Енгил саноат бирлашмалари ва корхоналарини бошқаришни такомиллаштириш ҳамда уларнинг фаолияти самарадорлигини ошириш, халқ истеъмоли моллари ишлаб чиқариш ҳажмларини кўпайтириш мақсадида ва Ўзбекистон ССЖ Президентининг 1991 йил 6 майдаги Фармонига мувофиқ Вазирлар Маҳкамаси қарор қилади:

1. Таркибида иловага мувофиқ бирлашмалар, корхоналар ва ташкилотлар бўлган тикувчилик ва трикотаж буюмлар ишлаб чиқариш «Ўзбеккийим» Ўзбекистон давлат концерни ташкил этилсин.

«Ўзбеккийим» концерни таркибига кирувчи бирлашмалар, корхоналар ва ташкилотлар фаолияти Ўзбекистон ССЖнинг амалдаги қонунларига, корхоналарнинг ўзининг ва жумҳуриятнинг манфаатларига зид бўлмаган бошқа концернлар ва уюшмаларда иштирок этиш ҳуқуқига эгадирлар.

2. Белгилансинки, «Ўзбеккийим» концерни:

мустақил ишлаб чиқариш-хўжалик комплекси ҳисобланади, енгил саноат моллари ишлаб чиқариш «Ўзбекенгилсаноат» Ўзбекистон давлат уюшмаси таркибига киради. Концерн ва уюшманинг аъзолари олдида уларга нисбатан ўз мажбуриятлари ва функцияларини бажариш юзасидан жавоб беради;

юридик шахс ҳисобланади, банк муассасаларида йиғма балансларга, ҳисоб-китоб ва бошқа счётларга эга бўлади, уларнинг ҳуқуқий мақомини белгиловчи «Ўзбекистон ССЖда корхоналар тўғрисида»ги Ўзбекистон ССЖ Қонунига, бошқа қонунчилик ва норматив актларга, шунингдек Ўзбекистон ССЖ Президенти ҳузуридаги Вазирлар Маҳкамаси билан келишган ҳолда уюшма Кенгаши томонидан тасдиқланадиган Уставга мувофиқ тўла хўжалик ҳисоби принциплари асосида фаолият кўрсатади;

унга «Ўзбекенгилсаноат» уюшмаси томонидан ажратиладиган хом ашё ва моддий ресурсларнинг фонд сақловчиси ҳисобланади.

3. Концернга таъсисчилари томонидан берилган ваколатларга мувофиқ қуйидагилар унинг фаолиятининг асосий функциялари ҳисобланади:

истеъмол бозорининг талабларини ҳисобга олган ҳолда концерннинг жорий дастурлари ҳамда иқтисодий ва ижтимоий ривожланиш истиқболларини ишлаб чиқиш, мақсадли комплекс илмий-техникавий дастурларини ишлаб чиқиш ва рўёбга чиқариш;

яратилган ишлаб чиқариш потенциалидан фойдаланиш самарадорлигини, ишлаб чиқариш технологияси даражасини, маҳсулотнинг сифатини ва техник даражасини ошириш, корхоналарни хусусийлаштириш, ижара ва кичик корхоналар, фирма савдоси ташкил этиш асосида халқ истеъмоли моллари ишлаб чиқаришни янада ривожлантириш ва кўпайтириш ҳамда аҳолининг уларга бўлган эҳтиёжини қондириш;

корхоналар билан биргаликда молия маблағларидан, моддий ва меҳнат ресурсларидан оқилона ва самарали фойдаланиш чора-тадбирларини амалга ошириш, бозор муносабатлари шароитида барқарор зарарсиз ишлашни таъминлаш бўйича амалий ёрдам бериш. Корхоналарнинг шартнома ва молия интизомига риоя қилишлари устидан назоратни амалга ошириш;

бирлашмалар билан корхоналар ўртасидаги тармоқ ичида кооперация асосида маҳсулот етказиб беришни ривожлантириш, тайёр маҳсулотни сотишни мувофиқлаштириш ва бунга кўмаклашиш;

ташқи иқтисодий алоқаларни ривожлантириш ва белгиланган тартибда қўшма корхоналар ташкил этиш бўйича таклифлар ишлаб чиқиш;

тармоқда ижтимоий соҳани ривожлантириш билан боғлиқ масалаларнинг комплекс ҳал этилишини таъминлаш, кадрлар сиёсатини олиб бориш, кадрлар тайёрлаш ва уларнинг малакасини ошириш;

тегишли давлат ва бошқа органларда ўз таркибига кирувчи корхоналар ва ташкилотларнинг ҳуқуқ ва манфаатларини ҳимоя қилишда қатнашиш.

