ва маҳоратли ижодкорлар ҳамда мутахассисларни жалб этсин;
музейнинг умумий кўриниши ва меъморий тузилиши миллий услуб ҳамда анъаналарга мос бўлишини, экспозициялар жаҳондаги илғор тажрибаларни ўзида мужассам этишини таъминласин;
музей экспозициялари ва композицияларини таъсирчан, интерактив усуллар, инновацион технологиялар ва сунъий интеллект имкониятларидан кенг фойдаланган ҳолда яратсин;
музей экспонатлари орқали мамлакатимиз ҳарбий тарихи ва меросини ҳаққоний ёритишга, ҳарбий хизматнинг жозибадорлигини ҳамда ёшларнинг ҳарбий касбга қизиқишини оширишга, уларни ватанпарварлик руҳида тарбиялашга алоҳида аҳамият қаратсин;
музейда аҳолининг мамлакатимиз ҳарбий санъати тарихи ва миллий армиямизнинг бугунги куч-қудрати ва салоҳияти билан яқиндан танишиши, илмий изланишлар олиб бориши, кўргазмалар, оммавий-маданий тадбирлар ҳамда ижодий учрашувлар ўтказиши учун барча шароитлар яратсин;
б) Ўзбекистон Республикаси Фанлар академияси Тарих институти ва Маданий мерос агентлиги билан биргаликда бир ой муддатда Ўзбекистон ҳарбий санъати тарихи давлат музейини ташкил этиш концепти ва тематик-экспозицион режасини ишлаб чиқиш бўйича ишчи гуруҳ томонидан ишлаб чиқилган музейни ташкил этиш концепти ва тарихий хронологик тартибдаги тематик-экспозицион режасини тасдиқласин;
в) Ўзбекистон Республикаси Маданий мерос агентлиги билан биргаликда музей фондида сақланаётган экспонатларни Миллий музей фондининг Давлат каталогига киритиш ишларини амалга оширсин.
4. Музейнинг мавжуд биносини реконструкция қилиш, ҳудудини ободонлаштириш ва жиҳозлаш ишларини амалга ошириш доирасида:
Ўзбекистон Республикаси Мудофаа вазирлиги «Ягона буюртмачи хизмати» — буюртмачи этиб;
режалаштирилган лойиҳалаштириш ва қурилиш-монтаж ишлари бўйича бош лойиҳа ва бош пудрат ташкилотлари давлат харидлари тўғрисидаги қонунчиликда белгиланган тартибда аниқланиши;
LexUZ шарҳиҚаранг: Ўзбекистон Республикасининг «Давлат харидлари тўғрисида»ги Қонуни.
лойиҳа-қидирув ва қурилиш-монтаж ишлари Ўзбекистон Республикаси Мудофаа вазирлигининг бюджетдан ташқари маблағлари, Сафарбарлик чақирув резерви маблағлари ва қонунчилик ҳужжатларида тақиқланмаган бошқа манбалар ҳисобидан молиялаштирилиши;
қурилиш-монтаж ишлари бўйича музей қиймати лойиҳа-смета ҳужжатлари ишлаб чиқилиб, ижобий экспертиза хулосалари олингандан сўнг белгилансин.
5. Музей бўйича белгиланган тартибда:
Ўзбекистон Республикаси Қурилиш ва уй-жой коммунал хўжалиги вазирлиги лойиҳа-смета ҳужжатларини ишлаб чиқишда шаҳарсозлик тўғрисидаги қонунчилик ҳужжатлари, шаҳарсозлик нормалари ва қоидалари, техник жиҳатдан тартибга солиш соҳасидаги норматив ҳужжатлар талабларига риоя этилиши ва экспертизадан ўтказилишини таъминласин;
Вазирлар Маҳкамаси ҳузуридаги Қурилиш ва уй-жой коммунал хўжалиги соҳасида назорат қилиш инспекцияси қурилиш-монтаж ишларида тасдиқланган лойиҳа ҳужжатлари талабларига риоя этилиши юзасидан давлат назоратини ўрнатсин.
