Хитой Халқ Республикасининг Раиси Ху Цзиньтаонинг Ўзбекистон Республикасига давлат ташрифи давомида (2004 йил 14—18 июнь) имзоланган Ўзбекистон Республикаси билан Хитой Халқ Республикаси ўртасидаги шериклик муносабатларини, дўстлик ва ҳамкорликни янада ривожлантириш ва мустаҳкамлаш тўғрисидаги қўшма декларация, икки томонлама ҳукуматлараро ва идоралараро битимлар, сиёсий, иқтисодий, ҳарбий-техник ва маданий-гуманитар ҳамкорликни ривожлантириш ҳақидаги эришилган аҳдлашувлар тўла кўламда ва ўз вақтида амалга оширилишини таъминлаш мақсадида Вазирлар Маҳкамаси қарор қилади:

1. Ташриф давомида имзоланган битимларни ва Хитой Халқ Республикаси билан икки томонлама сиёсий, иқтисодий, ҳарбий-техник ва маданий-гуманитар ҳамкорликни янада ривожлантиришга қаратилган эришилган аҳдлашувларни амалга ошириш бўйича тадбирлар режаси 1-иловага* мувофиқ тасдиқлансин.

2. Ўзбекистон Республикаси Иқтисодиёт вазирлиги, Молия вазирлиги ва Ташқи иқтисодий алоқалар агентлигининг:

Хитой Халқ Республикасининг Ўзбекистон Республикаси учун ажратилаётган грантлари ва кредитлари ҳисобига молиялаштириладиган 2-иловага* мувофиқ инвестиция лойиҳаларини тайёрлаш ва амалга ошириш;

Шанхай ҳамкорлик ташкилотига аъзо мамлакатларга берилаётган молиялаштириш доирасида ишлаб чиқилаётган 3-иловага* мувофиқ лойиҳалар рўйхати ҳақидаги таклифига розилик берилсин.

3. Ўзбекистон Республикаси Вазирлар Маҳкамаси ҳузуридаги Хорижий инвестициялар ва кредитлар масалалари бўйича идоралараро кенгаш (Р.Азимов):

ўн кун муддатда 2 ва 3-иловаларга мувофиқ инвестиция лойиҳаларининг техник-иқтисодий асосларини ишлаб чиқиш, экспертиза қилиш ва Идоралараро кенгаш мажлисларида тасдиқлаш жадвалини тасдиқласин;

Хитой Халқ Республикаси билан ҳамкорлик доирасида амалга ошириладиган инвестиция лойиҳаларини молиялаштиришнинг мақбул схемалари ишлаб чиқилишини ва, зарурият бўлганда, уларни қўшимча равишда молиялаштириш учун қўшимча ташқи қарз маблағлари жалб этиш масалалари ҳал этилишини таъминласин;

Хитой Халқ Республикасининг жалб этилаётган грантлари ва кредитлари ҳисобига янги инвестиция лойиҳаларини амалга ошириш юзасидан белгиланган тартибда таклифлар киритсин.

4. Ўзбекистон Республикаси Вазирлар Маҳкамасининг Ташқи иқтисодий алоқалар ва хорижий инвестициялар департаменти:

вазирликлар ва идораларнинг Хитой молия институтларининг кредит линиялари ва грант ёрдами доирасида молиялаштириладиган лойиҳаларни ишлаб чиқиш бўйича фаолияти мувофиқлаштирилишини, шунингдек уларнинг амалга оширилиши устидан мунтазам мониторинг олиб борилишини;

Ўзбекистон Республикаси Вазирлар Маҳкамасининг Комлекслари билан биргаликда барча зарур тартиботларнинг республиканинг ваколатли экспертиза органларида ва тижорат банкларида амалга оширилиши устидан қатъий назоратни;

қўшма лойиҳаларни амалга ошириш учун хитойлик потенциал етказиб берувчиларни иккала давлатнинг амалдаги қонун ҳужжатлари ҳисобга олинган ҳолда танлаб олиниши шартларини Хитой Халқ Республикасининг ваколатли идоралари билан келишиб олиш тартиб-қоидалари амалга оширилишини таъминласин.

5. Ўзбекистон Республикаси Вазирлар Маҳкамасининг Ижтимоий комплекси (А.Азизхўжаев) бир ой муддатда Ўзбекистон Республикаси билан Хитой ўртасида таълим, маданият ва илмий-техник алоқалар соҳасидаги ҳамкорликни ривожлантириш юзасидан тадбирлар режасини тайёрласин.

6. Савдо-иқтисодий ва илмий-техник ҳамкорлик бўйича Ўзбекистон-Хитой ҳукуматлараро комиссиясининг Ўзбекистонга оид қисмининг таркиби 4-иловага* мувофиқ тасдиқлансин.

7. Ўзбекистон Республикаси Ташқи ишлар вазирлиги, Ўзбекистон матбуот ва ахборот агентлиги, «Ўзтелерадио» компанияси, Ўзбекистон Миллий ахборот агентлиги эришилган аҳдлашувларнинг амалга оширилишини халқаро оммавий ахборот воситалари, шунингдек Интернет тармоғи каналлари орқали мунтазам равишда ёритсинлар.

8. Вазирлар Маҳкамасининг «Икки томонлама ҳукуматлараро ва идоралараро комиссиялар, қўмиталар ва кенгашлар таркибини тасдиқлаш тўғрисида» 1998 йил 14 декабрдаги 520-сон қарорига 16-илова ўз кучини йўқотган деб ҳисоблансин.

9. Мазкур қарорнинг бажарилишини назорат қилиш Ўзбекистон Республикасининг Бош вазири Ш.М.Мирзиёев зиммасига юклансин.