toggle_night_mode
Ўзбекистон Республикаси Қурилиш вазирининг
Буйруғи
ҚМҚ 2.04.03-19 «Канализация. Ташқи тармоқлар ва иншоотлар» қурилиш меъёрлари ва қоидаларининг 4.9-бандига ўзгартириш киритиш тўғрисида
[Ўзбекистон Республикаси Адлия вазирлиги томонидан 2022 йил 28 ноябрда ҳисобга олинди, ҳисоб рақами 118]
Ўзбекистон Республикасининг Шаҳарсозлик кодекси ҳамда Ўзбекистон Республикаси Президентининг 2022-йил 24-майдаги ПҚ-257-сон «Аҳолининг ичимлик сув таъминоти ва оқова сув хизматлари билан таъминланганлик даражасини ошириш бўйича қўшимча чора-тадбирлар тўғрисида»ги қарорига мувофиқ буюраман:
1. ҚМҚ 2.04.03-19 «Канализация. Ташқи тармоқлар ва иншоотлар» шаҳарсозлик нормалари ва қоидаларининг 4.9-банди қуйидаги таҳрирда баён этилсин:
«4.9. Оқова сув қувур ўтказгичларида қуйидагилар қўлланилиши керак:
ўзи оқар тармоқларда — босимсиз ва босимли (асосланган ҳолларда) темир бетонли, бетонли, сополли, чўян, асбест цементли, пластмасса, базалт композит қувурлар ва темир бетонли қисмлар;
босимли тармоқларда — босимли темир бетонли, асбест цементли, чўян, пўлат, пластмасса ва басалт композит қувурлар.
Изоҳлар:
ўзи оқар тармоқларда чўян қувурлари ҳамда босимли тармоқларда пўлат қувурлари етиб бориш қийин бўлган жойлардаги қурилишларда, чўкувчан тупроқларда, ер сатҳи кон ишларидан зарар кўрган ҳудудларда, сув ҳавзаларини, темир йўли ва автомобил йўллари остидан кесиб ўтган, хўжалик-ичимлик сув қувурлари билан кесишган ва қувурларга механик шикастлар етказилиши мумкин бўлган жойларда, шунингдек қувурлар эстакада таянчлари устидан олиб ўтилганда қўлланилиши мумкин;
қувурлар емирувчан муҳитларда ётқизилганда коррозияга чидамли қувурларни қўллаш лозим;
пўлат қувурлар қўлланилганда ташқи ва ички юзаларни коррозиядан ҳимоялаш чораларини назарда тутиш лозим. Пўлат қувурларнинг ташқи юзасини коррозиядан ҳимоя қилиш усулларини танлашда тупроқнинг коррозион хусусиятлари ҳамда дайди токлар таъсирида емирилиши мумкинлиги тўғрисидаги маълумотлар билан асосланиши керак. Пўлат қувурларни ташқи коррозиядан ҳимоялаш ГОСТ 9.602 га мувофиқ амалга оширилиши лозим. Пўлат қувурларнинг ички коррозиясини истисно қилиш мақсадида уларнинг ички юзасини лок бўёқ, рух ва бошқа коррозияга қарши қопламалар билан ҳимоялашни назарда тутиш керак;
барча турдаги пўлат ва темир-бетонли қувур ўтказгичларни лойиҳалашда коррозияга қарши электркимёвий ҳимоясини қуриш имкониятини яратиш учун ушбу қувурларни электр-кимёвий ўтказувчанлигининг узлуксизлигини таъминловчи чоралар назарда тутилиши керак;
базалт композит қувурлар ГОСТ 33123 га мос бўлиши ҳамда улар қўлланилганда мазкур изоҳларнинг иккинчи хатбошисида келтирилган талабларга мувофиқ бўлиши лозим.».
2. Мазкур буйруқ Ўзбекистон Республикаси Уй-жой коммунал хизмат кўрсатиш вазирлиги билан келишилган.
3. Мазкур буйруқ расмий эълон қилинган кундан эътиборан кучга киради.
Вазир Б. ЗАКИРОВ
Тошкент ш.,
2022 йил 22 ноябрь,
201-сон
Келишилди:
Уй-жой коммунал хизмат кўрсатиш вазири Ш. ХИДОЯТОВ
2022 йил 21 ноябрь