6. Белгилаб қўйилсинки:
Ўзбекистон Республикаси Маданий мерос агентлиги музей экспонатларини сақлаш тартиб-қоидаларига риоя этилишини назорат қилиб боради;
музейнинг маъмурий-бошқарув ходимлари, шунингдек, ижодий ходимлар ва мутахассислар меҳнатига ҳақ тўлаш шартларига кўра Вазирлар Маҳкамасининг 2018 йил 19 июндаги 458-сон қарори билан тасдиқланган давлат музейларининг мос келувчи ходимларига тенглаштирилади;
музей биносини сақлаш, жиҳозлаш ҳамда унинг фаолиятини таъминлаш билан боғлиқ харажатлар Мудофаа вазирлигига ушбу мақсадлар учун ҳар йили ажратиладиган Давлат бюджети маблағлари доирасида, Мудофаа вазирлигининг бюджетдан ташқари маблағлари, музей томонидан пулли хизматлар кўрсатишдан тушадиган маблағлар ва қонунчилик ҳужжатларида тақиқланмаган бошқа манбалар ҳисобидан амалга оширилади.
7. Ўзбекистон Республикаси Маданий мерос агентлиги Фанлар академияси Тарих институти билан биргаликда музей фаолиятини самарали ташкил этиш бўйича илмий-услубий ва амалий ёрдам кўрсатсин.
8. Ўзбекистон Республикаси Ташқи ишлар вазирлиги:
Мудофаа вазирлиги билан биргаликда музей экспозициясини бойитиш мақсадида хорижий мамлакатларда сақланаётган Ўзбекистон ҳарбий тарихига оид экспонатлар ва ҳужжатларни ёки уларнинг фотосурати ва нусхаларини Ўзбекистонга олиб келиш чораларини кўрсин;
музейга хорижий давлатлар музейлари ва халқаро ташкилотлар билан илмий ҳамкорликни ўрнатиш ва ривожлантиришда амалий ёрдам кўрсатсин.
9. Ўзбекистон Республикаси Мудофаа вазирлиги уч ой муддатда:
а) музейнинг янги ташкилий-штат тузилмаси ҳамда Ўзбекистон ҳарбий санъати тарихи давлат музейи тўғрисидаги низомни белгиланган тартибда тасдиқласин;
б) Рақамли технологиялар вазирлиги ва Маданият вазирлиги билан биргаликда:
музейни белгиланган тартибда телекоммуникация ва юқори тезликдаги Интернет тармоғига уланишини таъминласин;
музейга кириш чипталарининг онлайн савдосини ташкил этсин;
музей экспонатларини юқори сифатли 3D сканерлаш ва фотограмметрия орқали рақамли нусхаларга айлантириш, барча экспонатлар бўйича ягона электрон реестрни яратиш ва музей ички маълумотлар базаси билан интеграция қилиш чораларини кўрсин;
сунъий интеллект асосида музей экспонатлари ҳақида автоматик изоҳ, мультипликацияли тақдимот ўтказиш ва индивидуал таржима қилиш бўйича интеллектуал аудиогид, хорижий тилларда онлайн гид, музейга электрон саёҳат платформалари, 360° виртуал турлар, рақамли архивлар, онлайн экскурсия ва кўргазмалар ўтказиш тизимини жорий этсин;
музейда сенсорли панеллар, мультимедиа инсталляциялари, AR/VR технологиялари асосида жозибадор музей экспозицияларини, голографик намойишлар, рақамли макетлар ва интерактив тажриба зоналарини ташкил этсин;
ҳарбий техника, тарихий воқеалар ва махсус операцияларни виртуал муҳитда симуляция қилиш имкониятини яратсин;
музейнинг замонавий сайтини яратсин ҳамда унда музей фаолияти билан боғлиқ маълумотлар бериб борилишини йўлга қўйсин;
в) Ўзбекистон Республикаси Туризм қўмитаси билан биргаликда музейни туризм йўналишлари рўйхатига киритсин ҳамда унга ички ва ташқи сайёҳларни кенг жалб этиш чораларини кўрсин;
г) Ўзбекистон Республикаси Олий таълим, фан ва инновациялар вазирлиги ҳамда Мактабгача ва мактаб таълими вазирлиги билан биргаликда музейга таълим муассасалари талабалари, ўқувчи-ёшларнинг мунтазам ташрифларини ташкил этсин.
