641-сон 09.10.2020. Инсон ҳуқуқлари бўйича Самарқанд форуми концепцияси ва Инсон ҳуқуқлари бўйича Самарканд форумини ўтказиш регламентини тасдиқлаш тўғрисида

Ҳужжат 10.10.2020 санаси ҳолатига
Амалдаги версияга ўтиш

Ўзбекистон Республикаси Вазирлар Маҳкамасининг

қарори

Инсон ҳуқуқлари бўйича Самарқанд форуми концепцияси ва Инсон ҳуқуқлари бўйича Самарканд форумини ўтказиш регламентини тасдиқлаш тўғрисида

Ўзбекистон Республикаси Президентининг «Инсон ҳуқуқлари бўйича Ўзбекистон Республикасининг Миллий стратегиясини тасдиқлаш тўғрисида» 2020 йил 22 июндаги ПФ-6012-сон Фармонига мувофиқ Инсон ҳуқуқлари бўйича Самарқанд форумини ўтказиш тартибини белгилаш мақсадида Вазирлар Маҳкамаси қарор қилади:

1. Қуйидагилар:

Инсон ҳуқуқлари бўйича Самарқанд форумини ўтказишнинг мақсади ва вазифаларини, форумнинг ташкилотчилари ва иштирокчиларини, Самарқанд форумини ташкил этиш ва ўтказиш, унинг дастурини ишлаб чиқиш ва тасдиқлаш, форумни оммавий ахборот воситаларида ёритиб бориш тартибини назарда тутувчи Инсон ҳуқуқлари бўйича Самарқанд форуми концепцияси 1-иловага мувофиқ;

Инсон ҳуқуқлари бўйича Самарқанд форумини ташкил қилиш ва ўтказиш тартиби, бу борада тайёргарлик ва ташкилий тадбирларни амалга ошириш, Самарқанд форумининг Ташкилий қўмитасининг ҳамда давлат органлари ва ташкилотларининг асосий вазифалари, форумнинг иштирокчилари ва унда иштирок этиш шаклларини назарда тутувчи Инсон ҳуқуқлари бўйича Самарқанд форумини ўтказиш регламенти 2-иловага мувофиқ;

Самарқанд форумини ўтказиш бўйича Ташкилий қўмита таркиби 3-иловага мувофиқ тасдиқлансин.

2. Мазкур қарорнинг бажарилишини назорат қилиш Инсон ҳуқуқлари бўйича Ўзбекистон Республикаси Миллий маркази директори А.Х. Саидов зиммасига юклансин.

Ўзбекистон Республикасининг Бош вазири А. АРИПОВ

Тошкент ш.,

2020 йил 9 октябрь,

641-сон

Вазирлар Маҳкамасининг 2020 йил 9 октябрдаги 641-сон қарорига
1-ИЛОВА

Инсон ҳуқуқлари бўйича Самарқанд форуми

КОНЦЕПЦИЯСИ

1-боб. Умумий қоидалар

1. Мазкур концепция Инсон ҳуқуқлари бўйича Самарқанд форумини (кейинги ўринларда — Самарқанд форуми) ўтказишнинг мақсадлари, вазифалари ва тартибини белгилайди ҳамда уларни амалга оширишга қаратилган дастурлар ва комплекс чора-тадбирларни ишлаб чиқиш учун асос бўлади.

2. Самарқанд форумининг асосий мақсади инсон ҳуқуқлари соҳасида халқаро тажриба алмашиш орқали мавжуд муаммоларни аниқлаш ҳамда уларни бартараф қилиш чораларини кўриш билан инсон ҳуқуқларини таъминланишига эришиш, инсон ҳуқуқларини қўллаб-қувватлашни назарда тутадиган янги усул ва воситаларни қўллаш, инсон ҳуқуқ ва эркинликларини ҳимоя қилиш соҳасидаги Ўзбекистоннинг ижобий халқаро имиджини янада яхшилашдан иборат.

