toggle_night_mode
Ҳужжат 28.08.2025 санаси ҳолатига
Амалдаги версияга ўтиш
Ўзбекистон Республикаси Вазирлар Маҳкамасининг
қарори
Ўзбекистон Республикаси Дин ишлари бўйича қўмитаси ҳузуридаги Диний-маърифий соҳада малака ошириш ва қайта тайёрлаш институти фаолиятини ташкил этиш чора-тадбирлари тўғрисида
Ўзбекистон Республикаси Президентининг «Фуқароларнинг виждон эркинлиги ҳуқуқи кафолатларини янада мустаҳкамлаш ҳамда диний-маърифий соҳадаги ислоҳотларни янги босқичга олиб чиқиш чора-тадбирлари тўғрисида» 2025 йил 21 апрелдаги ПФ-68-сон Фармони ижросини таъминлаш, шунингдек, диний соҳада мутахассисларнинг малакасини ошириш ва қайта тайёрлаш ишларини янги босқичга олиб чиқиш мақсадида Вазирлар Маҳкамаси қарор қилади:
1. Ўзбекистон Республикаси Президентининг 2025 йил 21 апрелдаги ПФ-68-сон Фармонига мувофиқ:
Ўзбекистон халқаро ислом академияси ҳузуридаги Малака ошириш маркази Ўзбекистон Республикаси Дин ишлари бўйича қўмитаси ҳузуридаги Диний-маърифий соҳада малака ошириш ва қайта тайёрлаш институти этиб (кейинги ўринларда — Институт) қайта ташкил этилгани;
Институт исломшунослик, диншунослик, давлат ва дин муносабатлари асослари, шунингдек, радикаллашувнинг олдини олиш йўналишларида диний соҳада мутахассисларнинг малакасини ошириш ва қайта тайёрлашга ягона масъул муассаса этиб белгилангани маълумот учун қабул қилинсин.
2. Қуйидагилар Институтнинг асосий вазифалари этиб белгилансин:
диний-маърифий соҳа мутахассисларини, мазкур соҳада фаолият юритувчи давлат ва нодавлат нотижорат ташкилотлари ходимларини, шу жумладан барча таълим ташкилотларининг исломшунослик ва диншунослик фанлари ўқитувчиларининг малакасини ошириш ва қайта тайёрлаш;
исломшунослик, диншунослик, давлат ва дин муносабатлари асослари, шунингдек, радикаллашувнинг олдини олиш йўналишларида диний-маърифий соҳада мутахассисларнинг малакасини ошириш ва қайта тайёрлаш;
норматив-ҳуқуқий ҳужжатларида белгиланган диний-маърифий соҳа ходимлари ва раҳбар кадрларининг малакасини ошириш ва қайта тайёрлаш;
тингловчилар учун ишдан ажралмаган ҳолда малака оширишнинг муқобил шаклларини жорий этиш, кадрлар салоҳиятини ошириш, таълим бериш жараёнида инновацион педагогик технологиялар асосида ўқитишни ташкил этиш;
диний-маърифий соҳада фаолият юритувчи давлат хизматчилари ҳамда фуқаролик жамияти институтлари вакиллари учун соҳа бўйича билимларини оширишга қаратилган ўқув курсларини ташкил қилиш;
илмий-тадқиқот муассасалари билан ҳамкорликда диний-маърифий соҳадаги муаммолар ва мазкур соҳанинг энг долзарб масалалари, радикаллашувга, экстремизмга ва терроризмга қарши курашиш бўйича илмий-тадқиқот лойиҳаларини амалга ошириш, ушбу жараёнга миллий, хорижий ва халқаро грантларни жалб қилиш;
таълим жараёни ҳамда илмий фаолиятга юқори малакали маҳаллий ва чет эллик мутахассисларни кенг жалб қилиш, педагогика соҳасида илғор тажриба алмашиш борасида халқаро ҳамкорликни йўлга қўйиш;
республикада ижтимоий-маънавий муҳитни янада соғломлаштириш, ўсиб келаётган ёш авлодни маънавий-ахлоқий жиҳатдан баркамол этиб, ватанпарварлик руҳида тарбиялаш ишларини тубдан яхшилаш бўйича доимий иш олиб бориш;
илмий асосланган, диннинг асл таълимотини ўзида мужассам этган билимларни қамраб олган ўқув режа, ўқув дастур, ўқув қўлланмалари ҳамда тақдимот материалларини ишлаб чиқиш.
3. Институт Ўзбекистон Республикаси Давлат герби тасвири туширилган ва ўз номи давлат тилида ёзилган муҳрга ва бланкаларга, мустақил балансга, Ўзбекистон Республикаси Иқтисодиёт ва молия вазирлиги ҳузуридаги Ғазначилик хизматида очиладиган шахсий ғазна ҳисобварақларига, банк ҳисобварақларига, шу жумладан, хорижий валютадаги шахсий ғазна ҳисобварақларига эга бўлади.
4. Белгилансинки:
а) Институтга Дин ишлари бўйича қўмита раиси томонидан лавозимга тайинланадиган ва лавозимдан озод этиладиган директор раҳбарлик қилади, унинг мақоми, транспорт, меҳнатга ҳақ тўлаш, моддий рағбатлантириш ва тиббий таъминоти шартлари олий таълим ташкилоти филиали директорига тенглаштирилади;
б) Институтга:
илмий, таълим ва қонунчилик ҳужжатларида тақиқланмаган бошқа фаолиятни амалга ошириш бўйича пуллик хизматлар кўрсатиш;
Дин ишлари бўйича қўмита билан келишилган ҳолда шартнома асосида ўқитиш қийматларини мустақил белгилаш;
Институтни ривожлантириш жамғармаси маблағларининг ҳамда шартнома асосида ишларни бажариш ва хизмат кўрсатишдан тушадиган бошқа маблағларнинг (уларни амалга ошириш учун харажатларини чегириб ташлаган ҳолда) 75 фоизгача қисмини Институт ходимларини ижтимоий ҳимоя қилиш ва моддий рағбатлантириш тадбирларига йўналтириш;
ўқув жараёнига профессор-ўқитувчиларни ҳамда соҳа бўйича мутахассисларни меҳнатга соатбай ҳақ тўлаган ҳолда тўғридан-тўғри шартнома асосида жалб этиш ҳуқуқи берилади;
в) Ўзбекистон халқаро ислом академияси ҳузуридаги Малака ошириш марказининг Қорақалпоғистон Республикаси ва Сурхондарё вилоятлари минтақавий филиалларининг фаолияти тугатилади.
5. Қуйидагилар:
Ўзбекистон Республикаси Дин ишлари бўйича қўмитаси ҳузуридаги Диний-маърифий соҳада малака ошириш ва қайта тайёрлаш институтининг тузилмаси 1-иловага мувофиқ;
Ўзбекистон Республикаси Дин ишлари бўйича қўмитаси ҳузуридаги Диний-маърифий соҳада малака ошириш ва қайта тайёрлаш институтининг Самарқанд ва Наманган минтақавий филиаллари тузилмаси 2-иловага мувофиқ;
Ўзбекистон Республикаси Дин ишлари бўйича қўмитаси ҳузуридаги Диний-маърифий соҳада малака ошириш ва қайта тайёрлаш институтида мутахассисларни қайта тайёрлаш ҳамда уларнинг малакасини ошириш тартиби тўғрисидаги низом 3-иловага мувофиқ тасдиқлансин.
6. Белгилаб қўйилсинки, Институтда 2025 йил 1 сентябрдан бошлаб:
