ПҚ-3608-сон 16.03.2018. Самарқанд вилоятини ободонлаштириш ва фаровонлигини ошириш жамғармасини ташкил этиш чора-тадбирлари тўғрисида

Ҳужжат 16.03.2018 санаси ҳолатига
Амалдаги версияга ўтиш

Ўзбекистон Республикаси Президентининг

Қарори

Самарқанд вилоятини ободонлаштириш ва фаровонлигини ошириш жамғармасини ташкил этиш чора-тадбирлари тўғрисида

Архитектура ва қурилиш нормаларига мувофиқ ҳудудий инфратузилмани яхшилаш, ободонлаштириш, объектларни қуриш ва реконструкция қилиш, Самарқанд вилоятининг ижтимоий-иқтисодий вазифаларини жадал суръатларда ҳал этиш, аҳоли фаровонлигини яхшилаш, сув таъминоти ва канализация муаммоларини бартараф этиш, маҳаллаларнинг ички йўлларини таъмирлаш, ижтимоий объектларни қуриш ва моддий-техник базасини мустаҳкамлаш, ижтимоий соха ходимлари учун хизмат уйларини қуриш мақсадида:

1. Самарқанд вилояти хокимлигининг Самарқанд вилояти ҳокимлиги ҳузурида юридик шахс ташкил этмасдан Самарканд вилоятини ободонлаштириш ва фаровонлигини ошириш жамғармаси (кейинги ўринларда Жамғарма деб аталади) ташкил этиш тўғрисидаги таклифи маъқуллансин.

2. Қуйидагилар Жамгарма даромадларини шакллантириш манбалари этиб ҳисоблансин:

Самарқанд вилояти ҳокимлиги муассислигида ташкил этилган тижорат ташкилотларининг ажратмалари;

давлат, чет эл ва ҳалқаро ташкилотлар томонидан ажратиладиган грантлар;

юридик ва жисмоний шахсларнинг хомийлик ҳайриялари;

ҳалқаро молиявий институтлар ва банклар томонидан ажратиладиган кредитлар;

қонун ҳужжатларида тақиқланмаган бошқа манбалар.

3. Қуйидагилар Жамғарма маблағларидан фойдаланишнинг асосий йўналишлари этиб белгилансин:

Самарқанд вилоятида муҳандислик-коммуникация инфратузилмасини яхшилаш, ҳудудларни ободонлаштириш, кўкаламзорлаштириш ва маҳаллий ички йўлларни таъмирлаш;

кўп қаватли турар жойларнинг умумфойдаланиладиган қисмини таъмирлаш, болалар ва спорт майдончаларини барпо этиш;

Самарқанд вилоятида кенг қўламли бунёдкорлик ишларини амалга оширишда давлат ва жамоат эҳтиёжлари учун ер участкаларининг олиб қўйилиши муносабати билан жисмоний ва юридик шахсларга компенсация тўлаш ва улар учун кўп квартирали уйларни қуриш;

Кейинги таҳрирга қаранг.

кам таъминланган ва ёш оилаларга имтиёзли кредитлар олишда бошланғич бадални қисман ёки тўлиқ қоплаб бериш ҳамда маиший техника воситаларига бўлган бирламчи эхтиёжни қондириш;

маҳалла фуқаролар йиғинлари моддий-техника базасини мустаҳкамлаш, маҳаллалар ҳудудида кутубхоналар ташкил этиш ҳамда уларни бадиий ва бошқа адабиётлар билан бойитиш.

4. Белгилансинки, Самарқанд вилояти ҳокимлигининг Жамғармага дастлабки бадали Ўзбекистон Республикаси Тикланиш ва тараққиёт жамғармасининг Ўзбекистон Республикаси Ташқи иқтисодий фаолият миллий банки томонидан қайта молиялаштириладиган, Самарқанд вилояти ҳокимлигига 5 йил муддатга, 2 йил имтиёзли даврни ҳисобга олган ҳолда, фоиз ставкаси йилига 2,25 фоизни ташкил қиладиган ва қайта молиялаштирадиган банкнинг йилига 0,25 фоиз миқдордаги маржаси ҳисобга олиниб, комиссия йиғимлари ундирилмаган ҳолда 50 млн. АҚШ доллари миқдоридаги кредити ҳисобидан шакллантирилади.

Кейинги таҳрирга қаранг.

5. Ўзбекистон Республикаси Ташқи иқтисодий фаолият миллий банки томонидан кайта молиялаштириладиган Ўзбекистон Республикаси Тикланиш ва тараккиёт жамғармаси кредитини қоплаш прогноз жадвали иловага мувофиқ тасдиқлансин.

Кейинги таҳрирга қаранг.

6. Белгилансинки:

Жамғарма маблағларидан Ўзбекистон Республикаси Вазирлар Маҳкамаси билан келишилган ҳолда, Самарқанд вилояти хокимлиги томонидан тузиладиган манзилли рўйхатларга мувофиқ фойдаланилади;

Самарқанд вилояти ҳокимлиги Ўзбекистон Республикаси Тикланиш ва тараққиёт жамғармаси кредитидан мақсадли ва самарали фойдаланиш, шунингдек, Жамғармани ўз вақтида шакллантириш учун масъул бўлган ижро этувчи орган ҳисобланади;

Ўзбекистон Республикаси Тикланиш ва тараққиёт жамғармасининг жалб қилинадиган кредитини қоплаш ва хизмат кўрсатиш билан боғлик харажатлар Самарқанд вилоятининг маҳаллий бюджети қўшимча манбалари ҳамда қонун ҳужжатларида тақиқланмаган бошқа манбалар ҳисобидан амалга оширилади.

