718-сон 30.10.2024. Шаҳар атрофи ва вилоят ичи шаҳарлараро мунтазам автобус йўналишларида кўрилган зарарларни қоплаб бериш тизимини такомиллаштириш чора-тадбирлари тўғрисида

Ҳужжат 18.11.2025 санаси ҳолатига
Амалдаги версияга ўтиш

Ўзбекистон Республикаси Вазирлар Маҳкамасининг

қарори

Шаҳар атрофи ва вилоят ичи шаҳарлараро мунтазам автобус йўналишларида кўрилган зарарларни қоплаб бериш тизимини такомиллаштириш чора-тадбирлари тўғрисида

Ўзбекистон Республикаси Президентининг ««Ўзбекистон — 2030» стратегиясини «Ёшлар ва бизнесни қўллаб-қувватлаш йили»да амалга оширишга оид давлат дастури тўғрисида» 2024 йил 21 февралдаги ПФ-37-сон Фармони ижросини таъминлаш ҳамда аҳолининг юқори сифатли ва қулай йўловчи ташиш хизматларига бўлган эҳтиёжларини тўлиқ қондириш, соҳада бозор тамойилларини жорий этиш, молиялаштириш тизими ва тариф сиёсатини такомиллаштириш орқали хусусий сектор учун жозибали бизнес муҳитини яратиш мақсадида Вазирлар Маҳкамаси қарор қилади:

1. Қуйидагиларни назарда тутувчи Шаҳар атрофи ва вилоят ичи шаҳарлараро норентабель мунтазам автобус йўналишларида кўрилган зарарларни қоплаб бериш давлат хизматини кўрсатишнинг маъмурий регламенти (кейинги ўринларда — Маъмурий регламент) иловага мувофиқ тасдиқлансин:

ташувчиларнинг шаҳар атрофи ва вилоят ичи шаҳарлараро норентабель мунтазам автобус йўналишларида кўрилган зарарларини қоплаб бериш;

норентабель автобус йўналишларидан кўрилган зарарларни қоплаш бўйича мурожаатларини кўриб чиқиш;

норентабель автобус йўналишларига субсидия ажратиш тартиби ва шартлари.

Олдинги таҳрирга қаранг.

Белгилансинки, Қорақалпоғистон Республикасида шаҳар атрофи ёки вилоят ичидаги шаҳарлараро норентабель микроавтобус йўналишларида кўрилган зарарлар Маъмурий регламентда белгиланган тартибда қоплаб берилади.

(1-банд Ўзбекистон Республикаси Вазирлар Маҳкамасининг 2025 йил 14 ноябрдаги 725-сонли қарорига асосан хатбоши билан тўлдирилган — Қонунчилик маълумотлари миллий базаси, 18.11.2025 й., 09/25/725/1057-сон)

2. Транспорт вазирлиги Рақамли технологиялар вазирлиги билан биргаликда 2024 йил 25 декабрга қадар:

Маъмурий регламентга мувофиқ давлат хизматларининг Ўзбекистон Республикаси Ягона интерактив давлат хизматлари портали (кейинги ўринларда — ЯИДХП) орқали жорий этилишини;

ЯИДХПда давлат хизматлари кўрсатилишининг ҳар бир босқичида мурожаатларнинг кўриб чиқилиши кузатиб борилишини таъминласин.

3. Белгилансинки:

Маъмурий регламентга мувофиқ ташувчилар шаҳар ва вилоят ичи шаҳарлараро норентабель мунтазам автобус йўналишларида кўрилган зарарларни қоплаб бериш юзасидан ЯИДХП орқали 2025 йил 1 февралдан бошлаб мурожаат қиладилар;

шаҳар ва вилоят ичи шаҳарлараро норентабель мунтазам автобус йўналишларида кўрилган зарарларни қоплаб беришда талаб этиладиган маълумотларни (ҳужжатларни) кўриб чиқиш учун йиғим ундирилмайди.

4. Вазирлар Маҳкамасининг «Ҳудудларда жамоат транспорти фаолиятини янада такомиллаштириш чора-тадбирлари тўғрисида» 2021 йил 8 октябрдаги 630-сон қарорининг 6-банди қуйидаги мазмундаги хатбоши билан тўлдирилсин:

«Бунда мазкур қарорнинг 4 ва 6-бандларида назарда тутилган шаҳар атрофи ёки вилоят ичидаги шаҳарлараро автобус йўналишида кўриладиган зарар миқдори Қорақалпоғистон Республикаси ҳудуди учун, истисно тариқасида, 40 фоизгача (40 фоиз ҳам шу жумлага киради) миқдорда қоплаб берилади».