диний-маърифий соҳа мутахассислари, мазкур соҳада фаолият юритувчи давлат ва нодавлат нотижорат ташкилотлари ходимлари, мулкчилик шакли ва идоравий бўйсунувидан қатъи назар барча таълим ташкилотларининг исломшунослик ва диншунослик фанлари ўқитувчилари ишга қабул қилинган даврдан бошлаб олти ой ичида, кейинчалик ҳар уч йилда бир маротаба ўз малакасини оширади;
диний-маърифий соҳада яхлит илмий-тадқиқотлар тизимини яратиш мақсадида тегишли ихтисосликлар, шу жумладан, диншунослик, исломшунослик соҳалари бўйича олий таълимдан кейинги таълим жорий этилади;
Институт тадқиқотчиларини тадқиқот соҳалари бўйича ташкилотларга бириктириш амалиёти жорий этилади, уларнинг илмий-тадқиқот мавзулари бириктирилган соҳаларнинг аниқ муаммоларини ҳал этишга йўналтирилади;
таълим ташкилотларининг исломшунослик, диншунослик, давлат ва дин муносабатлари асослари фанларидан дарс берадиган, олий маълумотга эга номутахассис педагог кадрлари шартнома (тўлов) асосида қайта тайёрлаш курсларида ўқитилади.
7. Шундай тартиб ўрнатилсинки, унга мувофиқ:
қайта тайёрлаш курсларини муваффақиятли тугатган таълим ташкилотларининг олий маълумотга эга номутахассис педагог кадрларига давлат намунасидаги диплом берилади ҳамда улар таълим ташкилотларида исломшунослик, диншунослик фанларидан дарс бериш ҳуқуқига эга бўлади;
диний-маърифий соҳа мутахассислари, мазкур соҳада фаолият юритувчи давлат ва нодавлат нотижорат ташкилотлари ходимлари, мулкчилик шакли ва идоравий бўйсунувидан қатъи назар барча таълим ташкилотларининг исломшунослик ва диншунослик фанлари ўқитувчилари Институтда исломшунослик, диншунослик, давлат ва дин муносабатлари асослари, шунингдек, радикаллашувнинг олдини олиш йўналишларида малакасини ошириш бепул амалга оширилади;
Институтда манфаатдор вазирлик, идора ва ташкилотларнинг буюртмасига кўра шартнома (тўлов) асосида малака ошириш ва қисқа муддатли ўқув курслари ташкил этилади.
8. Институт фаолиятини молиялаштириш:
Давлат бюджети маблағлари, Институтнинг бюджетдан ташқари маблағлари, шартнома (тўлов) асосида ўқитишдан тушадиган маблағлар, илмий-ўқув, ўқув-методик, илмий ва ахборот-таҳлилий маҳсулотларни ишлаб чиқариш, хўжалик (меҳмонхона) фаолиятидан ва шартнома асосида хизмат кўрсатишдан тушадиган маблағлар, ҳомийлик хайриялари, халқаро молия институтлари ва бошқа хорижий ташкилотларнинг грантлари, республика илмий-тадқиқот лойиҳалари грантлари ҳамда қонунчилик ҳужжатларида тақиқланмаган бошқа манбалар ҳисобидан амалга оширилади;
2025 йилда Ўзбекистон Республикасининг республика бюджетидан биринчи даражали бюджет маблағларини тақсимловчи сифатида Дин ишлари бўйича қўмитага ажратилган маблағлар доирасида амалга оширилади, 2026 йилдан бошлаб эса Давлат бюджети параметрларида назарда тутилади.
9. Дин ишлари бўйича қўмита, Институт:
а) бир ой муддатда Институт устави тасдиқланиши ҳамда белгиланган тартибда давлат рўйхатидан ўтказилишини таъминласин;
б) икки ой муддатда:
исломшунослик, диншунослик, давлат ва дин муносабатлари асослари, радикаллашувнинг олдини олиш йўналишларида малака ошириш ва қайта тайёрлаш бўйича Институтнинг янги ўқув режа ва дастурларини ишлаб чиқсин;
Олий таълим, фан ва инновациялар вазирлиги билан биргаликда олий таълим ташкилотларининг диншунослик фанидан дарс бераётган номутахассис бўлган профессор-ўқитувчилари рўйхатини шакллантирсин, рўйхатни тизимли равишда янгилаб Институтнинг қайта тайёрлаш курсларида ўқитилишни ташкил этсин;
в) Ўзбекистон халқаро исломшунослик академияси билан биргаликда:
Институтни Ўзбекистон халқаро исломшунослик академиясига қарашли Тошкент шаҳри Шайхонтоҳур тумани Абдулла Қодирий кўчасидаги 11а-уй манзилида жойлашган бинонинг биринчи қаватига (469 кв метр ҳудудига) текин фойдаланиш ҳуқуқи асосида жойлаштирилишини таъминласин;
тугатилаётган Қорақалпоғистон Республикаси ва Сурхондарё вилояти минтақавий филиаллари ходимларини ишга жойлаштирсин.
10. Самарқанд вилояти ҳокимлиги ва Наманган вилояти ҳокимлиги Дин ишлари бўйича қўмита билан биргаликда бир ой муддатда Институтнинг Самарқанд ва Наманган минтақавий филиалларини ўқув жараёнини ташкил этиш учун мос биноларга текин фойдаланиш ҳуқуқи билан жойлаштириш чораларини кўрсин.
11. Дин ишлари бўйича қўмита манфаатдор вазирлик, идора ва ташкилотлар билан биргаликда:
Институтни стратегик ривожлантириш, унинг халқаро нуфузини ошириш, таълим фаолиятини халқаро стандартлар даражасига кўтариш, илмий-педагогик ва моддий-техник салоҳиятини кучайтириш чораларини кўрсин;
кадрлар малакасини ошириш ва қайта тайёрлашнинг илғор шакл ва усулларини жорий этган ҳолда таълим дастурларини доимий такомиллаштириб борсин;
Институт раҳбарлари ва профессор-ўқитувчиларини хорижий давлатларда ўзаро тажриба алмашиш ва малака ошириши учун зарур шарт-шароитлар яратсин, етакчи хорижий таълим ва илмий-тадқиқот ташкилотлари билан ҳамкорлик алоқаларини кенгайтирсин.
12. Ташқи ишлар вазирлиги етакчи хорижий илмий таълим марказлари ва таълим ташкилотлари билан ҳамкорлик қилишда Институтга ҳар томонлама кўмаклашсин.
13. Вазирлар Маҳкамасининг «Ўзбекистон халқаро ислом академияси ҳузурида Малака ошириш маркази ва «Зиё» медиа марказини ташкил этиш ҳамда уларнинг фаолиятини қўллаб-қувватлаш чора-тадбирлари тўғрисида» 2019 йил 14 январдаги 25-сон қарорига 4-иловага мувофиқ ўзгартиришлар киритилсин.
14. Дин ишлари бўйича қўмита манфаатдор вазирлик ва идоралар билан биргаликда ўзлари қабул қилган норматив-ҳуқуқий ҳужжатларни икки ой муддатда ушбу қарорга мувофиқлаштирсин.
15. Ушбу қарорнинг бажарилишини назорат қилиш Ўзбекистон Республикаси Дин ишлари бўйича қўмитаси раиси С.Д. Тошбоев зиммасига юклансин.
Ўзбекистон Республикасининг Бош вазири А. АРИПОВ
Тошкент ш.,
2025 йил 27 август,
542-сон
Вазирлар Маҳкамасининг 2025 йил 27 августдаги 542-сон қарорига
1-ИЛОВА
Ўзбекистон Республикаси Дин ишлари бўйича қўмитаси ҳузуридаги Диний-маърифий соҳада малака ошириш ва қайта тайёрлаш институтининг
ТУЗИЛМАСИ

