O‘zbekiston Respublikasi Oliy Kengashi qaror qiladi:

1. “Mehnatni muhofaza qilish to‘g‘risida”gi O‘zbekiston Respublikasi Qonuni e’lon qilingan paytdan boshlab amalga kiritilsin.

2. O‘zbekiston Respublikasi Vazirlar Mahkamasiga ikki oylik muddat ichida:

o‘z mehnat vazifalarini bajarish bilan bog‘liq tarzda shikastlangan yoxud sog‘liqlariga boshqa tarzda zarar yetgan ishchi va xizmatchilarga korxonalar, muassasalar va tashkilotlar tomonidan tovon to‘lashning tartibini va miqdorini belgilash;

O‘zbekiston Respublikasining qonun hujjatlarini “Mehnatni muhofaza qilish to‘g‘risida”gi O‘zbekiston Respublikasi Qonuniga muvofiq holga keltirish haqidagi O‘zbekiston Respublikasi Oliy Kengashiga takliflar taqdim etish;

O‘zbekiston Respublikasi Hukumatining qarorlarini “Mehnatni muhofaza qilish to‘g‘risida”gi O‘zbekiston Respublikasi Qonuniga muvofiq holga keltirish;

O‘zbekiston Respublikasi vazirliklari, davlat qo‘mitalari, idoralari, konsernlari va xo‘jalik boshqaruvining boshqa idoralari o‘zlarining ushbu Qonunga zid bo‘lgan me’yoriy hujjatlarini qayta ko‘rib chiqishlari va bekor qilishlarini ta’minlash topshirilsin.