«Чет эл инвестициялари ва чет эллик инвесторлар фаолиятининг кафолатлари тўғрисида», «Суғурта тўғрисида» Ўзбекистон Республикаси қонунлари, Ўзбекистон Республикаси Вазирлар Маҳкамасининг «Ўзбекистон Республикасида инвестицияларнинг суғурта ҳимоясини таъминлашга оид чора-тадбирлар тўғрисида» 1994 йил 13 апрелдаги 206-сон қарорига мувофиқ, мамлакатимиз ва чет эл инвесторларининг иқтисодий манфаатларини ҳимоя қилишни таъминлаш, шунингдек, Ўзбекистон Республикасида суғуртанинг замонавий тизимини ривожлантириш мақсадида Вазирлар Маҳкамаси қарор қилади:

1. «Американ Интернешнл Груп» («АИГ») билан:

а) устав сармояси 100 млн АҚШ доллари бўлган, шу жумладан:

«Ўзбекинвест» улуши — 80 млн АҚШ долларини,

«АИГ» улуши 20 млн АҚШ долларини ташкил қиладиган сиёсий таваккалчиликлардан суғурта қилиш «Ўзбекинвест Интернешнл» қўшма компанияси;

б) Устав сармояси 500 минг АҚШ доллари бўлган, шу жумладан:

«Ўзбекинвест» улуши — 245 минг АҚШ долларини,

«АИГ» улуши — 255 минг АҚШ долларини ташкил қиладиган «АИГ» — Ўзбекинвест» қўшма обунавий агентлиги;

в) устав сармояси 2 млн АҚШ доллари бўлган, шу жумладан:

«АИГ» улуши — 1020 минг АҚШ долларини,

Миллий банк улуши — 980 минг АҚШ долларини ташкил қиладиган таваккалчиликларидан суғурта қилиш бўйича Ўзбекистон — Америка қўшма суғурта компанияси («ЎЗ-АИГ») ташкил этилсин.

2. Қуйидагилар асосий вазифалари этиб белгилансин:

«Ўзбекинвест Интернешнл» компаниясининг Ўзбекистон Республикасига йўналтирилаётган хусусий чет эл инвестицияларини сиёсий таваккалчиликлардан суғуртавий ҳимоя қилишни таъминлаш;

«АИГ—Ўзбекинвест» обунавий агентлигининг суғурта шартномаларини экспертиза қилиш ва тузиш бўйича «Ўзбекинвест Интернешнл» компаниясининг агентлиги функцияларини амалга ошириш;

«Ўз-АИГ» компаниясиники — Ўзбекистон Республикасида тижорат таваккалчиликларини умумий суғурта қилиш ҳамда чет эллик ва мамлакатимиз инвесторлари ҳаётини суғурта қилиш соҳасида суғурта хизматлари, гаровга қўйилган мулкни мажбурий суғурталаш ҳам, шу жумладан эркин муомаладаги валютадаги тўлов билан кўрсатиш.

4. Ўзбекистон Республикаси Молия вазирлиги «Ўзбекинвест Интернешнл» компанияси ва «АИГ-Ўзбекинвест» обунавий агентлигини, рўйхатдан ўтказилгандан кейин 30 кун мобайнида уларнинг устав сармояларига бадаллар суммасининг 5 фоизи миқдорида дастлабки улуш тўловини ҳамда устав сармоясидаги «Ўзбекинвест» улушини қолганини тенг миқдордаги улушлар билан бир йил мобайнида Республика валюта фонди ҳисобидан тўласин.

Ўзбекистон Республикаси Ташқи иқтисодий фаолият миллий банки «Ўз-АИГ» компаниясининг устав фондидаги ўз улушини банкнинг даромадлари ҳисобидан тўласин.

5. Маълумот учун қабул қилинсинки:

устав сармоясининг тузилмасига мувофиқ «Ўзбекинвест — Интернешнл» компанияси директорлари Кенгашининг 5 аъзосидан 4 нафари Ўзбекистон Республикаси Молия вазирлиги томонидан тайинланади;

«Ўзбекинвест Интернешнл» компанияси активларини бошқа стратегияси ва шакллари унинг директорлар Кенгаши томонидан белгиланади.

6. «Ўз-АИГ» компанияси рўйхатдан ўтказилган санадан бошлаб 5 йил мобайнида даромад солиғи тўлашдан озод қилинсин.

7. «Ўз-АИГ» компаниясини Тошкент шаҳар, Туроб Тўла кўчаси, 1-уйдаги Халқаро Банк ва Молия Маркази биносига жойлаштирилсин.

8. Ўзбекистон Республикаси Молия вазирлиги, Ташқи иқтисодий алоқалар вазирлиги, Ташқи иқтисодий миллий фаолият банки, «Ўзбекинвест» компанияси, етакчи чет эл суғурта компанияларини жалб этган ҳолда, келгусида қўшма суғурта компанияларини ташкил қилиш ишларини давом эттирсинлар.

9. Мазкур қарорнинг бажарилишини назорат қилиш Ўзбекистон Республикаси Бош вазирининг ўринбосарлари Ў.Т. Султонов Б.С. Ҳамидов зиммасига юклансин.