Давлатлар бошлиқларининг 2001 йил декабрь ойида Тошкент шаҳрида бўлиб ўтган учрашувида эришилган келишувга мувофиқ, яхши қўшничилик муносабатларини мустаҳкамлаш, Тожикистон Республикаси юк автотранспорт воситалари ва автобусларининг Ўзбекистон Республикаси божхона ҳудудига кириб келиши ва транзити учун йиғимлар ставкаларини бирхиллаштириш мақсадида Вазирлар Маҳкамаси қарор қилади:

1. 2002 йил 10 январдан бошлаб Тожикистон Республикаси ҳар бир юк автотранспорт воситаси ва автобуснинг Ўзбекистон Республикаси божхона ҳудудига кириб келганлиги ва транзити учун:

битта юк автотранспорт воситаси ва автобусдан — 130 АҚШ долларига;

юк автотранспорт воситаси ва автобуснинг Ўзбекистон Республикаси ҳудудида 8 суткадан ортиқ ҳар бир куни учун — 50 АҚШ долларига;

Ўзбекистон Республикаси ҳудуди орқали юк автотранспорт воситаси ва автобуснинг учинчи мамлакатларга (МДҲ мамлакатларидан ташқари) транзити учун — 90 АҚШ долларига тенг миқдордаги суммада эркин муомаладаги валютада йиғимлар белгилансин.

2. Белгилансинки, йиғимлар бевосита божхона постларида ундирилади, олинган маблағлар божхона органларининг депозит ҳисоб-рақамлари орқали Республика йўл жамғармасининг валюта ҳисоб-рақамига ўтказилади.

3. Қуйидагилар:

Вазирлар Маҳкамасининг 1999 йил 15 сентябрдаги 429-сон қарорининг 2-банди;

Вазирлар Маҳкамасининг 1999 йил 20 сентябрдаги 431-ф-сон фармойиши 2-бандининг Тожикистон Республикаси юк автотранспорт воситаларидан ундириладиган йиғимлар ставкаларига оид қисми ўз кучини йўқотган деб ҳисоблансин.

4. Мазкур қарорнинг бажарилишини назорат қилиш Ўзбекистон Республикаси Бош вазирининг ўринбосари Р. Р. Юнусов зиммасига юклансин.