3. Самарқанд форумининг асосий вазифалари қуйидагилар ҳисобланади:

Ўзбекистоннинг инсон ҳуқуқлари соҳасида эришилган ютуқлари ва ташаббусларини дунё ҳамжамияти ўртасида тарғиб этиш ва шу орқали мамлакатнинг халқаро обрў-эътиборини мустаҳкамлаш;

инсон ҳуқуқларини долзарб масалалари бўйича халқаро, минтақавий ва миллий муҳокамалар ташкил қилиш ҳамда бу йўлдаги саъй-ҳаракат ва имкониятларни бирлаштириш;

жамиятнинг турли тоифалар вакилларини (кам таъминланганлар, ногиронлиги бўлган шахслар, меҳнат мигрантлари, болалар, ёшлар, хотин-қизлар, қариялар ва бошқалар) ҳуқуқлари ва қонуний манфаатларини ҳимоя қилиш соҳаларида ҳалқаро стандартлар ва ҳуқуқни қўллаш амалиётини янада такомиллаштириш;

инсон ҳуқуқлари соҳасидаги масалаларни хорижий олимлар, эксперт ва мутахассислар, халқаро ташкилотлар вакиллари иштирокида муҳокама қилиш ҳамда бу борада назарий ва амалий тажриба алмашиш.

2-боб. Самарқанд форуми ташкилотчилари ва иштирокчилари

4. Ўзбекистон Республикаси Вазирлар Маҳкамаси, Инсон ҳуқуқлари бўйича Ўзбекистон Республикаси Миллий маркази Самарқанд форумининг асосий миллий ташкилотчилари ҳисобланади.

Бирлашган Миллатлар Ташкилотининг (кейинги ўринларда — БМТ) Инсон ҳуқуқлари бўйича олий комиссари бошқармаси, Европада Хавфсизлик ва Ҳамкорлик Ташкилотининг (кейинги ўринларда — ЕХҲТ) Демократик институтлар ва инсон ҳуқуқлари бўйича Бюроси, БМТнинг Ўзбекистондаги доимий координатори, БМТ Тараққиёт Дастурининг Ўзбекистондаги доимий вакили, ЕХҲТнинг Ўзбекистондаги Лойиҳалар координатори, халқаро ва хорижий ташкилотлар Самарқанд форумининг халқаро ҳамкорлари ҳисобланади.

5. Самарқанд форумида БМТнинг таркибий тузилмалари (органлари ва қўмиталари), инсон ҳуқуқлари бўйича халқаро ва минтақавий ташкилотлар, инсон ҳуқуқлари бўйича миллий институтлар, парламентлар, суд ва ҳуқуқни муҳофаза қилувчи органлар, фуқаролик жамияти институтлари вакиллари, халқаро ва маҳаллий экспертлар, олимлар, соҳа мутахассислари, журналистлар ва бошқа жамоатчилик вакиллари иштирок этиш учун таклиф қилинади.

Иштирокчилар таркибини шакллантириш учун ташкилотчилар томонидан манфаатдор халқаро ташкилотлар, инсон ҳуқуқлари бўйича миллий институтлар, парламентлар, суд ва ҳуқуқни мухофаза қилувчи органлари, фуқаролик жамияти институтларига Самарқанд форуми ҳақида маълумот хати юборилади.

6. Самарқанд форумининг кун тартиби, ялпи ва шуъба мажлислари мавзуси ва маърузачилар рўйхатини шакллантириш мақсадида Илмий жамоатчилик кенгаши тузилади. Кенгаш таркибига инсон ҳуқуқлари ва халқаро ҳуқуқ соҳасидаги етакчи олимлар ва мутахассислар, халқаро ва минтақавий ташкилотлар вакиллари киритилади.

7. Самарқанд форумини юксак даражада ўтказиш бўйича тайёргарлик ва комплекс ташкилий тадбирлар режасини таъминловчи чора-тадбирларни тайёрлаш ҳамда ўз вақтида амалга ошириш Вазирлар Маҳкамаси томонидан ташкил этиладиган Самарқанд форумини ўтказиш бўйича Ташкилий қўмита томонидан амалга оширилади.

