|
Ҳужжат 23.12.2024 санаси ҳолатига
Амалдаги версияга ўтиш |
Ўзбекистон Республикаси Вазирлар Маҳкамасининг
қарори
Интеллектуал мулк соҳасида назорат харидини амалга ошириш тартиби тўғрисидаги низомни тасдиқлаш ҳақида
Ўзбекистон Республикаси Президентининг «Аҳолини сифатли истеъмол товарлари билан таъминлашга қаратилган қўшимча чора-тадбирлар тўғрисида» 2023 йил 4 апрелдаги ПҚ-110-сон қарорига мувофиқ Вазирлар Маҳкамаси қарор қилади:
1. Ўзбекистон Республикаси Президентининг «Аҳолини сифатли истеъмол товарлари билан таъминлашга қаратилган қўшимча чора-тадбирлар тўғрисида» 2023 йил 4 апрелдаги ПҚ-110-сон қарорининг 7-бандида контрафакт товарлар муомаласига барҳам бериш мақсадида интеллектуал мулк объектларига бўлган ҳуқуқларни бузиш билан боғлиқ ҳуқуқбузарликлар бўйича назорат харидини амалга ошириш тартиби ишлаб чиқилиб, Вазирлар Маҳкамасига киритиш белгиланганлиги маълумот учун қабул қилинсин.
2. Қуйидагиларни назарда тутувчи Интеллектуал мулк соҳасида назорат харидини амалга ошириш тартиби тўғрисидаги низом иловага мувофиқ тасдиқлансин:
назорат харидини ташкил этишни режалаштириш ва уни ўтказишга оид қоидалар;
назорат харидининг натижалари бўйича интеллектуал мулкка бўлган ҳуқуқларга риоя этилиш ҳолатини ўрганиш;
интеллектуал мулкка бўлган ҳуқуқларга риоя этилганлиги ҳолатини баҳолаш бўйича мезонларни белгилаш;
назорат харидини амалга ошириш билан боғлиқ тадбирларни молиялаштириш тартиби.
3. Ўзбекистон Республикаси Адлия вазирлиги:
савдо нуқталарида сотиладиган истеъмол товарлари, дори воситалари, тиббий буюм ва тиббий техника ҳамда муаллифлик ҳуқуқи объектларини реализация қилиш жараёнида интеллектуал мулк соҳасидаги қонунчилик ҳужжатлари талабларига риоя этилиши юзасидан тизимли равишда ўрганишлар ўтказилишини;
Кейинги таҳрирга қаранг.
кенг жамоатчилик ўртасида интеллектуал мулкка нисбатан ҳурмат ҳиссини ошириш ҳамда контрафакт товарларга нисбатан тоқатсизлик муносабатини шакллантиришга қаратилган манзилли тарғибот тадбирлари ўтказилишини таъминласин.
4. Мазкур қарорнинг бажарилишини назорат қилиш Ўзбекистон Республикаси адлия вазири А.Ж. Ташкулов зиммасига юклансин.
Ўзбекистон Республикасининг Бош вазири А. АРИПОВ
Тошкент ш.,
2024 йил 23 июль,
441-сон
Вазирлар Маҳкамасининг 2024 йил 23 июлдаги 441-сон қарорига
ИЛОВА
ИЛОВА
Интеллектуал мулк соҳасида назорат харидини амалга ошириш тартиби тўғрисида
НИЗОМ
1-боб. Умумий қоидалар
1. Ушбу Низом истеъмол товарлари, дори воситалари, тиббий буюм ва тиббий техника ҳамда муаллифлик ҳуқуқи (турдош ҳуқуқлар) объектларини (кейинги ўринларда — товарлар) реализация қилиш жараёнида интеллектуал мулк объектларига бўлган ҳуқуқларни бузиш билан боғлиқ ҳуқуқбузарликларни аниқлаш бўйича ўтказиладиган назорат харидини амалга ошириш тартиб-таомилларини белгилайди.
Кейинги таҳрирга қаранг.
2. Ушбу Низомга мувофиқ назорат хариди Ўзбекистон Республикасида ҳуқуқий муҳофазага олинган интеллектуал мулк объектларига оид ҳуқуқбузарликни аниқлаш мақсадида савдо нуқталарида (бозорлар, савдо дўконлари, кўчма савдо шохобчалари, дорихоналар ва бошқалар) реализация қилинадиган товарларни харид қилиш ҳисобланади.
