Ногиронларни ижтимоий муҳофаза қилиш тизимини янада такомиллаштириш, тиббий-ижтимоий ва касб бўйича соғломлаштириш самарадорлигини ошириш, уларнинг жамиятга интеграциялашувини кенгайтириш, эҳтиёжманд ногиронларни сифатли протез-ортопедия буюмлари билан таъминлаш ва тиббий-меҳнат экспертизаси хизмати самарадорлигини ошириш мақсадида Вазирлар Маҳкамаси қарор қилади:

1. Ўзбекистон Республикаси Меҳнат ва аҳолини ижтимоий муҳофаза қилиш вазирлиги, Иқтисодиёт вазирлиги, Молия вазирлиги ҳамда Соғлиқни сақлаш вазирлигининг Ногиронларни тиббий-ижтимоий ва касб бўйича соғломлаштириш миллий марказини ҳамда Таянч-ҳаракат қилиш тизими бузилган ногиронларни соғломлаштириш республика марказини бирлаштириш йўли билан Меҳнат ва аҳолини ижтимоий муҳофаза қилиш вазирлиги ҳузурида Ногиронларни соғломлаштириш ва протезлаш миллий марказини (кейинги ўринларда Марказ деб аталади) ташкил этиш тўғрисидаги таклифи қабул қилинсин.

2. Қуйидагилар Марказнинг асосий вазифалари этиб белгилансин:

ногиронларни тиббий, ижтимоий, касб бўйича реабилитация қилиш ва протезлаш;

ногиронлик, ногиронларни тиббий-ижтимоий ва касб бўйича реабилитация қилиш, протезлаш муаммолари бўйича чуқур илмий тадқиқотлар ўтказиш;

ногирон қиладиган асосий касалликларга чалинган ногиронларни реабилитация қилишнинг индивидуал дастурларини ишлаб чиқиш;

минтақавий марказлар фаолиятини мувофиқлаштириш;

ногиронликнинг ҳолати ва сабабларини тизимли асосда чуқур таҳлил қилиш, унинг олдини олиш бўйича илмий асосланган тавсияларни ишлаб чиқиш ва жорий этиш;

реабилитация қилиш марказлари ва даволаш-профилактика муассасалари билан биргаликда ногиронларни тиббий-ижтимоий ҳамда касб бўйича реабилитация қилиш чора-тадбирларини ишлаб чиқиш ва амалга ошириш;

ногиронларга фаол ҳаёт фаолияти, ўқиш ва меҳнат фаолияти имкониятини олишда кўмаклашиш.

санаторий-соғломлаштириш муассасалари билан биргаликда 1941 — 1945 йиллардаги уруш ва меҳнат фронти фахрийларини соғломлаштириш чора-тадбирларини ишлаб чиқиш ва амалга ошириш.

3. Марказнинг тузилмаси 1-иловага мувофиқ тасдиқлансин.

Ўзбекистон Республикаси Соғлиқни сақлаш вазирига Молия вазирлиги билан келишган ҳолда Марказ тузилмасига ўзгартиришлар киритиш ҳуқуқи берилсин.

4. Белгилаб қўйилсинки, Марказ:

Ногиронларни реабилитация қилиш ва протезлаш миллий марказининг ҳамда Таянч-ҳаракат қилиш тизими бузилган ногиронларни реабилитация қилиш республика марказининг ҳуқуқий вориси ҳисобланади;

ногиронликнинг ҳолати ва сабабларини тизимли асосда чуқур таҳлил қилиш, унинг олдини олиш бўйича илмий асосланган тавсияларни ишлаб чиқиш ва жорий этиш мақсадида тегишли вазирликлар, идоралардан ногиронлик масалалари бўйича зарур маълумотларни олиш ҳуқуқига эга.

1941 — 1945 йиллардаги уруш ва меҳнат фронти фахрийларини Соғлиқни сақлаш вазирлигига, Ўзбекистон Касаба уюшмалари Федерацияси Кенгашига ҳамда давлат ва хўжалик бошқаруви органларига қарашли санаторий-соғломлаштириш муассасаларида соғломлаштириш соҳасидаги фаолиятни ташкил қилади ва мувофиқлаштиради;

Марказ фаолияти қонун ҳужжатларида белгиланган тартибда республика бюджети маблағлари ҳисобидан молиялаштирилади.

5. Меҳнат ва аҳолини ижтимоий муҳофаза қилиш вазирлиги қонун ҳужжатларида белгиланган тартибда бир ой муддатда:

Марказ тўғрисидаги низомни ишлаб чиқсин ва тасдиқласин;

Ногиронларни тиббий-ижтимоий ва касб бўйича соғломлаштириш миллий маркази ҳамда Таянч-ҳаракат қилиш тизими бузилган ногиронларни соғломлаштириш республика марказининг асосий фондлари, товар-моддий захиралари ва бошқа бойликлари Марказ балансига берилиши-қабул қилиб олинишини таъминласин;

Марказнинг давлат рўйхатидан ўтказилишини таъминласин;

манфаатдор вазирликлар ва идораларни жалб қилган ҳолда қайта ташкил этилаётган марказлар ходимларини аттестациядан ўтказсин ҳамда Марказнинг юқори малакали ва тажрибали мутахассислар билан бутланишини таъминласин.

6. Ўзбекистон Республикаси Ҳукуматининг 2-иловага мувофиқ айрим қарорларига ўзгартиришлар киритилсин.

7. Мазкур қарорнинг бажарилишини назорат қилиш Ўзбекистон Республикаси Бош вазирининг ўринбосари Р.С. Азимов зиммасига юклансин.

1. Вазирлар Маҳкамасининг «Ўзбекистон Республикаси Меҳнат ва аҳолини ижтимоий муҳофаза қилиш вазирлиги фаолиятини ташкил этиш тўғрисида» 2001 йил 13 февралдаги 75-сон қарорига 1-иловада (Ўзбекистон Республикаси ҚТ, 2001 й., 2-сон, 11-модда) «Ногиронларни тиббий-ижтимоий ва касб бўйича соғломлаштириш миллий маркази ҳамда Таянч-ҳаракат қилиш тизими бузилган ногиронларни соғломлаштириш республика маркази» сўзлари «Ногиронларни соғломлаштириш ва протезлаш миллий маркази» сўзлари билан алмаштирилсин.

2. Вазирлар Маҳкамасининг «Ўзбекистон Республикаси Меҳнат ва аҳолини ижтимоий муҳофаза қилиш вазирлиги ҳамда Ташқи меҳнат миграцияси масалалари агентлиги тўғрисидаги низомларни тасдиқлаш ҳақида» 2001 йил 6 апрелдаги 162-сон қарорига 1-илованинг 14-бандида (Ўзбекистон Республикаси ҚТ, 2001 й., 4-сон, 21-модда):

бешинчи хатбоши қуйидаги таҳрирда баён қилинсин:

«Ногиронларни соғломлаштириш ва протезлаш миллий маркази»;

олтинчи хатбоши чиқариб ташлансин;

еттинчи—ўн иккинчи хатбоши тегишли равишда олтинчи—ўн биринчи хатбоши деб ҳисоблансин.