Ўзбекистон Республикаси Миллий гвардиясининг ҳарбий хизматчи ва ходимларини, ички ишлар органлари сафдорлар таркиби ҳамда вазирлик ва идораларнинг қўриқлаш (ҳарбийлаштирилган, қоровуллик) бўлинмалари ходимларини (кейинги ўринларда — ҳарбий хизматчи ва ходимлар) тайёрлаш, қайта тайёрлаш ва уларнинг малакасини ошириш тизимини янада такомиллаштириш, шунингдек, ўқув жараёнини замонавий ахборот ва педагогик технология воситаларидан кенг фойдаланган ҳолда ташкил этиш учун зарур шарт-шароитлар яратиш мақсадида:

1. Қорақалпоғистон Республикаси Вазирлар Кенгаши, Тошкент шаҳар ҳокимлиги, Ўзбекистон Республикаси Миллий гвардияси ва Ички ишлар вазирлигининг:

Тошкент шаҳрининг Сергели туманидаги А. Қодирий кўчаси 43-уй манзилида жойлашган Ўзбекистон Республикаси Ички ишлар вазирлиги ҳузуридаги Қўриқлаш департаментининг Тошкент шаҳар Қўриқлаш бошқармаси балансидаги Автохўжалик ҳудудида Ўзбекистон Республикаси Ички ишлар вазирлиги Малака ошириш институтининг Тошкент филиалини ташкил этиш;

Ички ишлар вазирлигининг Фарғона минтақавий ўқув марказини Ички ишлар вазирлиги Малака ошириш институтининг Фарғона филиалига айлантириш;

Ички ишлар вазирлигининг Жиззах минтақавий ўқув марказини Ички ишлар вазирлиги Малака ошириш институтининг Жиззах филиалига айлантириш;

Сурхондарё вилояти Денов тумани Файзли маҳалласи Файзли кўчаси 105-уй манзилида Ички ишлар вазирлиги Малака ошириш институтининг Сурхондарё филиалини ташкил этиш тўғрисидаги таклифларига розилик берилсин.

2. Қуйидагилар Ўзбекистон Республикаси Ички ишлар вазирлиги Малака ошириш институти Нукус, Фарғона, Жиззах, Тошкент ва Сурхондарё филиалларининг (кейинги ўринларда — Филиаллар) асосий вазифалари этиб белгилансин:

ички ишлар органлари сафдор ва сержантлар таркибини маъмурий-ҳуқуқий, жамоат тартибини сақлаш, касбий ва психологик тайёргарлик, жанговар махсус тайёргарлик бўйича қайта тайёрлаш ва уларнинг малакасини ошириш ҳамда тор ихтисосликлар сирасига кирувчи сафдорлар ва офицерлар таркибидаги лавозимларга биринчи марта тайинланган ходимларни бошланғич касбий тайёрлаш;

ҳарбий хизматчи ва ходимларни ватанпарварлик, Ватанига ва хизмат бурчига садоқат руҳида тарбиялаш, уларда одоб-ахлоқ фазилатларини шакллантириш;

фуқароларнинг ҳуқуқ ва эркинликларини, жамоат тартиби ва хавфсизлигини ҳимоя қилишга қодир бўлган, билимли, маънавий етук, жисмонан соғлом, хизмат бурчини виждонан бажара оладиган фаол ҳарбий хизматчи ва ходимларни тарбиялаш;

Ўзбекистон Республикаси Миллий гвардияси ва ички ишлар органларининг соҳавий хизматлари ҳамда вазирлик ва идораларнинг қўриқлаш (ҳарбийлаштирилган, қоровуллик) бўлинмалари учун малакали мутахассислар тайёрлаш;

қонунийликни таъминлаш, ҳуқуқ-тартиботни мустаҳкамлаш ва жиноятчиликка қарши кураш муаммолари бўйича тадқиқотларни амалга ошириш ҳамда амалий таклифлар, тавсиялар ва қўлланмалар ишлаб чиқиш;

ҳарбий хизматчи ва ходимларни зиммасига юкланган хизмат вазифаларини бажаришлари учун зарур бўлган назарий билим, амалий кўникма ва малакаларни пухта эгаллаш имконини берадиган зарур шарт-шароитлар яратиб бериш;