Директор

Илмий кенгаш

Ўқув ишлари бўйича директор ўринбосари

Ахборот-ресурс маркази

2

Молия-иқтисод бўлими

2

Ўқув-услубий бўлим

4

Ахборот-коммуникация технологиялари бўйича мутахассис

1

Ходимлар бўйича мутахассис

1

Қайта тайёрлаш бўлими

3

Юрисконсульт

1

Кафедралар *

Иш юритувчи

1

Хўжалик бўлими **

1

Меҳмонхона типидаги ётоқхона **

Минтақавий филиаллар ***

Изоҳ.
Ходимларнинг умумий чекланган сони (техник, хизмат кўрсатувчи, ўқув-ёрдамчи ходимлар ва профессор-ўқитувчилар таркибидан ташқари) — 18 нафар, шу жумладан бошқарув ходимлари — 10 нафар. Масъул ходимлар штат бирликлари сони бир нафардан иборат бўлганда меҳнатга ҳақ тўлаш шартлари бўйича бўлим бошлиғига тенглаштирилади.
* кафедрадаги профессор-ўқитувчилар сони Давлат бюджети ҳисобидан (бепул асосда) малака оширувчи тингловчилар сонидан келиб чиқиб ўзгаради. Кафедраларнинг ўқув-ёрдамчи ходимлари сони қонунчилик ҳужжатларида олий таълим муассасалари учун белгиланган нормативларга мувофиқ белгиланади.
** Штат бирликлари ҳамда техник ва хизмат кўрсатиш ходимлари сони олий таълим муассасалари учун белгиланган нормативларга мувофиқ белгиланади.
*** Меҳнатга ҳақ тўлаш шартлари бўйича минтақавий филиал раҳбарлари олий таълим муассасасининг деканига тенглаштирилади.
Вазирлар Маҳкамасининг 2025 йил 27 августдаги 542-сон қарорига
2-ИЛОВА
Ўзбекистон Республикаси Дин ишлари бўйича қўмитаси ҳузуридаги Диний-маърифий соҳада малака ошириш ва қайта тайёрлаш институтининг Самарқанд ва Наманган минтақавий филиаллари
ТУЗИЛМАСИ

