Ўзбекистон Республикаси Олий Кенгаши қарор қилади:

1. «Ўзбекистон Республикаси ногиронларни ижтимоий ҳимоя қилиш тўғрисида»ги Ўзбекистон Республикаси Қонуни матбуотда эълон қилинган кундан бошлаб кучга киритилсин, ушбу Қонуннинг 8, 9, 10 ва 12-моддаларида кўзда тутилган қоидалар бундан мустасно.

2. Ўзбекистон Республикаси Президенти ҳузуридаги Вазирлар Маҳкамаси 1992 йил 1 январига қадар:

Ўзбекистон Республикаси Ҳукуматининг қарорларини «Ўзбекистон Республикасида ногиронларни ижтимоий ҳимоя қилиш тўғрисида»ги Ўзбекистон Республикасининг Қонунига мослаштирсин;

Ўзбекистон Республикаси вазирликлари, давлат қўмиталари ва идоралари мазкур Қонунга зид бўлган норматив ҳужжатларни қайта кўриб чиқишлари ва бекор қилишларини таъминласин;

1992 йил 1 апрелга қадар:

ногирон деб ҳисоблаш учун асослар рўйхатини ишлаб чиқсин;

ногиронларни ижтимоий ҳимоя қилиш республика жамғармасини ташкил этиш тўғрисида таклифлар тайёрласин;

1992 йил 1 июлгача қонуннинг 8, 9, 10 ва 12-моддаларида кўзда тутилган қоидаларнинг босқичма-босқич амалга киритиш тўғрисида таклифлар киритсин;

қуйидаги масалаларни:

саломатликни тиклаш марказларини ташкил этиш тартиби ва муддатларига, пул билан таъминлашга, уларнинг моддий-техникавий ва кадрлар таъминотига доир;

ногиронларнинг жамоат бирлашмаларига ихтисослаштирилган корхоналар барпо этиш ҳамда уларнинг моддий базасини мустаҳкамлашда ёрдам бериш ҳақидаги;

тиббий, касб ва ижтимоий жиҳатдан тиклаш бўйича мутахассислар, шу жумладан чет элда мутахассислар тайёрлаш ҳақидаги;

ногиронлар учун махсус иш жойлари яратиш ҳақидаги масалаларни ҳал этсин;

1992—1994 йилларда ижтимоий инфраструктура объектларини, биринчи навбатда транспорт воситалари ва коммуникацияларни, вокзал комплексларини, аэропортлар, шунингдек ногиронлар яшайдиган турар жой биноларини ногиронларнинг эҳтиёжларини ҳисобга олган ҳолда қайта жиҳозлаш чораларини кўрсин.