Жисмоний шахслар томонидан Ўзбекистон Республикаси ҳудудига товарлар олиб келинишини янада тартибга солиш, улар томонидан олиб келинган товарларнинг тўлиқ ҳисобга олиниши ва сотилиши устидан назоратни кучайтириш мақсадида Вазирлар Маҳкамаси қарор қилади:

1. Белгилаб қўйилсинки, 2002 йил 1 августдан бошлаб Ўзбекистон Республикаси ҳудудига товарлар олиб келишда жисмоний шахслардан ундириладиган ягона бож тўлови белгиланган тартибга ва тасдиқланган ставкаларга мувофиқ эркин алмаштириладиган валютада тўланади.

2. Ўзбекистон Республикаси Молия вазирлиги Марказий банк ва Давлат божхона қўмитаси билан биргаликда жисмоний шахслар томонидан олиб келинадиган товарлардан ундириладиган ягона бож тўловини ундириш тартибини ва бюджетга ўтказиш механизмини бир ҳафта муддатда ишлаб чиқсин ва тасдиқласин.

3. Белгилаб қўйилсинки, жисмоний шахслар томонидан товарлар транспорт ва транспорт-экспедиторлик ташкилотлари орқали олиб келинганда божхонада расмийлаштириш белгиланган тартибда ягона бож тўловини тўлаган ҳолда бевосита товар эгаси бўлган жисмоний шахслар томонидан амалга оширилади.

Транспорт ва транспорт-экспедиторлик ташкилотларининг ташилаётган юкларни божхонада расмийлаштириши тақиқлансин.

4. Ўзбекистон Республикаси Адлия вазирлиги манфаатдор вазирликлар ва идоралар билан биргаликда бир ой муддатда қонун ҳужжатларига мазкур қарордан келиб чиқувчи ўзгартиришлар ва қўшимчалар киритиш юзасидан Ўзбекистон Республикаси Вазирлар Маҳкамасига таклифлар киритсин.

5. Мазкур қарорнинг бажарилишини назорат қилиш Ўзбекистон Республикаси Бош вазирининг ўринбосари Р.С. Азимов зиммасига юклансин.