3. Интеллектуал мулк соҳасида назорат хариди жисмоний ва юридик шахсларнинг тадбиркорлик фаолиятига аралашмаган ҳолда, мазкур Низомга 1-иловада келтирилган схемага мувофиқ икки нафар холислар иштирокида амалга оширилади ва бу тадбиркорлик субъектлари фаолиятида текширув ўтказиш ҳисобланмайди.
4. Назорат хариди бу борада юзага келадиган асосларга кўра режали ва режадан ташқари тарзда амалга оширилади.
5. Адлия органлари томонидан режали назорат хариди мазкур Низомга 2-иловада келтирилган шаклга мувофиқ тасдиқланадиган режали назорат харидини амалга ошириш графиги асосида амалга оширилади.
6. Режали назорат харидини амалга ошириш графиги, қоида тариқасида, муқаддам интеллектуал мулк соҳасида ҳуқуқбузарликлар содир этилган савдо нуқталари ва уларда фаолият юритувчи жисмоний ва юридик шахслар фаолиятини таҳлил қилиш асосида шакллантирилади.
График йил ёки йилнинг ҳар чораги учун ишлаб чиқилиб, адлия органининг расмий веб-саҳифасига жойлаштирилади. Графикда назорат харидини амалга оширишнинг аниқ ойлари ва кунлари кўрсатилмайди.
7. Режадан ташқари назорат хариди жисмоний ва юридик шахсларнинг мурожаатлари ҳамда оммавий ахборот воситалари, шунингдек, давлат органлари томонидан қонунчилик бузилиши тўғрисида тақдим этилган маълумотлар асосида ва уларда ҳолатга ҳуқуқий баҳо бериш учун етарли маълумотлар бўлмаганда ўтказилади.
2-боб. Назорат харидини ташкил этиш
Адлия органи раҳбарининг назорат харидини амалга ошириш ҳақидаги буйруғида қуйидагилар кўрсатилиши керак:
назорат харидини амалга ошириш учун асос;
назорат харидини амалга ошириш муддати;
назорат харидини амалга оширишга масъул ходимларнинг ФИО ва лавозими;
назорат хариди амалга ошириладиган савдо нуқтасининг номи;
назорат хариди ўтказилаётган савдо нуқтасининг почта манзили;
назорат хариди давомида ўрганиш учун танлаб олинадиган товарларнинг тури ва миқдори;
назорат харидини молиялаштириш масалалари.
9. Назорат хариди касса чеки ёки белгиланган шаклдаги тўлов амалга оширилганлиги ҳақидаги бошқа ҳужжат расмийлаштирилганда амалга оширилган ҳисобланади.
10. Назорат хариди натижалари бўйича қуйидагиларни назарда тутувчи далолатнома расмийлаштирилади:
адлия органи масъул ходимининг ФИО ва лавозими;
холисларнинг ФИО;
назорат харидини амалга ошириш учун адлия органининг буйруғи;
назорат хариди амалга оширилган савдо нуқтасининг номи ва манзили;
назорат хариди давомида ўрганиш учун танлаб олинадиган товарларнинг тури ва миқдори;
назорат харидини амалга ошириш учун сарфланган сумма.
Далолатномага касса чеки ёки белгиланган шаклдаги тўлов амалга оширилганлиги ҳақидаги бошқа ҳужжатлар ва назорат хариди давомида олинган маҳсулотларнинг фотосуратлари илова қилинади.
Далолатнома назорат харидини амалга оширган адлия органи ходимлари ва икки нафар холислар томонидан имзоланади.
3-боб. Товарлар бўйича ўрганиш ишларини ўтказиш
11. Назорат харидида олинган товарлар бўйича интеллектуал мулкка бўлган ҳуқуқлар бузилиши ҳолатига ҳуқуқий баҳо бериш мақсадида назорат хариди натижалари бўйича далолатнома расмийлаштирилгандан сўнг ўн иш куни ичида товарларни ўрганиш ишлари (кейинги ўринларда — товарларни ўрганиш ишлари) амалга оширилади.