4-боб. Самарқанд форумини амалга оширишдан кутиладиган натижалар

8. Самарқанд форумини амалга ошириш орқали қуйидаги натижаларга эришиш назарда тутилади:

инсон ҳуқуқлари соҳасидаги масалаларни хорижий олимлар, эксперт ва мутахассислар, халқаро ташкилотлар вакиллари иштирокида муҳокама қилинади ҳамда бу борада назарий ва амалий тажриба алмашилади;

мамлакатимизнинг инсон ҳуқуқлари соҳасида эришилган ютуқлари ва ташаббуслари дунё ҳамжамияти билан муҳокама қилинади, тарғиб этилади ва шу орқали Ўзбекистоннинг халқаро рейтинги ва обрў-эътибори яхшиланади;

инсон ҳуқуқлари бўйича халқаро мажбуриятларни бажариш юзасидан халқаро ташкилотларнинг инсон ҳуқуқлари соҳасидаги тавсияларини бажариш бўйича ижобий тажриба тўпланади;

инсон ҳуқуқларининг долзарб масалалари бўйича ташкил қилинган халқаро, минтақавий ва миллий муҳокамалар орқали бу йўлдаги саъй-ҳаракат ва имкониятлар бирлаштирилади;

жамиятнинг ижтимоий ҳимояга муҳтож қатламлари (кам таъминланганлар, ногиронлиги бўлган шахслар, меҳнат мигрантлари, болалар, ёшлар, хотин-қизлар, қариялар ва бошқалар) ҳуқуқлари ҳимоя қилиш соҳаларида ҳамкорлик йўлга қўйилади.

Вазирлар Маҳкамасининг 2020 йил 9 октябрдаги 641-сон қарорига
2-ИЛОВА

Инсон ҳуқуқлари бўйича Самарқанд форумини ўтказиш

РЕГЛАМЕНТИ

1-боб. Умумий қоидалар

1. Мазкур Регламент Инсон ҳуқуқлари бўйича Самарқанд форумига (кейинги ўринларда — Самарқанд форуми) тайёргарлик кўриш ва уни ташкилий жиҳатдан юқори савияда ўтказиш тартибини белгилайди.

2. Самарқанд форуми ҳар икки йилда йилнинг октябрь-ноябрь ойларида ёки Самарқанд форумини ўтказиш бўйича Ташкилий қўмита (кейинги ўринларда — Ташкилий қўмита) таклифига асосан бошқа вақтларда ҳам ўтказилиши мумкин.

3. Самарқанд форуми, қоида тариқасида, Самарқанд шаҳрида ёки Ташкилий қўмита таклифига асосан бошқа шаҳарда ўтказилади.

4. Самарқанд форумининг ишчи органи Инсон ҳуқуқлари бўйича Ўзбекистон Республикаси Миллий маркази (кейинги ўринларда — Марказ) ҳисобланади.

2-боб. Ташкилий қўмита

5. Самарқанд форумини юксак даражада ўтказишга қаратилган барча тайёргарлик ва ташкилий тадбирлар комплексини таъминловчи чора-тадбирларни тайёрлаш ва ўз вақтида амалга ошириш Ташкилий қўмита томонидан амалга оширилади.

6. Қуйидагилар Ташкилий қўмитанинг асосий вазифалари ҳисобланади:

Самарқанд форумини юқори савияда ўтказишга қаратилган барча тайёргарлик ва ташкилий тадбирлар комплексини таъминловчи чора-тадбирлар режасини («йўл харитаси») тайёрлаш ва ўз вақтида амалга ошириш;

Самарқанд форуми иштирокчиларининг келиб-кетиши, визаларининг расмийлаштирилиши, транспорт билан таъминланиши ва уларга тиббий хизматлар кўрсатиш масалаларини мувофиқлаштириш;

ахборот-таҳлилий ва бошқа ҳужжатларни ўз вақтида ва сифатли тайёрлашни таъминлаш, тадбирнинг ахборот ҳамкорлигини ташкиллаштириш бўйича зарур чора-тадбирларни қабул қилиш;

тадбирлар ўтказиладиган жойларнинг техник ва телекоммуникациялар билан таъминланишини, ободонлаштириш ва йўл-таъмирлаш ишларини олиб боришни ташкиллаштириш, шунингдек, Тошкент ва Самарқанд (ёки бошқа) шаҳарларида зарур меҳмонхоналарнинг тайёр бўлиши ва банд (бронь) қилинишини таъминлаш;

Самарқанд форуми ўтказиладиган жойларда қатъий санитария-эпидемиологик назорат ўрнатиш чораларини кўриш;

чора-тадбирлар режасини («йўл харитаси») ўз вақтида ва сифатли ижро этиш бўйича вазирлик ва идоралар фаолиятларини мувофиқлаштириш, шунингдек, Самарқанд форумига тайёргарлик кўриш ва ўтказиш билан боғлиқ бўлган бошқа ташкилий масалаларни ҳал қилиш.