10. Ўзбекистон Республикаси Ҳукуматининг 2-иловага мувофиқ айрим қарорларига ўзгартиришлар киритилсин.
11. Ушбу қарорнинг бажарилишини назорат қилиш Ўзбекистон Республикаси мудофаа вазири Ш.Г. Халмухамедов зиммасига юклансин.
Ўзбекистон Республикасининг Бош вазири А. АРИПОВ
Тошкент ш.,
2026 йил 3 июнь,
280-сон
Вазирлар Маҳкамасининг 2026 йил 3 июндаги 280-сон қарорига
1-ИЛОВА
1-ИЛОВА
Ўзбекистон ҳарбий санъати тарихи давлат музейини ташкил этиш концепти ва тематик-экспозицион режасини ишлаб чиқиш бўйича ишчи гуруҳ таркиби
|
1. |
Ш.Г. Халмухамедов |
— |
мудофаа вазири, ишчи гуруҳи раҳбари |
|
2. |
Х.А. Каршиев |
— |
мудофаа вазири ўринбосари, ишчи гуруҳи раҳбари ўринбосари |
|
3. |
Б.М. Ахмедов |
— |
маданият вазирининг биринчи ўринбосари |
|
4. |
Б.Г. Абдикаримов |
— |
Маданий мерос агентлиги директори |
|
5. |
Б.А. Абдуҳалимов |
— |
Фанлар академияси вице-президенти |
|
6. |
У.М. Юсупов |
— |
«Ўзархив» агентлиги директори |
|
7. |
О.А. Хасанов |
— |
Республика Маънавият ва маърифат маркази раҳбари |
|
8. |
А.Ҳ. Зиё |
— |
Фанлар академияси Тарих институти директори |
|
9. |
А.В. Нуридинов |
— |
Ўзбекистон Бадиий академияси раиси |
|
10. |
О.А. Усаров |
— |
мудофаа вазири маслаҳатчиси |
|
11. |
Э.Г. Раджапов |
— |
Олий таълим, фан ва инновациялар вазирлиги ҳузуридаги Инновацион ривожланиш агентлиги |
|
12. |
Ш.Н. Юсупов |
— |
Мудофаа вазирлиги ҳузуридаги «Ғалаба боғи» ёдгорлик мажмуаси бошлиғи |
|
13. |
Ж.Ҳ. Исмоилова |
— |
Фанлар академияси Ўзбекистон тарихи давлат музейи директори |
|
14. |
Х.Т. Файзиев |
— |
Фанлар академияси Темурийлар тарихи давлат музейи директори |
|
15. |
И.М. Валихўжаев |
— |
Ўзбекистон Бадиий ижодкорлар уюшмаси раиси |
|
16. |
Ш.Р. Пидаев |
— |
Фанлар академияси Санъатшунослик институти директори |
|
17. |
Х.Х. Холматов |
— |
«Аждодлар изидан» ҳарбий-тарихий жамияти раиси |
|
18. |
Б.В. Хасанов |
— |
Вазирлар Маҳкамаси ҳузуридаги «Қатағон қурбонлари хотираси» музейи директори |
|
19. |
Ф.А. Мақсудов |
— |
Фанлар академияси Миллий археология маркази директори |
|
20. |
А.А. Эргашев |
— |
Мудофаа вазирлиги Маънавият ва маданият департаменти бошлиғи, ишчи гуруҳи котиби |
Изоҳ:
1. Ишчи гуруҳ аъзолари бошқа ишга ўтган тақдирда, унинг таркибига ушбу лавозимларга янги тайинланган ёки зиммасига тегишли вазифаларни бажариш юкланган шахслар киритилади.
