Ўзбекистон Республикаси Қишлоқ ва сув хўжалиги вазирлиги насос станцияларини электр билан узлуксиз таъминлаш, экин майдонларини суғориш учун фойдаланиладиган сув ресурсларини олиш ва тўплаш ҳамда фойдаланилган электр энергияси учун ҳисоб-китоб қилиш мақсадида Вазирлар Маҳкамаси қарор қилади:

1. Сув ресурсларини тўплаш, экин майдонларини суғориш учун насос станцияларини электр билан таъминлаш ҳамда истеъмол қилинадиган электр энергияси учун ҳисоб-китоб қилиш тартиби иловага мувофиқ тасдиқлансин.

2. Мазкур қарорнинг бажарилишини назорат қилиш Ўзбекистон Республикаси Бош вазирининг ўринбосарлари Б.М. Олимжонов ва В.Й. Отаев зиммасига юклансин.

Мазкур Тартиб Қишлоқ ва сув хўжалиги вазирлигининг насос станцияларини электр энергияси билан узлуксиз таъминлаш, экин майдонларини суғориш учун ишлатиладиган сув ресурсларини олиш ва тўплаш ҳамда фойдаланилган электр энергияси учун ҳисоб-китоб қилиш мақсадида ишлаб чиқилган.

1. Қишлоқ ва сув хўжалиги вазирлиги белгиланган муддатларда «Ўзбекэнерго» давлат-акциядорлик компаниясига кейинги 3 йилда ҳақиқатда истеъмол қилинган электр энергиясининг ўртача йиллик миқдоридан ва қўшимча равишда фойдаланишга топширилаётган насос станциялари эҳтиёжидан келиб чиқиб чораклар бўйича ҳамда ирригация тизимлари ҳавза бошқармалари, Аму — Бухоро машина канали, Қарши магистраль канали бошқармалари ва «Мирзачўл» бирлашмаси бўйича кейинги йилга электр энергияси беришга йиғма буюртманома беради.

2. Молия вазирлиги Макроиқтисодиёт ва статистика вазирлиги томонидан ажратилган электр энергияси истеъмоли лимитларига мувофиқ электр энергияси учун ҳақ тўлаш учун кейинги йилга республика бюджетида Қишлоқ ва сув хўжалиги вазирлигига маблағ ажратишни назарда тутади.

3. Қишлоқ ва сув хўжалиги вазирлиги навбатдаги йил чораги бошланишидан 15 кун олдин «Ўзбекэнерго» давлат-акциядорлик компаниясига мазкур Тартибнинг 1-бандида кўрсатилган бўлинмалар бўйича электр энергияси истеъмоли йил чораги лимитини ойлар бўйича тақдим этади.

4. Қишлоқ ва сув хўжалиги вазирлиги кейинги ой бошланишидан 10 кун олдин «Ўзбекэнерго» давлат-акциядорлик компаниясига Аму — Бухоро, Аму — Занг, Жиззах магистраль каналлари насос станциялари ва Шеробод насос станцияси ишининг ойлик жадвалини тақдим этади, қолган насос станцияларининг навбатдаги ойдаги иш режимлари эса ирригация тизимлари ҳавза бошқармалари билан электр тармоқларининг тегишли корхоналари ўртасида электр энергиясини истеъмол қилишнинг белгиланган ойлик лимитлари доирасида келишилади.

5. Қишлоқ ва сув хўжалиги вазирлиги зарур ҳолларда «Ўзбекэнерго» давлат-акциядорлик компанияси билан биргаликда истеъмол қилиш лимитига йил чораклари доирасида ҳар ойда (шу жумладан, бўлинмалар бўйича) шу ойнинг 20-кунигача тузатиш киритади. Бунда чорак мобайнида кўпи билан икки марта тузатиш киритилиши мумкин. Жорий ой учун фойдаланилмаган электр энергияси лимити кейинги ойга ўтказилмайди.

6. Қишлоқ ва сув хўжалиги вазирлиги «Ўзбекэнерго» давлат-акциядорлик компанияси билан биргаликда ҳар ойнинг 5-кунидан кечиктирмай Молия вазирлигига ойнинг 1- кунидаги ҳолатга кўра насос станциялари томонидан электр энергиясидан фойдаланилиши тўғрисидаги қиёслаш далолатномасини тақдим этади.

7. Молия вазирлиги тақдим этилган қиёслаш далолатномалари асосида ойнинг 10-кунидан кечиктирмай бюджетда назарда тутилган ажратмалар доирасида Қишлоқ ва сув хўжалиги вазирлигига маблағлар ўтказади.

Қишлоқ ва сув хўжалиги вазирлиги икки кун муддатда харажатлар сметасида назарда тутилган доирадаги маблағларни амалда фойдаланилган электр энергияси учун ҳисоб-китоб қилиш учун «Ўзбекэнерго» давлат-акциядорлик компанияси корхоналари билан шартномалар тузган ўзига бўйсунувчи бюджет ташкилотларга етказади.

8. Қишлоқ ва сув хўжалиги вазирлиги билан келишмасдан Қарши, Аму — Бухоро, Аму — Занг, Жиззах ва Шеробод магистраль каналларининг насос станциялари, мелиорация насос станцияларининг «Ўзбекэнерго» давлат-акциядорлик компанияси томонидан энергиядан ўчириб қўйилишига йўл қўйилмайди.

9. Зарур бўлганда (табиий офатлар, қишлоқ хўжалиги экинларини қайта экиш) Қишлоқ ва сув хўжалиги вазирлиги электр энергиясига қўшимча лимитлар ва уларга ҳақ тўлашга маблағлар ажратиш учун асосланган ҳисоб-китобларни Макроиқтисодиёт ва статистика вазирлигига ва Молия вазирлигига тақдим этади. Мазкур масала бўйича қарор 10 кун мобайнида қабул қилинади.