7. Ташкилий қўмита таклифига асосан Самарқанд форумини ўтказиш билан ташкилий ишларга халқаро ташкилотлар, хорижий нодавлат нотижорат ташкилотлар жалб қилиниши мумкин.

3-боб. Самарқанд форумини ташкил этиш ва ўтказиш тартиби

8. Самарқанд форуми ўтказиладиган йилнинг июль ойида Марказ томонидан Ўзбекистон Республикаси Ташқи ишлар вазирлиги ҳамда Самарқанд (ёки бошқа) вилояти ҳокимлигининг таклифлари асосида тегишли вазирлик ва идоралар билан биргаликда ушбу тадбирларни ўтказиш билан боғлиқ бўлган ташкилий чора-тадбирларни ва Самарқанд форумининг харажатлар сметасини назарда тутадиган Вазирлар Маҳкамасининг фармойиши лойиҳаси тайёрланади.

9. Ташкилий қўмита Самарқанд форумини ўтказиш билан боғлиқ тадбирларга муносиб тайёргарлик кўриш ва уларни ўтказиш бўйича манзилли чора-тадбирлар режасини («йўл харитаси») тегишли йил февраль ойида ишлаб чиқиб, амалга ошириш тизимини жорий этади.

10. Самарқанд форумини ўтказиш бўйича давлат органлари ва ташкилотларига қуйидаги вазифалар юкланади:

Ўзбекистон Республикаси Ташқи ишлар вазирлиги — Марказнинг виза талабномаларига биноан келишилган рўйхатларга мувофиқ Самарқанд форумида иштирок этадиган хорижий мутахассислар учун белгиланган тартибда кириш визаларини консуллик йиғимлари ва ҳақиқий харажатларнинг ўрнини қоплаш ҳисобидан йиғимлар ундирилмасдан, зарур ҳолларда Ислом Каримов номидаги «Тошкент» халқаро аэропортида расмийлаштирилишини, шунингдек, Ўзбекистон Республикасида аккредитациядан ўтган дипломатик корпус ҳамда халқаро ташкилотлар вакилларининг онлайн форматдаги иштирокини таъминлаш;

Ўзбекистон Республикаси Давлат божхона қўмитаси — Самарқанд форумида иштирок этиши учун Ўзбекистон Республикасига ташриф буюрувчи делегация ва делегатларнинг божхона расмийлаштирувидан ўз вақтида ўтишини таъминлаш;

Ўзбекистон Республикаси Ички ишлар вазирлиги ва Миллий гвардия — Ўзбекистон Республикасида делегация ва делегатларнинг хавфсизлиги ҳамда Тошкент ва Самарқанд (ёки бошқа) шаҳарларида тадбирлар ўтказиладиган жойларда хавфсизликни таъминлаш;

Ўзбекистон Республикаси Соғлиқни сақлаш вазирлиги — Самарқанд форумини ўтказиш даврида тадбирлар ўтказилиши ва меҳмонлар яшаши керак бўлган жойларда самарали санитария-эпидемиологик назорат ўрнатиш ва сифатли тиббий хизмат кўрсатилишини таъминлаш;

Ўзбекистон Республикаси Олий ва ўрта махсус таълим вазирлиги, Тошкент давлат юридик университети, Жаҳон иқтисодиёти ва дипломатияси университети, Тошкент Халқаро Вестминстер Университети, Ўзбекистон давлат жаҳон тиллари университети, Самарқанд давлат чет тиллари институти — Самарқанд форуми ташкиллаштириш ва ўтказиш жараёнига юқори курс талабалари, магистрант ва докторантларни волонтёрлар сифатида жалб қилинишини таъминлаш;