Раҳбар

Ўқув-услубий бўлим

2

Хўжалик бўлими

1

Изоҳ. Ходимларнинг умумий чекланган сони (техник, хизмат кўрсатувчи, ўқув-ёрдамчи ходимлар ва профессор-ўқитувчилар таркибидан ташқари) — 4 нафар, шу жумладан бошқарув ходимлари сони — 3 нафар.
Вазирлар Маҳкамасининг 2025 йил 27 августдаги 542-сон қарорига
3-ИЛОВА
Ўзбекистон Республикаси Дин ишлари бўйича қўмитаси ҳузуридаги Диний-маърифий соҳада малака ошириш ва қайта тайёрлаш институтида мутахассисларни қайта тайёрлаш ҳамда уларнинг малакасини ошириш тартиби тўғрисида
НИЗОМ
1-боб. Умумий қоидалар
1. Ушбу Низом Ўзбекистон Республикаси Дин ишлари бўйича қўмитаси ҳузуридаги Диний-маърифий соҳада малака ошириш ва қайта тайёрлаш институтида (кейинги ўринларда — Институт) диний соҳа ва диний-маърифий соҳада ходимларни давлат ва дин муносабатлари, исломшунослик, диншунослик, радикализмга қарши кураш ҳамда бошқа йўналишларда қайта тайёрлаш ва уларнинг малакасини ошириш тартибини белгилайди.
2. Ушбу Низомда қуйидаги асосий тушунчалардан фойдаланилади:
диний-маърифий соҳа мутахассислари — Дин ишлари бўйича қўмита марказий аппарати, Қорақалпоғистон Республикаси, вилоятлар ва Тошкент шаҳар ҳудудий бошқармалари ҳамда туман (шаҳар) мутахассислари, Ўзбекистондаги ислом цивилизацияси маркази, илмий-тадқиқот марказлари, Ўзбекистон халқаро исломшунослик академияси раҳбар ва илмий ходимлари, профессор-ўқитувчилари, шунингдек, диний соҳа ходимлари ҳамда мазкур соҳада фаолият юритувчи давлат ва нодавлат нотижорат ташкилотлари ходимлари, мулкчилик шакли ва идоравий бўйсунувидан қатъи назар барча таълим ташкилотларининг исломшунослик ва диншунослик фанлари ўқитувчилари, шу жумладан норматив-ҳуқуқий ҳужжатларида диний-маърифий соҳада малакаси оширилиши ва қайта тайёрланиши белгиланган ходимлар;
буюртмачи — малака ошириш, қайта тайёрлаш ва қисқа муддатли курсларда таълим олиш учун мурожаат қилган жисмоний ёки юридик шахс;
талабгор — қайта тайёрлаш курсларида таълим олиш учун мурожаат қилган олий маълумотга эга бўлган шахс;
тингловчи — тегишли ташкилот томонидан рўйхат асосида тақдим этилган ёки белгиланган тартибда шакллантирилиб малака ошириш ва қайта тайёрлаш курсларига қабул қилинган жисмоний шахс;
малака ошириш — исломшунослик, диншунослик, давлат ва дин муносабатлари асослари, шунингдек, радикаллашувнинг олдини олиш йўналишлари бўйича ишлаб чиқилган ўқув дастурлари талабларидан келиб чиққан ҳолда диний-маърифий соҳа мутахассисларининг малака ва кўникмаларини мунтазам равишда янгилаб бориш орқали уларнинг касбий билим ва маҳоратини оширишга қаратилган ўқитиш шакли;
қайта тайёрлаш — исломшунослик, диншунослик, давлат ва дин муносабатлари асослари, шунингдек, радикаллашувнинг олдини олиш йўналишлари бўйича ишлаб чиқилган ўқув дастурлари асосида олий маълумотга эга номутахассис шахсларни зарур билим, кўникма ва малакаларни ўзлаштириш орқали янги касбий фаолиятга йўналтиришга қаратилган ўқитиш шакли;
малака талаблари — тингловчиларнинг умумий билим ва касб тайёргарлиги даражасига қўйиладиган талаблар мажмуи;
ўқув дастури — ўқув курсининг таълим мазмунини, унинг тингловчилар томонидан ўзлаштирилишининг мақсадга мувофиқ усулларини ташкил этишни назарда тутадиган, ахборот манбаи бўлган, мутахассисликларнинг малака талаблари, ўқув курсининг асосий мазмуни ва методик тузилишини аниқлаб берувчи асосий ҳужжат;
ўқув режаси — блоклар ва ўқув фанлари (курслар)нинг номларини, уларни ўзлаштириш учун ажратилган соатлар ҳажмини ҳамда тингловчиларнинг билимларини назорат қилиш шаклларини белгилаб берувчи асосий ҳужжат.
3. Институтда диний-маърифий соҳа мутахассислари исломшунослик, диншунослик, давлат ва дин муносабатлари асослари ҳамда радикаллашувнинг олдини олиш йўналишларида белгиланган даврийликка мувофиқ бепул асосда малака оширади.
4. Институтда қуйидагилар қонунчилик ҳужжатларида белгиланган тартибда шартнома асосида ўқитилади:
нодавлат таълим ташкилотларининг исломшунослик ва диншунослик йўналишидаги педагог кадрларининг малакасини ошириш;
таълим ташкилотларининг исломшунослик, диншунослик, давлат ва дин муносабатлари асослари фанларидан дарс берадиган, олий маълумотга эга номутахассис педагог кадрларини қайта тайёрлаш;
давлат ва нодавлат ташкилотларнинг ходимларини қисқа муддатли ўқув курсларида ўқитиш.
5. Институтда ўқув курслари қуйидаги таълим дастурлари асосида ташкил этилади:
диний соҳа мутахассислари ва таълим ташкилотларининг исломшунослик, диншунослик фанларидан дарс берадиган педагог кадрларнинг малакасини ошириш — 144 соат;
вазирлик, идора ва ташкилотларнинг ходимларини диний-маърифий соҳада қисқа муддатли ўқув курсларида ўқитиш учун — 36 соатдан 72 соатгача;
таълим ташкилотларининг исломшунослик, диншунослик, давлат ва дин муносабатлари асослари фанларидан дарс берадиган, олий маълумотга эга номутахассис педагог кадрларини қайта тайёрлаш, илгари олинган базавий (олий) маълумоти даражаси, қайта тайёрлашнинг тури ва касбий фаолиятининг ўзига хослигига кўра — 576 соатдан кам бўлмаган ҳажмда.
6. Институтда ташкил этиладиган курсларда аудитория ўқув юкламасининг энг кўп ҳажми, қоида тариқасида, ҳафтасига 36 соат этиб белгиланади.
Институт, заруратга кўра, ўқув курсларининг давомийлиги ва ўқув дастурларининг ҳажмига ўзгартириш киритади, янги малака ошириш ва қайта тайёрлаш дастурларини очади.
Қайта тайёрлаш ва малака ошириш курслари ўқув юкламаларининг энг кам меъёри давлат таълим талаблари билан белгиланади.
7. Институтда малака ошириш, қайта тайёрлаш ҳамда қисқа муддатли ўқув курслари масофавий таълим шаклида, тингловчиларнинг асосий иш жойидан ажралмаган ҳолда ташкил этилиши мумкин.
