Ўзбекистон Республикаси Олий Мажлиси қарор қилади:

1. «Эл-юрт ҳурмати» ордени таъсис этилсин.

2. «Эл-юрт ҳурмати» ордени тўғрисидаги Низом тасдиқлансин (илова қилинади).

3. «Эл-юрт ҳурмати» орденининг тавсифи тасдиқлансин (илова қилинади).

4. 1995 йил 22 декабрда қабул қилинган «Давлат мукофотлари тўғрисида»ги Ўзбекистон Республикаси Қонунининг 11-моддаси (Ўзбекистон Республикаси Олий Мажлисининг Ахборотномаси, 1995 йил, № 12, 266-модда; 1996 йил № 5-6, 63-модда; № 9, 120-модда) «Буюк хизматлари учун» ордени» деган сўзлардан сўнг «Эл-юрт ҳурмати» ордени» деган сўзлар билан тўлдирилсин.

1. «Эл-юрт ҳурмати» ордени билан мамлакат мустақиллигини, унинг иқтисодий қудратини мустаҳкамлашга, миллий маънавиятни, маданиятни юксалтиришга катта ҳисса қўшган, ўз меҳнати, илмий, жамоат иши, меҳнатсеварлиги ва ватанпарварлиги билан жамоатчиликнинг иззат-ҳурматига сазовор бўлган Ўзбекистон Республикаси фуқаролари мукофотланадилар.

«Эл-юрт ҳурмати» ордени билан Ўзбекистон Республикаси фуқароси бўлмаган шахслар ҳам мукофотланишлари мумкин.

2. «Эл-юрт ҳурмати» ордени билан мукофотлашга тақдим этиш, мукофотлаш ва уни топшириш «Давлат мукофотлари тўғрисида»ги Ўзбекистон Республикаси Қонунида назарда тутилган тартибда амалга оширилади.

3. «Эл-юрт ҳурмати» ордени билан мукофотланган шахслар энг кам иш ҳақининг қирқ карра миқдоридаги бир йўла пул мукофотини оладилар. «Эл-юрт ҳурмати» ордени билан тақдирланган шахслар қонун ҳужжатларида белгиланган имтиёзлардан фойдаланадилар.

4. «Эл-юрт ҳурмати» ордени кўкракнинг чап томонига тақиб юрилади.

5. «Эл-юрт ҳурмати» ордени билан вафотидан кейин мукофотланган тақдирда орден, мукофотлаш тўғрисидаги ҳужжат ва бир йўла пул мукофоти мукофотланганнинг оиласига топширилади.

«Эл-юрт ҳурмати» ордени 1 микрон қалинликдаги олтин қопланган 925 пробали кумушдан тайёрланади, у икки ёқлама нурлар таралувчи саккиз қиррали юлдуз шаклига эга. Юлдуз бурчаклари орасида зангори рангдаги шаффоф эмаль қопланган таралувчи нур тутамлари жойлашган. Юлдузнинг қарама-қарши қирралари оралиғидаги масофа 57 миллиметр. Нурларни ўз ичига олган доира диаметри — 52 миллиметр.

Орденнинг марказида чиқаётган қуёш, водийлар ва тоғлар фонида Регистон архитектура мажмуи тасвирланган. Фон рангли эмаль билан қопланган.

Тасвир атрофи 5 миллиметр кенгликдаги айлана билан ҳошияланган. Ҳошиянинг юқори қисмида, оқ фонда «EL-YURT HURMATI» сўзлари, ҳошиянинг пастки қисмида – яшил шаффоф эмаль билан қопланган дафна шохлари жойлашган.

Орқа томонида, пастки қисмида орден рақами 1 миллиметр катталикдаги ботиқ шрифт билан ёзилган.

Орден Ўзбекистон Республикаси Давлат байроғи рангларидаги муҳайяр лента ўралган қадағичга илмоқча ва ҳалқа ёрдамида уланади.

Орден қалинлиги — 8 миллиметр.

Орден вазни — 62,5 грамм.