Ўзбекистон Республикаси Маданият вазирлиги «Ўзбеккино» миллий агентлиги билан биргаликда — Самарқанд форумининг очилиш тадбирида, танаффус ва тушлик вақтида миллий фон (жонли), тадбир иштирокчилари учун Ҳукумат номидан ташкил этиладиган расмий қабулда концерт дастури ва мультимедиа тақдимотини ташкил этишда юксак профессионал маҳорат ва тажрибага эга бўлган ёш санъаткорларни ўрнатилган тартибда шартнома асосида кенг жалб этишни таъминлаш;

Марказ — Самарқанд форумига бағишланган www.asianforum.uz сайтининг доимий фаолиятини таъминлаш;

Тошкент шаҳар ва Самарқанд (ёки бошқа) вилояти ҳокимлиги, Ўзбекистон Республикаси Туризмни ривожлантириш давлат қўмитаси — Самарқанд форуми қатнашчилари ва меҳмонлар учун меҳмонхоналардан жой ажратиш чораларини кўриш;

Ўзбекистон Республикаси Транспорт вазирлиги — Ислом Каримов номидаги «Тошкент» халқаро аэропорти, Самарқанд халқаро аэропорти, Тошкент ва Самарқанд темир йўл вокзалларини ва улардаги VIP-залларни делегацияларни кутиб олиш, кузатиш ва уларга хизмат кўрсатиш учун тайёрлаш;

Самарқанд (ёки бошқа) вилояти ҳокимлиги — Самарқанд (ёки бошқа) шаҳрида кенг кўламдаги ободонлаштириш ва кўкаламзорлаштириш ишларини амалга ошириш, Самарқанд форуми ўтказиладиган бино ва ҳудудларни талаб даражасида тайёрлашни таъминлаш;

«Ўзбеккино» миллий агентлиги ва Ўзбекистон Миллий телерадиокомпанияси — Самарқанд форумини тарғиб қиладиган қисқа метражли ҳужжатли фильмларни ишлаб чиқиш ва уларнинг намойиш этилишини ташкил қилиш.

Ўзбекистон Республикаси Савдо-саноат палатаси, Бадиий академия ва «Ҳунарманд» уюшмасига Самарқанд форумини хорижий иштирокчилари учун эсдалик совғалари бўйича таклифлар ишлаб чиқиш ва Ташкилий қўмитага киритиш тавсия этилади.

11. Ўзбекистон Республикаси Президенти Администрацияси ҳузуридаги Ахборот ва оммавий коммуникациялар агентлиги, Ўзбекистон Миллий Ахборот агентлиги, «Дунё» ахборот агентлиги, Ўзбекистон Миллий телерадиокомпаниясига Самарқанд форуми ўтказиладиган йилнинг июль ойида ушбу тадбирларнинг мақсад ва вазифаларини маҳаллий ва хорижий оммавий ахборот воситаларида кенг ёритиш медиа-режасини ишлаб чиқиш ва тасдиқлаш учун Ташкилий қўмитага тақдим қилиш тавсия этилади.

Тасдиқланган медиа-режа асосида Самарқанд форумини ўтказишга тайёргарлик кўриш ва уларни ўтказиш бўйича амалга ошириладиган ишларни маҳаллий ва хорижий оммавий ахборот воситаларида мунтазам ёритиб бориш таъминланади.

12. Самарқанд форуми формати ялпи, шуъба мажлислар, турли тадбирлар (семинар, «давра суҳбати», маҳорат дарслари, тақдимотлар ва бошқа) шаклида ўтказилади. Самарқанд форуми, қоида тариқасида, икки кун давомида ташкиллаштирилади.

Самарқанд форуми видеоконференцалоқа шаклида ҳам ўтказилиши мумкин. Самарқанд форуми иштирокчилари учун маданий дастурлар ҳам ташкиллаштирилиши мумкин.

13. Самарқанд форуми ўзбек, инглиз ва рус тилларида иш олиб боради. Ташкилий қўмита таклифига асосан тадбир бошқа тилларда ҳам олиб борилиши мумкин.

