|
Ҳужжат кучини йўқотган 13.12.2018
|
Ўзбекистон Республикаси Президентининг
Фармони
УЛУҒ ВАТАН УРУШИ ЙИЛЛАРИДА ҲАРБИЙ МАЖБУРИЯТЛАРИНИ БАЖАРГАН ЁКИ МАМЛАКАТ ИЧКАРИСИДА ИШЛАГАН ШАХСЛАРГА ПЕНСИЯЛАРНИ ТЎЛАШ ТАРТИБИ ТЎҒРИСИДА
LexUZ шарҳиМазкур Фармон Ўзбекистон Республикаси Президентининг 2018 йил 12 декабрдаги ПФ-5597-сонли «Фуқароларнинг пенсия таъминоти тизими самарадорлигини ошириш ва пенсионерларни ижтимоий қўллаб-қувватлашни кучайтиришга оид қўшимча чора-тадбирлар тўғрисида»ги Фармонига асосан ўз кучини йўқотган.
1. «Ишловчи пенсионерларга пенсияларни тўлаш тўғрисида» 1995 йил 20 ноябрдаги 1289-сон Фармонга қўшимча равишда шу нарса белгилаб қўйилсинки, Улуғ Ватан уруши йилларида ҳарбий мажбуриятларини бажарган ёки мамлакат ичкарисида ишлаган, ҳозирда ҳам ишлаб турган пенсионерларга 1996 йил 1 январдан бошлаб Ўзбекистон Республикаси ҳудудида пенсиялар тўлиқ миқдорда тўланади.
2. Ўзбекистон Республикасининг ижтимоий таъминот, мудофаа, ички ишлар, молия вазирликлари, Миллий хавфсизлик хизмати ва Ижтимоий суғурта фонди «Ишловчи пенсионерларга пенсиялар тўлаш тартиби»га бир ҳафта муддат ичида тегишли қўшимчаларни киритсинлар ҳамда республиканинг барча вазирликларига, идоралари, корхоналари ва ташкилотларига етказсинлар.
3. Ўзбекистон Республикасининг Адлия вазирлиги Молия вазирлиги билан биргаликда амалдаги қонунларни ушбу Фармон қоидаларига мувофиқ ҳолга келтириш борасидаги таклифларни бир ҳафта муддат ичида Вазирлар Маҳкамасига тақдим этсин.
4. Мазкур Фармоннинг бажарилишини назорат қилиш Ўзбекистон Республикаси Вазирлар Маҳкамасининг зиммасига юклансин.
Ўзбекистон Республикасининг Президенти И. КАРИМОВ
Тошкент ш.,
1995 йил 28 декабрь,
ПФ-1334-сон
(Ўзбекистон Республикаси Олий Мажлисининг Ахборотномаси, 1995 й., 12-сон, 304-модда)