5. Мазкур қарорнинг бажарилишини назорат қилиш Ўзбекистон Республикаси Бош вазирининг ўринбосари — иқтисодиёт ва молия вазири Ж.А. Қўчқоров ҳамда транспорт вазири И.Р. Махкамов зиммасига юклансин.

Ўзбекистон Республикасининг Бош вазири А. АРИПОВ

Тошкент ш.,

2024 йил 30 октябрь,

718-сон

Вазирлар Маҳкамасининг 2024 йил 30 октябрдаги 718-сон қарорига
ИЛОВА

Шаҳар атрофи ва вилоят ичи шаҳарлараро норентабель мунтазам автобус йўналишларида кўрилган зарарларни қоплаб бериш давлат хизматини кўрсатишнинг

МАЪМУРИЙ РЕГЛАМЕНТИ

1-боб. Умумий қоидалар

1. Мазкур маъмурий регламент (кейинги ўринларда — Регламент) ташувчиларнинг шаҳар атрофи ва вилоят ичи шаҳарлараро норентабель мунтазам автобус йўналишларида кўрилган зарарларининг бир қисмини қоплаб бериш тартибини белгилайди.

2. Ушбу Регламентда қуйидаги асосий тушунчалардан фойдаланилади:

норентабель автобус йўналишлари — тижорат асосида йўловчилар ташиш хизматини кўрсатадиган ва бунга махсус рухсатномаси (лицензияси) бўлган юридик шахслар томонидан шаҳар атрофи ёки вилоят ичидаги шаҳарлараро автобус йўналишида кўриладиган зарар миқдори 30 фоизгача (30 фоиз ҳам шу жумлага киради) бўлган йўналиш, Тошкент шаҳри бундан мустасно;

норентабель автобус йўналишлари реестри — ташувчиларнинг асосланган таклифларига мувофиқ Қорақалпоғистон Республикаси Транспорт вазирлиги, вилоятлар транспорт бошқармалари (кейинги ўринларда — транспорт бошқармалари) томонидан рентабеллик даражаси ўрганиб чиқилиб, тасдиқланган ҳамда «Uztrans» ягона интерактив ахборот тизимига киритилган норентабель автобус йўналишлари рўйхати (кейинги ўринларда — Реестр);

масъул ташкилотлар — транспорт бошқармалари, Иқтисодиёт ва молия вазирлигининг ҳамда Вазирлар Маҳкамаси ҳузуридаги Солиқ қўмитасининг ҳудудий бошқармалари;

ташувчи — тижорат асосида йўловчилар ташиш хизматини кўрсатадиган ва бунга махсус рухсатномаси (лицензияси) бўлган юридик шахслар (кейинги ўринларда — ташувчилар);

«Uztrans» ягона интерактив ахборот тизими — автомобиль транспорти соҳасидаги ягона интерактив ахборот тизими.

3. Норентабель автобус йўналишларидан кўриладиган зарарларни қоплаш бўйича зарур маблағлар (кейинги ўринларда — субсидия) Қорақалпоғистон Республикаси республика бюджети ва вилоятлар маҳаллий бюджетлари параметрларида назарда тутилади.

4. Транспорт бошқармалари томонидан «Uztrans» ягона интерактив ахборот тизимида мазкур Регламентга 1-иловага мувофиқ Реестр шакллантирилади ҳамда ҳар бир вилоят кесимида юритилади.

5. Ташувчиларнинг асосланган таклифларига мувофиқ транспорт бошқармалари томонидан бир йилда бир маротаба 1 июлга қадар норентабель автобус йўналишларининг рентабеллик даражаси ўрганиб чиқилиб, Реестр тасдиқланади ҳамда «Uztrans» ягона интерактив ахборот тизимига тегишли маълумотлар киритилади.

6. Ташувчи ҳамда транспорт бошқармалари ўртасида белгиланган тартибда оммавий оферта шаклида муайян муддатга тузиладиган, йўналишда йўловчи ташиш хизматларини кўрсатиш ҳуқуқини берувчи шартнома бекор қилиниши натижасида ушбу йўналиш Реестрдан чиқарилмайди.

LexUZ шарҳи

Қаранг: Ўзбекистон Республикаси Фуқаролик кодексининг 369-моддаси.

7. Ташувчиларга субсидия ушбу Регламентга 2-иловага мувофиқ схемага асосан ажратилади.

2-боб. Давлат хизматлари кўрсатиш тартиби ва шартлари

8. Ташувчи ЯИДХП орқали давлат хизматидан электрон тарзда фойдаланиш учун рўйхатдан ўтади.

