Ўзбекистон Республикаси Давлат чегарасини қўриқлаш ва унга туташ ҳудудларда ердан фойдаланишни тартибга солиш манфаатларини кўзлаб Вазирлар Маҳкамаси қарор қилади:

1. Ўзбекистон Республикаси Вазирлар Маҳкамаси ҳузуридаги Геодезия ва картография бошқармаси чегарадош Мустақил Давлатлар Ҳамдўстлиги давлатлари вакиллари билан биргаликда 1994-1995 йиллар мобайнида Ўзбекистон Республикасининг Ҳамдўстлик давлатлари билан чегараларини аниқласин ва жойларда Ўзбекистон Республикасининг чегараларини бириктириб қўйиш бўйича Ўзбекистон Республикаси Ҳукуматига таклифлар киритсин.

2. Ўзбекистон Республикаси Қишлоқ хўжалиги вазирлиги, Қорақалпоғистон Республикаси Вазирлар Кенгаши ва вилоятлар ҳокимликлари Ўзбекистон Республикаси чегара қўшинларига қуйидаги ер майдонларини бепул фойдаланиш учун берсинлар;

Афғонистон Ислом Давлати билан чегарасининг бутун узунлиги бўйлаб Давлат чегараси чизиғи (сувдаги бўлинган жой) дан асосий муҳандислик иншоотлари чегарасигача, лекин камида 500 метргача бўлган ерларни;

Мустақил Давлатлар Ҳамдўстлиги давлатлари билан чегарадаги ерларни — чегаралар аниқлангандан ва биркитиб қўйилгандан кейин.

3. Қорақалпоғистон Республикаси Вазирлар Кенгаши ва вилоятлар ҳокимликлари Мустақил Давлатлар Ҳамдўстлиги давлатлари билан чегаралардаги бундай ерларни чегарадош давлатлар билан чегаралар аниқланган ва биркитиб қўйилган вақтдан бошлаб 2 ой мобайнида берсинлар.

4. Берилган ерлар доирасида ҳар қандай хўжалик, тадбиркорлик ва қонунчилик билан тақиқланмаган бошқа фаолиятни юритиш фақат Ўзбекистон Республикаси Давлат хавфсизлик хизмати Чегара қўшинларининг рухсатига биноан, тарафлар ўртасида ижара, инвестиция ва давлат-хусусий шериклик шартлари асосида расмийлаштириладиган шартномаларга мувофиқ, тегишли тўлов эвазига амалга оширилсин.

5. Мазкур қарорнинг бажарилишини назорат қилиш Ўзбекистон Республикаси Бош вазирининг биринчи ўринбосари И.Ҳ. Жўрабеков зиммасига юклансин.