4. Хўжалик ҳисоби даромади (фойда) ва номенклатурадаги маҳсулотларни етказиб бериш бўйича шартнома мажбуриятларининг бажарилиши бирлашмалар ва корхоналар фаолиятини баҳолашнинг асосий кўрсаткичлари деб ҳисоблансин.

«Ўзбеккийим» концерни таркибига кирувчи бирлашмалар, корхоналар ва ташкилотлар жумҳурият, ўз меҳнат жамоалари манфаатларидан ва бозор конъюнктурасидан келиб чиққан ҳолда:

тармоқнинг истеъмолчиларининг, савдо ташкилотларининг буюртмалари бўйича тегишли маҳсулотлар ва халқ истеъмоли моллари ишлаб чиқариш ҳажмларини мустақил равишда белгилайдилар, фирма магазинларининг тавсияларидан фойдаланган ҳолда уларни етказиб бериш юзасидан шартномалар тузадилар;

маҳсулот ишлаб чиқариш, ишлар ва хизматлар кўрсатиш харажатларини, олинадиган фойда миқдорини белгилайдилар, Ўзбекистон ССЖ қонунлари билан белгиланган нормативлар, шунингдек бошқа мажбурий тўловлар бўйича бюджет билан ҳисоб-китоблар қилингандан кейин ундан фойдаланиш масаласини мустақил равишда ҳал этадилар;

концерн Кенгаши томонидан белгиланган нормативларга мувофиқ фойдадан улар бажарадиган функциялар учун, шунингдек марказлашган резерв (эҳтиёт) жамғармаси ташкил этишга маблағлар ажратадилар.

5. Корхоналар ва ташкилотлар вакилларининг йиғилиши (конференцияси) «Ўзбеккийим» концернини бошқаришнинг юқори органи ҳисобланади, унда концерн Кенгаши сайланади.

Концерн Кенгашига бирлашмалар, корхоналар ва ташкилотларнинг раҳбарлари, шунингдек бошқарув аъзолари кирадилар. Кенгаш бошқарувни, унинг раиси ва ўринбосарларини сайлайди. Бошқарув раиси «Ўзбекенгилсаноат» уюшмасининг тақдимномасига кўра Ўзбекистон ССЖ Президенти ҳузуридаги Вазирлар Маҳкамаси томонидан тасдиқланади.

Концерн таркибига кирувчи корхоналар ва ташкилотларнинг рахбарлари, шунингдек концерн тафтиш комиссиясининг аъзолари ва унинг раиси концерн Кенгашининг тақдимномасига кўра «Ўзбекенгилсаноат» уюшмаси бошқаруви томонидан тасдиқланади.

«Ўзбеккийим» концернига унга юклатилган вазифалар ва функцияларни ҳисобга олган ҳолда, концерн Кенгаши билан келишув бўйича ўзининг тузилмаси, ходимлари сони ва меҳнатга ҳақ тўлаш жамғармасини мустақил белгилашга рухсат берилсин.

6. ЎзССЖ Молия вазирлиги, Ўзбекистон саноат-қурилиш банки, ЎзССЖ Давлат нархлар қўмитаси ва «Ўзбеккийим» концерни бир ой муддат ичида корхоналарнинг молиявий аҳволини таҳлил қилсинлар ва уларни молиявий соғломлаштириш бўйича ёрдам кўрсатсинлар.

7. ЎзССЖ Иқтисодиёт қўмитаси, ЎзССЖ Моддий-техника таъминоти давлат-кооператив қўмитаси, ЎзССЖ Молия вазирлиги, «Ўзглавлегснабсбит» «Ўзбекенгилсаноат» уюшмасига «Ўзбеккийим» концерни учун ўзлари тақсимлайдиган номенклатура бўйича концерн корхоналарининг ривожланиши ва ишлаши учун хом ашё ва молиявий ресурсларни ажратсинлар.

8. Ташкил этилаётган «Ўзбеккийим» концернининг аппарати Парадлар хиёбони кўчаси, 5-уйдаги ЎзССЖ Енгил саноат вазирлиги эгаллаб келган хоналарга жойлаштирилсин.

9. Қорақалпоғистон МССЖ Вазирлар Кенгаши, вилоят ижроия қўмиталари, Тошкент шаҳар ижроия қўмитаси, жумҳурият вазирликлари ва идоралари «Ўзбеккийим» концерни бирлашмалари ва корхоналарига кўмаклашсинлар ҳамда уларнинг ривожланиши ва фаолиятига доир ўз ваколатларига кирувчи масалаларнинг ўз вақтида ҳал этилишини таъминласинлар.