9. Ташувчи ЯИДХП орқали субсидия ажратиш бўйича қуйидаги ҳужжатларни илова қилган ҳолда мурожаат қилади:

ташувчининг аризаси;

мазкур Регламентга 3-иловага мувофиқ норентабель йўналишдан кўрилган зарар бўйича ҳисоб-китоб ҳужжатлари;

молиявий ҳисобот;

статистик ҳисобот;

ёқилғи, материал харажатларини асословчи ҳисоб-фактура ва ёқилғи нормаси ҳамда ёқилғи сарфи тўғрисидаги маълумотлар.

Ташувчидан мазкур бандда кўрсатилмаган маълумотлар ва ҳужжатларни талаб қилиш тақиқланади.

10. ЯИДХП орқали ариза ҳамда илова қилинган ҳужжатлар ва маълумотлар автоматик тарзда тегишли транспорт бошқармаларига, Иқтисодиёт ва молия вазирлигининг ҳамда Вазирлар Маҳкамаси ҳузуридаги Солиқ қўмитасининг ҳудудий бошқармаларига юборилади.

11. Транспорт бошқармалари, Иқтисодиёт ва молия вазирлигининг ҳамда Вазирлар Маҳкамаси ҳузуридаги Солиқ қўмитасининг ҳудудий бошқармалари аризага илова қилинган ҳужжатлар ва маълумотларни беш иш куни мобайнида тегишлилиги бўйича ўрганиб чиқади.

12. Масъул ташкилотлар ўртасида ахборот алмашинуви электрон рақамли имзони (кейинги ўринларда — ЭРИ) мажбурий тартибда қўллаш орқали фақат идоралараро электрон ўзаро боғланиш ёрдамида амалга оширилади.

13. Масъул ташкилотлар томонидан субсидия ажратиш ёки аризани рад этиш тўғрисида хулоса тайёрланади. Бунда:

субсидия ажратиш тўғрисида хулоса тайёрланган тақдирда, ариза Қорақалпоғистон Республикаси Жўқорғи Кенгеси ва вилоятлар ҳокимликлари ҳузурида ташкил этиладиган ташувчилар томонидан шаҳар атрофи ва вилоят ичидаги шаҳарлараро норентабель автобус йўналишларидан кўриладиган зарарларни қоплаш бўйича ҳудудий комиссияларга (кейинги ўринларда — ҳудудий комиссиялар) юборилади;

рад этиш тўғрисида хулоса тайёрланган тақдирда, тақдим этилган ҳужжатлар ва маълумотларда аниқланган камчиликлар ҳамда уларни бартараф этиш усуллари, шунингдек, кўрсатилган сабабларни бартараф қилиб, тегишли ҳужжатларни кўриб чиқиш учун такроран тақдим этиши учун беш иш куни муддат берилган ҳолда ташувчига ЯИДХП орқали юборилади.

14. Масъул ташкилотлар бир иш кунида субсидия беришни рад этиш тўғрисидаги хулосани ташувчининг ЯИДХПдаги шахсий кабинетига юборади.

Субсидия ажратиш қуйидаги асосларга кўра рад этилади:

йўналиш норентабель автобус йўналишлари реестрига киритилмаганлиги ва мазкур йўналишдан кўрилган зарарларни қоплаш Қорақалпоғистон Республикаси республика бюджети ва вилоятлар маҳаллий бюджетлари параметрларида назарда тутилмаганлиги;

аризада ушбу Регламентнинг 9-бандида кўрсатилган ҳужжатлар тўлиқ тақдим этилмаганлиги;

ташувчи банкротлик ёки тугатиш жараёнида бўлиши.

Субсидия беришни ушбу бандда кўрсатилмаган асослар бўйича рад этишга йўл қўйилмайди.

15. Ташувчи субсидия беришни рад этиш тўғрисидаги хулосани олган кундан бошлаб кўпи билан беш иш куни давомида хулосада кўрсатилган камчиликларни бартараф этиши ҳамда уларнинг бартараф этилганлигини тасдиқловчи ҳужжатларни илова қилган ҳолда, такроран ариза билан мурожаат қилиши мумкин.

Ушбу бандда кўрсатилган муддат тугагандан сўнг тақдим этилган ариза янги берилган деб ҳисобланади.

16. Субсидия ҳудудий комиссияларнинг қарорлари асосида ажратилади.

17. Қабул қилинган қарор бир иш куни мобайнида Қорақалпоғистон Республикаси Жўқорғи Кенгеси, халқ депутатлари вилоятлар Кенгашларига юборилади.