8. Ўқув курсларида ўқув жараёни, қоида тариқасида, 15 нафардан кам, бироқ 20 нафардан ортиқ бўлмаган тингловчилардан иборат академик гуруҳларда ташкил қилинади.
Бунда аудитория машғулотлари барча турларининг давомийлиги Институт томонидан белгиланади, лекин у 80 дақиқадан ошмаслиги ва ўқув машғулотлари оралиғидаги танаффус 10 дақиқадан кам бўлмаслиги лозим.
9. Институтда малака ошириш ва қайта тайёрлаш курсларини ташкил қилиш ва ўтказиш мазкур Низомга 1-иловадаги схемага мувофиқ ташкил этилади.
2-боб. Малака ошириш курсларини ташкил этиш
10. Малака ошириш курсларида ўқиш муддати Институт билан келишилган ҳолда буюртмачи ташкилотлар томонидан тасдиқланадиган таълим олувчиларнинг малака ошириш курслари вақти, шакли ва йўналиши кўрсатилган тақсимот-режаларга мувофиқ, Институт кенгаши томонидан тасдиқланган ўқув режаси ва дастурлари асосида ташкил этилади ҳамда ўқув машғулотлари жадвали бўйича амалга оширилади.
11. Диний-маърифий соҳа мутахассислари учун малака ошириш курслари буюртмачи ташкилотлар томонидан берилган контингент асосида Дин ишлари бўйича қўмита томонидан шакллантирилади, тақсимот-режалар ўқув йилининг бошланишига қадар буюртмачи ташкилотлар ва Дин ишлари бўйича қўмита билан келишилган ҳолда Институт томонидан тасдиқланади.
Қисқа муддатли ўқув курслари Институт кенгаши томонидан мустақил равишда буюртмачи ташкилотлар билан келишилган ҳолда тасдиқланадиган ўқув режа ва дастурига мувофиқ ихтиёрий ташкил этилади.
12. Буюртмачи ташкилотлар тақсимот-режаларга асосан ўқиши белгиланган ходимларининг малака ошириш курсларида қатнашишларини таъминлайди.
Ходим унинг меҳнат таътили ёки вақтинча меҳнатга қобилиятсизлиги даврида малака оширишга жалб қилинмайди.
13. Малака ошириш курсларига тингловчиларни қабул қилиш Институт директорининг буйруғи билан, қоида тариқасида, ўқув курслари бошланган куннинг ўзида расмийлаштирилади. Тингловчилар гуруҳини шакллантириш, курснинг ўқув режаси ва дастурларини ишлаб чиқишда ходимларнинг базавий маълумоти, мутахассислиги, тоифаси ва эгаллаб турган лавозимлари, шунингдек, касбий эҳтиёжлари ҳисобга олинади.
Институт тингловчиларнинг малака ошириш курсларига ўз вақтида келмаганлиги ёки уларда қатнашмаганлиги ҳақида буюртмачи ташкилотларга хабар беради.
14. Малака ошириш курсларида ўқув жараёни Институт директори томонидан тасдиқланадиган машғулотлар жадвали бўйича амалга оширилади.
15. Институт буюртмачи ташкилотлар сўровига мувофиқ ўқув машғулотларни ходимларнинг иш жойида Институт директори томонидан тасдиқланадиган якка тартибдаги режа асосида ташкил этиши мумкин.
16. Малака ошириш курсларига узрли сабабларга кўра ўз вақтида келмаган тингловчиларга ўқишнинг тегишли йўналиши бўйича навбатдаги малака ошириш курсларида ўқишга рухсат берилади.
17. Малака ошириш ва қисқа муддатли ўқув курслари тингловчиси курснинг ўқув режасида назарда тутилган барча назорат турларида ижобий натижа кўрсатса, курснинг ўқув дастури тўлиқ ўзлаштирилган ҳисобланади.
18. Малака ошириш курслари ўқув дастурига мувофиқ белгиланган мавзулар (модуллар) бўйича якуний синов имтиҳонини топшириш билан якунланади.
Қисқа муддатли ўқув курсларида якуний синов имтиҳони ўқув дастурида назарда тутилгандагина ўтказилади.
19. Малака ошириш курси якунида Институт директори томонидан тингловчиларга белгиланган намунадаги сертификат бериш тўғрисидаги буйруқ қабул қилинади.
20. Малака ошириш ва қисқа муддатли ўқув курсларини муваффақиятли тамомлаган тингловчиларга мазкур Низомга 2-иловада белгиланган намунадаги сертификат берилади.
Сертификат электрон генерация қилинган ва электрон имзо ёки унинг муқобил шаклдаги ҳужжатни тасдиқловчи воситалар (QR-код, штрихкод) билан тасдиқланган ҳужжат (сертификат) шаклида ҳам берилиши мумкин.
Якуний синов имтиҳонини топширмаган тингловчига бир маротаба қайта топшириш учун уч ойгача муддат берилади.
Қайта топшириш натижасидан ҳам якуний синов имтиҳонидан ўтолмаган тингловчига сертификат берилмайди. Бундай ҳолатда тингловчига малака ошириш курсида қатнашганлиги тўғрисида маълумотнома берилади.
3-боб. Қайта тайёрлаш курсларини ташкил этиш
21. Қайта тайёрлаш курсларида ўқув жараёни Институт кенгаши томонидан тасдиқланган ўқув режаси ва дастурлари асосида ташкил этилади ҳамда ўқув машғулотлари жадвали бўйича амалга оширилади.
22. Тингловчилар Институт кенгаши томонидан белгиланган ўринларга мувофиқ тўлов-контракт асосида қабул қилинади.
23. Тингловчилар Институтда қайта тайёрлаш курсларига буюртмачи ташкилотнинг ёки талабгорнинг тегишли мурожаатига кўра суҳбат асосида қабул қилинади.
Қабул қилиш тўғрисидаги мурожаатга талабгорнинг биометрик паспорти (идентификацияловчи ID-карта) ва олий маълумот тўғрисидаги дипломининг асл нусхаси илова қилинади.
24. Суҳбат Институт директорининг буйруғи билан ташкил этилган Суҳбат комиссияси томонидан талабгорнинг соҳа бўйича таянч билимлари ва таҳлилий фикрлашини аниқлаш нуқтаи назаридан ўтказилади.
Суҳбат ўтказиш жараёнлари узлуксиз видеотасвирга (овозли) туширилади. Видеотасвир Институтда камида бир йил давомида сақланади.
25. Суҳбат ўтказиш жадвали Институт директори томонидан тасдиқланади ва Институтнинг расмий веб-сайтида, қоидага кўра, суҳбат бошланишидан бир ҳафта олдин жойлаштирилади.
Суҳбат бошланишидан аввал суҳбат комиссияси аъзоларидан бири суҳбат ўтказиш тартиботларини талабгорларга тушунтиради. Талабгор саволларга жавоб бериб бўлган сўнг хонадан чиқишга рухсат берилади.