Самарқанд вилояти ҳокимлиги, Ўзбекистон Республикаси Тикланиш ва тараққиёт жамғармаси манфаатдор вазирлик ва идоралар билан биргаликда Жамғармага ажратилган маблағлардан самарали фойдаланиш юзасидан бир ой муддатда Вазирлар Маҳкамасига таклиф киритсин.

7. Ўзбекистон Республикаси Молия вазирлиги, Ўзбекистон Республикаси Тикланиш ва тараққиёт жамғармаси, Самарқанд вилояти ҳокимлиги ҳамда бошқа манфаатдор вазирликлар ва идоралар билан биргаликда беш кун муддатда Жамғарма маблағларидан фойдаланиш тартиби ва Ўзбекистон Республикаси Тикланиш ва тараққиёт жамғармасининг жалб қилинадиган кредитини қоплашнинг унинг аниқ манбаларини кўрсатган ҳолда механизмини назарда тутувчи низом лойиҳасини белгиланган тартибда ишлаб чиқсин ва тасдиқласин.

8. Ўзбекистон Республикаси Молия вазирлиги, Ташқи иктисодий фаолият миллий банки ҳамда Тикланиш ва тараққиёт жамғармаси билан биргаликда Жамғармага ажратилган кредитдан мақсадли ва самарали фойдаланилиши, шунингдек, унинг ўз вақтида қайтарилиши юзасидан таъсирчан мониторинг ўрнатсин.

Кейинги таҳрирга қаранг.

9. Ўзбекистон Республикаси Молия вазирига Ўзбекистон Республикаси Тикланиш ва тараққиёт жамғармасининг Ташқи иктисодий фаолият миллий банки томонидан қайта молиялаштириладиган кредити бўйича Самарқанд вилояти ҳокимлиги мажбуриятларига доир Ўзбекистон Республикаси давлат кафолатини бериш ваколати берилсин.

Кейинги таҳрирга қаранг.

10. Ўзбекистон Республикаси Бош вазирининг ўринбосари — молия вазири Ж.А. Қўчкоров Самарканд вилояти ҳокимлиги билан биргаликда икки ой муддатда Жамғарманинг молиявий манбаларини кенгайтириш юзасидан таклифлар ишлаб чиқсин.

11. Ўзбекистон Республикаси Ҳисоб палатаси (М.М. Икрамов) мазкур қарорнинг амалий ижросини алоҳида назоратга олиб, амалга оширилаётган ишларнинг натижадорлиги тўғрисида ҳар ой якуни билан Ўзбекистон Республикаси Президенти девонига маълумот киритиб борилишини таъминласин.

12. Мазкур қарорнинг ижросини назорат килиш Ўзбекистон Республикасининг Бош вазири А.Н. Арипов ва Самарқанд вилояти ҳокими Т.И. Джураев зиммасига юклансин.

Ўзбекистон Республикаси Президенти Ш. МИРЗИЁЕВ

Тошкент ш.,

2018 йил 16 март,

ПҚ-3608-сон

Ўзбекистон Республикаси Президентининг 2018 йил 16 мартдаги ПҚ-3608-сон қарорига
ИЛОВА

Ўзбекистон Республикаси Ташки иқтисодий фаолият миллий банки томонидан қайта молиялаштириладиган Ўзбекистон Республикаси Тикланиш ва тараққиёт жамғармаси кредитини қоплаш

ПРОГНОЗ ЖАДВАЛИ

Кредит суммаси	50 млн. АҚШ доллари
Кредит муддати	5 йил, шу жумладан имтиёзли давр — 2 йил
Фоиз ставкаси	йиллик 2.25 % (шу жумладан, банк маржаси — 0.25 %)
			минг АҚШ доллари
Қоплаш даврлари	Ўзлаштириш миқдори	Тўлов суммаси		Жами тўлов миқдори*
Қоплаш даврлари	Ўзлаштириш миқдори	асосий қарз	фоизлар*	Жами тўлов миқдори*
2018 йил I ярим йиллиги	50 000.0	-	-	-
2018 йил II ярим йиллиги	-	-	564,04	564,04
2019 йил I ярим йиллиги	-	-	560,96	560,96
2019 йил II ярим йиллиги	-	-	564,04	564,04
2020 йил I ярим йиллиги	-	7 142,86	564,04	7 706,90
2020 йил II ярим йиллиги	-	7 142,86	483,46	7 626,32
2021 йил I ярим йиллиги	-	7 142,86	400,68	7 543,54
2021 йил II ярим йиллиги	-	7 142,86	322,31	7 465,17
2022 йил I ярим йиллиги	-	7 142,86	240,41	7 383,27
2022 йил II ярим йиллиги	-	7 142,86	161,15	7 304,01
2023 йил I ярим йиллиги	-	7 142,84	80,15	7 222,99
Жами	50 000,0	50 000,0	3 941,24	53 941,24

*кредитнинг ҳақиқатда олинган миқдори ва санасидан келиб чиққан ҳолда аниқлаштирилади.

Кейинги таҳрирга қаранг.

(Қонун ҳужжатлари маълумотлари миллий базаси, 16.03.2018 й., 07/20/3608/0857-сон; Қонунчилик маълумотлари миллий базаси, 22.09.2021 й., 07/21/5249/0898-сон; 13.07.2022 й., 07/22/315/0621-сон; 19.03.2025 й., 07/25/113/0253-сон)