12. Товарларни ўрганиш ишлари қуйидаги мезонлар асосида амалга оширилади:
товарларда қўлланилган интеллектуал мулк объектининг рўйхатдан ўтказилган объектлар билан истеъмолчиларни чалғитиш даражасида ўхшашлиги;
товарларда муаллифлик ҳуқуқи (турдош ҳуқуқлар) объектларининг такрорланиши ёки тарқатилишида қонунчиликка риоя қилинганлиги;
товарларни ишлаб чиқарувчилар ва ҳуқуқ эгалари ўртасида тузилган лицензия шартномасининг мавжудлиги ҳамда бундай шартномаларнинг Ўзбекистон Республикаси Адлия вазирлигида рўйхатдан ўтказилганлиги, муаллифлик шартномалари бундан мустасно.
13. Товарларни ўрганиш якунлари бўйича интеллектуал мулк объектларига бўлган ҳуқуқлар бузилганлиги аниқланса, адлия органи томонидан ҳуқуқ эгасига бу тўғрисида уч иш куни ичида хабар қилинади, назорат хариди унинг мурожаати асосида амалга оширилган ҳолатлар бундан мустасно.
14. Хабардор қилинган ҳуқуқ эгаларидан тегишли ҳолат бўйича чора кўриш ҳақида мурожаат келиб тушса, у қонунчиликда белгиланган тартибда кўриб чиқилади.
Олдинги таҳрирга қаранг.
Ҳуқуқ эгалари томонидан ҳуқуқбузарлик ҳолати бўйича адлия органларининг хабарига бир ой муддат ичида муносабат билдирилади. Бундай муносабат билдирилмаган тақдирда, адлия органлари тадбиркорлик субъекти фаолиятини «хавфни таҳлил этиш» тизими натижалари асосида белгиланган тартибда «Ягона давлат назорати» ахборот тизимида рўйхатдан ўтказиш орқали ваколатли органни хабардор қилган ҳолда текширув ўтказиш орқали ҳуқуқбузарлик ҳолати юзасидан чоралар кўради.
(14-банднинг иккинчи хатбошиси Ўзбекистон Республикаси Вазирлар Маҳкамасининг 2024 йил 19 декабрдаги 859-сонли қарори таҳририда — Қонунчилик маълумотлари миллий базаси, 23.12.2024 й., 09/24/859/1047-сон)
15. Назорат хариди давомида олинган товарлар адлия органларининг мол-мулки ҳисобланади ва товарларни ўрганиш ишлари тугатилиб, натижаси юзасидан тегишли чоралар кўрилгунга қадар сақланади. Ушбу муддат тугагандан сўнг товарлар белгиланган тартибда ҳисобдан чиқарилади.
4-боб. Назорат харидини молиялаштириш
16. Назорат харидида товарларни сотиб олиш адлия органларининг харажатлар сметасида алоҳида кўрсатиб ўтилган маблағлар асосида молиялаштирилади.
Адлия органларининг назорат харидини молиялаштириш учун Адлия органлари ва муассасаларини ривожлантириш жамғармаси ҳисобидан маблағлар ажратилади.
Олдинги таҳрирга қаранг.
Назорат харидида товарларни сотиб олиш ҳуқуқ эгалари ёки уларнинг ишончли вакиллари томонидан ҳам белгиланган тартибда молиялаштирилиши мумкин.
(16-банд Ўзбекистон Республикаси Вазирлар Маҳкамасининг 2024 йил 19 декабрдаги 859-сонли қарорига асосан хатбоши билан тўлдирилган — Қонунчилик маълумотлари миллий базаси, 23.12.2024 й., 09/24/859/1047-сон)
17. Адлия органларининг назорат харидини амалга оширувчи масъул ходимлари корпоратив банк карталаридан мақсадли фойдаланиш учун моддий жавобгар ҳисобланади.
18. Назорат хариди мақсадли корпоратив банк картаси ёрдамида адлия органлари масъул ходимлари томонидан амалга оширилади.
Назорат харидини амалга ошириш ҳақидаги буйруқда назорат харидини адлия органларининг масъул ходимига бериладиган пул миқдорини қайд этган ҳолда нақд пул шаклида ҳам амалга ошириш белгиланиши мумкин.
19. Мақсадли корпоратив банк карталари ҳар бир адлия органи учун алоҳида очилади.
Мақсадли корпоратив банк карталаридан фақатгина назорат харидини амалга ошириш учун фойдаланилишига йўл қўйилади.