2. Ишчи гуруҳи раҳбари заруратга кўра ишчи гуруҳи таркибига бошқа мутахассисларни жалб қилиши мумкин.
Вазирлар Маҳкамасининг 2026 йил 3 июндаги 280-сон қарорига
2-ИЛОВА
2-ИЛОВА
Ўзбекистон Республикаси Ҳукуматининг айрим қарорларига киритилаётган ўзгартиришлар
2. Вазирлар Маҳкамасининг 2017 йил 11 декабрдаги 975-сон қарори билан тасдиқланган Ўзбекистон Республикаси Давлат бюджети ҳисобидан молиялаштириладиган музейлари, уларнинг филиал ва бўлимлари рўйхатининг «Ўзбекистон Республикасининг республика бюджетидан молиялаштириладиган музейлар» бўлими 7-позициясидаги «Қуролли Кучлар тарихи давлат музейи» сўзлари «Ўзбекистон ҳарбий санъати тарихи давлат музейи» сўзлари билан алмаштирилсин.
3. Вазирлар Маҳкамасининг «Ўзбекистон Республикаси Мудофаа вазирлигининг Маънавият ва маданият департаменти фаолиятини ташкил этиш чора-тадбирлари тўғрисида» 2024 йил 24 июндаги 356-сон қарорида:
а) 1-банднинг тўртинчи хатбошисида «Қуролли Кучлар давлат музейи» сўзлари «Ўзбекистон ҳарбий санъати тарихи давлат музейи» сўзлари билан алмаштирилсин;
б) 3-банднинг учинчи ва тўртинчи хатбошиларидаги «Қуролли Кучлар давлат музейи» сўзлари «Ўзбекистон ҳарбий санъати тарихи давлат музейи» сўзлари билан алмаштирилсин;
в) 1-илованинг 15-позициясида «Қуролли Кучлар давлат музейи» сўзлари «Ўзбекистон ҳарбий санъати тарихи давлат музейи» сўзлари билан алмаштирилсин;
г) 2-иловада:
6-банднинг иккинчи хатбошиси қуйидаги таҳрирда баён этилсин:
«Департамент ва унинг бўйсунувидаги бўлинмалар томонидан ташкил этиладиган театр ва концерт томоша намойишларига, Ўзбекистон ҳарбий санъати тарихи давлат музейига кириш чипталарини сотиш, шартнома асосида театр, концерт-томоша ва бошқа оммавий-маданий тадбирларни ташкил этиш ҳамда бошқа пулли хизматлар кўрсатишдан тушган тушумлар»;
8-банд қуйидаги таҳрирда баён этилсин:
«8. Департамент ва унинг бўйсунувидаги бўлинмалар томонидан ўтказиладиган тадбирларда иштирок этиш, улар томонидан ташкил этиладиган театр ва концерт-томоша намойишларига, Ўзбекистон ҳарбий санъати тарихи давлат музейига кириш учун чипта нархи, тўгарак ва ўқув курслари учун тўловлар, Департамент ва унинг бўйсунувидаги бўлинмаларга тегишли ҳудудда жисмоний ва юридик шахслар томонидан ўтказиладиган тадбирлар, шунингдек, шартнома асосида театр, концерт-томоша ва бошқа оммавий-маданий тадбирларни ташкил этиш ҳамда бошқа пулли хизматлар кўрсатиш учун тарифлар Ўзбекистон Республикасида кўрсатиладиган ўхшаш хизматлар учун белгиланган ўртача нархларни қўллаган ҳолда шакллантирилади.»;
9-банднинг «б» кичик банди қуйидаги таҳрирда баён этилсин:
«б) 25 фоиздан кўп бўлмаган миқдорда — Департамент ва унинг бўйсунувидаги бўлинмаларнинг ҳарбий хизматчилари, Қуролли Кучлар ишчи ва хизматчиларини моддий рағбатлантириш учун.»;
д) 3-илованинг 1-банди чиқариб ташлансин.
(Қонунчилик маълумотлари миллий базаси, 03.06.2026 й., 09/26/280/0553-сон)