14. Самарқанд форуми дастури Илмий жамоатчилик кенгаши аъзолари ва Ташкилий қўмита таклифлари асосида шакллантирилади ва тадбир бошланишидан камида бир ой олдин тасдиқланади.

Ялпи йиғилишлар регламенти:

Маърузалар — 20 дақиқа. Чиқишлар — 10 дақиқа.

Шуъба йиғилишлар регламенти:

Маърузалар — 15 дақиқа. Чиқишлар — 7 дақиқа.

15. Самарқанд форумини ахборот билан таъминлаш қуйидаги йўналишларни ўз ичига олади:

ахборотни оммавий ахборот воситаларида жойлаштириш, жонли эфирга узатиш;

маълумотларни www.asianforum.uz веб-сайти ва ижтимоий тармоқларда жойлаштириш;

матбуот анжуманлари ўтказиш.

Самарқанд форумини ўтказиш бўйича Матбуот маркази тузилади, унинг фаолиятида маҳаллий ва хорижий оммавий ахборот воситалари иштирок этади.

16. Самарқанд форуми якунлари бўйича иштирокчилар томонидан инсон ҳуқуқларини таъминлаш ва рўёбга чиқариш бўйича тавсиявий хусусиятга эга бўлган декларация, резолюция ёки бошқа ҳужжат қабул қилинади.

Самарқанд форумининг якуний ҳужжатлари БМТ, ЕХҲТ ва бошқа халқаро ташкилотлар, парламентлар, инсон ҳуқуқлари бўйича миллий институтларга юборилади, шунингдек, ташкилотчиларнинг веб-сайтларида ва оммавий ахборот воситаларида жойлаштирилади.

4-боб. Самарқанд форуми иштирокчилари ва унда иштирок этиш шакллари

17. Самарқанд форумида Бирлашган Миллатлар Ташкилотининг таркибий тузилмалари (органлари ва қўмиталари), инсон ҳуқуқлари бўйича халқаро ва минтақавий ташкилотлар, инсон ҳуқуқлари бўйича миллий институтлар, парламентлар, суд ва ҳуқуқни муҳофаза қилувчи органлар, фуқаролик жамияти институтлари вакиллари, халқаро ва маҳаллий экспертлар, олимлар, соҳа мутахассислари, журналистлар ва бошқа жамоатчилик вакиллари иштирок этиш учун таклиф қилинади.

18. Иштирокчилар Самарқанд форумининг ялпи ва шуъба мажлислари, тадбирлари (семинар, давра суҳбати, «маҳорат дарслари», тақдимотлар ва бошқа) ва маданий дастурларида қатнашиши мумкин.

19. Самарқанд форумида иштирок этиш, маъруза билан чиқиш қилиш, «маҳорат дарслари» ўтиш, мунозараларда қатнашиш ёки тингловчи сифатида қатнашиш ва бошқа шаклларда бўлиши мумкин.

20. Самарқанд форумида иштирок этиш шартлари қуйидагилардан иборат:

иштирокчиларнинг олдиндан электрон рўйхатдан ўтиши ёки иштирокини бошқача тарзда тасдиқлаш;

дастлабки экспертизадан ўтказиш учун маърузалар матнлари ёки бошқа материалларни тақдим этиш;

Самарқанд форумига шахсан ташриф буюриш (агарда видеоконференцалоқа шаклида ўтказилмаётган бўлса).

21. Ташкилий қўмита таклифига асосан Самарқанд форумида иштирок этганлигини тасдиқловчи сертификат берилиши мумкин.

5-боб. Якунловчи қоидалар

22. Самарқанд форумининг дастури у бошланишидан камида бир ой олдин Ташкилий қўмита томонидан берилган таклифларга асосан шакллантирилади ва иштирокчиларга юборилади.

23. Самарқанд форумини молиялаштириш Ўзбекистон Республикаси Давлат бюджети маблағлари, халқаро ташкилотлар маблағлари ёки ҳомийлик ҳайриялари, ташкилотчиларнинг маблағлари ёки қонун ҳужжатларида тақиқланмаган бошқа манбалар ҳисобидан амалга оширилади.

Кейинги таҳрирга қаранг.