18. Қорақалпоғистон Республикаси Жўқорғи Кенгеси, халқ депутатлари вилоятлар Кенгашларининг субсидия ажратиш тўғрисидаги қарорига асосан Иқтисодиёт ва молия вазирлигининг ҳудудий бошқармалари томонидан тегишли маблағлар икки иш кунида ташувчининг тижорат банклардаги ҳисобварақларига ўтказиб берилади.

3-боб. Якунловчи қоидалар

19. Субсидия ажратиш учун тақдим этилган маълумотлар ва ҳужжатларнинг тўғрилиги ҳамда ҳаққонийлигига ташувчилар масъул ҳисобланади.

20. Ташувчиларнинг субсидия ажратиш тўғрисидаги мурожаатлари ўрнатилган тартибда кўриб чиқилишига ва маблағлар ажратилишига ҳудудий комиссиялар раислари масъул ҳисобланади.

21. Мазкур Регламент талабларининг бузилишида айбдор бўлган шахслар қонунчилик ҳужжатларида белгиланган тартибда жавоб берадилар.

LexUZ шарҳи

Қаранг: Ўзбекистон Республикаси Маъмурий жавобгарлик тўғрисидаги кодексининг 215⁵-моддаcи.

Шаҳар атрофи ва вилоят ичи шаҳарлараро норентабель мунтазам автобус йўналишларида кўрилган зарарларни қоплаб бериш давлат хизматини кўрсатишнинг маъмурий регламентига
1-ИЛОВА

_____________________вилоятининг
шаҳар атрофи ёки вилоят ичидаги шаҳарлараро норентабель автобус йўналишлари бўйича

РЕЕСТР

Т/р	Автобус йўналиши			Масофаси (км)	Қатнов очилган сана	Режа бўйича автотранспорт сони	Ташувчи номи (ёки бириктирилмаган)	Тузилган шартнома		Реестрга киритиш ёки чиқариш		Транспорт бошқармаси бошлиғининг Ф.И.О.
Т/р	тури Шаҳар атрофи (ША) ёки вилоят ичидаги шаҳарлараро (ВИШ)	Т/р	Автобус йўналиши номи	Масофаси (км)	Қатнов очилган сана	Режа бўйича автотранспорт сони	Ташувчи номи (ёки бириктирилмаган)	Сана	Амал қилиш муддати	Сана	киритиш ёки чиқариш	Транспорт бошқармаси бошлиғининг Ф.И.О.
1	2	3	4	5	6	7	8	9	10	11	12	13
1.
2.
3.
4.
5.

Шаҳар атрофи ва вилоят ичи шаҳарлараро норентабель мунтазам автобус йўналишларида кўрилган зарарларни қоплаб бериш давлат хизматини кўрсатишнинг маъмурий регламентига
2-ИЛОВА

Шаҳар атрофи ва вилоят ичидаги шаҳарлараро норентабель автобус йўналишларидан кўриладиган зарарни субсидия ажратиш йўли билан қоплаб бериш

СХЕМАСИ

Босқичлар	Субъектлар	Тадбирлар	Бажариш муддатлари
Босқичлар	Субъектлар	Тадбирлар	Бажариш муддатлари

1-босқич	Ташувчи	Ягона интерактив давлат хизматлари портали (ЯИДХП) орқали давлат хизматидан электрон тарзда фойдаланиш учун рўйхатдан ўтади.	Ўз хоҳишига кўра
1-босқич	Ташувчи		Ўз хоҳишига кўра

2-босқич	Ташувчи	ЯИДХП орқали норентабель автобус йўналиши бўйича кўрилган зарарни қоплаш (субсидия ажратиш) бўйича ариза билан мурожаат қилади.	Ҳар ойнинг 10-санасигача
2-босқич	Ташувчи		Ҳар ойнинг 10-санасигача

3-босқич	ЯИДХП	Мурожаат масъул ташкилотларга (Транспорт вазирлигининг ҳудудий бошқармалари, Иқтисодиёт ва молия вазирлигининг ҳудудий бошқармалари, Солиқ қўмитасининг ҳудудий бошқармалари) юборилади.	Автоматик тарзда
3-босқич	ЯИДХП		Автоматик тарзда