5-боб. Якунловчи қоидалар
20. Назорат харидини амалга оширишда юридик шахслар ёки якка тартибдаги тадбиркорларнинг молиявий-хўжалик фаолиятига аралашиш ҳамда текширувлар ўтказиш қатъиян тақиқланади.
21.Ушбу Низом талабларининг бузилишида айбдор бўлган шахслар қонунчилик ҳужжатларига мувофиқ жавоб берадилар.
LexUZ шарҳиҚаранг: Ўзбекистон Республикаси Маъмурий жавобгарлик тўғрисидаги кодексининг 1771, 1772-моддалари, Ўзбекистон Республикаси Жиноят кодексининг 149-моддаси, Ўзбекистон Республикаси Меҳнат кодексининг 312 –– 315-моддалари.
22. Назорат хариди амалга оширилиши ёки унинг натижаларидан норози бўлган томонлар белгиланган тартибда судга шикоят қилиши мумкин.
LexUZ шарҳиҚаранг: Ўзбекистон Республикасининг «Жисмоний ва юридик шахсларнинг мурожаатлари тўғрисида»ги ва «Судлар тўғрисида»ги қонунлари.
Интеллектуал мулк соҳасида назорат харидини амалга ошириш тартиби тўғрисидаги низомга
1-ИЛОВА
1-ИЛОВА
Интеллектуал мулк соҳасида назорат харидини амалга ошириш тартиби
СХЕМАСИ
|
Босқичлар |
Субъектлар |
Тадбирлар |
Муддатлар | |||
|
1-босқич |
Адлия органлари |
1. Режали назорат харидини амалга ошириш графигини тасдиқлайди ҳамда расмий веб-саҳифаларга жойлаштиради. |
Ҳар йили ёки ҳар чоракда | |||
|
Жисмоний ва юридик шахслар, ОАВ, давлат органлари |
2. Адлия органларига ҳуқуқбузарлик юзасидан мурожаат қилади ёки маълумотлар тақдим этади. |
Доимий | ||||
|
Адлия органлари |
3. ОАВ ва бошқа ахборот манбаларидан қонун бузилиши тўғрисидаги маълумотларни олади. |
Доимий | ||||
|
|
||||||
|
2-босқич |
Адлия органлари |
1. Режали назорат харидини амалга ошириш графигига мувофиқ назорат харидини амалга ошириш бўйича буйруқ чиқаради. |
График тасдиқлангандан сўнг | |||
|
2. Режадан ташқари назорат харидини амалга ошириш бўйича буйруқ чиқаради. |
Мурожаат келиб тушгандан ёки маълумотлар олингандан ёхуд тақдим этилгандан сўнг (зарурат бўлса) | |||||
|
3-босқич |
Адлия органлари |
Назорат хариди натижалари бўйича далолатнома расмийлаштиради. |
Назорат хариди амалга оширилгандан сўнг | |||
|
4-босқич |
Адлия органлари |
Назорат харидида олинган товарлар бўйича интеллектуал мулкка бўлган ҳуқуқлар бузилиши ҳолатига ҳуқуқий баҳо бериш мақсадида товарларни ўрганади. |
Далолатнома расмийлаштирилгандан сўнг ўн иш куни ичида | |||
|
5-босқич |
Адлия органлари |
Товарларни ўрганиш якунлари бўйича интеллектуал мулк объектларига бўлган ҳуқуқлар бузилганлиги аниқланганда ҳуқуқ эгасига хабар беради (назорат хариди ҳуқуқ эгасининг мурожаати асосида амалга оширилган ҳолатлар бундан мустасно). |
Товарларни ўрганиш якунлангандан сўнг уч иш кунида |
Интеллектуал мулк соҳасида назорат харидини амалга ошириш тартиби тўғрисидаги низомга
2-ИЛОВА
2-ИЛОВА
Адлия органлари томонидан режали назорат харидини амалга ошириш
ГРАФИГИ
|
Т/р |
Назорат хариди амалга ошириладиган савдо нуқтаси номи |
Савдо нуқтасининг почта манзили |
Назорат хариди давомида ўрганиш учун танлаб олинадиган товарларнинг тури ва миқдори |
Назорат харидини амалга ошириш муддати (йил ва чорак) |
(Қонунчилик маълумотлари миллий базаси, 24.07.2024 й., 09/24/441/0544-сон; 23.12.2024 й., 09/24/859/1047-сон; 03.07.2026 й., 09/26/353/0680-сон)