Суҳбат ўтказиш бўйича комиссия мажлисида баённома юритилади ва у комиссия раиси ва суҳбатда қатнашган бошқа комиссия аъзолари томонидан имзоланади. Суҳбат комиссияси баённомаси бир нусхада тузилади.
Баённомада суҳбат ўтказиш жойи ва санаси, суҳбатнинг бошланиш ва якунланиш вақти, суҳбатда қатнашган комиссия аъзоларининг рўйхати, суҳбатда қатнашган талабгорлар ва танлов ўтказиш жараёнига тааллуқли бўлган бошқа маълумотлар, суҳбат якунлари бўйича комиссия қарори, шу жумладан суҳбатдан ўтган деб топилган талабгор кабилар кўрсатилади.
26. Суҳбатдан муваффақиятли ўтган ва ўқиш учун маблағларни тўлаган талабгор Институт директорининг буйруғи билан ўқишга қабул қилинади.
27. Суҳбат натижалари юзасидан натижалар эълон қилингандан кейин 24 соат ичида Институтга шикоят қилиниши ва апелляция тартибида кўриб чиқилиши мумкин. Апелляция таркиби Институт директорининг буйруғи билан тасдиқланади.
28. Суҳбат ўтказиш билан боғлиқ бўлган барча ҳужжатлар йиғма жилдларга тикилган ҳолда Институтда белгиланган тартибда сақланади.
29. Қайта тайёрлаш курсларида ишдан ажралган ҳолда ўқиш давомида тингловчиларнинг асосий иш жойидаги ўртача иш ҳақини сақлаб қолиш масаласи меҳнат қонунчилигида белгиланган тартибда ҳал қилинади.
30. Қайта тайёрлаш иккинчи олий таълим ҳисобланмайди.
31. Қайта тайёрлаш курсларида ўқиш учун тўлов-контракт суммаси миқдори Институт кенгаши томонидан тасдиқланади.
32. Ўқитиш давомийлиги, қоида тариқасида, 24 ҳафтани ташкил этади. Институт заруратга кўра ўқитиш давомийлиги ва ўқув дастурларининг ҳажмига ўзгартириш киритиши мумкин.
33. Ўқув жараёни Институт кенгаши томонидан тасдиқланган малака талаблари, ўқув режалари ва дастурларига мувофиқ ташкил этилади.
34. Қайта тайёрлаш курси тингловчиси курснинг ўқув режасида кўзда тутилган барча оралиқ назоратлар ва якуний аттестацияда ижобий натижа кўрсатса, курснинг ўқув дастури тўлиқ ўзлаштирилган ҳисобланади.
Қайта тайёрлаш курсининг оралиқ назорат топшириқларини муваффақиятли бажарган тингловчи якуний аттестацияга қўйилади.
35. Қайта тайёрлаш курсининг якуний аттестациясини ўтказиш учун Институт директори тегишли буйруқ билан якуний аттестация комиссиясини ташкил этади.
Қайта тайёрлаш курсининг якуний аттестацияси якуний назорат синовлари ва битирув ишини ҳимоя қилиш орқали ўтказилади.
36. Якуний аттестациядан муваффақиятли ўтган тингловчиларга мазкур Низомга 3-иловада белгиланган намунадаги диплом берилади.
4-боб. Тингловчиларнинг ҳуқуқ ва мажбуриятлари
37. Тингловчилар ўқув машғулотлари бошланишидан олдин Институт тингловчиларининг ички тартиб-қоидалари билан таништирилади.
38. Тингловчилар қуйидаги ҳуқуқларга эга:
ўқув жараёнини яхшилаш, қайта тайёрлаш ва малака ошириш тизимини такомиллаштириш бўйича Институт раҳбариятига таклифлар киритиш;
маънавий-маърифий ва маданий тадбирларда қатнашиш;
малака ошириш, қайта тайёрлаш ва қисқа муддатли ўқув курслари билан боғлиқ бўлган қўшимча маълумотлар ва маслаҳатлар олиш;
Институтнинг ахборот-ресурс маркази, ўқув хоналари ва компьютер техника воситаларидан фойдаланиш;
Институт ходимлари хатти-ҳаракатлари юзасидан шикоят қилиш.
Тингловчилар қонунчилик ҳужжатларига мувофиқ бошқа ҳуқуқларга ҳам эга бўлишлари мумкин.
39. Тингловчилар:
белгиланган тартибда ўқув режаси ва дастурлари асосида ўқиши;
ўқув машғулотларида ўз вақтида шахсан ўзлари иштирок этиши;
ўқув дастурларида назарда тутилган назорат турларини ва якуний синов имтиҳонларини топшириши;
ўз назарий билимларини, касбий кўникмалари ва маҳорат даражасини ошириши;
ўқув жараёнида берилган топшириқларни ўз вақтида бажариши;
Институтга тегишли бўлган мол-мулкни асраб-авайлаши, Институт тингловчиларининг ички тартиб-қоидаларига қатъий риоя этиши лозим.
Тингловчилар қонунчилик ҳужжатларига мувофиқ бошқа мажбуриятларга ҳам эга бўлишлари мумкин.
40. Тингловчи қуйидаги ҳолатларда тингловчилар сафидан чиқарилади:
ўз хоҳишига биноан;
ўқув интизоми ва Институтнинг ички тартиб-қоидаларини мунтазам равишда ёки бир маротаба қўпол равишда бузганда;
узрли сабабларсиз қайта тайёрлаш курслари бўйича ўқув машғулотларини 30 (ўттиз) соатдан ва малака ошириш курслари бўйича ўқув машғулотларини 20 (йигирма) академик соатдан ортиқ қолдирганда;
ўқув режасидаги фан (курс)ни ўзлаштирмаганда;
шартнома асосида ўқитиш билан боғлиқ мажбуриятларни бажармаганда;
саломатлиги туфайли (тиббий комиссия маълумотномаси асосида);
суд томонидан озодликдан маҳрум этилганда;
вафот этганда.
41. Тингловчи қайта тайёрлаш ёки малака ошириш курси тингловчилари сафидан чиқарилганда, Институт бу ҳақида уни ўқишга юборган буюртмачи ташкилотга хабар беради.
5-боб. Якунловчи қоидалар
42. Малака ошириш ва қайта тайёрлаш курси тингловчилари билан боғлиқ ҳужжатлар Институтда белгиланган тартибда сақланади.
43. Диплом ёки сертификат йўқотилган ёхуд яроқсиз ҳолга келган, бузилган ҳолларда диплом ёки сертификатнинг дубликати берилади. Бунда ушбу шахслар Институт директорига диплом ёки сертификатнинг йўқотиш, яроқсиз ҳолга келиш ёхуд бузилиш ҳолати баён этилган ариза беради.
Дубликат мурожаат қилинган санадан бошлаб ўн беш кун ичида берилади.
44. Мазкур Низом талабларининг бузилишида айбдор шахслар қонунчилик ҳужжатларига мувофиқ жавобгар бўлади.
Дин ишлари бўйича қўмита ҳузуридаги Диний-маърифий соҳада малака ошириш ва қайта тайёрлаш институтида мутахассисларни қайта тайёрлаш ҳамда уларнинг малакасини ошириш тартиби тўғрисидаги низомга
1-ИЛОВА
Диний-маърифий соҳада малака ошириш ва қайта тайёрлаш институтида малака ошириш ва қайта тайёрлаш курсларини ташкил қилиш
СХЕМАСИ

