Ўзбекистон Республикаси Олий Мажлиси қарор қилади:

1. «Буюк хизматлари учун» ордени таъсис этилсин.

2. «Буюк хизматлари учун» ордени тўғрисидаги Низом тасдиқлансин (илова қилинади).

3. «Буюк хизматлари учун» орденининг тавсифи тасдиқлансин (илова қилинади).

1. «Буюк хизматлари учун» ордени билан Ўзбекистон Республикаси фуқаролари ҳамда хорижий давлатларнинг фуқаролари фан ва техникани, иқтисодиёт ва маданиятни ривожлантиришдаги катта хизматлари, давлатлараро ҳамкорликни ривожлантиришга ҳамда Ўзбекистоннинг халқаро обрўсини оширишга қаратилган ички ва ташқи сиёсатни амалга ошириш ишига сезиларли ҳисса қўшганлиги учун тақдирланадилар.

2. «Буюк хизматлари учун» ордени билан мукофотлашга тақдим этиш, мукофотлаш ва орденни топшириш «Давлат мукофотлари тўғрисида»ги Ўзбекистон Республикаси Қонунида назарда тутилган тартибда амалга оширилади.

3. «Буюк хизматлари учун» ордени билан мукофотланган шахслар энг кам иш ҳақининг қирқ карраси миқдорида бир марта бериладиган пул мукофоти ёки шу суммага тенг эсдалик совғасини оладилар.

«Буюк хизматлари учун» ордени билан мукофотланган шахслар қонун ҳужжатларида белгилаб қўйиладиган имтиёзлардан фойдаланадилар.

4. «Буюк хизматлари учун» ордени муҳайяр лентага биркитилиб, кўкракка тақиб юрилади.

5. «Буюк хизматлари учун» ордени билан вафотидан кейин мукофотланган тақдирда, мукофотлаш тўғрисидаги ҳужжат ва бир марта бериладиган пул тўлови мукофотланганнинг оиласига топширилади.

«Буюк хизматлари учун» ордени 0,25 микрон қалинликдаги тилла қопланган 925-даражали (пробали) кумуш қотишмадан тайёрланади.

Орден саккиз бурчакли мусамман кўринишда бўлиб, унинг қирралари ёқутрангда тайёрлангандир. Мусамманнинг қарама-қарши жойлашган қирраларининг ораси 57 миллиметр.

Орден марказида доира жойлашган бўлиб, ундаги рамзий тарзда тасвирланган мовий рангдаги ер курраси фонида Ўзбекистон Республикаси харитаси тилларангда тасвирланган. Доиранинг ташқи чизиғи бўйича диаметри 35 миллиметр, ички чизиқ бўйича 24 миллиметрдир.

Доиранинг ташқи ва ички чизиқлари ўртасида, оқ эмаль фонида юқори қисмида зарҳал рангдаги «BUYUK XIZMATLARI UCHUN» ёзуви жойлашган. Ҳарфларнинг баландлиги 3 миллиметр.

Доира чизиқларининг ўртасида, пастки қисмда яшил рангдаги иккита бирлаштирилган дафна новдалари жойлаштирилган.

Орден оралиқ колодка ва ҳалқалар ёрдамида қизил, ҳаво ранг, оқ ва яшил рангдаги йўл-йўл муҳайяр лентага биркитилади.

Орденнинг орқа томонида Ўзбекистон Республикасининг давлат герби тасвирланган. Пастки қисмида орденнинг рақами 1 миллиметр катталикдаги ботиқ шрифт билан ёзилган.

Орденнинг оғирлиги 65 грамм.

Орденнинг қалинлиги 7 миллиметр.