ўқув жараёнига ўқитишнинг илғор услуб ва шаклларини, замонавий ахборот технологиялари воситаларини жорий қилиш, ҳарбий хизматчи ва ходимларнинг белгиланган вазифаларни ҳал этишга амалий йўналтирилганлигини таъминлаган ҳолда, ўқув-тарбия жараёнини узлуксиз равишда такомиллаштириб бориш;

ҳарбий хизматчи ва ходимларнинг малакасини оширишда ўқитишнинг онлайн шаклини кенг қўллаш;

Ўзбекистон Республикаси Ички ишлар вазирлиги ва Миллий гвардиясининг таълим муассасалари ўртасида доимий равишда илмий ва амалий тажриба алмашиш амалиётини йўлга қўйиш.

4. Белгилаб қўйилсинки:

б) Филиаллар Ўзбекистон Республикаси Ички ишлар вазирлигининг юридик шахс мақомига эга бўлган таркибий бўлинмаси ҳисобланади, Ўзбекистон Республикаси давлат герби тасвири туширилган ва ўз номи давлат тилида ёзилган муҳрга ва бланкларга, мустақил балансга ҳамда банк муассасаларида шахсий ҳисобварақларига эга бўлади;

в) Филиалларда ҳарбий хизматчи ва ходимларни ҳамда вазирлик ва идораларнинг ҳарбийлаштирилган ва қоровуллик қўриқлаш бўлинмаларининг мутахассисларини бошланғич тайёрлаш, қайта тайёрлаш ва уларнинг малакасини ошириш бўйича ўқув жараёни қуйидаги ҳудудларга тақсимланган ҳолда ташкил этилади:

Ўзбекистон Республикаси Ички ишлар вазирлиги Малака ошириш институтининг Тошкент филиали — Тошкент шаҳри ва Тошкент вилоятида хизмат қилаётган ҳарбий хизматчи ва ходимлар ҳамда мутахассислар учун;

Ўзбекистон Республикаси Ички ишлар вазирлиги Малака ошириш институтининг Фарғона филиали — Фарғона, Андижон ва Наманган вилоятларида хизмат қилаётган ҳарбий хизматчи ва ходимлар ҳамда мутахассислар учун;

Ўзбекистон Республикаси Ички ишлар вазирлиги Малака ошириш институтининг Жиззах филиали — Сирдарё, Жиззах ва Самарқанд вилоятларида хизмат қилаётган ҳарбий хизматчи ва ходимлар ҳамда мутахассислар учун;

Ўзбекистон Республикаси Ички ишлар вазирлиги Малака ошириш институтининг Нукус филиали — Қорақалпоғистон Республикаси, Хоразм, Навоий ва Бухоро вилоятларида хизмат қилаётган ҳарбий хизматчи ва ходимлар ҳамда мутахассислар учун;

Ўзбекистон Республикаси Ички ишлар вазирлиги Малака ошириш институтининг Сурхондарё филиали — Қашқадарё ва Сурхондарё вилоятларида хизмат қилаётган ҳарбий хизматчи ва ходимлар ҳамда мутахассислар учун.

5. Ўзбекистон Республикаси ички ишлар вазирига қуйидаги ҳуқуқлар берилсин:

Ўзбекистон Республикаси Ички ишлар вазирлигининг умумий штат бирликлари доирасида Филиалларнинг ташкилий-штат тузилмаларига ўзгартириш киритиш;

Ўзбекистон Республикаси Ички ишлар вазирлиги ҳузуридаги Қўриқлаш департаменти маблағлари ҳисобидан қўриқлаш бўлинмалари учун мутахассисларни ўқитиш самарадорлигини ошириш мақсадида Филиалларнинг моддий-техник ва ўқув-машғулот базаларини мустаҳкамлаш, қуриш, реконструкция қилиш ва таъмирлашни амалга ошириш.