Босқичлар

Субъектлар

Тадбирлар

Бажариш муддатлари

1-босқич

Ўзбекистон Республикаси Дин ишлари бўйича қўмитаси

1. Манфаатдор вазирлик, идора ва ташкилотлар билан келишган ҳолда тингловчилар контингентини шакллантиради ва Институтга малака ошириш курсларини ташкил этиш учун тақдим этади.

Ўқув йили бошида

Диний-маърифий соҳада малака ошириш ва қайта тайёрлаш институти (кейинги ўринларда — Институт)

2. Қайта тайёрлаш курсларини ташкил этиш учун Суҳбат комиссиясини тузади ва расмий веб-саҳифасида қайта тайёрлаш курсларига суҳбатлар тўғрисидаги маълумотни жойлаштиради.

Суҳбат ўтказиладиган кундан бир ҳафта олдин

2-босқич

Талабгор,

буюртмачи ташкилот

Малака ошириш ёки қайта тайёрлаш курсида ўзи ёки ходимлари иштирок этиши тўғрисида Институт директори номига мурожаат йўллайди.

Ўз хоҳишига кўра

3-босқич

Институт

1. Буюртмачи ташкилотнинг мурожаатига мувофиқ малака ошириш курслари тингловчилари гуруҳини шакллантиради.

Белгиланган муддатларда

2. Қайта тайёрлаш курси талабгорлари мурожаатларини қабул қилади ва Суҳбат комиссияси томонидан суҳбат ўтказади.

Суҳбат ўтказиш графигига мувофиқ

3. Суҳбатдан ўтган талабгорлар билан шартнома тузади.

Ўқув курси бошланишидан олдин

4-босқич

Институт

1. Тингловчилар учун малака ошириш ва қайта тайёрлаш курсларини тасдиқланган дастурлар асосида ташкил этади.

Ўқув курси давомида

2. Малака ошириш курсининг якуний синовидан муваффақиятли ўтган тингловчиларга сертификат беради.

Ўқув курси якунида

3. Қайта тайёрлаш курсининг якуний аттестациясидан муваффақиятли ўтган тингловчиларга диплом беради.

Дин ишлари бўйича қўмита ҳузуридаги Диний-маърифий соҳада малака ошириш ва қайта тайёрлаш институтида мутахассисларни қайта тайёрлаш ҳамда уларнинг малакасини ошириш тартиби тўғрисидаги низомга
2-ИЛОВА

Малака ошириш ҳақида давлат намунасидаги сертификат

ШАКЛИ
 

НАМУНА

Oʻzbekiston Respublikasi Davlat gerbi

Oʻzbekiston Respublikasi

Din ishlari boʻyicha qoʻmitasi huzuridagi

Diniy-maʼrifiy sohada malaka oshirish va qayta tayyorlash instituti

Malaka oshirganlik haqida

SERTIFIKAT

MO № 000000

_________________________________________________________________

(tinglovchining familiyasi, ismi, otasining ismi)

20_____-yil _________________ dan 20______-yil _________________ gacha

Din ishlari boʻyicha qoʻmita huzuridagi Diniy-maʼrifiy sohada malaka oshirish va qayta tayyorlash institutida jami ____________ soatga moʻljallangan ____________________________________________________________ boʻyicha

(malaka oshirish kursining nomi)

malakasini oshirdi.
 

Muhr oʻrni

yoki QR-kod

Direktor _____________

(familiyasi, ismi, otasining ismi)

Sana ________________

Qayd raqami _____________

Малака оширганлик ҳақида давлат намунасидаги сертификат
ТАВСИФИ
Малака оширганлик тўғрисидаги сертификат А4 форматли оқ қоғозда офсет усулида, беш хил рангдан фойдаланган ҳолда: матн учун — қора рангда, расмлар тасвири учун — яшил, кўк, қизил рангларда, фон учун — оч кулрангда босиб чиқарилади.
Варақнинг чап қисмида четидан 10 мм чекинган ҳолда, эни 32 мм бўлган Ўзбекистон Республикаси Давлат байроғи тасвирланган тасма жойлаштирилади. Тасманинг юқори қисмида диаметри 30 мм бўлган Давлат герби, паст қисмида эса — 35 мм ўлчамли иккита квадрат қўшилишидан ҳосил бўлган саккиз қиррали юлдуз, юлдузнинг ўртасида муҳр учун 25 мм диаметрли оқ айлана жойлашган.
Варақнинг қолган қисмида юқорида давлат тилида «Oʻzbekiston Respublikasi Din ishlari boʻyicha qoʻmitasi huzuridagi Diniy-maʼrifiy sohada malaka oshirish va qayta tayyorlash instituti» ва «Malaka oshirganlik haqida SERTIFIKAT» сўзлари бўлади. Сертификат икки ҳарф — МО ва олти рақамли сондан иборат тартиб рақамига эга. Барча матн нақшли растрдан иборат оч кулранг фонда босиб чиқарилади.
Сертификат:
ёруғлик воситасида нусха кўчиришни қийинлаштириш учун очиқ ранглар;
нақшли растр;
ҳар хил рангли растрлардан фойдаланиш йўли билан турли рангларни ташкил этиш;
ўзгарадиган рақамлардан иборат тартиб рақами қўлланган ҳолда тўртта ҳимояга эга.
Дин ишлари бўйича қўмита ҳузуридаги Диний-маърифий соҳада малака ошириш ва қайта тайёрлаш институтида мутахассисларни қайта тайёрлаш ҳамда уларнинг малакасини ошириш тартиби тўғрисидаги низомга
3-ИЛОВА

