Ўзбекистон Республикасининг Конституциясига мувофиқ ва назорат органлари фаолиятини тартибга солиш, ягона давлат солиқ ва божхона сиёсатини ўтказиш, Ўзбекистон Республикасининг иқтисодий манфаатлари ҳимоя қилинишини таъминлаш мақсадида:

1. Ўзбекистон Республикаси Вазирлар Маҳкамаси ҳузуридаги Давлат солиқ бош бошқармаси негизида Ўзбекистон Республикаси Давлат солиқ қўмитаси ташкил этилсин.

2. Ўзбекистон Республикасининг Давлат божхона қўмитаси Бош божхона бошқармасига айлантирилсин ва у Ўзбекистон Республикасининг Давлат солиқ қўмитасига бўйсундирилсин.

Давлат солиқ қўмитаси раисининг ўринбосари — Бош божхона бошқармасининг бошлиғи лавозими таъсис этилсин.

3. Ўзбекистон Республикаси Ички ишлар вазирлигининг Иқтисодиёт соҳасидаги жиноятларга қарши курашиш бошқармаси ва унинг жойлардаги бўлинмалари тугатилиб, ходимларининг 50 фоизи Давлат солиқ қўмитасига берилсин.

Ўзбекистон Республикасининг Давлат солиқ қўмитаси таркибида махсус тафтиш-назорат бошқармаси ташкил этилсин.

Махсус тафтиш-назорат бошқармасининг бошлиғи — Давлат Солиқ қўмитаси раисининг ўринбосари лавозими таъсис этилсин.

4. Ўзбекистон Республикасининг Вазирлар Маҳкамаси республика ҳукуматининг қарорларини мазкур Фармонга мувофиқаштирсин, шунингдек Ўзбекистон Республикаси Давлат солиқ қўмитаси фаолиятини ташкил этиш тўғрисидаги Низомни ишлаб чиқсин ва тасдиқласин.

5. «Ўзбекистон Республикасининг Давлат божхона қўмитасини ташкил этиш тўғрисида» Ўзбекистон Республикаси Президентининг 1992 йил 10 августдаги Фармони ўз кучини йўқотган деб ҳисоблансин.