Бунда иштирокчиларга Форум доирасида мамлакат ичидаги ички транспорт ва овқатланиш, айрим хорижий иштирокчилар учун транспорт ва меҳмонхона билан боғлиқ харажатларни қоплайди.

Вазирлар Маҳкамасининг 2020 йил 9 октябрдаги 641-сон қарорига
3-ИЛОВА

Самарқанд форумини ўтказиш бўйича Ташкилий қўмита

ТАРКИБИ

А.Х. Саидов	—	Ўзбекистон Республикаси Олий Мажлиси Қонунчилик палатаси Спикерининг биринчи ўринбосари, Инсон ҳуқуқлари бўйича Миллий маркази директори, Ташқилий кўмита раиси
келишув асосида	—	Ўзбекистон Республикаси Президенти ҳузуридаги Хавфсизлик кенгаши аппарати масъул ходими
Ф.Н. Арзиев	—	Ўзбекистон Республикаси ташқи ишлар вазирининг биринчи ўринбосари«»
Ш.У. Собиров	—	Ўзбекистон Республикаси ички ишлар вазирининг биринчи ўринбосари
О.З. Насритдинходжаев	—	Ўзбекистон Республикаси молия вазирининг биринчи ўринбосари
А.М. Хаджибаев	—	Ўзбекистон Республикаси соғлиқни сақлаш вазирининг биринчи ўринбосари
О.А. Пекос	—	Ўзбекистон Республикаси ахборот коммуникациялари ва технологияларини ривожлантириш вазирининг биринчи ўринбосари
И.Р. Маҳкамов	—	Ўзбекистон Республикаси транспорт вазирининг биринчи ўринбосари в.б.
А.Х. Қўлдошев	—	Ўзбекистон Республикаси фавқулодда вазиятлар вазирининг биринчи ўринбосари
А.Ў. Аққулов	—	Ўзбекистон Республикаси Туризмни ривожлантириш давлат қўмитаси раисининг биринчи ўринбосари
А.Ж. Тошқулов	—	Ўзбекистон Республикаси адлия вазириўринбосари
У.Ш. Бегимқулов	—	Ўзбекистон Республикаси олий ва ўрта махсус таълим вазири ўринбосари
Ж.Ш. Носиров	—	Ўзбекистон Республикаси маданият вазирининг биринчи ўринбосари
А.З. Саъдуллаев	—	Ўзбекистон Республикаси Ёшлар ишлари агентлиги директори
Ж.О. Ортиқхўжаев	—	Тошкент шаҳар ҳокими
Э.О. Турдимов	—	Самарқанд вилояти ҳокими
А.А. Ходжаев	—	Ўзбекистон Республикаси Президенти Администрацияси ҳузуридаги Ахборот ва оммавий коммуникациялар агентлиги директори
А.Ж. Ходжаев	—	Ўзбекистон миллий телерадиокомпанияси раиси
А.К. Кўчимов	—	Ўзбекистон Миллий ахборот агентлиги Бош директори
Ш.Т. Кудратҳўжаев	—	Халқаро пресс-клуб раҳбари
Ф.Ф. Абдухаликов	—	«Ўзбеккино» миллий агентлиги директори, Ўзбекистон электрон оммавий ахборот воситалари миллий ассоциацияси раиси
С.Л. Суяров	—	«Дунё» Ахборот агентлиги директори
А.И. Икрамов	—	Ўзбекистон Савдо-саноат палатаси раиси
А.В. Нуридинов	—	Ўзбекистон Бадиий академияси раиси
Э.С. Туляков	—	«Тараққиёт стратегияси» маркази ижрочи директори
Б.М. Бекмуродов	—	«Юксалиш» умуммиллий ҳаракат раиси

Изоҳ. Ташкилий қўмита аъзолари бошқа ишга ўтган тақдирда, унинг таркибига ушбу лавозимларга янги тайинланган ёки зиммасига тегишли функцияларни бажариш юклатилган шахслар киритилади.

Кейинги таҳрирга қаранг.

(Қонун ҳужжатлари маълумотлари миллий базаси, 10.10.2020 й., 09/20/641/1367-сон; Қонунчилик маълумотлари миллий базаси, 05.04.2022 й., 09/22/153/0266-сон)