Қайта тайёрлаш ҳақида давлат намунасидаги диплом

ШАКЛИ
 

НАМУНА

Oʻzbekiston Respublikasi Davlat gerbi

Oʻzbekiston Respublikasi

Din ishlari boʻyicha qoʻmitasi huzuridagi

Diniy-maʼrifiy sohada malaka oshirish va qayta tayyorlash instituti

Qayta tayyorlash haqida

DIPLOM

QT № 000000

_________________________________________________________________

(tinglovchining familiyasi, ismi, otasining ismi)

20_____-yil __________________ dan 20______-yil __________________gacha

Din ishlari boʻyicha qoʻmita huzuridagi Diniy-maʼrifiy sohada malaka oshirish va qayta tayyorlash

institutida ___________________________ soatga moʻljallangan

_________________________________________________________________________________

(qayta tayyorlash kursining nomi)

qayta tayyorlash kursida taʼlim olib, _____________________________________________________________________________

bitiruv-malaka ishini ___________ bahoga himoya qildi va qayta tayyorlash oʻquv kursini muvaffaqiyatli tamomladi.

Muhr oʻrni

yoki QR-kod
 

Direktor _____________

(familiyasi, ismi, otasining ismi)

Sana ________________

Qayd raqami ____________

Қайта тайёрлаш ҳақида давлат намунасидаги дипломнинг
ТАВСИФИ
Қайта тайёрлаш тўғрисидаги диплом А4 форматли оқ қоғозда офсет усулида, беш хил рангдан фойдаланган ҳолда: матн учун — қора рангда, расмлар тасвири учун — яшил, кўк, қизил рангларда, фон учун — оч пушти рангда босиб чиқарилади.
Варақнинг чап қисмида четидан 10 мм чекинган ҳолда, эни 32 мм бўлган Ўзбекистон Республикаси Давлат байроғи тасвирланган тасма жойлаштирилади. Тасманинг юқори қисмида диаметри 30 мм бўлган Давлат герби, паст қисмида эса — 35 мм ўлчамли иккита квадрат қўшилишидан ҳосил бўлган саккиз қиррали юлдуз, юлдузнинг ўртасида муҳр учун 25 мм диаметрли оқ айлана жойлашган.
Варақнинг қолган қисмида юқорида давлат тилида «Oʻzbekiston Respublikasi Din ishlari boʻyicha qoʻmitasi huzuridagi Diniy-maʼrifiy sohada malaka oshirish va qayta tayyorlash instituti» hamda «Qayta tayyorlash haqida DIPLOM» сўзлари босилади. Диплом икки ҳарф — QT ва олти рақамли сондан иборат тартиб рақамига эга. Барча матн нақшли растрдан иборат оч пушти ранг фонда босиб чиқарилади.
Диплом:
босиб чиқаришнинг икки усули — офсет ва юқори усули;
ёруғлик воситасида нусха кўчиришни қийинлаштириш учун очиқ ранглар;
нақшли растр;
ҳар хил рангли растрлардан фойдаланиш йўли билан турли рангларни ташкил этиш;
махсус қоғоз;
ўзгарадиган рақамлардан иборат тартиб рақами қўлланган ҳолда олтита ҳимояга эга.
Вазирлар Маҳкамасининг 2025 йил 27 августдаги 542-сон қарорига
4-ИЛОВА
Вазирлар Маҳкамасининг «Ўзбекистон халқаро ислом академияси ҳузурида Малака ошириш маркази ва «Зиё» медиа марказини ташкил этиш ҳамда уларнинг фаолиятини қўллаб-қувватлаш чора-тадбирлари тўғрисида» 2019 йил 14 январдаги 25-сон қарорига киритилаётган ўзгартиришлар
1. Номи қуйидаги таҳрирда баён этилсин:
«Ўзбекистон Республикаси Дин ишлари бўйича қўмитаси ҳузуридаги Диний-маърифий соҳада малака ошириш ва қайта тайёрлаш институти ва Ўзбекистон халқаро ислом академияси ҳузурида «Зиё» медиа марказини ташкил этиш ҳамда уларнинг фаолиятини қўллаб-қувватлаш чора-тадбирлари тўғрисида».
2. 1-банд қуйидаги таҳрирда баён этилсин:
«1. Ўзбекистон Республикаси Президентининг 2025 йил 21 апрелдаги ПФ-68-сон ҳамда 2018 йил 16 апрелдаги ПФ-5416-сон фармонларига мувофиқ:
Ўзбекистон Республикаси Дин ишлари бўйича қўмитаси ҳузурида Самарқанд ва Наманган вилоятлари минтақавий филиалларига эга бўлган муассаса шаклидаги Диний-маърифий соҳада малака ошириш ва қайта тайёрлаш институти (кейинги ўринларда — Институт) ташкил этилганлиги;
Ўзбекистон халқаро исломшунослик академияси (кейинги ўринларда — Академия) ҳузуридаги «Зиё» медиа маркази мамлакатимизда диннинг асл инсонпарварлик моҳиятини, аждодларимизнинг ислом ва жаҳон цивилизациясига қўшган бой диний-илмий меросини кенг тарғиб қилувчи, диний-маърифий ҳаётдаги янгиликларни жамоатчиликка етказувчи муассаса шаклидаги асосий медиа тузилма сифатида шакллантирилганлиги маълумот учун қабул қилинсин».
3. 2-банд ўз кучини йўқотган деб ҳисоблансин.
4. 3-банднинг «а» кичик банди чиқариб ташлансин.
иккинчи ва учинчи хатбошилар чиқариб ташлансин;
тўртинчи-бешинчи хатбошилар тегишлича иккинчи-учинчи хатбошилар деб ҳисоблансин.
иккинчи хатбоши чиқариб ташлансин;
учинчи — бешинчи хатбошилар тегишлича иккинчи — тўртинчи хатбошилар деб ҳисоблансин;
иккинчи хатбошидаги «Марказ» сўзи «Институт» сўзи билан алмаштирилсин.
7. 6-банд ўз кучини йўқотган деб ҳисоблансин.
8. 7 ва 10-бандлардаги «Академия ҳузуридаги Малака ошириш маркази» сўзлари «Институт» сўзи билан алмаштирилсин.
9. 1 ва 2-иловалар ўз кучини йўқотган деб ҳисоблансин.
(Қонунчилик маълумотлари миллий базаси, 28.08.2025 й., 09/25/542/0785-сон)