4-босқич	Масъул ташкилотлар	Ариза ҳамда илова қилинган ҳужжатларни ўрганиб чиқиб, субсидия ажратиш ва/ёки ажратишни рад этиш тўғрисида хулоса тайёрлайди ҳамда ташувчининг ЯИДХПдаги шахсий кабинетига автоматик тарзда юборади. Субсидия ажратиш тўғрисида хулоса тайёрланган тақдирда, аризани Қорақалпоғистон Республикаси Жўқорғи Кенгеси ва вилоятлар ҳокимликлари ҳузурида ташкил этиладиган ташувчилар томонидан шаҳар атрофи ва вилоят ичидаги шаҳарлараро норентабель автобус йўналишларидан кўриладиган зарарларни қоплаш бўйича ҳудудий комиссияларга юборади.	5 иш кунида
4-босқич	Масъул ташкилотлар		5 иш кунида

5-босқич	Комиссия	Субсидия ажратиш тўғрисидаги қарорни Қорақалпоғистон Республикаси Жўқорғи Кенгеси, халқ депутатлари вилоятлар Кенгашларига юборади.	1 иш кунида
5-босқич	Комиссия		1 иш кунида

6-босқич	Иқтисодиёт ва молия вазирлигининг ҳудудий бошқармалари	Қорақалпоғистон Республикаси Жўқорғи Кенгеси, халқ депутатлари вилоятлар Кенгашларининг субсидия ажратиш тўғрисидаги қарорига асосан тегишли маблағлар ташувчининг тижорат банклардаги ҳисобварақларига ўтказиб берилади.	2 иш кунида
6-босқич	Иқтисодиёт ва молия вазирлигининг ҳудудий бошқармалари		2 иш кунида

Шаҳар атрофи ва вилоят ичи шаҳарлараро норентабель мунтазам автобус йўналишларида кўрилган зарарларни қоплаб бериш давлат хизматини кўрсатишнинг маъмурий регламентига
3-ИЛОВА

	«________________________________» МЧЖнинг 20___ йил ______________ ойида ___________ ^{(корхонанинг номи)} ____________________________________ ^(ой) __________ __________________________________ ____-сонли ______________ автобус __ ^{(шаҳар атрофи / вилоят ичидаги шаҳарлараро)} _____^(№) _________ ^{(йўналиш номи)} _________ йўналиши бўйича ________________ молиявий кўрсаткичлар тўғрисидаги ____________________________ ^{(амалдаги ёки прогноз)}^_^{__________________________________________________________} МАЪЛУМОТ

Т/р	Кўрсаткичлар номи	Ўлчов бирлиги	Норентабель йўналиш бўйича амалдаги кўрсаткич
I.	Умумий маълумотлар
1.	йўналиш масофаси	км
2.	йўналишдаги автобуслар сони	дона
3.	йўналишдаги автобуслар қиймати	млн.сўм
4.	автобуснинг йўловчи сиғими	йўловчи
5.	йўналишдаги қатновлар сони	дона
6.	амалдаги тариф бир йўловчи-км	сўм
II.	Жами йўловчилар сони	йўловчи
III.	Даромадлар (7.+8.)	минг сўм
7.	нақд пулда йўловчи ташишдан	минг сўм
8.	электрон тўловда йўловчи ташишдан	минг сўм
IV.	Таннарх харажати (9.+10.+11.+12.+13.+14.+15.+16.+17.)	минг сўм
9.	иш ҳақи харажати	минг сўм
10.	ягона ижтимоий тўлов	минг сўм
11.	ёқилғи (метан газ)	минг сўм
12.	шина харажати	минг сўм
13.	двигатель мой харажати	минг сўм
14.	фильтр, колодка ва бошқалар	минг сўм
15.	техник хизмат ва жорий таъмир	минг сўм
16.	амортизация	минг сўм
17.	бошқа харажатлар	минг сўм
V.	Давр харажати (18.+19.+20.)	минг сўм
18.	сотиш харажати	минг сўм
19.	маъмурий харажатлар	минг сўм
20.	бошқа харажатлар	минг сўм
VI.	Молиявий фаолият бўйича харажат	минг сўм
21.	фоиз харажатлари	минг сўм
VII.	Молиявий фаолиятдан олинадиган даромад	минг сўм
VIII.	Жами харажат (IV+V+VI-VII.)	минг сўм
IX.	Соф фойда ёки зарар (III.-VIII.)	минг сўм
22.	Рентабеллик даражаси (IX./IV. *100)	%

Изоҳ. Норентабель йўналишда давр харажатларини ҳисоблаш учун йўналишнинг иш ҳақи харажатларини жами харажатларга нисбати фоиз кўринишида ҳисобланади.

Раҳбар	________________	________________________
	^Имзо	^Ф.И.О.

Бош ҳисобчи	________________	________________________
	^Имзо	^Ф.И.О.

(Қонунчилик маълумотлари миллий базаси, 04.11.2024 й., 09/24/718/0881-сон; 18.11.2025 й., 09/25/725/1057-сон)