6. Шундай тартиб ўрнатилсинки, унга мувофиқ:

Филиалларнинг раҳбар ва педагоглар таркибини қайта тайёрлаш ва уларнинг малакасини ошириш Ўзбекистон Республикаси Ички ишлар вазирлиги Академияси, Ички ишлар вазирлиги Малака ошириш институтида ҳамда вазирлик ва идораларнинг олий, олий ҳарбий ва ихтисослаштирилган таълим муассасаларида амалга оширилади;

Ўзбекистон Республикаси Миллий гвардияси Ихтисослашган ўқув маркази Ўзбекистон Республикаси Миллий гвардияси оддий аскар ва сержантлар таркибига мансуб ҳарбий хизматчилар ва ходимларни тайёрлаш бўйича таянч бўлинма ҳисобланади.

7. Ўзбекистон Республикаси Миллий гвардияси, Ички ишлар вазирлиги:

Ўзбекистон Республикаси Миллий гвардияси ва ички ишлар органларининг тегишли соҳавий хизмат мутахассислари Филиалларнинг ўқув-тарбия жараёнига жалб қилинишини;

Филиалларда таълим жараёнининг сифатини ошириш, ўқув машғулотларини ўтказиш мақсадида Ўзбекистон Республикаси Ички ишлар вазирлиги ҳузуридаги Қўриқлаш департаменти маблағлари ҳисобидан шартнома асосида республиканинг етакчи олий ва ўрта махсус таълим муассасалари ва илмий-тадқиқот марказларининг профессор-ўқитувчилар таркиби, юқори малакали мутахассислари ҳамда экспертлари, шунингдек, захирадаги ҳарбий хизматчи ва ходимларни жалб қилинишини;

ҳарбий хизматчи ва ходимлар билан касбий, жанговар ва махсус тайёргарлик бўйича амалий машғулотларни ўтказишда Ўзбекистон Республикаси Миллий гвардияси ва ички ишлар органлари ўқув объектларидан, ўқув моддий-техник базаларидан ҳамда дала ўқув майдонларидан (полигонларидан) бепул кенг фойдаланилишини таъминласин.

8. Белгилансинки:

2022 — 2024 йилларда Ўзбекистон Республикаси Миллий гвардияси Тошкент минтақавий ўқув марказининг қурилиш, реконструкция ва ободонлаштириш бўйича ишлари ўрнатилган тартибда Тошкент шаҳар ҳарбий-маъмурий сектори, Ўзбекистон Республикаси Миллий гвардияси Қўриқлаш бош бошқармаси маблағлари ва қонунчиликда тақиқланмаган бошқа маблағлар ҳисобидан амалга оширилади;

қурилиш даврида Ўзбекистон Республикаси Ички ишлар вазирлиги Малака ошириш институтининг Тошкент филиали вақтинча Тошкент шаҳар, Шайхонтоҳур тумани, Шохидонтепа кўчаси, 126-уй манзилида жойлаштирилади;

Ўзбекистон Республикаси Ички ишлар вазирлиги ҳузуридаги Қўриқлаш департаментига моддий-техник ва ўқув-машқ базаларини мустаҳкамлаш, такомиллаштириш учун республиканинг давлат ва тижорат банкларидан кредит олишга рухсат берилади.

8¹. Таркибида қўриқлаш (ҳарбийлаштирилган, қоровуллик) бўлинмалари мавжуд бўлган вазирлик ва идоралар ҳар йили 1 декабрга қадар Ўзбекистон Республикаси Ички ишлар вазирлигига кейинги йил учун ушбу бўлинмалар мутахассисларини бошланғич тайёрлаш, қайта тайёрлаш ва уларнинг малакасини ошириш режасини тақдим этиб борсин ва уларнинг қатъий ижросини таъминласин.

9. Ўзбекистон Республикаси Миллий гвардияси вазирлик ва идоралар билан биргаликда қонун ҳужжатларига ушбу қарордан келиб чиқадиган ўзгартириш ва қўшимчаларни киритиш тўғрисида икки ой муддатда Вазирлар Маҳкамасига таклиф киритсин.

10. Мазкур қарорнинг ижросини назорат қилиш Ўзбекистон Республикасининг Бош вазири А.Н. Арипов ва Ўзбекистон Республикаси Президенти ҳузуридаги Хавфсизлик кенгаши котиби В.В. Махмудов зиммасига юклансин.